Inee komi mosalai tau ntanina
7
1 “Inee komi mosalai tau ntanina bona ntena mbui komi nasalai ni Pue Ala. 2 Lawi pesoka anu nipake mosoka tau ntanina, etu mbui anu ina rapoposoka komi. Lempona, adiwa pesalaimi i tau ntanina, ewa etu mbui pesalai ni Pue Ala si komi.3 Mangkiada mpane nipeita parupu i rara mata nu rangami, molentano rangka nu kau anu ria i rara nu matami baria niita? 4 Adiwa mpane pensani komi mangulika rangami: ‘Mai kulaliki parupu i matamu,’ molentano ria mani rangka nu kau i matami. 5 Komi anu mengkalompe! Sangangaa nilaliki nsalaa rangka nu kau anu ria i matami, lako mabaada petotokimi molaliki parupu i mata nu rangami.
6 Parewa anu magali anu ria i tombi penombaa, inee nikiraka dike, kasopoana napenggolii komi nakiki. Inee komi mokiraka mutiara i boe lawi ina nalongko-longko mbero ngkida.”a
Pekakae si Pue Ala
7 “Perademode si Pue Ala, batena Nakiraka komi. Kadelomode apa anu nipobilala, batena nisumba. Tangkudodoomode boboka, batena Nabungkasika komi. 8 Lawi ima anu merade ina rakiraka. Ima anu mangkadelo ina mansumba. Ima anu motangkudodoo boboka ina rabungkasika.
9 Riapae lako i olomi anu mokiraka watu i anami, ane merade sira roti? 10 Ba mokiraka ule ane merade sira bau? Baria! 11 Mogalo komi tau anu madaa, niinsani mani mokiraka apa anu malompe i anami, apa mani Tuamami anu ria i suruga, batena ina mokiraka apa anu malompe i tau anu merade si Ia.”
Dala anu manoto
12 “I pangka-pangkana, apa anu niunde rababeika komi nu tau ntanina, etu mbui anu sangangaa nibabeika sira. Etumo puu nu Atura ni Musa ai patudu nu nabi-nabi.
13-14 Boboka ai dala anu monontosi naraka maemba, etumo mpane mawori tau anu mangula dala etu. Agaiana boboka ai dala anu monontosi katuwu malompe, mapari ai magupi, etumo mpane saudi ngkida tau anu mansumba boboka etu. Mewali pesuamode komi mampoliungi boboka anu magupi etu.”
Nabi-nabi anu mepakanawu tongawa i babeiara
15 “Mainga-inga komi i nabi-nabi anu mepakanawu. Ina dongka sira si komi ewa dimba, molentano kamonsona ewa serigala anu masekeda sira. 16 Ane niita babeiara, ina niinsani kamonsona sira aretu nabi-nabi anu mepakanawu. Anggoro baria rapupu lako i walaa anu modui. Wua ara baria rapupu lako i owo anu modui. 17 Awetu mbui kau anu marudu, malompe powuana. Kau anu madusu, baria malompe powuana. 18 Baria ria kau anu malompe anu madaa wuana, ai baria ria kau anu madaa anu malompe wuana. 19 Kau anu baria malompe powuana, ina ratowo mpane ratende i rara nu apu. 20 Mewali ane niita babeiara, ina niinsani kamonsona sira aretu nabi-nabi anu mepakanawu.
21 Baria ope-ope tau anu moronde Aku ‘Pue, Pue!’ anu ina mesua i rara peparenta nu TuamaKu anu i suruga. Batena ngkida tau anu mobabei peundea nu TuamaKu anu ina mesua i rara nu peparentaNa. 22 Agaiana i eo pobotusi kasopoa dunia, mawori tau ina moronde Aku: ‘Pue! Pue! Bariapae Nuinsani ka kamina anu mopadongka NgkoraMu i rara nu sangaMu! Mampopeloso kami seta i rara nu sangaMu. Ai maisi mbui tanda kuasa anu kibabei i rara nu sangaMu.’
23 Agaiana ina Kusonoi sira: ‘Baria sambela komi Kuinsani! Peloso komi lako i se ei, komi anu madaa babeiami.’”
Ngkora pandiri kono i rodua tau anu mowangu tombi
24 “Ima ngkida anu mangepe pololitaKu mpane napeulai, simbela ewa sadua tau anu matopa, anu mowangu tombina i wongko watu. 25 Sambela tempo, toa uda, meumbalamo ue, mpane pambui anu marimbuku morumpa tombi etu, agaiana tombi etu baria mapoka, lawi rawangu i wongko watu.
26 Agaiana tau anu mangepe pololitaKu mpane baria napeulai, simbela ewa sadua tau anu madoio, anu mowangu tombina i wongko wungi. 27 Sambela tempo toamo uda, meumbalamo ue, mpane pambui anu marimbuku morumpa tombi etu, mewali tombi etu kasaliu mapoka ai marupu.”