I Yesu mosalai guru agama Yahudi ai toParisi
23
1 Lako ni se etu, i Yesu mangulika tau wori ai topeguruNa, Nauli, 2 “Guru-guru agama ai toParisi siramo anu ria kuasara mopatuduka komi Atura ni Musa. 3 Etumo mpane sangangaa nipeulai sinangka apa anu rapatudukara komi. Agaiana inee nipeulai babeiara, lawi sira aretu baria sira mampeulai apa anu rapatudukara komi. 4 Mopakoloka sira tau wori atura ai ada agama anu mantimi, agaiana baria mogalo saudi potulingira tau mampopolumako ada ai atura etu!5 Ope-ope anu malompe anu rababeira, bona ratoia ngkida sira nu tau ntanina. Motaka sira pambolia wati-wati nu Sura Ngkora Magali anu rapakapekara i wingkeraa ai koloro pekakaera rapakabosera, ai jubara rapakandoera renda-rendana.* 6 Rapenokara rapopomeso i pomesoa anu teadai i posusaa ai pomesoa anu teadai i tombi penombaa. 7 Raundera rabila nu tau i pogulu-gulua nu tau wori ai raundera raronde ‘Guru.’b
8 Agaiana komi, inee komi mampenoka rabila ai raronde ‘Guru,’ lawi sadua ngkida Gurumi ai komi ope-ope topopoka ngkida komi. 9 Ai inee mbui nipomabose tau i dunia ei ai nironde sira ‘Tuamami,’ lawi Tuamami sadua ngkida, iamo Tuamami anu ria i suruga. 10 Ai inee mbui komi mampenoka raronde ‘Tadulako,’ lawi tadulakomi sadua ngkida, iamo Datu Topesorema anu nadandi ni Pue Ala. 11 Ima anu mangunde bona mabose katuwuna, sangangaa mewali sala ia batua nu rangana. 12 Ima anu mampemabose ina rapakoi, ai ima anu mengkakoi ina rapomabose.
13 Masurewu komi, guru-guru agama ai toParisi! Komi tau anu mengkalompe! Komi anu mosomboki dala mesua i rara peparentaa ni Pue Ala, lawi komi saduduami baria niunde mesua, ai tau ntanina anu rapari-parira mesua, niombo.
14 [Masurewu komi, guru-guru agama ai toParisi! Komi tau anu mengkalompe! Niakalangi ngkida towawine tobemba anu mesiasi katuwura ai nirampaki tombira. Ai roo awetu, mekakae komi masae-sae motabusingi babeiami anu madaa. Etumo mpane ina rasuku mantimi komi!]
15 Masurewu komi, guru-guru agama ai toParisi! Komi tau anu mengkalompe! Madota mpuu komi mopatudu rangami bona mampeulai sira patudumi. Niagika mbotopae moweta tasi ai molumako karao, bona ria ngkia sadua tau anu mewali topegurumi. Ai ane mewalimo sira topegurumi, nipopewali sira maruminsi mpii kadaara mpane lako i kadaami.
16 Batena ina masurewu komi tadulako-tadulako anu mabilo, anu mampenoka monini rangami! Mepatudu komi ewa ei: ane ria sadua tau anu mosumpa mokabelai Tombi ni Pue Ala, niuli baria ia tetaka ai sumpana etu. Agaiana ane ria sadua tau mosumpa, mokabelai bulawa anu i rara Tombi ni Pue Ala, tetaka ia ai sumpana etu. 17 Madoio mpuu komi, komi ewa tau anu mabilo! Ba niuli, bulawa melumbu peawana mpane lako i Tombi ni Pue Ala? Kamonsona Tombi ni Pue Ala etuda anu mopakagali bulawa anu i rarana. 18 Mepatudu mbui komi ewa ei: ane ria sadua tau anu mosumpa mokabelai meja potunua popenomba, baria ia tetaka ai sumpana etu. Agaiana ane ria sadua tau mosumpa mokabelai popenomba anu rasuwe i wongko meja etu, batena tetaka ia ai sumpana etu. 19 Maruminsi mpuu kabilomi! Ba niuli, popenomba melumbu mpane lako i meja potunua popenomba? Baria, lawi meja potunua popenomba etumo anu mopakagali popenomba anu i wongkona. 20 Lawi, ane sadua tau mosumpa mokabelai meja potunua popenomba, lempona mokabelai ia meja potunua popenomba etu ai ope-ope anu rasuwe i wongkona. 21 Ai ane sadua tau mosumpa mokabelai Tombi ni Pue Ala, lempona mokabelai Tombi ni Pue Ala ai i Pue Ala anu meari i Tombi etu. 22 Ai ane sadua tau mosumpa mokabelai suruga, lempona mokabelai pomesoa ni Pue Ala, ai mokabelai mbui i Pue Ala anu momeso i pomesoa etu.
23 Masurewu komi guru-guru agama ai toParisi! Komi tau anu mengkalompe! Madota mpuu komi mampeulai sawaa anu kokoi. Mogaloda tuda-tuda anu kokoi i karawaami ewa sare, saderei ai tuda-tuda anu rapopakuli, nipopenomba sampulu parasee si Pue Ala mangula Atura ni Musa. Agaiana sawaa anu mobundu mpii anu manguli: sangangaa manoto babeiami, maasi komi rangami, ai tetida komi si Pue Ala, agaiana baria nipeulai. Kamonsona, sawaa etumo anu sangangaa nipeulai, ai inee mbui nipawia pangulami sawaa anu baria gaga mobundu mpii. 24 Komi tadulako-tadulako mabilo anu mampenoka monini rangami, nilaliki sambaa dali i ue anu ina niinu, agaiana onta anu sumambaa niome ngkida.
25 Masurewu komi guru-guru agama ai toParisi! Komi tau anu mengkalompe! Agaiana i rarami, buke pesioro ai dosa. Komi ewa tau anu mobakosi panginuami ai tabomi i raoana ngkida, molentano i rarana keraki. 26 Komi toParisi, mabilo mpuu komi! Sangangaa nibakosi sala rara nu panginuami, bona maningku mbui i raoana.
27 Masurewu komi guru-guru agama ai toParisi! Komi tau anu mengkalompe! Komi ewa talumba anu raoana mabula ai malompe raita, agaiana i rarana keisi wuku nu tomate ai maisi mpangkana anu merikati. 28 Ewa etu mbui komi, i petotoki nu tau, babeiami manoto i raoana ngkida. Agaiana i rarami, topodongko komi ai madaa babeiami.
29 Masurewu komi guru-guru agama ai toParisi! Komi tau anu mengkalompe! Nipakalompe ai nipoperae liliu talumba nu nabi-nabi, ai talumba nu tau anu manoto ni banimpia. 30 Kalawiana niuli: ‘Ane rapana tuwu kami simbela-mbela ai ulububuki ni banimpia, batena baria kami mangula babeiara mampopate nu nabi-nabi.’ 31 Lako i pololitami etu, nipangaku mpuu ka komina pemulea anu mampopate nabi-nabi aretu. 32 Mewali, nipaliliu ngkimo mobabei dosa mangula babeia nu ulububumi!
33 Komi tau anu madaa, pemulea nu tau anu madaa! Inee nipenoka ina tepawia komi lako i karasukumi i rara naraka. 34 Nipetingai lompe-lompe: ina Kutudu sira nabi-nabi, tau anu matopa ai guru-guru agama bona lau sira si komi anu tuwu ei-ei ai mopatuduka komi pololitaKu. Agaiana ria sira anu ina nipopate, ria sira anu nipaku i kau anu rapopombesape, ria sira anu ina nirurugii i rara nu tombi penombaami, ai ria mbui sira anu niwuwulai lako i kota sambua dongka i kota anu ntanina. 35 Etumo mpane, komi anu ina mokolo ope-ope kamasala nu ulububumi ni banimpia, anu mampopate tau anu manoto sira. Babeia nu ulububumi etu, mepuu lako i pampopatera i Habeli tau anu baria masala, dongka i pampopatera i nabi Sakaria ana ni Berekia, rapopate i olo nu Tombi ni Pue Ala ai potunua popenomba. 36 Mamonso mpuu anu Kuulika komi, komi anu tuwu ei-ei batena mokolo ope-opena aretu.”
Mapari rara ni Yesu lawi toYerusale baria madota modoko Ia
37 “ToYerusale, toYerusale! Nipopate sira nabi-nabi, ai tudua-tudua ni Pue Ala, niwatui sira. Mawori mbela Kupenoka moona paleKu mokalupui komi ewa sambaa manu ntina anu motaoboki anana, agaiana baria niunde. 38 Nipetingai: Tombi Penombaami ei ina napalengi ni Pue Ala. 39 Bona niinsani: saudi tempodamo bariamo Aku niita, duduuna dongka tempona niuli: ‘I Pue Ala mowati Ia anu mai i rara nu sangaNa!’”