Kamate ni Lasarus
11
1-2 Sadua tomoane anu rasanga i Lasarus meari i boea Betania simbela-mbela ai pokana i Maria ai i Marta. (I Maria etumo anu mobasaika lana wongi i paa ni Yesu mpane naparisi ai wuluana.) Sambela tempo, i Lasarus tongona madua. 3 Pokana anu rodua etu motudumo tau ntanina lau mangulika i Yesu, “Pue, i Lasarus anu Nupokaasi, tongona madua.”4 Awetu naepe ni Yesu bambari etu, Nauli, “Sakina etu baria ina mangkeni kamate. Agaiana bona i Pue Ala ratoia, ai AnaNa rapopeawa mbui.”
5 I Yesu mampokakaia i Marta, i Maria, ai i Lasarus. 6 Agaiana awetu Naepe i Lasarus madua, Naoaka baria kasaliu lau, meari mani Ia i peariaNa roeo kasaena. 7 Liumo roeo, lako Naulikada sira topeguruNa, “Aginamo mesola kita lau i tana Yudea.”
8 Rauli nu topeguruNa, “Guru, baria mani masae toYahudi i se etu mampenoka mowatui Iko. Mangkiada mpane Nupenoka mbuimo lau si dou?”
9 Naulika sira ni Yesu, “I rarana saeoa, bariapae sampulu rojaa? Tau anu molumako mabaa, baria sira tesube. Pensani sira meita, lawi ria pewangka nu eo anu mopakabaa dunia ei. 10 Agaiana tau anu molumako kawengi, batena tesube sira, lawi baria ria kamabaana.”
11 Ewa etumo lolita ni Yesu, mpane roo awetu Nauli mbuimo, “Rangata i Lasarus, maleta. Agaiana ina lau Aku molike ia.”
12 Nauli nu topeguruNa sira, “Pue, ane wule maleta ngkida ia, batena malompe-lompe ia. 13 Kamonsona lolita ni Yesu etu, lempona i Lasarus matemo. Agaiana topeguruNa baria sira manginsani lempo nu pololitaNa etu, nipenokara leta mpuu i Lasarus.”
14 Mewali, Napakanotokamo sira lempo nu pololitaNa, Nauli, “I Lasarus matemo. 15 Agaiana, matono Aku lawi baria Aku ria, i tempona namate. Lawi apa anu mewali, mangkeni kalompe si komi, bona maroso pepotuumi si Aku. Ei-ei laumo kita si Lasarus.”
16 I Tomas, anu rauli mbui i Didimus,a mangulika sira singka topeguruNa, “Aginamo meula kita si Ia, bona mamate kita simbela-mbela ai Ia.”
I Yesu mopakalene i Marta ai i Maria
17 Awetu sira dongka i boea Betania, raulika i Yesu, iba eomo i Lasarus roo rapaiwu. 18 Betania etu gompi i Yerusale, kira-kira tolu kilo mete kakaraona lako i Yerusale. 19 Mewali, mawori sira tau anu lako i Yerusale mai mopakalene i Marta ai i Maria i kamate nu pokara.
20 Awetu naepe ni Marta i Yesu dongkamo, etumo mpane laumo i Marta modupa Ia. Agaiana i Maria, i tombi liliu ngkida. 21 Nauli ni Marta si Yesu, “Pue, ane ke i se ei Iko ni tempona pokaku madua, kebaria ia ina mamate. 22 Agaiana nauda ewa etu, kuinsani: apa anu Nuperade si Pue Ala ei-ei, batena Nakiraka Iko.”
23 Nauli ni Yesu si Marta, “Pokamu ina tuwu mpesola.”
24 Nauli ni Marta, “Anu kuinsani, i Lasarus ina tuwu mpesola i eo pobotusi kasopoa dunia, i karapopengkawangura ope-ope tomate.”
25 Nauli ni Yesu, “Aku eimo anu mampopengkawangu tomate, ai anu mokiraka katuwu. Tau anu mepotuu si Aku, nauda sira mamatemo, ina tuwu mpesola sira. 26 Ai ope-ope tau anu mansumba katuwu lako i pepotuura si Aku, batera baria mamate duduuna kasae-saeana. Mewali ba nupotuu anu Kuuli etu?”
27 Nauli ni Marta, “Io, Pue, kupotuu ka Ikona Ana ni Pue Ala, Datu Topesorema anu nadandi ni Pue Ala ni banimpia anu ina mai i dunia.”
28 Awetu roomo ia manguli ewa etu, laumo ia i tombi moronde i Maria, nakukuwi naulika, “Si dou ria i Guru, Napenoka mampomberumpaka iko!” 29 Awetu naepe ni Maria pololitana, maliga mpuumo ia lau mampomberumpaka i Yesu. 30 Ni tempo etu, i Yesu baria mani mesua i rara boea, ria mani Ia i raoa boea i pomberumpara ai i Marta ni mpongone. 31 ToYahudi anu i rara nu tombi anu mai mepakalene aretu, mangita i Maria kasaliu lambu, raulira, “Lau i talumba ia motumangi!” Etumo mpane meula mbui sira.
32 Dongkamo i Maria i pensopia ni Yesu ni mpongone, naitamo i Yesu mpane lau molingkudu i lioNa, naulika, “Pue, ane ke i se ei Iko ni tempo etu, baria ina mamate pokaku.”
33 Awetu naita ni Yesu i Maria motumangi ai toYahudi anu naposimbelaka motumangi mbui sira, etumo mpane mawiora ai mapari raraNa. 34 Napekune sira, “Imba ia nipaiwu?”
Raulira, “Pue, lau tapeita.”
37 Agaiana ria mbui sira anu manguli, “Tau anu mabilo Napakaosa. Mangkiada mpane baria Ia mopakaosa i Lasarus bona ntena mamate?”
I Yesu mopatuwu mpesola i Lasarus
38 Lako ni se etu, mapari rara ni Yesu, mpane lau Ia i talumba. Talumba etu, iamo sambua kalolu anu rakae i tabingke bulu anu ratuko ai watu mabose. 39 Nauli ni Yesu, “Bungkasimode watu petuko etu!”
I Marta, poka ni Lasarus anu mate etu, manguli, “Pue, ineemo rabungkasi. Mawaumo, lawi iba eomo rapaiwu.”
40 Nauli ni Yesu si Marta, “Bariapae Kuulikamo iko ni mpongone, ane nupotuu Aku, ina nuita mpuu kabosena kuasa ni Pue Ala!” 41 Roo awetu, rabungkasimo watu petuko nu talumbana. I Yesu motirangai langi, Nauli, “TuamaKu, Kuuli maisi kalompena si Iko, lawi Nuepemo pamperadeKu ei. 42 Kuinsani, Nuepe liliu pamperadeKu. Agaiana pamperadeKu ei Kuuli masisimbuku, bona raepe nu tau wori i se ei, bona rapotuu ka Ikona mpuumo anu motudu Aku.”
43 Roo awetu, nauli ni Yesu masisimbuku, “Lasarus! Pensuwumode mai!” 44 Mewali mensuwu mpuumo i Lasarus, tuwu mpesolamo ia, mensuwu lako i rara nu talumba. Palena ai paana tebungkusi mani ai bana popebungkusina, ai woona tetolombungi mani mangula ada nu toYahudi. Naulika sira ni Yesu, “Bungkasi pebalungkusina bona malompe polumakona.”
Tadulako nu toYahudi moparenta mampopate i Yesu
45 Mawori toYahudi anu mai mosondaki i Maria ni tempo etu, mangita apa anu nababei ni Yesu. Mpane mawori sira anu mepotuu si Ia. 46 Agaiana ria mbui sira anu lau i toParisi mopadongka apa anu nababei ni Yesu etu. 47 Etumo mpane toParisi ai kapala-kapala tadulako menomba, mobabei sira pogombo mabose simbela-mbela ai topobotusi kara-kara nu toYahudi, raulira, “Apa anu sangangaa tababei? Lawi maisi mpuu tanda kuasa anu Nababei. 48 Ane tapogeaka liliu, ope-ope tau ina mepotuu sira si Ia. Kasopoana luwu, topoparenta nu toRoma ina mai mogero Tombi ni Pue Ala ai mopakaropu tau wori.”
49 Roo awetu, mololitamo sadua lako i olora anu rasanga i Kayapas, Tadulako Menomba Mabose ni pae etu, nauli, “Baria niinsani apa-apa! 50 Bariapae niinsani, mobundu mani si komi ane sadua mamate mopasuru tau wori, mpane tau wori ina maropu.” 51 Kamonsona i Kayapas mololita ewa etu, baria lako i pololitana saduduana, agaiana lolita etu nakiraka ia ni Pue Ala, lawi ia Tadulako Menomba Mabose ni pae etu. Etumo mpane nauli ni Kayapas, i Yesu ina mamate mopasuru toYahudi. 52 Ai baria wule toYahudi. Nakeningkamate ni Yesu etu, ope-ope ana ni Pue Ala anu masawu-sawu i sumalele dunia, ina ragulu mpane rapasantobu sira.
53 Mepuu ni eo etu, tadulako nu toYahudi mogombo mpane meparentamo sira bona i Yesu rapopate. 54 Mewali, etumo mpane i Yesu bariamo mampatongawa i olo nu toYahudi, bona bariamo raita nu tau wori. Malambumo Ia lako i se etu lau i boea anu rasanga Efraim i wiwi pada lori. Meari Ia i se etu simbela-mbela ai topeguruNa.
55 Ni tempo etu, ina dongka eo mabose agama Yahudi anu rauli Eo Posusa Pasa. Lako baria mani eo mabose etu, mawori tau lako i boea-boeana lau i Yerusale, bona mobabei sira sambua ada mopakagali wotora, mangula ada agamara. 56 Tau anu mogulu i Yerusale aretu kasaliu mangkadelo sira i Yesu. Tongora mogulu i Tombi ni Pue Ala, mombepekune sira, raulira, “Adiwa pesumbaami? Ba ina mai Ia i posusa ei?”
57 Ewa etumo pololitara tau wori. Lawi kapala-kapala tadulako menomba ai toParisi, ria amimo parentara i tau wori anu manguli, “Ima-ima komi anu manginsani kaimbana i Yesu, sangangaa nipetumbuika kami, bona rasoko.”