ToParisi ai toSaduki merade bona i Yesu mobabei tanda kuasa
16
1 Lako ni se etu, basangkia toParisi ai toSaduki dongka si Yesu mampetandaka Ia ai pampekunera bona rasumbara kamasalaNa, raulikara, “Nubabeika kami tanda kuasa bona tongawa si kami kalako si Pue Alana Iko.”2 Nasonoi ni Yesu, “Ane ina malimpamo eo ai mawaga langi, niuli: ‘Marawa luwui raoa.’ 3 Ane madondo-dondo mawaga langi ai marimbongo raoa, niuli: ‘Luwui ina keuda.’ Niinsani mpuu mampekatandai raoa. Agaiana baria niinsani mampekatandai apa anu nababei ni Pue Ala i tempo ei-ei. 4 Komi anu tuwu ei-ei, madaa mpii komi! Baria komi matundu si Pue Ala. Mamperade komi tanda kuasa, agaiana baria ria tanda kuasa ntanina anu ina rapopeitaka komi. Ngkalina ngkida tanda kuasa ewa anu mewali si nabi Yunu ni banimpia.” Roo awetu, Napalengimo sira.
Patudu nu toParisi ai toSaduki rapandiri ewa ragi
5 Awetu dongka topeguru ni Yesu i sambali rano, lako rakaendorada kabariara mangkeni roti. 6 Ni tempo etu mbui, naulika sira ni Yesu, “Mainga-inga komi i ragi nu toParisi ai toSaduki!”
7 Agaiana topeguruNa baria rainsanira lempona pololitaNa etu, mewali mombekukuwi sira, raulira sadua ai sadua, “Nauli ni Guru ewa etu, lawi baria takaendo mangkeni roti.”
8 Agaiana nainsanida ni Yesu apa anu rauli nu topeguruNa, etumo mpane Naulika sira, “Mangkiada mpane nipololita liliu kabariami mangkeni roti? Makura mani pepotuumi si Aku! 9 Baria manipae niinsani lempona tanda kuasa anu Kubabei i tau wori? Bariapae nikaendo lima ogu roti anu Kupopopakoni sira tau anu lima nsobu? Ai sangkia bingka labina anu nigulu? 10 Adiwa mbui ai roti anu pitu oguna Kupakonika sira tau anu iba nsobu? Ai sangkia bingka mbui labina anu nigulu? 11 Mangkiada mpane baria niinsani kabariana roti anu Kutunggai? Mewali Kusolaki Kuuli: Mainga-inga komi i ragi nu toParisi ai toSaduki.”
12 Roo awetu, lako rainsanida nu topeguruNa kabariana ragi anu rapoporoti anu natunggai ni Yesu. Tunggaia nu pololitaNa, bona mainga-inga sira i patudu nu toParisi ai toSaduki.
I Peturu mopangaku ka i Yesuna Datu Topesorema
13 Laumo i Yesu ai topeguruNa i tana anu gompi i kota Kaisarea Pilipi. I se etu, i Yesu mekune i topeguruNa, “Mangula panguli nu tau wori, ima Ana Manusia etu?”
14 Mesono sira topeguruNa, “Ria anu manguli i Yohane Toperiu, ria mbui anu manguli i nabi Elia, anu ntanina mbui manguli i nabi Yeremia, ba sadua lako i nabi-nabi.”
15 Napekune mbuimo sira, Nauli, “Ane pesumbaa nu pekirimi, Aku ei, ima?”
16 Nasonoi ni Simo Peturu, “Ikomo Datu Topesorema, Ana ni Pue Ala anu tuwu duduuna i kasae-saeana.”
17 Nauli ni Yesu, “Simo ana ni Yunu, morasi mpuu iko, lawi baria manusia anu mampopainsanika iko etu, agaiana TuamaKuda anu i suruga. 18 Mewali, rasanga iko i Peturu, lempona ‘watu.’ Ai i wongko watu anu maroso ei, ina Kuwangu posintuwu nu ope-ope jumaaKu, ai kuasa nu kamate baria pensani monangi sira. 19 Ina Kukiraka iko pegili i peparentaa ni Pue Ala. Mewali, apa anu nuombo i dunia, etu mbui anu raombo i rara nu suruga. Ai apa anu nupaliu rababei i dunia, rapaliu mbui rababei i suruga.” 20 Roo awetu, Naombo mpii sira, nauli, “Inee mpuu niuli ba si ima ngkida ka Akuna Datu Topesorema.”
I Yesu mampololita kono i kamateNa
21 Mepuu lako ni se etu, napakanoto ni Yesu i topeguruNa apa anu sangangaa mewali i wotoNa. Nauli, “Sangangaa lau Aku i Yerusale, si dou ina rapopesiasi Aku nu totomana toYahudi, kapala-kapala tadulako menomba ai guru-guru agama. Ina rapopate Aku, agaiana i eo katolu, ina rapatuwu mpesola Aku.”
22 Agaiana nadii ni Peturu i Yesu i tumbirina mpane nakambaroka, nauli, “Inee awetu pololitaMu Pue! Manoto i Pue Ala baria ina mampopewali etu si Iko.”
23 Agaiana natalikuri ni Yesu i Peturu, mpane naulika, “Peloso! Pololitamu etu, pololita Datu nu Seta! Ba nupenoka mosomboki Aku, bona baria Aku mampeulai peundea nu TuamaKu? Pampekirimu etu pampekiri manusia, baria pampekiri ni Pue Ala.”
24 Roo awetu, naulika sira topeguruNa, “Ima anu mampenoka meula si Aku, inee mampeulai peundeana saduduana, mosimbu ia kau popakua ia, ai meula liliu si Aku. 25 Lawi ima anu napari-pari mampeparai katuwuna, katuwu malompe anu ria si ia ina matonto. Agaiana ima anu matonto katuwuna nakenimpeulana si Aku, iamo anu mansumba katuwu malompe. 26 Apa bunduna tau morompu ope-ope peawa dunia, ane baria kita mansumba katuwu malompe anu baria mokasopoa. Lawi baria ria anu pensani tapake montolosi katuwu malompe etu. 27 Bariamo masae Ana Manusia simbela-mbela ai malaeka-malaekaNa sira, ina mai lako i suruga ai peawa nu TuamaNa. I tempo etu, ina Nasurungi ope-ope tau sintoto ai babeiara. 28 Bona niinsani! Ria komi i se ei anu baria mamate lako baria mani mangita Ana Manusia dongka meparenta mewali Datu.”