I Yesu rapopeawa i tumu bulu
17
1 Aono eo lako ni se etu, i Yesu mangkeni tolu topeguruNa mempanai lau i tumu bulu anu mawane. TopeguruNa anu tolu etu iamo: i Peturu, i Yakobu ai i Yohane toi ni Yakobu, sira ngkida anu mamporangai i Yesu. 2 Tempora ria i se etu, tebalikimo lense ni Yesu. LioNa mewangka ewa eo, ai sampiNa mabula mengkila-ngkila. 3 Ungangkidamo topeguruNa mangita mbui sira rodua nabi anu mololita simbela-mbela ai i Yesu. Nabi anu rodua etu iamo: i Musa ai i Elia. 4 Mpane, nauli ni Peturu si Yesu, “Pue, masana mpuu kiepe i se ei. Ane Nuunde Pue, kubabei tolu ogu bambaru i se ei: saogu si Iko Pue, saogu si Musa ai saogu mbui si Elia.”5 Tongo mani ni Peturu mololita, ungangkidamo gawu anu mewangka mobalungkusi sira, ai raeperamo wotu anu manguli, “Ia eimo AnaKu anu Kupokakaia ai anu Kupokatono. Nipetingai pololitaNa!”
6 Awetu raepe nu topeguruNa wotu etu, molumba-lumba sira i tana lawi maruminsi kaekara. 7 Agaiana laumo i Yesu mogompilisi sira ai Napetui sira, mpane Naulika sira, “Peongko, inee komi maeka!” 8 Awetu metotoki sira, bariamo ria tau ntanina anu simbela-mbela ai sira, batena i Yesudamo. 9 Tongora mempandolu lako i tumu bulu etu, naombo sira ni Yesu, “Inee niuli-uli nauda ba si ima ngkida apa anu niita ni mpongone, lako baria mani Ana Manusia rapatuwu mpesola lako i kamate.”
10 Mekune sira topeguruNa, raulira, “Mawuli raraki. Mangkiada mpane rauli nu guru-guru agama, i nabi Elia sangangaa dongka ilodo, lako dongkada Datu Topesorema?”
11 Nasonoi ni Yesu, “Mamonso mpuu, i Elia sangangaa dongka ilodo, lawi ia anu mopatimama sinangkana. 12 Agaiana Kuulika komi, dongkamo i Elia, agaiana tau sira baria rainsanira ka iana. Rapopesiasi ia mangula peundeara. Ewa etu mbui Ana Manusia ina rapopesiasi mangula peundeara.” 13 Mewali, lako rainsanida nu topeguruNa lempona lolita ni Yesu ni mpongone: anu rapandiri ewa i nabi Elia iamo i Yohane Toperiu.
I Yesu mopakaosa anakoi anu napesuangi nu seta
14 I pesola ni Yesu ai topeguruNa anu tolu aretu, mampomberumpaka sira tau wori, dongkamo sadua tomoane anu mai molingkudu i lioNa, nauli, 15 “Pue, Nupokaasi kowo anaku. Mosaki madungka ia, ai paka malimpu ane dongka sakina. Mawori mbela ia madungka i rara apu, ai mawori mbela mbui ia madungka i rara ue. 16 Kukenimo ia i topeguruMu, agaiana baria rabukura mopakaosa.”
17 Nauli ni Yesu i topeguruNa, “Adiwada komi ei? Mangkiada mpane baria komi mepotuu ai baria nipeulai peundeaNa? Sangkia manidapae kasaena sangangaa simbela-mbela Aku ai komi? Sangkia mani kasaena sangangaa manoa Aku si komi? Keni mai anakoi etu!”
18 Lako i se etu, nakambaroka ni Yesu seta anu mopakasusa anakoi etu. Melosomo seta, ai maosa mpuumo ia.
19 Roo awetu, topeguruNa mai mampomberumpaka i Yesu i tempona saduduaNa, rapekunera si Ia, “Guru, mangkiada mpane baria kibuku mampopeloso seta etu?”
20 Nasonoi ni Yesu, “Lawi baria mani maroso pepotuumi. Kuulika komi: ane riamo pepotuumi nauda kokoi ngkida ewa ati nu tasinawu, ope-ope pensani mewali. Pensani komi mangulika bulu etu: ‘Pelimba lako i se etu!’ Ai batena melimba bulu etu, baria ria sampangka anu baria pensani nibabei. 21 [Agaiana seta anu ewa etu, pensani rapopeloso wule mekakae ai mopuasa.]”
Karombelana i Yesu mampololita kono i kamateNa
22 Tempona i Yesu ai topeguruNa terusu i Galilea, Naulika sira ni Yesu, “Bariamo masae Ana Manusia, ina rasusu i kuasa nu manusia. 23 Ina rapopate Ia, agaiana i eo katolu ina tuwu mpesola Ia.” Ni se etu, mapari mpiimo rara nu topeguruNa.
Pobaiari asele nu Tombi ni Pue Ala
24 Kadongka ni Yesu ai topeguruNa i kota Kapernaum, dongkamo sadua anu mampesingarai asele si Peturu ai mampekune, “Asele i Tombi ni Pue Ala, ba nabaiari mbui nu Gurumu, ba baria?”
25 Nasonoi ni Peturu, “Nabaiari!”
Lako ni se etu, awetu ina mesuamo i Simo Peturu i rara nu tombi peariara, baria mani ia mampaka mololita, ilodomo i Yesu mepekune, “Simo, adiwa pesumbaamu: ima anu sangangaa mobaiari asele si datu? Ba tau anu samboea ai ia, ba tosandarena anu nakuasai?”
26 Nasonoi ni Peturu, “Tosandarena anu nakuasai.”
Nauli ni Yesu, “Ane awetu, tau anu samboea ai ia baria paraluu mobaiari asele. 27 Agaiana nauda ewa etu, aginamo mobaiari kita, bona ntena makoi rarara si kita. Mewali, laumode i rano momeka. Nuala bau anu mpolinguruna numeka. Ina nusumba doi i rara ngangana, sukana sondo tapopobaiari aseleta rodua. Nuala doi etu, mpane nubaiarika kita asele nu Tombi ni Pue Ala.”