Ngkora pandiri kono i dimba ai toporewu
10
1 Nauli ni Yesu, “Kuulika komi: ane ria sadua tau anu mempone i wala bona mesua i rara gimpu dimba, baria moliu i boboka, tau etu iamo topanangka ai toperampaki. 2 Agaiana, ane toporewu, mesua ia moliu i boboka. 3 Topokampai gimpu mobungkasika ia boboka, ai dimbana manginsani mampetingai wotuna. Toporewu etu moronde sangara sambaa-sambaa ai mangkeni sira lau i raoa. 4 Tempona nakeni ope-ope dimbana lau i raoa, moilodomo ia lako si sira, mpane dimbana meula si ia, lawi rainsanira mampetingai wotuna. 5 Baria sira mangula tau ntanina. Ane ria tau anu baria toporewura anu moronde sira, rapelosokara, lawi baria rainsanira wotuna.”6 I Yesu mopadongka pandiri etu i toParisi, agaiana baria rainsanira lempona. 7 Etumo mpane nauli mbuimo ni Yesu, “Aku ei pensani rapandiri ewa boboka anu rapoliungi nu dimba mesua i rara gimpu. 8 Ope-ope tau anu moilodo lako si Aku anu manguli ka sirana toporewu anu malompe, sira etu topanangka ai toperampaki. Agaiana dimbaKu, baria sira mangula perondera. 9 Aku eimo boboka. Ima anu mesua moliu si Aku, mansumba sira katuwu malompe. Pensani sira rapandiri ewa dimba anu mesua i rara gimpu mpane mensuwu lau i raoa mansumba owo anu marudu. 10 Toperampaki mai wule mai manangka, mepopate ai mepakaropu. Agaiana Aku, mai Aku bona manusia mansumba katuwu malompe, ai pewati anu baria tesoka kaisina.
11 Aku eimo toporewu anu malompe. Toporewu anu malompe mosusu katuwuna, bona dimbana tuwu sira. 12 Ane ria sadua tau anu rasaro ngkida, baria malompe pamporewuna, lawi baria ia tumpu dimba. Ane naita serigala mai, melangka ia mopalengi dimba aretu. Mewali dimba aretu nasoko nu serigala, ai nasawu-sawu sira. 13 Tau anu rasaro etu melangka, lawi mobago ia bona mansumba ngkida sarona. Baria ia mampekiri dimba aretu.
14-15 Aku eimo toporewu anu malompe. Ewa TuamaKu manginsani Aku, ai Aku manginsani TuamaKu, ewa etu mbui Aku manginsani dimbaKu, ai dimbaKu manginsani mbui Aku. Kususu katuwuKu bona dimbaKu tuwu sira.
16 Ria mani dimbaKu anu ntanina, agaiana baria sira ria i rara gimpu ei. Sira mbui, sangangaa Kukeni. Ina manginsani mpuu sira wotuKu, ai ope-ope dimbaKu ina mewali ngkida sira santobu ai sadua ngkida toporewura.
17 TuamaKu mampokakaia Aku, lawi Kususu katuwuKu bona tuwu mpesola Aku. 18 Baria ria mogalo sadua anu pensani mampopate Aku, agaiana Aku saduduaKu mosusu wotoKu bona rapopate. Ria kuasaKu mosusu wotoKu bona rapopate ai ria mbui kuasaKu tuwu mpesola. Etumo parenta nu TuamaKu anu Kudoko lako si Ia.”
19 Awetu raepe nu toYahudi pololita ni Yesu, mombesese mbuimo sira. 20 Mawori sira anu manguli, “Ia napesuangi nu seta ai magila! Bariamo paraluu tapetingai pololitaNa.”
21 Agaiana ria mbui anu manguli, “Baria! Tau anu napesuangi nu seta baria mololita ewa etu. Riapae seta anu mopakaosa tau anu mabilo?”
I Yesu baria raunde nu toYahudi
22 Ni tempo etu i Yerusale, tau sira tongora mamposusai susa mokaendo Eo Popakagali Tombi ni Pue Ala. Ni tempo etu, tempo malengi. 23 I Yesu tongoNa molulumako i tambale anu rasanga Tambale Salomo, i Tombi ni Pue Ala. 24 ToYahudi motolelikimo i Yesu, raulikara, “Mangkiada mpane Nupogeaka liliu kami mawuli? Ane Datu Topesorema mpuu Iko, pakanotoka kami.”
25 Nauli ni Yesu, “Roomo komi Kuulika, agaiana baria nipotuu. Tanda kuasa anu Kubabei ai kuasa nu TuamaKu, etumo anu mopakanoto kaimana Aku. 26 Agaiana baria mpuu nipotuu, lawi baria komi dimbaKu. 27 DimbaKu manginsani wotuKu. Kuinsani mpuu sira, ai raulara Aku. 28 Kukiraka sira katuwu malompe anu baria mokasopoa, ai manoto kabariara ina rasuku i naraka. Baria ria sadua anu pensani mamperampai sira lako si Aku. 29 Melumbu kuasa nu TuamaKu lako i ope-opena, ai Iamo anu mokiraka Aku dimbaKu. Baria ria sadua anu pensani mamperampai sira lako i TuamaKu. 30 Aku ai TuamaKu, sadua ngkida Kami.”
31 Lako ni se etu, toYahudi mandoamo sira watu, rapenokara mowatui i Yesu. 32 Naulika sira ni Yesu, “Niita mpuu Aku mobabei bago anu malompe mangula parenta nu TuamaKu. Lako i ope-ope bagoKu etu, bago umba anu mewali patingkeruna mpane nipenoka mowatui Aku?”
33 Rauli nu toYahudi, “Baria nakenimpobagoMu anu malompe mpane ina kipopate Iko, agaiana nakenimpopakoiMu i Pue Alada! Nuuli i Pue Ala Iko, agaiana Iko manusia biasa ngkida.”
34 Nauli ni Yesu, “I rara Sura Aturami, teukimo lolita ni Pue Ala i toYahudi ni banimpia anu manguli ewa ei: Pue Ala manguli, ‘i pue ala komi.’a 35 Tainsani apa anu teuki i rara nu Sura Ngkora Magali, baria ria katebalikina. Mewali, ane i Pue Ala mangulika tau anu modoko NgkoraNa ‘komi i pue ala’, 36 mesua i akalapae ane Aku anu napelisi ai natudu nu TuamaKu mai i dunia ei, niuli mopakoi Aku i Pue Ala, nakenimpanguliKu ka Akuna Ana ni Pue Ala.
37 Ane baria Kubabei bago anu lako i TuamaKu, inee Aku nipotuu. 38 Agaiana nakeningka Kupobagona, naudapae baria Aku nipotuu, sangangaa nipotuu apa anu Kupobago etu. Etumo mpane, ina niinsani mpuu i rarami: Aku mosintuwu ai TuamaKu, ewa etu mbui, TuamaKu mosintuwu ai Aku.”
39 Awetu raepe nu toYahudi lolita ni Yesu, rapetandakara mbuimo mosoko Ia, agaiana baria mewali rasokora.
40 Lako ni se etu, mangoka mbuimo i Yesu lau i sambuteka ue Yarade i periua ni Yohane ni banimpia, mpane meari i se etu. 41 Mawori tau lau mampomberumpaka i Yesu. Rauli nu tau aretu, “I Yohane baria mobabei tanda kuasa. Agaiana ope-ope anu napadongka kono si Yesu mewali asamo.” 42 Etumo mpane mawori tau i se etu mepotuu si Yesu.