Ngkora pandiri kono i toposawu
4
1 Sambela tempo, i Yesu mepatudu mbuimo i wiwi rano Galilea. Mawori mpuu tau terusu motoleliki Ia. Etumo mpane laumo i Yesu mensawi i duanga anu i wongko ue, ai momeso i rarana. Tau wori meongko sira i wiwi rano. 2 Maisi mpangkana anu Napatuduka sira i rara ngkora pandiri, Nauli, 3 “Nipetingai! Ria sadua tau anu lau mosawu. 4 Tongona mosawu, ria tinuda anu manawu i dala. Dongka sira tosi, motilo duduuna ope. 5 Ria mbui tinuda anu manawu i tana anu mowatu-watu, saudi ngkida tanana. Tinudana etu maliga mpuu tuwu, lawi manipi tanana. 6 Awetu keeo, malele duduuna bangi, lawi baria mandala rarina. 7 Ria mbui tinuda anu manawu i olo nu owo anu modui, mpane tuwu simbela-mbela ai owo anu modui etu. Agaiana owo anu modui etu kalalaua mobalungkusi tumbe nu tinuda etu, duduuna baria mowua ai mamate. 8 Ria mbui tinuda anu manawu i tana anu marudu. Tinuda etu, malompe katuwuna ai kalalaua mabose, duduuna mowua. Ria anu tolu mpulu mbela kaisi nu wuana lako i tinudana, ria anu aono mpulu mbela kaisi nu wuana lako i tinudana, ria mbui anu sangatu mbela kaisi nu wuana lako i tinudana.” 9 Roo Ia mopadongka ngkora pandiri etu, Naulika sira, “Malompe mpii ane nikaendo liliu, apa anu niepemo!”Apa puuna i Yesu mololita ai ngkora pandiri
10 Roo awetu, tempo ni Yesu mopatani, dongkamo topeguruNa anu sampulu rodua ai tau sira anu mangepemo patuduNa, mekune si Ia, “Apada lempona ngkora pandiri etu ni mpongone?”
11 Nauli ni Yesu, “Nakirakamo komi ni Pue Ala pekiri, mampelempoi patudu kono peparenta ni Pue Ala anu tewunikai mani. Agaiana i tau ntanina, Kupatudu sira mopake ngkora pandiri, 12 bona tepabukei anu teuki i rara nu Ngkora Magali, ewa ei:
‘Meita mboto sira, agaiana baria rainsanira lempona apa anu raitara.
Meepe mboto sira, agaiana baria rainsanira tunggaiana apa anu raepera.
Mewali, baria sira mesola si Pue Ala,
ai dosara baria teampuni.’” (Yesaya 6:9-10)
I Yesu mopakanotoka sira lempona ngkora pandiri kono i toposawu
13 Roo awetu, naulika sira ni Yesu, “Ane baria niinsani lempona ngkora pandiri ni mpongone, adiwa ka niinsanina lempona ngkora pandiri anu ntanina? 14 Toposawu iamo tau anu mopadongka Ngkora ni Pue Ala. 15 Ria sira tau anu pensani rapandiri ewa tinuda anu manawu i dala. Mangepe mpuu sira Ngkora ni Pue Ala, agaiana Datu nu Seta mopakawuli rarara, duduuna bariamo sira mopairara Ngkora etu.
16 Ria mbui sira tau anu pensani rapandiri ewa tinuda anu manawu i tana anu mowatu-watu. Awetu raepera Ngkora ni Pue Ala, kasaliu matono mpuu rarara. 17 Agaiana baria mandala porarina Ngkora ni Pue Ala etu i rarara, etumo mpane baria sira tetida. Ane rapopesiasi sira ba rapakapari nakenimpepotuura i Ngkora ni Pue, mewali bariamo sira mepotuu.
18 Ria mbui sira tau anu rapandiri ewa tinuda anu manawu i olo nu owo anu modui. Mangepe mpuu sira Ngkora ni Pue Ala, 19 agaiana wule mopairara liliu ngkida sira katuwura i rara dunia ei, ai mampenoka ngkida sira morompu peawa nu dunia, ai mawori mpangkana mani peundea nu pekirira. Etumo mpane bariamo ria pearia Ngkora ni Pue Ala i rarara, ai bariamo mobundu Ngkora etu i rara nu katuwura.
20 Ria mbui tau anu rapandiri ewa tinuda anu manawu i tana anu marudu. Awetu raepera Ngkora ni Pue Ala, kasaliu radokora mpane rapairarara. I tau aretu Ngkora ni Pue Ala mowua. Ria sira anu tolu mpulu mbela kaisi nu wuana lako i tinudana, ria sira anu aono mpulu mbela kaisi nu wuana, ria mbui sira anu sangatu mbela kaisi nu wuana lako i tinudana.”
Ngkora pandiri kono i sulo anu ratuko nu gumba
21 Nauli mbuimo ni Yesu, “Riapae tau anu mopatuwu sulo i rara nu tombina mpane natuko ai gumba, ba naboli i woi nu koina? Kamonsona sulo batena raboli i peariana bona pewangkana raita nu ope-ope tau i rara nu tombi. 22 Ewa etu mbui ope-ope patuduKu anu tewuni mani ina tewungkesi. Ai ope-ope anu rawunikai mani batena ina tongawa. 23 Malompe mpii ane nikaendo liliu, apa anu niepemo!”
24 Nauli mbui ni Yesu, “Nipairara apa anu niepe ei. Lawi pesoka anu nipake mosoka tau ntanina, etu mbui anu ina napoposoka komi ni Pue Ala, ai melumbu mani karasokami. 25 Mewali tau anu nakariangi, i Pue Ala kalalaua motambai apa anu ria si ia. Agaiana tau anu baria ria apa-apana, nauda ba apa ngkida anu ria si ia batena Nadoa mpesola.”
Pandiri kono i tinuda anu tuwu
26 Nauli ni Yesu, “Ane dongkamo peparenta ni Pue Ala i dunia, pensani rapandiri ewa ei: sadua tau lau motudai bondena. 27 Malompe madedi ba mabaa, malompe i tempona maturu ba i tempona mengkawangu, tinudana tuwu liliu. Agaiana ba adiwa katuwuna tinudana aretu duduuna mabose, baria nainsani. 28 Lako i tana, tinuda moparia wuana. Mpolinguruna tawena ai kauna anu mensuwu, lako ni se etu mowuamo, duduuna moisi. 29 Ane mamongkomo wua nu tinuda etu, laumo tumpuna mosombe, lawi temponamo rapepae.”*
Ngkora pandiri kono i tasinawu
30 Nauli ni Yesu, “Ane peparenta ni Pue Ala dongka i dunia, adiwa ka tapopontanina? Pandiri apa anu tapake mopakanoto? 31 Peparenta ni Pue Ala ewa ati nu tasinawua i rara nu ngkora pandiri ei: Ria sadua tau anu mosawu ati nu tasinawu i bonde. Ati nu tasinawu etu manete mpii, melumbu kakokoina lako i ope-ope ati nu pinambula anu tuwu i dunia ei. 32 Agaiana ane rasawu mpane tuwu, melumbu kawanena mpane lako i pinambula ntanina. Daana maisi ai mabumbu tawena, etumo mpane pensani rapodumui nu tosi ai rapeongaira.”
33 Ewa etumo i Yesu mopatudu tau ai maisi ngkora pandiri, ane mopadongka Ia Ngkora ni Pue Ala. Napatudu sira mangula karabukura manginsani lempona. 34 Baria ria anu Napatuduka sira ane baria ai ngkora pandiri. Agaiana ane tempona Iadamo ai topeguruNa sira, lako Napakanotokada sira lempona ngkora pandiri aretu.
I Yesu mopakalene pambui mabose
35 Awetu marembemo eo, nauli ni Yesu i topeguruNa, “Laumo kita i sambuteka rano.” 36 Mewali, mangokamo sira mopalengi tau wori anu i wiwi nu rano. Ria mbui topoduanga ntanina i se etu anu meula.
37 Baria masae lako ni se etu, dongkamo pambui mabose. Duangara narumpa nu balumba, duduuna duangara mepuumo napesuangi nu ue. 38 Ni tempo etu, i Yesu tongona maleta mbai i wuntu nu duanga, mopake longa. TopeguruNa lau molike, raulikara, “Guru! Mangkiada mpane leta ngkida Iko? Ina masurewu kita!”
39 Mengkawangu Ia, kasaliu Nakambaroka pambui ai balumba, Nauli, “Pengkaroo! Kalenemode!” Mengkaroo mpuumo pambui, ai ungangkidamo rano etu malene mpii. 40 Roo awetu, naulika ni Yesu topeguruNa, “Mangkiada mpane maeka komi? Mangkiada mpane baria Aku nipotuu?”
41 Agaiana batena maeka mpuu sira topeguruNa, etumo mpane mololita sira, raulira sadua ai sadua, “Tau anu adiwada ei, mogalo pambui ai balumba mampeulai sawaaNa?”