8
1 Agaiana i Yesu lau i Bulu Saitun. 2 Ewa ineilena madondo-dondo, lau mbuimo i Yesu i Tombi ni Pue Ala. Maimo sira tau wori mogompilisi Ia, mewali momeso Ia mopatudu sira.3 Tongo ni Yesu mepatudu, guru-guru agama ai toParisi dongkamo sira mangkeni sadua towawine anu rasumbara tongona mebualosi, rapopeongkora i olo nu tau wori. 4 Raulikara i Yesu, “Guru, towawine ei rasumba kongko tongona mebualosi! 5 I rara Atura ni Musa, ria parenta anu manguli: towawine anu mobabei ewa etu sangangaa rawatui duduuna mamate. Mewali Iko, adiwa pobotusiMu?” 6 Tunggaiana pampekunera etu, mangkadelo sira kamasalana pololita ni Yesu bona rasalaira. Agaiana baria sira nasonoi ni Yesu. Motumpa ngkida Ia ai mouki-uki i tana ai karaweNa.
7 Mekune liliu sira si Ia, etumo mpane Nawangu wooNa, mpane Naulika sira, “Ima si komi anu baria madosa, iamo anu ilodo mowatui towawine etu!” 8 Roo awetu, motumpa mbuimo Ia, ai mouki-uki liliu i tana ai karaweNa.
9 Awetu raepe nu tadulako nu toYahudi aretu lolita ni Yesu, ope-ope sira malambu ngkandii sadua-sadua, mepuu lako i anu matua mpiimo tinuwuna. Kasopoana, i Yesu ai towawine etudamo anu ria i se etu. 10 Roo awetu, Nawangu mbuimo wooNa naulika towawine etu, “Imbamora sira tau anu mosalai iko ni mpongone, bariapae ria anu mampenoka mani mosuku iko?”
11 Nasonoi nu towawine etu, “Bariamo sira ria, Pue.”
Nauli ni Yesu, “Aku mbui, baria iko Kusuku. Mewali, mesolamo iko, ai ineemo iko mobabei dosa.”]a
I Yesu iamo pewangka anu mopakabaa rara nu manusia
12 Roo awetu, mololita mbuimo i Yesu i tau wori, Nauli, “Aku eimo pewangka anu mopakabaa rara nu manusia i sumalele dunia. Tau anu mangula Aku, baria sira molumako i rara nu kamadedi. Batena mansumba sira kamabaa anu moparia katuwu.”
13 Rauli nu toParisi si Yesu, “Baria mamonso pololitaMu, lawi wotoMu saduduaMu ngkida anu Nupololita.”
14 Nasonoi ni Yesu, “Naudapae mololita Aku kono i wotoKu saduduaKu, batena mamonso pololitaKu, lawi Kuinsani kalako imbaKu mai ai Kuinsani imba pearia anu Kukalaungi. Agaiana komi, baria niinsani. 15 Mobotusi komi kara-kara mangula pekiri nu manusia. Aku, baria Aku mobotusi kara-kara nu tau ba ima ngkida. 16 Ane rapana, ina mobotusi Aku kara-kara nu tau sira, pobotusiKu batena manoto, lawi baria wule saduduaKu ngkida. Agaiana TuamaKu anu motudu Aku, Iamo anu mamporangai Aku.
17 I rara Atura ni Musa ria teuki ewa ei: ‘Ane ria rodua sabi anu simbela pololitara, pololitara etu pensani rapotuu.’ 18 Ria rodua sabiKu, iamo Aku saduduaKu ai TuamaKu anu motudu Aku.”
19 Rapekune nu toParisi, “Imba TuamaMu?”
Mesono i Yesu, “Baria Aku niinsani, etumo mpane baria mbui niinsani TuamaKu. Ane rapana niinsani mpuu Aku, keniinsani mbui TuamaKu.” 20 Ope-ope etu napadongka ni Yesu tongona mepatudu i rara nu Tombi ni Pue Ala gompi i peti pambolia doi popenomba. Agaiana baria mani mogalo sadua anu mosoko Ia, lawi baria mani dongka tempona.
I pearia anu Kukalaungi baria pensani nikalaungi
21 Nauli mbuimo ni Yesu i tadulakora toYahudi, “Ina lambu Aku, ai ina nikadelo Aku, agaiana ina mamate komi lawi madosa mani komi. I pearia anu Kukalaungi, baria pensani nikalaungi.”
22 Awetu raepe nu tadulako nu toYahudi pololitaNa, mololitamo sira sadua ai sadua, raulira, “Apa lempona pololitaNa ni mpongone? Ba Napenokada menoo, mpane Nauli baria kita pensani lau i pearia anu Nakalaungi.”
23 Naulika sira ni Yesu, “Komi lako i woi, Aku lako i wongko. Komi lako i dunia ei, Aku baria lako i dunia ei. 24 Etumo mpane Kuulika komi, ina mamate komi i rara nu kamadosami. Mewali, ane baria nipotuu pololitaKu anu mopakanoto kaimana Aku, batena mpuu komi mamate lawi madosa liliu komi.”
25 Rapekunera, “Kamonso-monsona, ima mpuu Iko?”
Mesono i Yesu, “Roomowo Kuulika komi lako ni mpolinguruna! 26 Maisi mani anu ina Kusalaika komi. Agaiana Ia anu motudu Aku, sintoto mpuu rapotuu, ai apa anu Kuepe lako si Ia, etumo anu Kupadongka si komi i dunia.”
27 Anu natunggai pololita ni Yesu iamo TuamaNa, agaiana baria rainsanira lempona. 28 Etumo mpane Naulika mbuimo sira, “Ane nipakawane Ana Manusia,b lako niinsanida kaimana Aku. Baria ria sampangka anu Kubabei mangula peundeaKu. Batena ngkida Kuuli apa anu napatuduka Aku nu TuamaKu. 29 Ai Ia anu motudu Aku ina mamporangai liliu Aku, lawi Kubabei liliu apa anu mopakatono raraNa.”
I Pue Ala mopawia komi lako i dosa
30-31 Tongo ni Yesu mopadongka ope-ope etu, mawori toYahudi mepotuu si Ia. Mewali, Naulika sira, “Ane nipeulai liliu patuduKu, ina mewali mpuu komi topeulaKu, 32 ai ane topeulaKumo komi, ina niinsani mpuu patudu anu mamonso. Patudu anu mamonso etumo, anu ina mopowia komi lako i karapobatuami.”
33 Mesono sira, raulira, “Kami ei, pemulea ni Burahima! Baria kami sambela rapobatua. Mangkiada mpane Nuulika kami: ‘ina tepawia kami lako i karapobatuaki?’”
34 Nauli ni Yesu, “Bona niinsani, ope-ope tau anu mobabei dosa, napobatua sira nu dosa. 35 Ane batua, baria manoto kapearina liliu i tombi nu tuana. Agaiana ane ana nu tuana, manotomo kapearina liliu i tombi nu tuamana. 36 Mewali, ane Ana Manusia mopawia komi lako i dosami, tepawia mpuu komi, lawi Iamo Ana ni Pue Ala.
Pemulea ni Burahima anu baria mepotuu
37 Kuinsani ka komina pemulea ni Burahima. Agaiana ria komi anu mampenoka mampopate Aku, lawi baria nipairara pololitaKu. 38 Apa anu Kuita i lio nu TuamaKu, etumo anu Kuulika komi. Agaiana mobabei komi apa anu napatuduka komi nu tuamami.”
39 Rauli nu toYahudi, “Tuamaki iamo i Burahima!”
Nauli ni Yesu, “Ane monso-monso komi ana ni Burahima, manoto komi mangulakai babeia ni Burahima. 40 Kupadongkaka komi patudu anu mamonso anu Kudoko lako si Pue Ala, agaiana nipenoka ngkida mampopate Aku! Ane i Burahima, baria ewa etu babeiana. 41 Babeiami etu batena mangula babeia nu tuamami!”
Rasonoi nu toYahudi, “Kami, baria kami ana tana! Tuamaki sadua ngkida, iamo i Pue Ala.”
42 Nauli ni Yesu, “Ane monso-monso mpuu i Pue Ala Tuamami, kenipokaasi Aku, lawi lako si Pue Ala Aku mai. Baria Aku mai mangula peundeaKu saduduaKu. Mai Aku mangula peundea ni Pue Ala, lawi Ia anu motudu Aku. 43 Baria mpuu niinsani lempona pololitaKu, lawi baria nibuku mampetingai patuduKu. 44 Tuamami iamo Datu nu Seta! Ai nipenoka mangula liliu peundea nu tuamami etu. Kalawiana lako i mpolinguruna iamo topepopate, lawi baria ria kamanoto si ia, ai baria ia mampopolumako anu manoto. Ane ia wule modongko mampololita wotona saduduana, lawi ia topodongko ai puu nu dongko. 45 Mewali, naudapae manoto Kuuli, agaiana baria Aku nipotuu. 46 Baria ria i olomi anu pensani mopakanoto kariana dosaKu. Ane mampololita Aku anu mamonso, mangkiada mpane baria Aku nipotuu. 47 Tau anu lako si Pue Ala naunde mampetingai pololita ni Pue Ala. Agaiana, komi baria lako si Pue Ala, etumo mpane baria niunde mampetingai pololitaKu.”
I Yesu melumbu mpane lako i Burahima
48 Rauli nu toYahudi, “Mamonso mpuu anu kiuli! Simbela Iko ai toSamaria anu napesuangi nu seta.”
49 Nasonoi ni Yesu, “Baria Aku napesuangi nu seta. Mobila Aku TuamaKu. Agaiana komi, baria Aku nibila. 50 Baria Aku mampopetoia, naunde ni Pue Ala bona rapomabose Aku, ai Iamo anu mobotusi. 51 Bona niinsani, ima anu mampeulai pololitaKu, baria sira mamate, tuwu sira duduuna kasae-saeana.”
52 Raulira nu toYahudi, “Ei-ei, kiinsani mpuu ka napesuangiMu nu seta! I Burahima matemo. Ewa etu mbui ope-ope nabi ni banimpia, mamatemo sira. Agaiana Nuulida: ima anu mampeulai pololitaKu baria sira mamate duduuna kasae-saeana. 53 Lawi i Burahima saduduana mamatemo, ai ope-ope nabi mamatemo mbui sira. Kamonsona ima Iko? Mesua i akalapae melumbu mani Iko mpane tuamaki i Burahima?”
54 Nauli ni Yesu, “Ane motoia Aku wotoKu saduduaKu, baria ria pobunduana. Agaiana, i Pue Ala TuamaKu, Iamo anu motoia Aku, anu niuli ka Iana anu nipenombai. 55 Agaiana kamonsona baria niinsani i Pue Ala. Ane Aku, Kuinsani. Ane ke Kuuli baria Kuinsani Ia, modongko Aku ewa komi. Agaiana Kuinsani mpuu Ia, ai Kupeulai pololitaNa. 56 Ane ulububumi i Burahima, matono rarana lawi ina naita eo kadongkaKu. Kamonsona naitamo eo kadongkaKu, etumo mpane matono ia.”
57 Raulira nu toYahudi, “TinuwuMu, baria mani sondo lima mpulu mpae. Niitamumopae i Burahima?”
58 Nauli ni Yesu, “Bona niinsani, lako baria mani rapoanaka i Burahima, ria amimo Aku!”
59 Awetu raepe nu toYahudi pololitaNa etu, mandoamo sira watu rapenokara mowatui Ia. Agaiana bariamo ria i Yesu raitara, mensuwumo Ia lako i Tombi ni Pue Ala.