I Yesu mopakaosa sadua tau anu mabilo
9
1 Tongo ni Yesu molumako, Naitamo sadua tau anu mabilo mepuu lako i karapoanakana. 2 Mekune sira topeguruNa si Ia, “Guru, mangkiada mpane mabilo ia mepuu lako i karapoanakana? Ba nakeningkamadosana saduduana, ba nakeningkamadosa nu tomanana?”3 Mesono i Yesu, Nauli, “Baria dosana saduduana, ai baria mbui dosa nu tomanana. Agaiana bona mampoliungi ia, kuasa ni Pue Ala tongawa i ope-ope tau. 4 Tempona mani mabaa, sangangaa tapopolumako bago ni Pue Ala anu motudu Aku. Lawi ane dongkamo tempona madedi, bariamo ria tau anu pensani mobago. 5 TongoKu mani i dunia, Aku eimo pewangka anu mopakabaa rara nu manusia i sumalele dunia.”
6 Awetu roomo i Yesu mololita ewa etu, mowangelu Ia i tana. WangeluNa etu, Nagaliampo ai tana bona mewali lombu, mpane Napopobasaika mata nu tau anu bilo etu. 7 Roo awetu, Naulika, “Laumode membasolio i Wusu Siloam.” (“Siloam” lempona “Ratudu.”) Lau mpuumo ia membasolio, awetu ia mesola, meitamo ia.
8 Lako ni se etu, sintonggina ai tau anu paka mangita ia merade-rade, mombepekune sira, raulira, “Imada dou? Bariapae tau anu bilo anu paka momeso merade-rade?”
9 Ria anu manguli, “Kalawiana iamodee!”
Ria mbui anu manguli, “Baria, kasimbelaana ngkida.”
Agaiana ia saduduana nauli, “Akumo ei!”
10 Mewali, rapekunera, “Adiwa mpane pensani iko meita?”
11 Naulika sira, “Tau anu rasanga i Yesu mobabei lombu, Napopobasaika mataku, mpane Naulika aku: ‘Lau iko membasolio i Wusu Siloam.’ Lau mpuumo aku membasolio, lako ni se etu meitamo aku!”
12 Rapekunera, “Imbamora Tau etu?”
Naulika sira, “Baria kuinsani.”
ToParisi moparesa karapakaosana tau anu bilo
13-14 Ope-ope etu mewali ni eo penombaa nu toYahudi. Ni tempo etu, i Yesu mogaliampo wangeluNa ai tana, mpane mopakaosa tau anu mabilo etu. Mewali, tau anu bilo anu meitamo etu rakenira lau i toParisi. 15 ToParisi mekune mbui si ia, raulira, “Adiwa mpane pensani iko meita?”
Naulika sira, “Nabasaika mataku ai lombu, mpane membasolio aku, mewali meitamo aku.”
16 Basangkia sira toParisi manguli, “Ane ewa etu, tau etu baria lako si Pue Ala, lawi baria mampeulai paliata i eo penombaa.”
Agaiana ria anu manguli, “Ane tau madosa, lako imba mai kuasaNa mobabei maisi tanda kuasa anu ewa etu?” Etumo mpane mombesese sira sadua ai sadua.
17 Lako ni se etu, mekune mbuimo sira toParisi i tau mabilo etu, raulira, “Ane iko, adiwa pesumbaa nu pekirimu nakenimpopakaosaNa matamu?” Nauli nu tau anu mabilo etu, “Manoto Ia sadua nabi.”
18 Agaiana tadulako nu toYahudi baria sira mampotuu ka iana mpuumo tau anu mabilo ni banimpia ai ungangkidamo meita ia. Etumo mpane raronde nu tinana ai tuamana bona mampomberumpaka sira, 19 mpane rapekunera, “Ba mamonso mpuu tau ei anami? Ba iamo anu mabilo mepuu lako i karapoanakana? Adiwada mpane pensani ia meita?”
20 Rauli nu tinana ai tuamana, “Anu kiinsani, kalawiana ia ei anaki anu mabilo mepuu lako i karapoanakana. 21 Agaiana adiwa dalana mpane pensani ia meita, baria kowo kiinsani. Ai ima anu mopakaosa ia, baria mbui kiinsani. Nipekunedamo si ia. Pensani ia mosonoi pampekunemi, lawi manginaomo ia.” 22 Tinana ai tuamana manguli ewa etu, lawi maeka sira i tadulako nu toYahudi. Lawi riamo botusiana parenta nu tadulako aretu anu ewa ei: ima-ima anu manguli ka i Yesuna Datu Topesorema, bariamo sira rapaliu mesua i tombi penombaa. 23 Etumo puuna mpane tomanana manguli, “Nipekunedamo si ia, lawi manginaomo ia.”
24 Roo awetu, raronde mbuimo tau anu mabilo etu, mpane raulikara, “Posumpamode i lio ni Pue Ala, apa anu nuuli etu mamonso! Kiinsani i Yesu etu iamo tau anu madosa.”
25 Naulika sira, “Aku, baria kuinsani ba tau madosa aku ba baria. Anu kuinsani, ni banimpia mabilo aku, agaiana ei-ei meitamo aku.”
26 Lako ni se etu, rapekunera mpesola, “Apa anu Nababeika iko? Adiwa dalaNa mopakaosa iko?”
27 Nasonoi sira, “Roomowo komi kutuntuka ni mpongone, bariapae niepe? Mangkiada mpane mekune liliu komi si aku? Ba nipenoka mbui mewali topeguruNa?”
28 Lako ni se etu, rapapakoira ia raulikara, “Iko topeguruNa! Kami topeguru ni nabi Musa! 29 Kiinsani kalawiana i Pue Ala mopadongka pololitaNa si Musa ni banimpia. Agaiana i Yesu etu, baria kiinsani kalako imbaNa mai.”
30 Mesono tau anu mabilo etu, “Mewulii mpuu komi! Niuli baria niinsani kalako imbana Ia, molentano Napakaosa mataku! 31 Tainsani i Pue Ala baria mosonoi pamperade nu tau anu madosa, agaiana mampetingai Ia pamperade nu tau anu mengkoru si Ia ai anu mampeulai parentaNa. 32 Lako i pewali nu dunia, baria mani sambela taepe tunturakana tau anu mabilo lako i karapoanakana anu pensani rapakaosa. 33 Ane i Yesu baria lako si Pue Ala, manoto baria Ia pensani mobabei apa-apa.”
34 Rasonoi nu tadulako nu toYahudi aretu, “Ikomo anu buke dosa mepuu lako i karapoanakamu. Mangkiada mpane pebai iko mopatudu kami?” Mepuu ni se etu, rapopeloso ia lako i tombi penombaa ai bariamo rapaliu mesua.
35 Naepe ni Yesu karapopelosoNa lako i tombi penombaa. Etumo mpane Napomberumpaka tau anu lako meita etu, Naulika, “Ba mepotuu iko i Ana Manusia?”
36 Nauli nu tau etu, “Nuulika aku kaimana Ana Manusia, bona mepotuu aku si Ia.”
37 Nauli ni Yesu, “Nuitamo! Iamo anu tongona mampololitaka iko.”
38 Nauli nu tau etu, “Kupotuu Iko, Pue!” Mpane molingkudu ia menomba si Yesu.
39 Nauli ni Yesu, “KamaiKu i dunia ei, mai Aku mobotusi kara-kara nu tau, bona tau anu mabilo pensani meita, ai tau anu meita ina mewali mabilo.”
40 Ria sira basangkia toParisi i se etu anu mangepe lolita ni Yesu, raulikara, “Ba Nuuli mabilo mbui kami?”
41 Nauli ni Yesu, “Ane kemabilo komi, kebaria ina niinsani apa anu mamonso, ai baria komi madosa. Agaiana, lawi niuli meita mpuu komi, batena madosa komi.”