I Yesu mampololita kamagerona Tombi ni Pue Ala
13
1 Mensuwumo i Yesu lako i Tombi ni Pue Ala etu. Tongora mensuwu, ria sadua lako i topeguruNa anu manguli, “Guru, peita Tombi ni Pue Ala ei! Peita watuna! Maroso ai merae mpuu!”2 Nauli ni Yesu, “Niita mbotowoo Tombi ni Pue Ala ei, bariapae? Kuulika komi: baria ria mogalo saogu luwu watuna anu teparampi mani i peariana. Batena ina magero asa.”
I Yesu mampololita kapari anu ina morumpa sira tau anu meula si Ia
3 Roo awetu, laumo i Yesu i Bulu Saitun mpane momeso melio i Tombi ni Pue Ala i Yerusale. TongoNa momeso, i Peturu, i Yakobu, i Yohane ai i Andaria maimo sira mololita si Ia ni tempona baria ria tau ntanina, 4 raulira, “Nuulika kami ba impia pewalina anu Nuuli ni mpongone. Ai tanda apa anu ina mewali, ane dongka tempona mewali?”
5 Nauli ni Yesu, “Mainga-inga komi, bona ntena komi raakalangi. 6 Lawi mawori tau anu ina mai, manguli ka siranamo Datu Topesorema, duduuna mawori tau ina raakalangira. 7 Ane mangepe komi wamba pombeala ai bambari-bambari pombeala, inee komi maeka, lawi ope-ope etu sangangaa mewali nsalaa, agaiana baria mani dongka kasopoa dunia. 8 I tempo etu, tosangamba ina mombeala ai tosangambana, kadatua sambua ina moewa kadatua sambuana, ai imba ngkida ria linu ai oro. Agaiana ope-ope etu, lako pepuuana, ewa kadua anu naepe nu sadua towawine anu ina moanamo.
9 Agaiana komi ei, mainga-inga komi! Lawi ina rasoko komi mpane rakeni lau i topobotusi kara-kara agama. Ina rasepe-sepe komi i rara nu tombi-tombi penombaa. Nakenimpeulami si Aku, ina rakeni komi i topoparenta ai i datu-datu. I se etumo tempomi, mopatongawa pepotuumi si Aku, i tau aretu. 10 Ai Bambari Malompe sangangaa rapadongka nsalaa i sumalele dunia, mpane lako mewalida eo kasopoa dunia. 11 Ane rasoko komi mpane rakeni i topobotusi kara-kara, ai ane dongka tempona rakiraka komi tempo mololita, inee nipopari rara kaapana anu ina niuli. Lawi apa anu niuli i tempo etu luwu, baria lako i pekirimi saduduami, agaiana lako i Inosa Magalida.
12 I tempo etu, ria tau ina mosusu pokara ba anara bona rapopate, nakenimpeulara si Aku. Ewa etu mbui anu ina mewali i anakoi, moewa sira tomanara ai mosusu sira tomanara bona rapopate, nakenimpeula nu tomanara si Aku. 13 Nakenimpeulami si Aku, ina rakasisi komi nu ope-ope tau. Agaiana tau anu meula liliu si Aku duduuna i kasopoana, ina mansumba sira katesorema.”
Topepakaropu anu madaa
14 Mpane napaliliu ni Yesu pololitaNa nauli, “Ina mangita komi Topepakaropu anu madaa, meongko i pearia anu totona baria pensani napearii. (Ima anu mobasa lolita ei, niparesa apa lempona!) Mewali, i tempo etu tau anu ria i Yudea sangangaa melangka sira lau i bulu. 15 Tau anu tongora i tarampa, inee sala sira mesua i rara nu tombira mangala ba apa-apa. 16 Tau anu i bonde, inee sira mesola i boea mangala sampira. 17 Ina mapari mpuu katuwu nu towawine anu tongora mampaiwoto ai anu mopasusu anara. 18 Mekakae komi si Pue Ala, bona eo etu inee mewali i tempo anu malengi. 19 Lawi i tempo etu, ina dongka kapari anu maruminsi mpii anu baria mani sambela mewali lako i mpolinguruna, i tempona i Pue Ala moteru dunia duduuna ei-ei, ai bariamo mbui ina mewali. 20 Agaiana tempo kapari etu ina napakarede ni Pue Ala, lawi ane baria napakarede, baria ria sadua tau anu ina tuwu. Mewali, nakenimpampokaasiNa tau anu Napelisi, etumo mpane Napakarede tempo kapari etu.
21 I tempo etu, ane ria anu mangulika komi: ‘Peita! Datu Topesorema ria i se ei!’ ba ‘Peita ria si dou!’ Inee sira nipotuu. 22 Lawi ina dongka sira tau anu meakalangi, anu manguli ka sirana ‘Datu Topesorema’, ba anu manguli ka sirana nabi. Ina mobabei sira tanda kuasa ai tanda anu metingkarai bona moakalangi sira tau wori. Ane kepensani, mogaloda tau anu napelisi ni Pue Ala, raakalangira mbui. 23 Etumo mpane, mainga-inga komi! Kupopainsanika amimo komi i ope-opena aretu, lako baria mani mewali.”
Kadongka nu Ana Manusia
24 “Mewali roo awetu, ane liumo tempo kapari etu, eo ina tebaliki mewali madedi, wula bariamo mewangka, 25 ai betue ina manawu lako i langi, ai ope-ope kuasa-kuasa i langi aretu mewali maguneo. 26 I tempo etu, ope-ope tau ina mangita Ana Manusia, buke kuasa ai peawa, mendolu mai lako i suruga nabalungkusi nu gawu. 27 Ina Natudu malaeka-malaekaNa lau mogulu tau anu Napelisi lako i sumalele dunia, mepuu i wuntuna sambali dongka i wuntuna sambali.”
Pepatudu lako i kau ara
28 “Nipairara apa anu Kupatuduka komi lako i kau ara. Ane niita daana motumbe ai motawe, niinsanimo kaina dongkana tempo madii. 29 Ewa etu mbui, ane niita pewalina anu Kuuli ni mpongone, niinsani bariamo masae ina dongka Ana Manusia. 30 Bona niinsani: ope-ope anu Kuuli ni mpongone batena mewali lako baria mani mamate ope-ope tau anu tuwu i tempo ei-ei. 31 Langi ai dunia ina mapaia, agaiana NgkoraKu batena ria duduuna i kasae-saeana.”
Patudu bona mainga-inga
32 “Agaiana ane eo ai jaa pewalina ope-ope etu, batena ngkida TuamaKu anu manginsani. Baria ria sadua tau anu manginsani. Mogaloda malaeka anu i suruga baria manginsani. AnaNa, baria mbui Nainsani. 33 Etumo mpane sangangaa mainga-inga komi ai matimama komi, lawi baria niinsani tempo pewalina. 34 Kadongka mpesola Ana Manusia, rapandiri ewa ei: Ria sadua tumpu tombi moliwo ina lau i kota anu karao. Lako baria mani ia mangoka, natudumo topekadipuraka mokadipuraka tombina, sadua-sadua nakiraka sira bagora. I topokadipuraka boboka, naulika: ‘Mainga-inga iko!’ 35-36 Mewali, komi mbui sangangaa mainga-inga bona ane ungangkidamo dongka tumpu tombi, baria komi nasumba tongomi maleta, lawi baria niinsani ba impia kadongkana tumpu tombi etu, ba sindulau eo ba i tongo mbengi ba gompi mabaa ba i pensibe eo. 37 Apa anu Kuulika komi ei, Kuulika mbui ope-ope tau. Mewali mainga-inga liliu komi!”