Menonso lako i dosa
13
1 Ni tempo etu, ria sira tau anu mopadongka si Yesu kono basangkia toGalilea anu napopate ni Pilatu, anu tongora mosusu binata rapopenombara si Pue Ala. 2 Awetu naepe ni Yesu pololitara, mololita Ia Nauli, “Nipenokami toGalilea aretu rapopate sira ewa etu, nakenimpelumbu nu dosara lako i rangara i Galilea? 3 Baria! Kuulika komi ane baria komi mampenonsoi dosami, ope-ope komi kamatemi mewulungati, ewa kamatera. 4 Ria mbui sampulu walu dua tau anu mamate lawi nadungkangi nu solompio gompi ue Siloam anu ria i Yerusale. Nipenokami kamatera etu mewali awetu, nakenimpelumbuna dosara lako i ope-ope tau ntanina i Yerusale? 5 Baria! Sambela mani komi Kuulika, ane baria komi mampenonsoi dosami, ope-ope komi kamatemi mewulungati, ewa kamate nu rangara i Yerusale.”Ngkora pandiri kono i sampuu kau ara anu baria mowua
6 Roo awetu, napaliliumo ni Yesu pololitaNa ai ngkora pandiri ei, Nauli, “Ria sadua tau anu motuda sampuu kau ara i bondena. Sambela tempo, laumo tumpu bonde mampeita babila ria wuana. Agaiana baria ria mogalo saogu wuana. 7 Etumo mpane nauli nu tumpu bonde etu, i topokadipuraka bondena: ‘I rarana tolu mpae, mai aku mampeita wua nu kau ei, agaiana baria mogalo saogu wuana anu kusumba. Mewali, nutowo ngkimo! Apa bunduna tuwu i se ei, ane baria mowua wule mampaope ntoo karudu nu tana.’
8 Agaiana nasonoi nu topokadipuraka bondena: ‘Tua, nupogeaka sala kau ei tuwu sampae mani. Ina kuwarasingi puuna, mpane kupambolii pupuk bona marudu. 9 Mole mowua mbotopae luwu, i pae mai. Ane baria mowua, lako kutowoda.’”
I Yesu mopakaosa sadua towawine anu mabungku i eo penombaa
10 Sambela tempo, i Yesu mepatudu i tombi penombaa, i eo penombaa. 11 I se etu, ria sadua towawine anu sampulu walu mpaemo madua, lawi napesuangi nu seta. Towawine etu mabungku, baria nabuku meongko togo. 12 Awetu naita ni Yesu towawine etu, Narondemo mai, ai awetu dongka towawine etu, Naulika, “Tina, maosamo iko lako i sakimu.” 13 Roo awetu, Napaga towawine etu. Mewali, ungangkidamo manoto bengona, meongkomo ia, mpane motoia i Pue Ala.
14 Agaiana ria ni se etu, sadua tadulako nu tombi penombaa anu masodo mangita i Yesu mopakaosa tau, i eo penombaa. Etumo mpane nauli i tau wori, “Aono eona, pensani kita mobago. I eo-eo etu, pensani komi mai mampopepakaosa, inee i eo penombaa!”
15 Nasonoi ia ni Yesu, “Komi, anu mengkalompe! I eo penombaa, ope-ope tau mopawia japira ai baulara lako i gimpura, mpane rakenira lau i raoa rapanginuira. 16 I se ei, ria sadua towawine pemulea ni Burahima. Sampulu walu mpaemo nasilu Datu nu Seta. Bariapae sintoto ane towawine ei rapawia lako i ka natakana Datu nu Seta, i eo penombaa?” 17 Lolita ni Yesu etu mopakaea sira iwaliNa, agaiana tau wori mampokatono ope-ope anu mewulii anu nababei ni Yesu etu.
Ngkora pandiri kono i ati nu tasinawu ai ragi
18 Napaliliu ni Yesu pololitaNa, Nauli, “Ane peparenta ni Pue Ala dongka i dunia, adiwa pewalina? 19 Pewalina ewa ngkora pandiri ei: Ria ati nu tasinawua anu naala nu sadua tau, mpane nasawuka i bondena. Ati nu tasinawu etu tuwu ai kalalaua mabose duduuna mewali sampuu kau. Dongkamo sira tosi mobabei dumura i daana.”
20 Nauli mbuimo ni Yesu sampangka ngkora pandiri i tau wori, “Peparenta ni Pue Ala, 21 ewa ragi anu naala nu sadua towawine, nagalo ai iba mpulu liter tampu, duduuna membongke ope-ope.”
Boboka anu magupi
22 I rara polumako ni Yesu lau i Yerusale, basangkia kota ai boea Napoliungi. Mopaguru Ia tau i kota ai i boea anu Napoliungi aretu. 23 Ria sadua tau anu mekune si Yesu, “Pue, saudi ngkidapae tau anu rasorema?”
Nasonoi ni Yesu, 24 “Anu rasorema, pensani rapandiri ewa tau anu mesua i boboka anu magupi. Sangangaa nipari-pari mesua i boboka anu magupi etu, lako tongona mani tebungkasi. 25 Lawi ane dongkamo tempona, boboka etu natuko nu tumpu tombi, mawori sira tau anu ina mampenoka mesua, agaiana bariamo sira pensani mesua. Mewali ane meongko mani komi i raoa, ina meronde komi merade bona boboka rabungkasika komi. Ina niuli, ‘Pue, bungkasika kowo kami boboka!’
Ina Nasonoi komi, ‘Baria komi Kuinsani, ai baria Kuinsani kalako imbami mai.’
26 Ina niulika Ia: ‘O Pue! Mangkoni ai manginu simbela-mbelamo kami ai Iko! Mepatudumo Iko i rara nu boeaki!’
27 Agaiana ina nasonoi komi nu tumpu tombi: ‘Baria Kuinsani kalako imbami mai. Ope-ope komi anu madaa babeiami, peloso komi lako i se ei.’
28 I tempomi mangita ulububumi ni banimpia ewa i Burahima, i Isaki ai i Yako, ai ope-ope nabi. Ina momeso sira matono-tono i rara peparenta ni Pue Ala. Agaiana komi ina ratende komi i rara nu pesukua anu baria mokasopoa. I se etu ina motumangi komi mantodisa liliu kapari. 29 Mawori tau anu ina dongka lako i pensibea eo ai i kalimpaa eo, ai lako mbai moure ai mbai monsau ai matono-tono sira ai momeso mangkoni simbela-mbela i rara peparenta ni Pue Ala. 30 Kasopoana, tau anu tepaitaliku ina mewali tepailodoka, ai tau anu tepailodoka ina mewali tepaitaliku.”
Masusa rara ni Yesu mampekiri toYerusale
31 Ni tempo etu, ria sira basangkia toParisi anu mai si Yesu, raulikara i Yesu, “Lambumo Iko lako i se ei, ai lau Iko i pearia ntanina, lawi ria tunggaia ni Herode mampopate Iko.”
32 Naulika sira ni Yesu, “Niulika topeakalangi etu ewa ei: Eo ei ai neile Kupopolumako mani bagoKu mampopeloso seta ai mopakaosa tau anu madua. Agaiana nepua, ina sopomo bagoKu. 33 Agaiana nauda awetu, sangangaa molumako liliu Aku i eo ei, i neile, ai nepua monontosi Yerusale. Lawi baria sintoto ane sadua nabi rapopate i raoa nu Yerusale.
34 ToYerusale, toYerusale! Komi mampopate nabi-nabi. Ai tau anu natudu ni Pue Ala si komi, niwatui sira. Mawori mbela Kuunde moona paleKu mokalupui komi ewa sambaa manu ntina anu motaoboki anana, agaiana baria niunde. 35 Bona niinsani: Ina napalengi komi ni Pue Ala! Monso mpuu anu Kuulika komi, bariamo Aku niita, duduuna dongka tempona, niuli: ‘Pue Ala mowati Ia anu mai i rara nu sangaNa!’”