I Yesu mopakaosa sadua tau madua
14
1 Sambela tempo i eo penombaa, i Yesu lau mangkoni i tombi nu sadua tadulako nu toParisi. Tongona i tombi etu, mawori toParisi ai guru-guru agama mokamata liliu i Yesu babila ria kamasalaNa rasumbara. 2 Ni tempo etu mbui, dongkamo sadua tau anu madua mangkawae. 3 Mekune i Yesu i guru-guru agama ai i toParisi anu ria ni se etu, Nauli, “Mangula atura agamata, ba pensani kita mopakaosa tau madua i eo penombaa, ba baria?”4 Guru-guru agama ai toParisi aretu, baria sira mesono. Mewali, Napatoromo ni Yesu tau anu madua etu, Napakaosa mpane Natudu mesola. 5 Roo awetu, Naulika sira, “Ane rapana ria anami ba japimi anu manawu i tibubu i eo penombaa, ba nipogeaka i rara nu tibubu? Ba nisore, nauda i eo penombaa?” 6 Agaiana baria ria sadua anu pebai mosonoi pampekune ni Yesu etu.
Sangangaa mengkaiwoi kita
7 I tombi nu toParisi etu, i Yesu mangita basangkia torare anu mampelisi pomesoa anu teadai. Etumo mpane i Yesu mopatudu sira ai ngkora pandiri ei, 8 Nauli, “Ane raronde iko lau i posusa pebua, inee iko momeso i pomesoa anu teadai. Molepae luwu ria tau ntanina anu raronde anu melumbu karaadaina mpane lako iko. 9 Ane awetu, tumpu nu susa ina mangulika iko, ewa ei: ‘Pelimba! Ia anu momeso i se ei.’ Ina maea iko melimba lau momeso i taliku. 10 Mewali, ane raronde iko lau i posusaa, aginamo momeso iko i taliku mpii, babila ina naulika iko tumpu nu susa, ‘Ane pensani momeso mbai i lio kita.’ Mewali, ina raadai iko i lio nu tau wori. 11 Ima anu mampemabose ina rapakoi, ai ima anu mengkakoi ina rapomabose.”
12 Roo awetu, i Yesu mololita i toParisi anu moronde Ia etu, Nauli, “Ane moronde iko tau mai i posusaamu, malompe tongo eo ba kawengi, inee iko moronde rangamu, poka wotomu, poka-pokamu, ai topebuku i rara nu boeamu. Lawi sira batena ina moronde mbui iko, ai apa anu nubabeika sira etu, ina rasurungira. 13 Agaiana ane moparia iko posusa, ronde sira tau anu mesiasi katuwura, anu baria masinokai wotora, tau anu mapalu, ai tau anu mabilo. 14 Ane awetu babeiamu, ina nawati iko ni Pue Ala, lawi baria rabuku nu tau aretu mosurungi babeiamu. Apa anu nubabei etu ina nasurungi ni Pue Ala, i tempora rapatuwu mpesola ope-ope tau anu mampeulai parenta ni Pue Ala.”
Ngkora pandiri kono i susa anu mabose
15 Tongora mangkoni, ria sadua torare anu mangepe lolita ni Yesu ni mpongone. Raulikara i Yesu, “Morasi mpuu tau anu ina mangkoni simbela-mbela ai i Pue Ala i rara peparentaNa.”
16 Agaiana nauli ni Yesu i tau etu, “Sambela tempo, ria sadua tau anu mobabei posusa anu mabose, ai mawori tau anu naronde. 17 Awetu matimamamo ope-ope, tumpu susa etu motudumo batuana lau mangulika sira tau anu rarondemo nauli: ‘Laumo kita mangkoni, lawi matimamamo ope-ope.’ 18 Agaiana ope-ope sira anu rarondemo, ria penggoliara mpane baria sira pensani lau i posusaana. Sadua tau anu mpolinguruna raronde manguli: ‘Lako roo aku mobaluki tana, mewali sangangaa lau sala kupeita. Merade asi aku, baria aku pensani lau.’ 19 Ria mbui sadua anu manguli: ‘Lako roo aku mobaluki lima mboko japi, mewali sangangaa lau sala sira kupopopajeko. Merade asi aku, baria aku pensani lau!’ 20 Ria mbui sadua anu manguli: ‘Lako roo aku rabua! Mewali, baria aku pensani lau.’
21 Pesola nu batuana etu, napadongka i tuana pesono nu tau sira anu rarondemo. Mewali maruminsi mpuu karumpuna tumpu susa etu, etumo mpane naulika batuana: ‘Lau iko maliga i dala anu mabose ai i penga-penga nu dala i kota. Nuronde mai ope-ope tau anu mesiasi katuwura, anu baria masilolonga wotora, anu mabilo, ai anu mapalu.’ Lau mpuumo nu batua etu mangula sawaa nu tuana.
22 Mesola mbuimo mai batuana etu, napololita i tuana: ‘Tua, parentamu kupopolumakomo, agaiana ria mani pearia anu mansoa.’
23 Etumo mpane tumpu susa etu mangulika batuana, nauli: ‘Lau mbuimo iko i raoa nu kota, bona nubambari posusa ei, malompe i dala anu mabose, awetu mbui i penga-penga dala. Sangangaa nuperade mpii si sira bona madota sira mai, bona tombiku mabuke tau. 24 Lawi mamonso mpuu Kuulika komi: Baria mogalo sadua tau anu Kurondemo mpolinguruna, ina mampemina pangkoniKu!’”
Mapari meula si Yesu
25 Sambela tempo, mawori tau meula si Yesu i rara polumakoaNa. Napembalilingi sira, mpane Nauli: 26 “Nipetingai: Ane ria tau anu naunde meula si Aku, agaiana melumbu pampokaasina tinana, tuamana, towawinena, anana sira, pokana sira, ba wotona saduduana, mpane lako pampokaasina Aku, baria ia pensani mewali topeguruKu. 27 Nipetingai: Ane ima anu baria madota mosimbu kau anu rapopombesape anu ina rapopakui ia, ai baria meula si Aku, baria pensani mewali topeguruKu.
28 Ane ria sadua lako i olomi anu naunde mowangu saogu solompio, sangangaa napepekiri nsalaa popobaiarina powangu nu solompio etu, ba ina sondo doina, ba baria. 29 Lawi ane lako napepuu mobabei watu pomesoa nu solompiona, agaiana opemo doina lako baria mani roo solompiona, ina rapapantawai ia nu ope-ope tau anu mangita. 30 Ina raulira: ‘Ae! Tau ei napepuumo mowangu solompio, agaiana baria sondo doina!’
31 Awetu mbui, ane ria sadua datu anu mangkeni surudadona anu sampulu nsobu ina mombeala ai sadua datu anu ria rompulu nsobu surudadona. Aginamo datu etu mampepekiri nsalaa, ba nabuku moewa iwalina ba baria. 32 Lawi ane nainsani kabariana nabuku moewa sira, aginamo i tempona karao mani sira iwalina, natudu tauna lau merade mombesingkalompe ai iwalina.”
33 Mewali napaliliu ni Yesu pololitaNa, nauli, “Ane baria niunde mopawia ope-ope anu ria si komi, baria komi pensani mewali topeguruKu.”
Bure anu matawoo