I Yesu mopaguru topeguruNa kono i pekakae
11
1 Sambela tempo, i Yesu lau mekakae. Awetu roomo Ia mekakae, sadua topeguruNa manguli, “Tua, Nupaguru kowo kami mekakae, ewa i Yohane Toperiu mopatudu mbui nu topeguruna sira.”2 Naulika sira ni Yesu, “Ane mekakae komi, niuli ewa ei:
Tuamaki, kitoia sangaMu.
Patongawamode peparentaMu i dunia.
3 Kiraka kami pangkoniki anu sondo i eo ei.
4 Ampunimode kami i kamasalaki, ewa poampuniki tau anu masala si kami.
Inee kami Nupogeaka rakelo.”
5 Naulika mbui sira ni Yesu, “Pandirina, ane ria sadua lako i olomi anu lau i rangana i tongo mbengi, mpane nauli: ‘Poka, nukiraka kowo aku tolu ogu roti, 6 lawi ria torareku anu lako dongka, baria ria apa-apa anu ina kukiraka ia.’ 7 Agaiana mesono pokana, nauli: ‘Inee aku nusalempori. Tebensulemo bobokaku, aku ai anaku maturumo kami. Baria aku pensani mengkawangu. Baria ria apa-apa anu ina kukiraka iko.’
8 Mewali adiwamo? Nauda ia rangamu, baria naunde mengkawangu ai mokiraka iko ba apa-apa. Agaiana ane baria iko maea mamperade liliu, kasopoana ia ina mengkawangu ai mokiraka iko apa anu nuparaluu. 9 Mewali Kuulika komi: Perademode si Pue Ala, batena Nakiraka komi. Kadelomode apa anu nipobilala, batena nisumba. Tangkudodoomode boboka, batena Nabungkasika komi. 10 Lawi ima anu merade ina rakiraka. Ima anu mangkadelo ina mansumba. Ima anu motangkudodoo boboka ina rabungkasika. 11 I olomi, riapae komi anu mokiraka ule i anami, ane anami merade bau? 12 Ba mokiraka kalajengking i anami ane merade teme? Baria! 13 Naudapae komi tau anu madaa, niinsani mani mokiraka apa anu malompe i anami. Apa mani Tuamami anu ria i suruga, batena ina mokiraka Inosa Magali i tau anu merade si Ia.”
I Yesu ai i Beelsebul
14 Sambela tempo i Yesu mampopeloso seta lako i sadua tau anu baria nainsani mololita. Awetu seta etu meloso, tau etu mepuumo mololita. Mawori tau anu mampowuli. 15 Agaiana ria mbui sira tau anu manguli, “KuasaNa etu lako si Beelsebul datu nu ope-ope seta. Etumo mpane pensani Ia mampopeloso seta.”
16 Ria mbui sira anu mampetandaka i Yesu bona rasumbara kamasalaNa. Merade sira si Yesu bona Napopeitaka sira tanda kuasa bona tongawa kalako si Pue Alana Ia. 17 Agaiana nainsani ni Yesu apa anu ria i rarara. Etumo mpane Naulika sira, “Ane ria sambua kadatua, ai tau wori i rara kadatua etu mosisala liliu sira ai mombeewa, kadatua etu ina magero. Ane tau santina paka mogaa-gaa ai mosisala, ina marugi posintuwura tina etu. 18 Awetu mbui i kadatua nu Seta. Niuli, mampopeloso Aku seta ai kuasa lako si Beelsebul, datu nu ope-ope seta. Agaiana ane Datu nu Seta moewa singka setana, batena ina magero kadatuana. 19 Niuli mampopeloso Aku seta ai kuasa lako si Beelsebul datu nu ope-ope seta. Mewali ane awetu, kuasa apa anu rapake nu topeulami aretu mampopeloso seta? Lako i babeia nu topeulami aretu, tongawamo kabariana mamonso peraimi etu. 20 PampopelosoKu seta ai kuasa ni Pue Ala, etumo anu mopakanoto kadongkanamo peparenta ni Pue Ala i olomi.
21 Ane ria sadua tau anu maroso, ai timama ia ai sinangka parewana mombeala mokampai tombina, ope-ope anu-anuna baria ina mangkia-ngkia. 22 Agaiana ane ria sadua anu melumbu karosona, lau motungka tumpu tombi etu, mpane nanangi tumpu tombi etu, mewali tau etu ina morampaki ope-ope parewa pombeala anu naporoso nu tumpu tombi etu, mewali ope-ope anu-anuna natibo-tiboka tau.
23 Ima anu baria simbela-mbela ai Aku, iamo iwaliKu. Ima anu baria motulungi Aku mangkeni tau mewali tau ni Pue Ala, iamo anu mangkeni tau karao lako si Pue Ala.”
Seta anu mesola mpesola
24 “Ane seta mopalengi sadua tau, seta etu molulumako i pada lori, mangkadelo ia pearia napengkaroongi sampalai, agaiana baria ria nasumba. Etumo mpane nauli: ‘Ina mesola aku i tombi anu kupearii ni banimpia, iamo tau anu kupalengimo.’ 25 Mesolamo ia lau i tau anu napalengi ni banimpia, naita tau etu ewa tombi anu maningku karasapulengina ai tekadipuraka lompe. 26 Etumo mpane laumo ia moronde pitu seta anu singka setana anu melumbu kamadaara lako si ia. Laumo sira mesua i tau anu napalengimo ni banimpia, mpane mearimo sira i se etu. Kasopoana, tetambaimo pesiasi nu tau etu lako i mpolinguruna.”
Ima anu matono
27 Awetu roomo i Yesu mololita awetu, ria sadua towawine i olo nu tau wori anu mangulika Ia, “Matono mpuu towawine anu mampoanaka Iko ai anu mopasusu Iko!”
28 Agaiana nasonoi ni Yesu, Nauli, “Anu matono iamo tau anu mampetingai ai mampeulai sira Ngkora ni Pue Ala.”
Tanda nabi Yunu
29 Tongora tau wori motoleliki i Yesu, Napapulomo pololitaNa si sira, Nauli, “Madaa mpii komi anu tuwu i tempo ei, merade bona Kupopeitaka komi tanda kuasa. Agaiana baria ria tanda kuasa anu ina rapopeitaka komi. Anu ina rapopeitaka komi, batena ngkida tanda ewa anu mewali si nabi Yunu ni banimpia. 30 Banimpia i Yunu mewali tanda i tumpu kota Niniwe. Awetu mbui Ana Manusia ina mewali tanda i tau anu tuwu ei-ei. 31 I eo pobotusi kasopoa dunia, datu towawine lako mbai monsau ina rapatuwu mpesola simbela-mbela ai komi anu tuwu ei-ei, ai ia ina mopakanoto kamasalami. Lawi datu towawine etu dongka lako i tanana anu karao, naunde mampetingai pepatudu ni Datu Salomo. Agaiana riamo i olomi anu meliu kabose nu katuwuNa lako si Salomo, agaiana baria nipotuu pololitaNa. 32 Awetu mbui i eo pobotusi kasopoa dunia, tumpu kota Niniwe ina rapatuwu mpesola simbela-mbela ai komi anu tuwu ei-ei, ai sira ina motudoka komi salami, lawi menonsomo sira lako i dosara i pampetingaira lolita ni nabi Yunu. Agaiana ei-ei, riamo i olomi anu meliu kabose nu katuwuNa mpane i nabi Yunu, agaiana baria nipotuu pololitaNa.”
Pewangka ai kamadedi
33 “Baria ria sadua tau anu mosuwe sulo mpane nawuni ba natuko ai gumba. Agaiana sulo batena naboli i peariana bona pewangkana raita nu ope-ope tau anu mesua. 34 Matamu iamo sulo nu wotomu, lawi ane malompe matamu, mabaa mbui wotomu. Agaiana ane mawurau matamu, madedi mpii wotomu. 35 Awetu mbui ai iko. Sangangaa nupakalompe-lompe, bona anu napakabaa ni Pue Ala inee nupakadedi. 36 Ane mabaa raramu lawi nasimbaki pewangka ni Pue Ala duduuna bariamo ria anu madedi, ina mabaa mbui ope-ope katuwumu ewa apa anu nawangkasi nu sulo.”
I Yesu mosalai toParisi ai guru-guru agama
37 Awetu i Yesu roomo mololita, ria sadua toParisi anu moronde Ia lau mangkoni i tombina. Lau mpuumo Ia mangkoni. 38 Tingkaramo toParisi etu mangita i Yesu mangkonimo, agaiana baria mani Ia memando mangula ada agamara. 39 Etumo mpane nauli ni Yesu, “Komi toParisi ewa sadua tau anu mobakosi panginua ai tabo wule i raoana ngkida. Agaiana i rarami mampokailu komi anu-anu nu rangami ai madaa mpuu komi. 40 Madoio mpuu komi! Baria wotota ngkida anu napopewali ni Pue Ala. Napopewali mbui rarata. 41 Apa anu ria si komi sangangaa nikiraka sira tau anu mesiasi katuwura. Ane awetu babeiami, wotomi ai sinangka babeiami, sintoto ai peundea ni Pue Ala.
42 Masurewu komi toParisi! Mogaloda tuda-tuda anu kokoi i karawaami ewa solasi, kulapae ai daka-daka ntanina, nipopenomba sampulu parasee si Pue Ala mangula atura agama. Agaiana atura anu mabose anu manguli sangangaa nibabei apa anu manoto i singka manusiami, ai sangangaa nipokaasi i Pue Ala, agaiana baria nipeulai. Kamonsona parenta etuda anu sangangaa nipeulai, ai inee mbui malipa rarami mampopolumako parenta anu ntanina.
43 Masurewu komi toParisi! Lawi mampenoka komi rapopomeso i pomesoa anu raadai i rara nu tombi penombaa, ai mampenoka komi rabila nu tau wori i pobalu-balua. 44 Masurewu komi! Lawi komi ewa talumba anu baria mokatandaa. Talumba etu ralongko-longko nu tau, agaiana baria rainsanira mawori mpangka anu merikati i rarana. Awetu mbui komi, malompe i raoa ngkida komi, agaiana madaa nu rarami.”
45 Sadua guru agama nu toYahudi mangulika i Yesu, “Ee Guru, pololitaMu etu, mopakoi kami!”
46 Mesono i Yesu, “Masurewu mbui komi guru agama! Lawi komimo anu mopakoloka sira tau wori atura ai ada agama anu mantimi, agaiana baria mogalo saudi nidurei tau mampopolumako ada ai atura etu! 47 Masurewu komi! Mobabei komi talumba nu nabi sira, anu napopate nu ulububumi. 48 Mewali komi saduduami anu mopangaku, nipokono apa anu nababeimo nu ulububumi. Kalawiana sira anu mampopate nabi-nabi aretu, mpane komi anu mowangu talumbana. 49 I Pue Ala manginsani kadaana babeiami. Etumo mpane Nauli ni Pue Ala ewa ei:
‘Ina Kutudu sira nabi-nabi ai suroKu lau si sira.
Ria sira ina rapopate, ria sira ina rapopesiasi.’
50 Mewali, etumo mpane tau anu tuwu i tempo ei, ina rasuku nakeningka rapopatera ope-ope nabi mepuu lako i karateruna dunia ei, 51 mepuu lako i karapopatena i Habeli dongka-dongka si Sakaria anu rapopate i olo nu Tombi ni Pue Ala ai potunua popenomba. Mamonso mpuu anu Kuulika komi, komi anu tuwu ei-ei batena mokolo ope-opena aretu!
52 Masurewu komi guru-guru agama! Kamonsona, kekomimo anu sangangaa mopatudu tau, bona manginsani sira adiwa dala lau si Pue Ala. Agaiana komida saduduami baria mangunde mampeulai dala etu, ai nisombo mbui sira tau anu mampenoka mangula dala anu manoto.”