I Yesu mampololita kagero nu Tombi ni Pue Ala
24
1 Tongo ni Yesu molumako mensuwu lako i Tombi ni Pue Ala, topeguruNa mogompilisi Ia mpane motudoka Ia kalompena karababeina Tombi ni Pue Ala etu. 2 Mewali, naulika sira ni Yesu, “Io, niitamo ope-ope etu. Agaiana bona niinsani: baria ria mogalo saogu luwu watuna anu teparampi mani i peariana, kalawiana ina magero asa.”I Yesu mampololita kapari nu tau anu meula si Ia
3 Roo awetu, laumo i Yesu momeso i Bulu Saitun. TongoNa momeso, dongkamo sira topeguruNa i tempona baria ria tau ntanina, mpane mekune sira si Ia, “Impia pewalina anu niuliMu ni mpongone ai apa tanda anu ina mewali i kadongkaMu ai apa tandana kasopoanamo dunia ei?”
4 Nasonoi ni Yesu, “Mainga-inga komi, bona ntena komi raakalangi. 5 Lawi mawori tau ina mai ai manguli ka sirana Datu Topesorema. Mawori tau ina raakalangi. 6 Ina mangepe komi wamba pombeala ai bambari pombeala, agaiana inee komi maeka. Lawi ope-ope etu sangangaa mewali nsalaa, agaiana baria mani dongka kasopoa dunia. 7 I tempo etu, tosangamba ina mombeala ai tosangambana, kadatua sambua ina moewa kadatua sambuana, ai imba ngkida ina ria oro ai linu. 8 Agaiana ope-ope etu, lako pepuuana ewa kadua anu naepe nu sadua towawine anu ina moana.
9 I tempo etu, komi ina rasoko ai rasusu i topoparenta bona rapopesiasi komi ai rapopate komi, ai tau i sumalele dunia ina mokasisi komi nakenimpeulami si Aku. 10 Mawori tau ina mosapuaka peulara si Aku. Ria anu ina mosusu pokara i iwalira. Mawori tau mombekasisi. 11 Ai ina dongka mbui, nabi-nabi anu ina mopakanawu tau wori. 12 I tempo etu, kalalaua tetambai kadaa nu tau, duduuna makura asira i tau. 13 Agaiana tau anu mepotuu liliu si Aku duduuna i kasopoana, ina mansumba sira katesorema. 14 Ai Bambari Malompe kono i peparenta ni Pue Ala batena rabambari i sumalele dunia, bona naepe nu ope-ope tau. Roo awetu, lako dongkada kasopoa dunia.”
I Yesu mampololita kapari mabose anu ina mewali
15 “Ni banimpia i nabi Danie mampololita kadongkana anu rasanga ‘Topepakaropu anu madaa.’ (Ima anu mobasa lolita ei, niparesa lempona!) I tempona niita anu natunggai ni nabi Danie etu, meongko i pearia anu magali i Tombi ni Pue Ala, mampopewali Tombi ni Pue Ala bariamo magali, 16 aginamo tau anu meari i boea-boea i propinsi Yudea, melangka sira lau i bulu. 17 Tau anu tongora momeso i tarampa,a inee sira mesua i rara nu tombi mangala ba apa-apa. 18 Tau anu i bonde, inee sira mesola i boea mangala sampira. Kasaliu melangka komi! 19 I tempo etu, ina mapari mpuu katuwu nu towawine anu mampaiwoto ai anu mopasusu anara. 20 Mekakae komi si Pue Ala bona i eo pelangkami etu, inee i tempo malengi ba i eo penombaa. 21 Lawi i tempo etu, ina dongka kapari anu maruminsi mpii anu baria mani sambela mewali lako i pewalina dunia duduuna ei-ei. Ane liumo kasopoa dunia, kapari etu bariamo ina mewali. 22 Agaiana tempo kapari etu, ina napakarede ni Pue Ala, lawi ane baria napakarede, baria ria sadua tau anu nabuku tetida tuwu i dunia. Mewali, nakenimpampokaasiNa tau anu Napelisi, etumo mpane ina Napakarede tempo kapari etu.
23 I tempo etu, ane ria anu mangulika komi: ‘Peita, eimo Datu Topesorema’ ba ‘dou mai’. Inee sira nipotuu. 24 Lawi ina mawori tau anu dongka meakalangi, anu manguli ka sirana ‘Datu Topesorema’, ba anu manguli ka sirana nabi. Ina mobabei sira tanda kuasa ai tanda anu metingkarai, bona moakalangi sira tau wori. Ane kepensani, mogaloda tau anu napelisi ni Pue Ala, raakalangira mbui. 25 Nikaendo! Kuulika amimo komi ope-ope etu lako baria mani mewali.
26 Mewali, ane ria anu mangulika komi: ‘Peita, Datu Topesorema ria si dou i pada lori,’ inee komi lau si dou! Ane raulira: ‘Peita, ria i se etu i rara nu tombi,’ inee sira nipotuu! 27 Lawi i kadongka mpesola Ana Manusia, ewa pewangka banibi anu mensuwu i pensibea eo mewangka dongka-dongka i kalimpaa eo. 28 Imba kariaana anu mamate mpane mawaumo, i se etu mbui tosi kaloa mogulu.”b
I Yesu mampololita apa anu ina mewali i kadongkaNa mpesola i dunia
29 “Ane liumo tempo kapari etu,
‘eo ina tebaliki mewali madedi,
wula bariamo mewangka,
ai betue ina manawu lako i langi,
ai ope-ope kuasa-kuasa i langi aretu mewali maguneo.’ (Yesaya 13:10; 34:4)
30 I tempo kadongkana mpesola Ana Manusia, ina ria tanda i langi. Ai ope-ope tau i dunia ina motumangi, lawi Ana Manusia ina raita nu tau mendolu mai lako i suruga i wongko gawu anu buke kuasa ai peawa. 31 Tatamburu anu mabose ina ratawui, ai Ana Manusia ina motudu malaekaNa lau mogulu tau anu Napelisi lako i sumalele dunia, mepuu i wuntuna sambali dongka i wuntuna sambali.”
Pandiri kono i kau ara
32 “Nipairara apa anu Kupatuduka komi lako i kau ara. Ane niita daana motumbe ai motawe, niinsanimo kaina dongkana tempo madii. 33 Ewa etu mbui ane niita pewalina sinangka anu Kuuli ni mpongone, niinsani bariamo masae ina dongkamo tempona kadongka nu Ana Manusia. 34 Bona niinsani: ope-ope anu Kuuli ni mpongone batena mewali lako baria mani mamate ope-ope tau anu tuwu i tempo ei-ei. 35 Langi ai dunia ina mapaia, agaiana NgkoraKu batena ria duduuna i kasae-saeana.”
Sangangaa mainga-inga kita mampegia kadongkana mpesola i Yesu
36 “Agaiana eo ai jaa pewalina ope-ope etu, batena TuamaKu anu manginsani. Baria ria tau anu manginsani. Mogaloda malaeka anu ria i suruga, baria mbui rainsanira. Ai AnaNa, baria mbui Nainsani. 37 Apa anu mewali i tempo ni nabi Noho ni banimpia, ina mewali mbui i eo kadongka nu Ana Manusia. 38 I tempo ni nabi Noho ni banimpia, baria rainsanira apa anu ina morumpa sira. Mangkoni ai manginu liliu ngkida sira, motombi sira ai rapopotombi sira. Etu anu rababeira liliu duduuna i nabi Noho mesua i rara duanga mabose. 39 Nalaboadamo sira nu ue anu meumbala, lako rainsanirada apa anu mewali. Ewa etu mbui pampomaleka nu tau i kadongka mpesola nu Ana Manusia i dunia. 40 I tempo etu, rodua tau mobago simbela sira i bonde, sadua rakeni mpane sadua rapalengi. 41 Rodua towawine tongora mogili, sadua rakeni mpane sadua rapalengi. 42 Etumo mpane Kuuli mainga-inga komi, lawi baria niinsani impia Puemi ina dongka!”
Ngkora pandiri kono i sadua tumpu tombi anu mainga-inga
43 “Sangangaa nipairara ngkora pandiri ei: ane kenainsani ami nu tumpu tombi impia kadongkana topanangka, batena mainga-inga ia, baria napogeaka topanangka mesua i rara nu tombina. 44 Etumo mpane sangangaa mainga-inga komi, lawi baria niinsani impia kadongka nu Ana Manusia.”
Ngkora pandiri kono i rodua batua
45 “Ria sadua batua anu matundu ai matopa, anu pensani napotuu nu tuana. Naongko ia nu tuana motadulakoi batua ntanina, mourusi pangkonira eo-eona. 46 Matono mpuu batua etu, ane i pesola nu tuana, nasumba tongona mampopolumako bagona. 47 Batua etu batena naongko nu tuana mokadipuraka ope-ope anu-anuna.
48 Agaiana ane rapana batua etu madaa babeiana. Mpane nauli nu rarana: 49 ‘Masae mani lako dongkada tuaku!’ Mewali napepuumo morurugii singka batuana, mpane mangkoni ai manginu liliu ia simbela-mbela ai tau anu malangu-langu. 50 Agaiana, ane ungangkidamo dongka tuana i eo ai i jaa anu baria nainsani, 51 batua etu ina narurugii ai naweduka nu tuana i raoa, i pearia anu sintoto i tau anu mengkalompe ngkida. I se etu, ina motumangi ia ai mantodisa.”