Totomana nu toYahudi motunggai mampopate i Yesu
14
1 Roeodamo lako baria mani dongka Eo Posusa Pasa ai Posusa Roti Anu Baria Raragii,a kapala-kapala tadulako menomba ai guru-guru agama tongora mangkadelo dala mosoko ngkandii i Yesu bona rapopate. 2 Agaiana raulira, “Inee sala tasoko i eo posusa ei, bona ntena ria kaguneo i olo nu tau wori.”Sadua towawine mobumbusi i Yesu ai lana wongi
3 I tempo ni Yesu ria i boea Betania, i tombi nu sadua tau anu rasanga i Simo, anu ni banimpia ketangga. Tongora mangkoni, dongkamo sadua towawine mangkeni sabotolo lana wongi anu masuli mpii balukina, anu rababei lako i rari nu kau anu mawongi anu baria ria galona. Natepoki nu towawine tambolo nu botolo etu, mpane rakando lana etu i woo ni Yesu tanda pebilana. 4 Ria sira basangkia tau i se etu, anu marumpu mangita apa anu nababei nu towawine etu. Raulira sadua ai sadua, “Mangkiada mpane lana anu masuli etu ratende mbero ngkida? 5 Ane rapana lana wongi etu rapobalu, balukina labi tolu atu doi pera.b Aginamo rapobalu bona balukina rakiraka sira tau anu mesiasi.” Etumo mpane, rakarumpuira towawine etu.
6 Agaiana naulika sira ni Yesu, “Pogeaka ngkimode. Mangkiada mpane nipakasusa rara nu towawine ei? Apa anu nababei si Aku, malompe. 7 Lawi tau anu mesiasi, ria liliu sira si komi. Ane niunde motulungi sira, ria mboto tempomi. Agaiana Aku, baria Aku ria liliu si komi. 8 Towawine ei mobabeimo apa anu nabuku nababei. Nabumbusika Aku lana wongi mopatimama ami wotoKu i karapaiwuKu luwu. 9 Bona niinsani: i sumalele dunia, imba ngkida Bambari Malompe rabambari, apa anu nababei nu towawine ei batena rakaendo, baria ina rakalingaka.”
I Yudasi mampobalu i Yesu i iwaliNa
10 Roo awetu, sadua lako i topeguruNa anu sampulu rodua, anu rasanga i Yudasi Iskariot, lau i kapala-kapala tadulako menomba, mangulika sira tunggaiana mampobalu i Yesu si sira. 11 Matonomo sira mangepe tunggaiana etu, ai radandika ia rakiraka doi. Lako ni se etu, i Yudasi mangkadelo tempo anu malompe mosusu i Yesu si sira bona rasokora.
I Yesu mangkoni pangkoni Posusa Pasa simbela-mbela ai topeguruNa
12 I eo pepuuaana Posusa Roti Anu Baria Raragii i tempona dimba Pasa rasambale, topeguru ni Yesu mekune si Ia, “Pue, imba peundeaMu kipasilolonga pangkoni Pasa anu ina takoni?”
13 Mewali natudumo ni Yesu rodua topeguruNa, Naulika sira, “Laumode komi i rara nu kota. I se etu ina nipomberumpaka sadua tau anu mangkeni panombuana anu moisi ue. Peulamode komi si ia. 14 Ane mesua ia i rara nu tombi, niulika tumpu tombi anu napesuangi etu: ‘Nauli ni Guru: imba peariaKu mangkoni pangkoni Posusa Pasa simbela-mbela ai topeguruKu?’ 15 Tumpu tombi etu ina motudoka komi sambua lonta mabose anu i wongko. Lonta etu tepasilolonga amimo, sondomo parewana. I se etu ina nipasilolongaka kita pangkoni Pasa.”
16 Lau mpuumo sira topeguruNa anu rodua aretu mesua i rara nu kota. Kadongkara i se etu, ope-ope mewali ewa anu naulika sira ni Yesu, mpane mopasilolongamo sira pangkoni Pasa.
17 Kawengi, laumo i Yesu simbela-mbela ai topeguruNa anu sampulu rodua i lonta anu rapasilolongamo ni mpongone. 18 Tongora momeso mangkoni, nauli ni Yesu, “Bona niinsani: sadua lako si komi anu mangkoni simbela kita ei-ei, ina mampobalu Aku i iwaliKu.”
19 Awetu raepe nu topeguruNa pololitaNa, mapari rarara, ai mekunemo sira sadua-sadua si Yesu, raulira, “Manoto baria aku anu Nutunggai Pue?”
20 Nasonoi ni Yesu, “Anu mampobalu Aku, iamo sadua lako si komi anu sampulu rodua ei, anu motubuka rotina santabo-ntabo ai Aku. 21 Mamonso mpuu, Ana Manusia batena mamate ewa anu tepakanotomo i rara nu Sura Ngkora Magali. Agaiana maruminsi kasurewu nu tau anu mampobalu Ia. Aginamo tau etu, ineemo rapoanaka.”
I Yesu mokira-kira roti ai anggoro i topeguruNa
22 Tongora mangkoni, naalamo ni Yesu roti ai mekakae manguli maisi kalompena si Pue Ala. Roo awetu, Nabinse-binsemo roti etu ai Nakiraka sira, Nauli, “Nialamode, eimo wotoKu.” 23 Roo awetu, Naala mbuimo sambua panginua anu keisi anggoro, mpane manguli maisi kalompena si Pue Ala, mpane Nasusuka sira. Ope-ope sira manginu anggoro etu. 24 Ni tempo etu, naulika sira ni Yesu, “Eimo raaKu anu tebubu i kamateKu luwu, mosuru dosa nu manusia. RaaKu ei mopakaroso dandi ni Pue Ala anu mopasintuwu i Pue Ala ai manusia. 25 Bona niinsani: mepuu ei-ei, bariamo Kuinu anggoro duduuna manginu Aku anggoro anu bou i rara peparenta nu TuamaKu”. 26 Roo awetu, moduluamo sira sampangka dulua petoia. Awetu roomo sira modulua, lambumo i Yesu ai topeguruNa lako i kota lau i Bulu Saitun.
I Yesu mampololita pesapuaka ni Peturu
27 Lako i se etu, naulika sira ni Yesu topeguruNa, “Ope-ope komi ina mopalengi Aku, ewa anu teuki i rara Sura Ngkora Magali, ewa ei:
‘Ina Kupopate Toporewu etu,
duduuna dimbaNa masawu.’ (Sakaria 13:7)
28 Agaiana i ka NapatuwuKu mpesola luwu, moilodo Aku lau i tana Galilea.”
29 Nauli ni Peturu, “Naudapae ope-ope tau mopalengi Iko Pue, agaiana aku baria!”
30 Nauli ni Yesu, “Bona nuinsani: i kawengi ei ngkimo, lako baria mani motuturua manu karombelana, tolu mbelamo Aku nusapuaka.”
31 Agaiana sambela mani napakaroso ni Peturu pololitana, nauli, “Naudapae aku mamate simbela-mbela ai Iko, baria mpuu ina kusapuaka ka kuinsaniMu!” Ewa etu mbui pololitara topeguruNa ntanina.
I Yesu mekakae i bonde Getsemani
32 Roo awetu, dongkamo sira i bonde anu rasanga Getsemani. I se etu, nauli ni Yesu i topeguruNa, “Pomesomode komi i se ei. Lau sala Aku mekakae.”
33 Mpane Nabawai i Peturu, i Yakobu ai i Yohane lau sira simbela ai Ia. Ni tempo etu, mepuumo mawiora Ia ai baria maroroo raraNa. 34 Naulika sira, “Mapari mpuu raraKu, ewa ina mamate Kuepe. I se eimo sala komi ai mainga-inga komi!”
35 Roo ni se etu, Napalengi sira karao saudi mpane molingkudu motumpa mekakae. I rara nu pekakaeNa, merade Ia bona ane pensani baria Ia mansumba kapari etu, 36 Nauli, “TuamaKu! Baria ria anu baria Nubuku Nubabei. Nupaka karao kowo kapari anu ina morumpa Aku ei. Agaiana baria peundeaKu anu mewali, peundeaMuda Uma.”
37 Roo awetu, laumo Ia i topeguruNa anu tolu, Nasumba sira tongora maleta. Naulika i Peturu, “Simo! Ba letada iko? Bariapae nubuku mainga-inga nauda mogalo sajaa ngkida? 38 Mainga-inga komi ai mekakae komi, bona ntena komi narumpa nu pekelo. I rarami niunde mpuu mobabei anu manoto, agaiana baria nibuku lawi wotomi batena malede.”
39 Lako i se etu, lau mbuimo Ia mekakae. PekakaeNa etu simbela ai pekakaeNa anu mpolinguruna. 40 Roo awetu, mesola mbuimo Ia mampomberumpaka topeguruNa anu tolu aretu, ai maleta mbuimo sira nakeningkamaruminsina katetunduara. Baria rainsanira apa anu sangangaa raulira si Ia.
41 Lau mbuimo i Yesu mekakae i katolu mbelana, ai roo etu, mai mbuimo Ia i topeguruNa anu tolu aretu, Naulika sira, “Maturu ai leta manidapae komi? Sondomo! Dongkamo tempona Ana Manusia rasusu i tau anu madaa. 42 Pematamode komi! Mesolamo kita. Peita, doumo mai tau anu mampobalu Aku.”
I Yesu rasoko
43 Tongona mani i Yesu mololita, dongkamo i Yudasi, sadua lako i topeguruNa anu sampulu rodua, simbela-mbela ai tau wori anu mangkeni guma ai pewombe. Tau aretu raposawaaka sira nu kapala-kapala tadulako menomba, guru-guru agama ai totomana nu toYahudi. 44 I Yudasi mangulika amimo sira tanda bona rainsanira kaumbana i Yesu, nauli, “Ima anu kuiki, Iamo. Sokomode, nikeni ai nikampai mpii.” 45 Mewali, kadongkara i se etu, laumo i Yudasi mampomberumpaka i Yesu, nauli, “Guru!” Mpane naiki. 46 Roo awetu, i Yesu rasokoramo ai rasilu. 47 Lako i se etu, sadua tau anu gompi si Yesu mowuka gumana mpane motimbe batua nu Tadulako Menomba Mabose etu, pudu talingana.
48 Nauli ni Yesu i tau sira anu mosoko Ia, “Ba tau madaadapae Aku ei, mpane mai Aku nisoko mangkeni komi guma ai pewombe? 49 Eo-eona, ria Aku simbela-mbela ai komi i karawaa nu Tombi ni Pue Ala mepatudu. Mangkiada mpane baria Aku nisoko ni tempo etu? Agaiana ope-ope ei sangangaa mewali, bona tepabukeimo apa anu teuki i rara Sura Ngkora Magali.”
50 Roo ni se etu, melangkamo sira ope-ope topeguruNa mopalengi i Yesu.
51 Ni tempo etu, ria mbui sadua anantomoane anu meula si Yesu, anu wule mokomoi wotona ai komo anu bula. Ria sira anu ina mosoko ia, 52 etumo mpane nawonsuimo komona meloa ia, mpane melangka.
I Yesu i lio nu topobotusi kara-kara nu toYahudi
53 Lako ni se etu, i Yesu rakenimo lau i tombi nu Tadulako Menomba Mabose. Ni se etu, moterusumo sira ope-ope kapala-kapala tadulako menomba, guru-guru agama ai totomana nu toYahudi anu ntanina. 54 I Peturu meula ngkarao ngkida duduuna dongka i karawaa tombi nu Tadulako Menomba Mabose. Ni se etu, momeso ia manderu simbela-mbela ai topokampai i Yesu.
55 Ni tempo etu, kapala-kapala tadulako menomba ai ope-ope topobotusi kara-kara nu toYahudi mangkadelomo sira sabi anu mosalai i Yesu, bona i Yesu rasuku mamate. Agaiana baria ria mogalo sampangka salaNa rasumbara. 56 Mawori mpuu sabi anu mosalai Ia, agaiana tongawamo dongkora ngkida lawi baria simbela pesonora. 57 Mpane ria basangkia dua anu meongko anu morai i Yesu manguli anu baria mamonso, raulira: 58 “Kiepemo, Tau ei manguli ewa ei: ‘Ina Kugero Tombi ni Pue Ala anu nawangu nu manusia, ai i rarana tolu eo ina Kuwangu mpesola anu ntanina, anu baria nababei nu manusia.’” 59 Agaiana i posabikira etu, baria mbui simbela pololitara.
60 Meongkomo Tadulako Menomba Mabose i lio nu ope-ope topeparesa i se etu, mpane mampekune i Yesu, “Bariapae Nusonoi sinangka anu rasalaika Iko etu?” 61 Agaiana i Yesu baria mesono, nauda sampangka pololitaNa. Sambela mani Tadulako Menomba Mabose mekune si Ia, “Ba Iko mpuu Datu Topesorema, Ana ni Pue Ala anu tetoia?”
62 Nasonoi ni Yesu, “Io, Akumo, ai ina niita Ana Manusia momeso mbai i kuana ni Pue Ala anu makuasa, ai ina niita mbui Ia mendolu mai lako i suruga nabalungkusi nu gawu.”
63 Awetu naepe nu Tadulako Menomba Mabose apa anu nauli ni Yesu, nasepamo baduna nakeningkarumpuna, nauli, “Bariamo paraluu ria sabi! 64 Niepe mpuumo pololitaNa mopakoi i Pue Ala. Adiwamo pobotusimi?”
Ope-ope sira, raulira, “Masala mpuu Ia! Sangangaa rapopate Ia!”
65 Lako ni se etu, ria sira anu mowangelusi Ia, ria mbui sira anu mampopowadi-wadi Ia: rabungkusi lioNa mpane rasopo, mpane raulikara, “Ee nabi! Uli ba ima anu mosopo Iko!” Mogaloda topekampai mosopo mbui i Yesu.
I Peturu mosapuaka peulana si Yesu
66 Ni tempona i Peturu i karawaa mani, maimo sadua towawine anu mobago i tombi nu Tadulako Menomba Mabose si ia. 67 Awetu naita i Peturu manderu, kasaliu naulika, “Bariapae iko mbui sadua ranga ni Yesu toNasare dou?”
68 Agaiana nasapuaka ni Peturu, nauli, “Baria kuinsani apa anu nuuli!” Lako ni se etu laumo ia gompi i boboka nu wala. Ni tempo etu motuturuamo manu.
69 Towawine etu mangita mbuimo i Peturu, mpane nauli i tau anu ria i se etu, “Ia ei anu simbela-mbela ai i Yesu.” 70 Agaiana nasapuaka mbuimo ni Peturu nauli: Baria! Baria aku.
Baria masae lako ni se etu, tau anu meongko i se etu manguli mbui, “Iko mpuu rangaNa! Lawi iko, toGalilea mbui iko.”
71 Mosumpamo i Peturu, nauli, “Mamate aku! Baria mpuu kuinsani Tau anu niuli etu!” 72 Ni tempo etu, motuturuamo manu karombelana. Nakaendomo ni Peturu lolita ni Yesu anu manguli, “Lako baria mani motuturua manu karombelana, tolu mbelamo Aku nusapuaka.” Etumo mpane maruminsi mpuu potumangi ni Peturu.