Ima anu mabose katuwuna i petotoki ni Pue Ala
18
1 I tempo etu, dongka sira topeguru ni Yesu mekune si Ia, raulira, “Pue, ima anu melumbu kabose nu katuwuna i rara peparentaa ni Pue Ala?”2 I Yesu moronde sadua anakoi, Napopeongko i liora, 3 mpane Naulika sira, “Kamonsona: ane baria nibaliki pangkeniakami mengkaiwoi ewa anakoi ei, baria komi ina mewali tau ni Pue Ala i rara nu peparentaaNa. 4 Ima anu mengkaiwoi ewa anakoi ei, iamo anu melumbu kabose nu katuwuna lako i ope-ope tau ni Pue Ala i rara peparentaaNa. 5 Ima anu modoko sadua tau ewa anakoi ei, simbelamo Aku anu nadoko.
6 Agaiana ima anu mopakanawu sadua lako i anakoi anu mepotuu si Aku, duduuna mobabei ia dosa, aginamo saogu watu mabose anu rapake mogili, rataka i tambolo nu tau etu rapopopakatiri ia i tasi. 7 Masurewu sira tau i dunia ei, lawi mawori tau anu rapakanawura duduura madosa. Batena ria pekelo anu mepakanawu, agaiana masurewu sira tau anu moparia pekelo aretu.
8 Mainga-inga komi bona inee komi madosa. Ane palemu sambali ba paamu sambali anu mangkeni iko madosa, nupuaki ngkimo mpane nutende. Aginamo sambali ngkida palemu ba paamu, mesua i peparentaa ni Pue Ala, mpanena rombali mani palemu ba paamu, agaiana kasopoana ratende iko i rara apu anu mambugi liliu. 9 Ai ane matamu sambali anu mangkeni iko madosa, nudungkiki ngkimo mpane nutende. Aginamo sambali ngkida matamu mewali tau ni Pue Ala i rara peparentaaNa, mpanena rombali matamu, agaiana kasopoana ratende iko i rara apu naraka.”
Ngkora pandiri kono i dimba anu matonto
10 “Mewali, mainga-inga mpuu komi. Inee nipakoi sadua lako i tau anu kokoi katuwura ewa anakoi ei. Kuulika komi: sadua-sadua sira, ria malaeka anu mokampai sira ai ria liliu sira si Pue Ala. 11 [Lawi tunggaia nu Ana Manusia mai i dunia bona mangkadelo tau anu matonto.]
12 Adiwa pesumbaami? Ane rapana, ria sadua tau anu sangatu mbaa dimbana, mpane matonto sambaa, apa anu ina nababei? Batena napalengi dimbana anu sasio mpulu sasio mbaa i mungku-mungkuna, mpane lau mangkadelo sambaa anu matonto etu. 13 Kuulika komi: ane nasumba mpesola dimbana etu, maruminsi katonona mampokatono dimbana anu sambaa etu, mpane dimbana anu sasio mpulu sasio mbaa anu baria sira matonto. 14 Ewa etu mbui Tuamami i suruga, baria Naunde ane ria sadua lako i anakoi ei matonto ai maropu.”
Apa anu tababei ane ria pokata anu masala si kita
15 “Ane ria pokamu sampepepotuu anu masala si iko, lau nupomberumpaka ia, mpane nuulika salana. Sangangaa nubabei etu bona ntena ria anu manginsani, batena komi roduami ngkida. Ane nadoko pololitamu, posintuwu mpesola komi. 16 Agaiana ane baria naunde mampeulai pololitamu, nukeni sadua ba rodua tau nuposabi. Lawi i rara Sura Ngkora Magali teuki ewa ei:
‘Ane ria tau anu rarai masala,
sangangaa ria rodua ba tolu dua tau anu mosabiki kamonsona kamasalana,
bona manoto kara-karana.’ (Pepopainga 19:15)
17 Ane baria naunde mampetingai lolita nu sabi etu, nupadongka i ope-ope pokami sampepepotuu i rara jumaa. Ane baria napotuu ope-ope pokami sampepepotuu mokambaroka ia, niimba ia ewa toperuru asele ai ewa tau anu baria manginsani i Pue Ala.
18 Bona niinsani: apa anu niombo i dunia, etu mbui anu raombo i suruga. Ai apa anu nipaliu rababei i dunia, rapaliu mbui i suruga. 19 Ai Kuulika mbui komi: ane ria komi rodua i dunia ei anu sintuwu mekakae mamperade ba apa ngkida, pekakaemi etu ina nasonoi nu TuamaKu i suruga. 20 Lawi imba tau mogulu nakeningka Akuna, nauda rodua ba tolu ngkida sira, Aku ria simbela-mbela ai sira.”
Ngkora pandiri kono i sadua tau anu baria moampuni rangana
21 Roo awetu, i Peturu mogompilisi i Yesu ai mekune si Ia, nauli, “Pue, ane pokaku sampepepotuu masala si aku, sangkia mbela ia sangangaa kuampuni? Ba pitu mbela?”
22 Nasonoi ni Yesu, “Baria wule pitu mbela. Agaiana bela-belana masala si iko sangangaa nuampuni liliu ia. 23 Lawi peparenta ni Pue Ala pensani rapandiri ewa sadua datu anu ina mourusi inda nu batuana. 24 Mpolinguruna, ria sadua batua anu moinda sansobu mpaena ia mobago lako pirida indana, rakeni ia i lio nu datu, 25 batua etu baria mpuu kowo nabuku mobaiari indana. Mewali, nasawaakamo nu datu, nauli: ‘Pobalu ngkimo batua etu ai anana ai towawinena ai ope-ope anu-anuna, bona tebaiari indana.’
26 Molingkudumo batua etu i lio nu datu, merade ampu, nauli: ‘Tua, manoa sala iko, ina kubaiari mboto kowo indaku!’ 27 Mewali, maasi rara nu datu etu i batua etu, mpane naparisi indana.
28 Laumo batua etu, mampomberumpaka sadua singka batuana anu moinda sangatu eona mobago lako pirida indana si ia. Kasaliu nasoko rangana etu, naleme mpane naulika: ‘Nubaiari ope-ope indamu!’
29 Molingkudumo rangana etu merade ampu, nauli: ‘Manoa sala iko, ina kubaiari mboto kowo indaku!’ 30 Agaiana baria nadoko pamperade nu rangana etu. Agaiana batena nakeni lau i topobotusi kara-kara bona ratarunggu duduuna nabaiari ope-ope indana.
31 Awetu raita nu batua anu ntanina apa anu mewali, wiora mpuu rarara. Laumo sira si datu mopadongka babeia nu batua etu. 32 Awetu naepe nu datura pololitara, natudumo tau lau moronde batua anu madaa babeiana etu. Kadongkana batua etu, naulika ia nu datu: ‘Madaa mpuu iko! Indamu kuparisimo, nakeningka nupesiasiina si aku. 33 Bariapae sangangaa maasi mbui iko i singka batuamu, ewa kamaasiku si iko?’ 34 Maruminsi mpuu kasodo nu datu etu ai bariamo ria kamaasina. Mewali batua anu madaa babeiana etu natarunggu duduuna napapiri ope-ope indana.” 35 Napasopo ni Yesu ngkora pandiri etu, Nauli, “Etu mbui anu ina nababeika komi nu TuamaKu i suruga, ane baria komi moampuni rangami lako i rarami.”