I Yesu mopakaosa sadua tau anu ketangga
8
1 Pendolu ni Yesu lako i mungkuna, mawori tau meula si Ia. 2 Ni tempo etu, maimo sadua tau anu ketangga molingkudu motumpa i lio ni Yesu, nauli, “Tua, kuinsani ka Nubukuna mopakaosa aku. Ane Nuunde, pakaosa kowo aku!”3 Napatoro ni Yesu tau etu, Naulika, “Kuunde, kaosamode!” Ni tempo etu ngkimo, maosamo tau etu. 4 Roo awetu, nauli mbui ni Yesu si ia, “Inee nupololita si ima ngkida apa anu mewali ni mpongone. Laumode nupopeitaka wotomu i tadulako menomba bona napakanoto kamaosamumo, ai nukeni popenombamu mangula sawaa anu teuki i rara Atura ni Musa, bona tongawa i ope-ope tau kamaosamumo.”
I Yesu mopakaosa sadua batua nu tadulako surudado nu toRoma
5 Pesua ni Yesu i kota Kapernaum, dongkamo sadua tadulako nu surudado toRoma mampomberumpaka i Yesu, mpane merade tulungi, 6 nauli, “Tua, batuaku anu ria i tombi, baria nabuku mampopokale wotona, ai maruminsi pantodisana nakeningkamaduana naepe.”
7 Nauli ni Yesu, “Ina lau Aku mopakaosa ia.”
8 Nasonoi nu tadulako surudado etu, “Tua, baria aku sintoto modoko Iko i tombiku. Nauda santepo ngkida pololitaMu Nuuli, batena maosa batuaku. 9 Ewa aku ei, ria toiwongkoku ai ria mbui toiwoiku. Ane kuposawaaka sadua surudadoku, kuulika: ‘Lau iko!’ Sangangaa lau ia. Ane kuronde surudadoku anu ntanina: ‘Mai iko!’ Sangangaa mai ia. Ane kuulika batuaku: ‘Babei etu!’ Sangangaa nababei.”
10 Napowuli ni Yesu mampetingai pololita nu tadulako surudado etu. Etumo mpane Napembalilingimo sira tau anu meula si Ia, Nauli, “Mabose mpii pepotuu nu tau ei! I toSaraeli sira, baria mani ria mogalo sadua Kusumba anu mabose pepotuuna ewa tau anu baria toYahudi ei. 11 Bona niinsani, mawori tau anu baria sira toYahudi dongka lako i pensibea eo ai lako i kalimpaa eo, momeso sira ai mangkoni matono-tono simbela-mbela ai i Burahima, i Isaki ai i Yako, ulububu nu toYahudi i tempona i Pue Ala mepuu meparenta i dunia anu bou luwu, 12 kamonsona toYahudida anu sintoto mewali tau ni Pue Ala i rara peparentaaNa, agaiana sirada anu ratende i rara nu kadediana. I se etu, ina motumangi sira ai mantodisa liliu kapari.” 13 Roo awetu, nauli ni Yesu i tadulako nu surudado etu, “Pesolamode, apa anu nupotuu etu ina mewali.” Ni tempo etu ngkimo, maosa mpuumo batuana anu madua i tombina.
I Yesu mopakaosa pomaniana ni Peturu
14 Roo awetu, i Yesu lau i tombi ni Peturu. I se etu, Naita pomaniana woto ni Peturu anu towawine maturu i paturuana lawi napawembe. 15 I ka Napatoro ni Yesu pale nu towawine etu, kasaliu maosa ia. Lako ni se etu, mengkawangumo ia mpane morora i Yesu.
Mawori tau napakaosa ni Yesu
16 Awetu malimpamo eo, mawori tau anu napesuangi nu seta rakeni si Yesu. Seta aretu napopeloso ni Yesu ai pololitaNa ngkida, ai Napakaosa mbui sira tau ntanina anu madua. 17 Ope-ope anu nababei ni Yesu etu, mopabukeimo lolita ni nabi Yesaya anu manguli:
“Iamo anu mokolo pantodisata
ai mopakaosa sakita.” (Yesaya 53:4)
Tau anu mampenoka meula si Yesu
18 Sambela tempo, awetu naita ni Yesu mawori mpuu tau anu mai motoleliki Ia, Nabawai sira topeguruNa malambu lau i sambuteka rano. 19 Ni tempo etu, lako baria mani sira mangoka, ria sadua guru agama toYahudi anu mai si Yesu, nauli, “Guru, imba ngkida kalauaaMu, kupenoka meula si Guru!”
20 Nasonoi ni Yesu, Nauli, “Serigala ria kalolura ai tosi ria dumura, agaiana Ana Manusia mogaloda pearia anu Napodampai wooNa, baria ria.”
21 Roo awetu, ria mbui sadua topeguruNa anu ntanina, manguli, “Pue, Nupaliu sala aku lau mopaiwu tuamaku.”
22 Agaiana nauli ni Yesu si ia, “Peulamode si Aku! Pogeaka sira tomate mopaiwu singka tomatera.”a
I Yesu mampopengkaroo pambui anu mabose
23 Roo awetu, mensawimo i Yesu i rara nu duanga simbela-mbela ai topeguruNa anu sampulu rodua, mpane mangokamo sira. 24 Ungangkidamo kepambui maruminsi i rano, duduuna balumba mabose morumpa duangara. Ni tempo etu, i Yesu tongona leta. 25 TopeguruNa lau molike Ia, raulikara, “Pue! Tulungi! Ina masurewu kita!”
26 Naulika sira ni Yesu, “Mangkiada mpane maeka komi? Komi ei baria gaga maroso pepotuumi.” Mengkawangumo i Yesu mpane kasaliu mokambaroka pambui ai balumba i rano. Ungangkidamo rano etu malene mpii.
27 Rapowuli mpuu nu topeguruNa, raulira, “Tau anu adiwada ei, mpane pambui ai balumba mampeulai sawaaNa!”
I Yesu mopakaosa rodua tau anu napesuangi nu seta
28 Awetu sira dongka i tana Gadara i sambuteka rano, maimo sira rodua tau anu napesuangi nu seta mampomberumpaka i Yesu. Tau aretu lako i talumba mai, lawi meari sira i se etu. Tau anu rodua aretu maruminsi kasekera, etumo mpane bariamo ria tau anu pebai moliu i se etu. 29 Tau anu napesuangi nu seta aretu monganga-nganga sira, raulira, “Ana ni Pue Ala! Mangkiada mpane mai Iko? Ba ina Nupopantodisa kami, lako baria mani dongka tempo anu napakanoto ni Pue Ala?”
30 Baria karao lako i se etu, ria sira boe sangguruma tongora mansui. 31 Seta-seta anu mampesuangi tau aretu raperadera mpii si Yesu, raulira, “Ane sangangaa Nupopeloso kami lako i se ei, Nutudu kami mesua i boe aretu.”
32 Nauli ni Yesu, “Laumode komi!” Meloso mpuumo sira seta aretu kasaliu mesua i boe. Mewali boe aretu, melangka sira duduura manawu i rano, mamate sira malinso.
33 Tau anu mokampai boe aretu, melangkamo sira lau i kota mopadongka apa anu mewali i boera ai apa anu mewali i rodua tau anu napesuangi nu seta aretu. 34 Etumo mpane tau anu lako i kota moguguruma sira lau mampomberumpaka ai Yesu. Awetu sira momberumpa ai i Yesu, raperadera mpii bona i Yesu sangangaa malambu lako i kotara.