I Yesu mopakoni lima nsobu tau
6
1 Roo awetu, laumo i Yesu i sambuteka rano Galilea, anu rasanga mbui Rano Tiberias. 2 Kadongkara i se etu, mawori mpuu tau meula si Ia, lawi mangitamo sira ope-ope tanda kuasa anu Nababei i popakaosaNa tau sira anu madua. 3 Lau i Yesu i mungku-mungkuna simbela-mbela ai topeguruNa, mpane momeso sira i se etu. 4 Ni tempo etu, ina dongka eo mabose agama Yahudi anu rasanga Eo Posusa Pasa. 5 Natotokimo ni Yesu mantoleli, mokoloromo sira tau wori mai mogompilisi Ia. Napekune si Pilipu, “Imba kita mobaluki pangkoni, tapopopakoni sira tau anu ewa ei kaworira?” 6 (Kamonsona, nainsani ni Yesu apa anu ina Nababei. Napekune ewa etu si Pilipu, lawi tunggaia ni Yesu mampetandaka pepotuu ni Pilipu.)7 Nauli ni Pilipu, “Nauda rongatu doi pera tapopobaluki pangkoni mpane tatibo-tiboka sira ope-ope tau arei, baria ina sondo nauda sadua-sadua sira saudi-saudi ngkida sira rakiraka.”
8 Lako ni se etu, sadua topeguruNa anu rasanga i Andaria, poka ni Simo Peturu, manguli, 9 “I se ei ria sadua anakoi anu meboku lima ogu roti ai rombaa bau, agaiana apamopae pobunduana i tau wori ei?”
10 Nauli ni Yesu, “Popomeso sira!” Momeso mpuumo sira i owo, lawi i pomesoara etu maisi owo. Kaworira tau aretu, kira-kira lima nsobu tomoane. 11 Lako ni se etu, nadoamo ni Yesu roti, Nauli maisi kalompena si Pue Ala, mpane Natibo-tiboka tau wori anu tongora momeso. Ewa etu mbui ka Nababeina i bau. Mangkonimo sira ope-ope duduura mabosu. 12 Awetu mabosumo sira ope-ope, nauli ni Yesu i topeguruNa, “Nigulu labina, bona ntena ria anu ratende ntoo.” 13 Ragulura mpuumo, labina sampulu rombingka lako i lima ogu roti anu rakoni nu tau wori ni mpongone.
14 Awetu raita nu tau wori tanda kuasa etu, mololitamo sira sadua ai sadua, raulira, “Kalawiana Ia mpuumo nabi anu radandi ni banimpia, anu rauli ina mai i dunia!” 15 Mewali, ria tunggaiara mopari-pari Ia mewali datura. Awetu nainsani ni Yesu tunggaiara, malambumo Ia lako ni se etu lau mopatani.
I Yesu molumako i wongko ue
16 Awetu ina madedimo, mendolumo sira topeguruNa lau i rano mampegia kadongka ni Yesu. 17 Rapegiara i Yesu duduuna madedi, agaiana baria mani dongka. Mewali, moduangamo sira lau monontosi kota Kapernaum. 18 Tongora moduanga, dongkamo pambui marimbuku, duduuna mabose balumba i rano etu. 19 Kira-kira lima ba aono kilo metemo kakaraona duangara rawosera, lako i wiwi nu rano etu, raitaramo i Yesu molumako i wongko ue mai mogompilisi sira. Mewali maruminsi kaekara. 20 Etumo mpane nauli ni Yesu, “Inee komi maeka! Aku mboto ei.” 21 Awetu raepera wotuNa, rapopesuaramo i Yesu i rara nu duangara. Awetu i Yesu mesua i rara duanga, ni tempo etu mbui kasaliu dongkamo sira i wiwi rano anu ratunggaira.
Mawori tau lau i sambuteka rano mangkadelo i Yesu
22 Ewa ineilena madondo, tau wori anu meari mani i sambuteka rano, lau sira mangkadelo i Yesu, raulira, “Imbamora Ia? Baria ria mensawi i duanga simbela-mbela ai topeguruNa ni ngkunuwia. Agaiana baria ria duanga ntanina i se ei, batena ngkida duanga anu rapensawii nu topeguruNa.” 23 Roo awetu, ria basangkia ogu duanga ntanina lako i kota Tiberias mai, mensopi sira gompi i pearia nu tau wori aretu. 24 Awetu raita nu tau wori aretu, kabarianamo ria i Yesu ai topeguruNa i se etu, moduangamo sira lau i kota Kapernaum mangkadelo Ia.
I Yesu iamo pangkoni anu mokiraka katuwu
25 Awetu dongka sira tau wori i sambuteka rano, rasumbara i Yesu ni se etu, mewali rapekunera, “Guru! Niimpia kadongkaMu i se ei?”
26 Mesono i Yesu, “Kuinsani tunggaiami mangkadelo Aku. Nikadelo Aku, baria nakenimpangitami tanda kuasa anu roomo Kubabei, agaiana nakeningkabosumimo mangkoni roti. 27 Inee komi mobago mangkadelo pangkoni anu sampalai kaopena ai anu polo mawai. Agaiana mobagoda komi mangkadelo pangkoni anu baria pensani mawai ai anu mokiraka katuwu malompe anu baria mokasopoa. Ana Manusia anu mokiraka pangkoni etu, lawi Iamo anu napakanoto ni Pue Ala.”
28 Mekune sira tau wori, “Apa anu sangangaa kipobago bona pobagoki mangula peundea ni Pue Ala?”
29 Nauli ni Yesu, “Eimo bago anu naunde ni Pue Ala: mepotuu komi si Ia anu natudu mai ni Pue Ala.”
30 Rauli mbui nu tau wori, “Ane ewa etu, tanda apa anu Nupopeitaka kami, bona kipotuu kalako si Pue Alana mpuu Iko? Apa anu ina Nubabei? 31 Ulububuki mangkonimo sira manna i pada lori ewa anu teuki i rara Sura Ngkora Magali, ‘Nakiraka sira roti anu lako i suruga.’”
32 Nauli ni Yesu, “Bona niinsani, baria i nabi Musa anu mokiraka pangkoni lako i suruga. TuamaKuda anu mokiraka komi pangkoni anu monso-monso lako i suruga. 33 Pangkoni anu nakiraka komi ni Pue Ala, iamo pangkoni anu mendolu mai lako i suruga, anu mokiraka katuwu i manusia.”
34 Raulika Ia nu tau wori, “Ane ewa etu, kiraka kowo kami pangkoni etu eo-eona!”
35 Nauli ni Yesu, “Aku eimo pangkoni anu mokiraka katuwu. Ima anu mai si Aku ai mepotuu si Aku, bariamo sira maoro ai bariamo sira mangkamara duduuna kasae-saeana. 36 Agaiana, ewa anu Kuuli ni mpongone, naudapae Aku niita, baria mani Aku nipotuu. 37 Ope-ope tau anu nakirakamo Aku nu TuamaKu, batena mai si Aku. Ai ima-ima anu mai si Aku, batena Kudoko ai baria Kusapuaka. 38 Lawi kamaiKu lako i suruga, baria Aku mobabei peundeaKu saduduaKu. Mai Aku mobabei peundea ni Pue Ala anu motudu Aku. 39 Eimo peundeaNa: bona lako i ope-ope tau anu Nakiraka Aku, inee ria sadua anu matonto; batena Kupopengkawangu sira ope-ope lako i kamate i eo pobotusi kasopoa dunia. 40 Eimo peundea nu TuamaKu: bona ope-ope tau anu mangita AnaNa ai anu mepotuu i AnaNa, ina mansumba sira katuwu malompe anu baria mokasopoa, ai ina Kupopengkawangu sira i eo pobotusi kasopoa dunia.”
41 Lako ni se etu, modeademo sira toYahudi, lawi nauli ni Yesu ka Ianamo pangkoni anu mendolu mai lako i suruga. 42 Mololitamo sira, raulira sadua ai sadua, “Bariapae i Yesu etu, ana ni Yusupu? Tainsani mpuu tinaNa ai tuamaNa. Mangkiada mpane Nauli ka Iana anu lako i suruga?”
43 Naulika sira ni Yesu, “Inee komi modeade. 44 Baria ria sadua anu pensani mai si Aku, ane baria nakeni nu TuamaKu anu motudu Aku. Ai ima ngkida anu mai si Aku ina Kupopengkawangu lako i kamate i eo pobotusi kasopoa dunia. 45 I rara nu sura nabi-nabi ni banimpia teuki ewa ei:
‘I Pue Ala ina mopaguru ope-ope topeulaNa.’ (Yesaya 54:13)
Mewali, ope-ope tau anu mangepe ai modoko patudu nu TuamaKu, batena mai sira si Aku. 46 Inee nipenoka ria sira anu mangita TuamaKu. Batena Ia anu natudu ni Pue Ala anu mangita i Pue Ala. 47 Bona niinsani: ima anu mepotuu si Aku, mansumba sira katuwu malompe anu baria mokasopoa. 48 Akumo pangkoni anu mokiraka katuwu.
49 Ulububumi ni banimpia i pada lori, mangkoni sira pangkoni anu rasanga manna, ai mamatemo mbui sira ope-ope. 50 Agaiana baria ewa etu pangkoni anu mendolu mai lako i suruga. Ima ngkida anu mangkoni pangkoni ei, baria sira mamate. 51 Aku eimo pangkoni anu mendolu mai lako i suruga, pangkoni nu katuwu! Tau anu mangkoni pangkoni ei mansumba sira katuwu malompe anu baria mokasopoa. Pangkoni nu katuwu ei, lempona wotoKu anu Kususu bona manusia mansumba katuwu.”
52 Awetu raepe nu toYahudi lolita ni Yesu etu, mombesonoi sira sadua ai sadua, raulira, “Adiwa mpane pensani Ia mosusu wotoNa si kita bona takoni?”
53 Etumo mpane mololita i Yesu, Nauli, “Kuulika komi, ane baria nikoni woto nu Ana Manusia, ai baria niinu raaNa, baria komi ina mansumba katuwu duduuna kasae-saeana. 54 Tau anu mangkoni wotoKu ai manginu raaKu, mansumba sira katuwu malompe anu baria mokasopoa, ai Kupopengkawangu sira lako i kamate i eo pobotusi kasopoa dunia, 55 lawi wotoKu monso-monso mpuu pangkoni anu mokiraka katuwu, ai raaKu monso-monso mpuu anu rainu, anu mokiraka katuwu. 56 Tau anu mangkoni wotoKu ai manginu raaKu, mosintuwu liliu sira ai Aku, ewa etu mbui Aku ai sira.
57 TuamaKu anu motudu Aku, Iamo puuna katuwu, ai Aku tuwu lako si Ia. Ewa etu mbui tau anu mangkoni wotoKu, mansumba sira katuwu lako si Aku. 58 Etu mpuumo pangkoni anu mendolu lako i suruga, tau anu mangkoni pangkoni etu, ina tuwu duduuna kasae-saeana. Pangkoni etu, baria ewa manna anu rakoni nu ulububumi ni banimpia. Lawi nauda sira mangkoni manna etu, batera mamate.”
59 Ope-ope etu napadongka ni Yesu, i tempona mepatudu i tombi penombaa i Kapernaum.
Mawori tau mopawia peulara si Yesu
60 Awetu raepe nu topeulaNa pololitaNa, mawori sira anu manguli, “Ae! Mapari mpuu patudu etu. Baria ria anu madota mampetingai patudu etu.”
61 Agaiana nainsani ni Yesu podeadera nu topeulaNa. Etumo mpane Naulika sira, “Ba niposumpu rara mangepe patuduKu ni mpongone? 62 Ane awetuda, adiwa ane niita Ana Manusia, mengkaore mpesola lau i peariaNa mpolinguruna? 63 Inosa ni Pue Alamo anu mokiraka katuwu. Karoso nu manusia baria mobundu. PololitaKu anu Kupadongkaka komi mensuwu lako i Inosa ni Pue Ala ai mokiraka katuwu. 64 Agaiana nauda ewa etu, ria mpuu lako i olomi anu baria mepotuu.” Nauli ni Yesu ewa etu lawi Nainsani mpuumo lako ni mpolinguruna kaimana anu baria ina mepotuu si Ia, ai ima anu ina mampobalu Ia. 65 Nauli mbui ni Yesu, “Etumo mpane Kuulika komi ni mpongone, baria ria sadua anu pensani mai si Aku, ane baria nakenimpeundea nu TuamaKu.” 66 Mepuu ni tempo etu, mawori topeulaNa mopalengi Ia. Bariamo raundera meula si Ia.
I Peturu mopangaku peulana si Yesu
67 Mewali, mekune mbuimo i Yesu i topeguruNa anu sampulu rodua, Nauli, “Ba ina nipalengi mbui Aku?”
68 Nauli ni Simo Peturu si Ia, “Ane kipalengi Iko Pue, si imamo kami lau? Iko ngkida anu mampololita lolita anu mokiraka katuwu malompe anu baria mokasopoa. 69 Kipotuumo ai kiinsani ka Ikona anu magali lako si Pue Ala.”
70 Nauli ni Yesu, “Aku mpuumo anu mampelisi komi anu sampulu rodua ei. Naudapae ewa etu, ria sadua lako i olomi anu nakuasai Datu nu Seta.” 71 Anu natunggai ni Yesu iamo i Yudasi ana ni Simo Iskariot. Lawi nauda i Yudasi mewali sadua lako i sampulu rodua topeguruNa, iamo anu ina mampobalu i Yesu i iwaliNa.