I Yesu mopakaosa tau i eo penombaa
5
1 Roo awetu, mangokamo i Yesu lau i Yerusale, mangula posusa nu toYahudi. 2 Gompi i boboka pesuangaa i Yerusale ria boboka anu rasanga “Boboka Dimba”. I se etu ria saogu wusu, i rara basa nu toYahudi sangana Betesda. Ria lima mbuana tambale anu metoleliki wusu etu. 3 Mawori tau madua mogulu i se etu. Ria sira anu mabilo, anu mawara paara, ai anu mapalu, ope-ope sira maturu liliu i tambale etu. [Mampegia sira pokale nu ue i wusu etu. 4 Lawi sambela-sambela ria malaeka ni Pue anu mendolu mai i wusu etu mampopokale ue. Ai ima anu ilodo mendolu i rara nu wusu i tempona ue mokale, kasaliu maosamo ia lako i sakina, saki apa ngkida.]5 Ria i se etu sadua tomoane, tolu mpulu walu mpaemo kasaena madua. 6 Naita ia ni Yesu maturu i se etu, ai nainsani ni Yesu kasaenamo madua. Napekune, “Nuundepae maosa?”
7 Nauli nu tau etu, “Pue, baria kowo ria anu mangkeni aku lau i rara nu wusu i tempona ue mokale. Awetu aku lako ina lau, riamo anu mampeilodongi aku.”
8 Nauli ni Yesu, “Pengkawangumode, wilulumode alimu, ai polumakomode.” 9 Maosa mpuumo tau etu, nawilulu alina, mpane molumako ia.
Pewalina etu i eo penombaa nu toYahudi. 10 Etumo mpane tadulako-tadulako nu toYahudi mokambaroka tau anu lako maosa etu, raulikara, “Eo ei, eo penombaa! Baria iko pensani mangkeni alimu.”
11 Nauli nu tau etu, “Natudu aku nu tau anu mopakaosa aku ni mpongone, Naulika aku: ‘Wilulumode alimu mpane polumakomode.’”
12 Rapekunera, “Ima anu motudu iko mangkeni alimu mpane molumako?” 13 Agaiana baria nainsani kaimana anu mopakaosa ia, lawi i Yesu lambu ngkandii ai bariamo raita i olo nu tau wori.
14 Baria masae lako ni se etu, i Yesu mampomberumpaka tau etu i Tombi ni Pue Ala, Naulika, “Maosamo iko, ineemo iko mobabei dosa, bona baria iko narumpa ba apa-apa anu melumbu kadaana.” 15 Lako ni se etu, laumo tau etu mampomberumpaka sira tadulako nu toYahudi, naulika sira ka i Yesuna anu mopakaosa ia. 16 Etumo mpane tadulako nu toYahudi mangkadelo dala mopakasusa i Yesu, lawi mepakaosa Ia i eo penombaa.
17 Naulika sira ni Yesu “TuamaKu mobago duduuna ei-ei, ai Aku mbui mobago.” 18 Lako ni se etu, tadulako nu toYahudi mopari-pari mangkadelo dalara mampopate Ia. Mobabei sira ewa etu, baria wule nakeningka Naliungina ada i eo penombaa, agaiana lawi Nauli mbui ka i Pue Alana TuamaNa; lempona, mopasimbela Ia wotoNa ai i Pue Ala.
Pobago ai kuasa ni Yesu
19 Ni tempo etu, nauli ni Yesu, “Kamonsona, Ana ni Pue Ala, baria Ia pensani mobago mangula peundeaNa saduduaNa. Naitamo apa anu nababei nu TuamaNa, ai batena etu anu Napobago. Apa ngkida bago nu TuamaNa, etu mbui bagoNa, 20 lawi TuamaNa mampokakaia Ia, ai Napopeitaka si Ia ope-ope anu Nababei. Ai ria mbui bago anu ina Napopeitaka Ia anu melumbu kabosena lako i bago anu roomo Napobago. Ina Napobago bago etu duduuna tingkara mpuu komi. 21 Ewa TuamaNa mampopengkawangu tomate ai mokiraka sira katuwu, Ia mbui mokiraka katuwu si ima ngkida mangula peundeaNa. 22 TuamaNa bariamo mobotusi sinangka kara-kara nu manusia, agaiana kuasa pobotusi etu Nasusumo si Ia, AnaNa. 23 Nababei ewa etu, bona ope-ope tau mobila Ia ewa pebilara i TuamaNa. Ima anu baria mobila Ia, baria mbui sira mobila TuamaNa anu motudu AnaNa.
24 Mamonso mpuu pololitaKu ei: ima-ima anu mampetingai pololitaKu mpane mepotuu si Pue Ala anu motudu Aku, mansumba sira katuwu malompe anu baria mokasopoa. Baria sira ina rasuku nakeningkamadosara. Tepawiamo sira lako i kamate, mpane mansumba sira katuwu. 25 Sangangaa nipotuu: ina dongka tempona ai kamonsona dongkamo tempona tomate ina mangepe wotu nu Ana ni Pue Ala, ai sira anu mangepe wotuNa ina mansumba katuwu. 26 Lawi TuamaNa makuasa mokiraka katuwu. Ewa etu mbui, AnaNa Nakiraka kuasa mokiraka katuwu. 27 Nakiraka mbui Ia kuasa mobotusi kara-kara nu manusia, lawi iamo Ana Manusia.
28 Inee nipotingkara pololitaKu ei, lawi sambela tempo ope-ope tau anu mamate ina mangepe wotuNa, 29 ai ina mengkawangu sira lako i talumbara. Tau anu mobabei lompe ina rapopengkawangu sira bona mansumba sira katuwu malompe. Agaiana tau anu mobabei daa ina rapopengkawangu mbui sira bona rasuku.”
I Yesu manguli kaimana sabiNa
30 “Aku, baria pensani mobabei apa-apa mangula peundeaKu saduduaKu. Kubotusi sinangkana mangula apa anu naparentaika Aku nu TuamaKu. PebotusiKu manoto, lawi baria Aku mangula peundeaKu saduduaKu, agaiana mangulada Aku peundea ni Pue Ala anu motudu Aku.
31 Ane rapana Aku saduduaKu anu mampololita kono i wotoKu, pololitaKu etu baria pensani rapotuu. 32 Agaiana ria anu ntanina anu mosabiki Aku iamo TuamaKu, ai Kuinsani kamonsona pesabikiNa. 33 Ni banimpia, motudu komi tuduami lau si Yohane mampekune kono si Aku, ai napololita pesabikina si sira. Apa anu nauli etu, ope-ope batena mamonso. 34 Agaiana kamonsona baria Kuparaluu sabi lako i manusia. Kupopaingaaka komi lolita ni Yohane etu, bona mansumba komi katuwu malompe. 35 I Yohane etu ewa sulo anu mewangka ai mangkeni kamabaa si komi. Mpane komi, matono mpuu komi mangepe pololitana. Agaiana kamatonomi etu sampalai ngkida.
36 Agaiana ria mbui pesabiki anu melumbu lako i pesabiki anu napadongka ni Yohane. Lawi apa anu tongona Kupobago ei-ei, iamo bago anu naparentaika Aku nu TuamaKu, bona Kuparoo. BagoKu eimo anu mopatongawa ka Akunamo anu natudu nu TuamaKu mai i dunia ei. 37 Ai melumbu lako i se etu, TuamaKu anu motudu Aku mai, Ia saduduaNa anu mampololita kono si Aku. TuamaKu etu, baria mani sambela niepe wotuNa, ai baria mani sambela niita lenseNa. 38 PololitaNa baria teboli i rarami, lawi baria komi mepotuu si Aku anu Natudu mai. 39 Moparesamo komi Sura Ngkora Magali, lawi nipenokami lako i Sura Ngkora Magali etu nisumba katuwu malompe anu baria mokasopoa. Naudapae Ngkora Magali etu anu mololita kono si Aku. 40 Agaiana, baria mani niunde mai si Aku bona mansumba komi katuwu malompe.
41 Baria Aku mampopetoia i manusia. 42 Agaiana Kuinsani mpuu komi, kabariana ria asimi si Pue Ala. 43 Mai Aku ai kuasa nu TuamaKu, agaiana baria Aku nidoko. Agaiana ane ria sira anu dongka ai kuasara saduduara, niunde modoko sira. 44 Adiwapae ka nipotuuKu, lawi mampenoka ngkida komi ratoia nu rangami, baria niunde mangkadelo petoia lako si Pue Ala. 45 Agaiana inee nipenoka ka Akuna anu ina mosalai komi i TuamaKu. Kamonsona i nabi Musada anu nisarumaka anu ina mosorema komi etu, anu ina mosalai komi. 46 Ane monso-monso nipotuu i Musa, manoto nipotuu mbui Aku, lawi apa anu nauki ni Musa etu, mampololita kono Aku. 47 Agaiana ane baria nipotuu apa anu nauki ni Musa, adiwamo kapensanina nipotuu pololitaKu.”