Ngkora pandiri kono i dimba anu matonto
15
1 Sambela tempo, mawori toperuru asele ai tau ntanina mai si Yesu, lawi raundera mampetingai pololitaNa. Tau aretu mangula pampekiri nu tau wori, tau anu madaa. 2 Ria mbui sira toParisi ai guru-guru agama anu mangita sira. Modeade sira, raulira, “Ae! Mosimada Ia ai tomadosa, ai mangkoni simbela-mbela sira!”3 Etumo mpane i Yesu mopadongka si sira ngkora pandiri ei, 4 Nauli, “Ane rapana sadua lako i olomi anu ria dimbana sangatu mbaa. Ane matonto sambaa, apa anu nababei? Batena napalengi dimba anu sasio mpulu sasio mbaa i pada, mpane lau ia mangkadelo sambaa anu matonto duduuna nasumba. 5 Ane nasumba mpesola, matono mpuu ia. Nakeningkatonona, natilundumo dimbana, mpane nakeni mpesola. 6 Roo awetu, narondemo simadana ai sintonggina, naulika sira, ‘Matono raraku, lawi dimbaku anu matonto kusumba mpesolamo, mewali taposusaimo.’ 7 Awetu mbui i suruga, ane sadua tau anu madosa menonso lako i dosana, melumbu katono ni Pue Ala mampokatono tau etu, mpane sasio mpulu sasio tau anu manoto anu baria paraluu menonso.”
Ngkora pandiri kono i doi anu matonto
8 Napaliliu ni Yesu pololitaNa ai ngkora pandiri ei, Nauli, “Ria sadua towawine anu mamboli sampulu mpeka doi pera. Ane matonto sampeka, apa anu nababei? Lau ia mosuwe sulo mpane mosapulengi tombina. Batena nakadelo duduuna nasumba. 9 Awetu nasumba, narondemo rangana ai sintonggina, nauli: ‘Matono mpuu aku, lawi kusumba mpesolamo doiku anu matonto, mewali taposusaimo.’ 10 Awetu mbui katono nu malaeka ni Pue Ala, lawi sadua tau anu madosa, anu menonso lako i dosana.”
Ngkora pandiri kono i anakoi anu matonto
11 Nauli mbui ni Yesu, “Pandirina, ria sadua tomana tomoane anu ria rodua anana, tomoane asa. 12 Anu torapotoi mangulika nu tuamana: ‘Uma, nukiraka aku tiboku lako i anu-anumu.’ Mewali, tuamara mogaa-gaamo anu-anuna i anana anu rodua etu.
13 Basangkia eona lako ni se etu, anana anu torapotoi mampobalumo kirana mpane lau i tana anu karao. I se etu, mopaope mbero ia doina ai babeia anu baria sintoto. 14 Awetu opemo doina, mewalimo tempo oro mabose i tana etu, etumo mpane mepuumo mesiasi katuwuna. 15 Mewali laumo ia mampedurei i sadua tumpu boea. Tumpu boea etu motudu ia mokampai boena. 16 Nakeningkaorona, napenoka kowo mangkoni pangkoni boe etu. Nauda awetu, baria ria sadua anu mokiraka ia pangkoni.
17 Kasopoana, mangkaendomo ia tuamana, ai nauli nu rarana: ‘Mogaloda topobago i tombi nu tuamaku, melabi-labi pangkonira, agaiana aku i se ei, ina mamate maoro aku. 18 Mewali, ina mesola aku lau i tuamaku, ai ina kuulika ia: Uma, madosamo aku si Pue Ala ai si Uma. 19 Bariamo aku sintoto nuronde anamu. Aginamo nuimba ngkimo aku batuamu.’ 20 Roo awetu, mesolamo ia lau i tuamana.
Karao mani lako i tombina, tuamana mangitamo anana. Nakeningkamaasina, melangkamo ia lau mampomberumpaka anana, nakalupui mpane naiki. 21 Nauli nu anana etu: ‘Uma, madosamo aku si Pue Ala ai si Uma. Bariamo aku sintoto nuronde anamu.’
22 Agaiana tuamana morondemo sira batuana, naulika sira: ‘Maliga komi mai! Nikeni mai sampi anu merae mpii mpane nibaduika ia. Ai niunsa sinsi i karawena, ai nikandupai ia. 23 Roo awetu, laumo komi mopakala ana japi anu marudu mpane nisambale. Ina mosusa kita mpane mangkoni i katono-tono! 24 Lawi anaku ei matemo ni banimpia, agaiana tuwu mpesolamo. Matonto ia ni banimpia, agaiana kusumba mpesolamo.’ Mewali mosusamo sira i katono-tono.
25 Ni tempo etu, anana anu torapowutu, ria i bonde. Pesolana lako i bonde, gompimo ia i tombina, mangepe ia wamba nu tulali ai topotaro. 26 Etumo mpane moronde ia sadua topobago nu tuamana, napekune, nauli, ‘Apa anu tongona rababei i tombi?’ 27 Nasonoi nu batua etu: ‘Toimu dongka mpesolamo! Tuamamu motudumo tau mosambale sambaa ana japi anu marudu, lawi anana anu matonto nasumba mpesolamo i rara kalompe-lompe.’
28 Masodo mpuu anana anu torapowutu etu, duduuna baria ia madota mesua i rara nu tombi. Mensuwu tuamana lau morerenasi ia bona mesua i rara nu tombi. 29 Agaiana, nauli: ‘I paenamo aku mobago si iko, Uma. Baria sambela kuewa parentamu. Nauda awetu, apa anu nubabeika aku? Mogaloda sambaa ana nu towau, baria mani ria anu nukiraka aku bona kubabei posusa simbela-mbela ai simadaku sira. 30 Anamu anu lako mesola etu motende mbero anu-anumu ai towawine sira anu mampobalu wotora, agaiana awetu ia mesola mai, nusambalekada ia ana nu japi anu marudu!’