I Yesu lau i posusaa i Yerusale
7
1 Roo awetu, i Yesu lau i sumalele tana Galilea mopadongka Ngkora. Agaiana baria Naunde lau i tana Yudea, lawi ria sira tadulako nu toYahudi i se etu anu mampenoka mampopate Ia.2 Ni tempo etu, ina dongkamo eo anu rapomabose nu toYahudi anu rauli Posusa Pobambaru.a 3 Etumo mpane rauli nu poka-poka ni Yesu si Ia, “Inee Iko i se ei liliu! Laumode i Yudea, bona topeulaMu mangita tanda kuasa anu Nubabei. 4 Baria ria tau anu ina mowunikai apa anu nababei, ane naunde bona tolele sangana. Etumo mpane, popetudokamode tanda-tanda kuasa bona tolele sangaMu i sumalele dunia!” 5 Poka-poka ni Yesu aretu mololita ewa etu, lawi baria mbui sira mepotuu si Ia.
6 Naulika sira ni Yesu, “Baria mani dongka tempona Kupatongawaaka sira wotoKu. Ane komi, baria mangkia ba impia komi lau i Yerusale, 7 lawi baria ria tau anu mokasisi komi. Agaiana Aku, rakasisi nu tau i dunia ei, lawi Kupakanotoka sira kadaana babeiara. 8 Laumode komi i posusaa etu, Aku baria. Lawi baria mani dongka tempoKu.” 9 Ewa etumo lolita ni Yesu i pokaNa, ai meari mani Ia i Galilea.
10 Lau mpuumo sira poka-poka ni Yesu i Yerusale bona mangula Posusa Pobambaru. Basangkia eona lako ni se etu, i Yesu saduduaNa lau ngkandii-ndii, bona ntena rainsani nu tau wori. 11 Ni posusaa etu, tadulako nu toYahudi mangkadelo liliu i Yesu, raulira, “Imbamora Ia?”
12 Mpane tau wori mbui, mombekukuwimo sira. Ria sira anu manguli, “Tau anu malompe mpuu Ia.”
Ria mbui sira anu manguli, “Baria! Ia mopakanawu ngkida tau wori!” 13 Agaiana baria ria mogalo sadua anu pebai mololita naepe-epe ntalinga nu tau wori, mampololita kono si Ia, lawi maeka sira i tadulako nu toYahudi.
I Yesu mepatudu i Tombi ni Pue Ala ni tempona Posusa Pobambaru
14 Awetu basangkia eomo susa etu raposusai, mesua i Yesu i rara nu Tombi ni Pue Ala, mpane Napepuumo mepatudu. 15 Tingkara sira toYahudi mangepe patuduNa, raulira, “Adiwa mpane Nainsani ope-ope anu teuki i rara nu Ngkora Magali, molentano baria Ia sambela mosikola?”
16 Naulika sira ni Yesu, “Anu Kupatuduka komi, patudu lako si Pue Ala anu motudu Aku, baria patuduKu saduduaKu. 17 Ima anu mampenoka mobabei peundea ni Pue Ala, ina nainsani kalako imbana patuduKu ei, ba lako si Pue Ala mpuu ba wule pololitaKu saduduaKu. 18 Ima anu mopadongka pepatuduna saduduana, mangkadelo ia bona ratoia nu tau ntanina. Agaiana tau anu mangkadelo bona ratoia tau anu motudu ia, tau etu manoto, ai baria ia modongko. 19 I nabi Musa ni banimpia mokiraka komi Atura ni Pue Ala. Agaiana baria komi ria sadua anu mampeulai Atura etu. Mangkiada mpane nipenoka mampopate Aku?”
20 Rauli nu tau wori, “Magila Iko! Imapae anu mampenoka mampopate Iko?”
21 Nauli ni Yesu, “Lako sampangkada bago anu Kupobago i eo penombaa, nipowulimo. 22 Nakiraka komi ni Musa atura bona ratindi komi, agaiana kamonsona atura petindi etu, baria lako si Musa, agaiana lako i ulububuta, lako baria mani ria i Musa. Etumo mpane, naudapae i eo penombaa batena natindi komi. 23 Mewali, ane metindi komi i eo penombaa ntena komi moliungi Atura ni Musa, mangkiada mpane nikarumpui Aku ane mopakaosa mbui Aku tau i eo penombaa, bona sumalele wotona malompe? 24 Inee komi mosalai tau ntanina mangula apa anu niita ngkida, agaiana sangangaa nibotusi i kanoto-notona.”
Bata-bata rarara tau wori ba i Yesu mpuu Datu Topesorema
25 Roo awetu basangkia toYerusale, manguli, “Bariapae, Ia dou anu ina rapopate? 26 Molentano dou mboto Ia mopatudu tau wori ai baria ria kaekaNa, ai baria ria anu mokambaroka. Ba rainsani nu tadulakota ka Iana Datu Topesorema? 27 Agaiana baria manoto ka Iana Datu Topesorema, lawi tainsani kalako imbana mai Ia. Ane dongka mpuu Datu Topesorema anu radandi ni banimpia, baria ria anu ina manginsani kalako imbaNa mai.”
28 Mewali, tongo ni Yesu mepatudu i rara nu Tombi ni Pue Ala, mololitamo Ia masisimbuku, Nauli, “Niuli niinsani mboto kaimana Aku ai kalako imbaKu mai. Baria Aku mai mangula peundeaKu saduduaKu. Mai Aku mangula peundea ni Pue Ala anu motudu Aku. Iamo anu sintoto rapotuu. Agaiana komi, baria Ia niinsani. 29 Aku, Kuinsani Ia lawi lako si Ia Aku mai, ai Ia anu motudu Aku.”
30 Ni tempo etu, ria sira anu mampetandaka mosoko Ia, agaiana lawi baria mani dongka tempona, etumo mpane baria ria sira anu pebai. 31 Agaiana ria sira tau wori i olora anu mepotuu si Ia, raulira, “Datu Topesorema mpuu Ia, lawi maisimo tanda kuasa anu Nababei.”
32 Ria sira toParisi anu mangepe pombekukuwi nu tau wori, mampololita kono si Yesu. Etumo mpane toParisi ai kapala-kapala tadulako menomba, motudumo sira basangkia dua topokampai Tombi ni Pue Ala lau mosoko i Yesu. 33 Ni tempo etu, i Yesu mololita i tau wori, Naulika sira, “Bariamo Aku masae simbela-mbela ai komi, ina mesolamo Aku lau si Ia anu motudu Aku. 34 Ina nikadelo Aku, agaiana bariamo Aku nisumba, lawi i pearia anu Kukalaungi, baria pensani nikalaungi.”
35 Mawuli rarara toYahudi mangepe pololitaNa, mpane mombepekune sira, raulira, “Imba Ia ina lau mpane Nauli bariamo tasumba? Ba lau i tana nu tosandarena bona meari simbela-mbela ai toYahudi anu mampogaloka toYunani mpane mopaguru sira i se etu? 36 Ai apa lempona pololitaNa anu manguli, ina takadelo agaiana baria tasumba, ai baria kita pensani lau i pearia anu Nakalaungi?”
Inosa Magali rapandiri ewa ue nu katuwu
37 I eo kasopoana Posusa Pobambaru etu, iamo eo anu melumbu karapomabosena raposusaira i Posusa Pobambaru etu. Ni tempo etu, meongkomo i Yesu i rara Tombi ni Pue Ala, mpane mololita masisimbuku nauli, “Ima anu mangkamara, maimo komi manginu si Aku! 38 Mepotuumo komi si Aku bona tepabukei si komi apa anu teuki i rara Sura Ngkora Magali anu manguli: lako i rarara, moilimo ue anu mokiraka katuwu.” 39 Anu natunggai lolita ni Yesu iamo Inosa Magali, anu ina mendolu i tau anu mepotuu si Ia. Tempo ni Yesu mololita ewa etu, Inosa Magali baria mani mendolu i topeulaNa, lawi baria mani Ia rapopeawa.
40 Mawori tau mangepe lolita ni Yesu, ai ria sira anu manguli, “Ia mpuumo nabi anu nadandi ni Pue Ala ni banimpia.”
41 Ria mbui sira anu manguli, “Ia eimo Datu Topesorema!”
Agaiana ria mbui sira anu manguli, “Ae! Ia toGalilea! Baria manoto Datu Topesorema lako i Galilea. 42 Lawi i rara nu Sura Ngkora Magali teuki: Datu Topesorema iamo pemulea ni Datu Daudi anu lako i kota Beteleme, kota karapoanakaana i Daudi.” 43 Etumo mpane mombesonoi sira tau wori: ria sira anu mepotuu si Yesu, ria anu baria. 44 Ria sira anu mampenoka mosoko Ia, agaiana baria sira pebai.
Tadulako nu toYahudi baria mepotuu si Yesu
45 Awetu topokampai Tombi ni Pue Ala anu ratudu lau mosoko i Yesu mesola mpesola sira. ToParisi ai i kapala-kapala tadulako menomba mekune si sira, raulira, “Mangkiada mpane baria nisoko ai nikeni mai?”
46 Rasonoira, “Baria mani ria mogalo sadua tau kiepe anu mololita ewa pololitaNa!”
47 Nauli nu toParisi aretu, “Ba Naakalangi mbuimo komi? 48 Niita mbotowo, baria ria sadua lako i tadulakota ba toParisi anu mepotuu si Yesu. 49 Batena tau wori ngkida anu mepotuu si Ia, lawi baria sira manginsani Atura ni Musa. Sira aretu batena ina nasuku sira ni Pue Ala!”
50 Roo awetu, sadua lako i toParisi aretu anu rasanga i Nikodemus. I Nikodemus etu, sambelamo mampomberumpaka i Yesu.* Nauli ni Nikodemus i singka rangana: 51 “Mangula Atura ni Musa, baria kita pensani mosuku sadua tau ane baria mani napadongka notona ai raparesa babeiana.”
52 Mesono sira rangana, raulira, “Iko ewa toGalilea! Nuwila ai nuparesa i rara nu Sura Ngkora Magali. Baria ria nabi anu mensuwu lako i Galilea.”
Towawine anu rasumba mebualosi
53 [Roo awetu, mesolamo sira sadua-sadua lau i tombira.