I Yesu baria radoko nu toNasare
6
1 Roo ni se etu, i Yesu ai topeguruNa mangoka lako i kota Kapernaum, mesola lau i boeaNa. 2 Ni eo penombaa, laumo Ia i tombi penombaa mopaguru tau. Mawori tau i se etu. Awetu raepera patudu ni Yesu, tingkara sira, raulira, “Imada anu mopatudu Ia mpane ewa etu katopaNa? Katopa apa anu ria si Ia? Lako imba kuasaNa mobabei tanda kuasa? 3 Bariapae wule basi ngkida Ia, ana ni Maria. Poka ni Yakobu, i Yoses, i Yudasi ai i Simo. Ai pokaNa towawine, ria mbui sira simbela-mbela ai kita i se ei.” Etumo mpane baria radokora i Yesu.4 Lako i se etu, naulika sira ni Yesu, “Sadua nabi rabila imba ngkida kalauaana. Agaiana ane i boeana saduduana, ai i olo nu pokana, baria ia rabila.” 5-6 Mawuli rara ni Yesu lawi baria sira mepotuu si Ia. Etumo mpane saudi ngkida tanda kuasa anu pensani Nababei i se etu, wule basangkia dua ngkida tomadua anu Napakaosa.
I Yesu motudu topeguruNa mopadongka Ngkora ni Pue
Roo ni se etu, laumo i Yesu mampolumakoi boea-boea anu gompi i se etu ai mopaguru tau. 7 Naronde topeguruNa anu sampulu rodua, Natudu sira rorodua lau mobambari Ngkora ni Pue ai Nakiraka sira kuasa mampopeloso seta. 8 Lako baria mani sira mangoka, Napatudu sira ewa ei, “Inee komi mangkeni apa-apa i polumakomi, batena ngkida lai. Mogaloda roti, tas ba doi, inee! 9 Pensani komi mekandupa, ai badumi sondomo anu i wotomi ngkida.” 10 Nauli mbui, “Ane dongka komi i sambua boea, mpane ria sira tau anu modoko komi i tombira, meari komi i se etu duduumi mangoka lau i boea ntanina. 11 Agaiana ane tau anu meari i boea etu baria modoko komi, ba baria mangunde mampetingai pololitami, nipalengi boea etu, ai nitaronta awu anu mentaka i talampapaami, etu tandana mewali pepopainga si sira.”
12 Awetu i Yesu roomo mopatudu sira topeguruNa anu sampulu rodua, mangokamo sira topeguruNa aretu lau mobambarika tau wori, bona menonso sira lako i dosara. 13 Topeguru ni Yesu aretu mampopeloso maisi seta anu mokuasai tau, ai mobasaika lana saitun i tau anu madua ai mopakaosa sira.
Kamate ni Yohane Toperiu
14 Ni tempo etu, Datu Herode Antipas mangepe apa anu nababei ni Yesu, lawi sanga ni Yesu tebambarimo imba-imba ngkida. Ria anu manguli, “I Yesu iamo i Yohane Toperiu anu tuwu mpesola! Etumo mpane ria kuasaNa mobabei tanda anu mewulii.”
15 Agaiana ria mbui anu manguli, “Ia i nabi Elia.”
Ai ria mbui anu manguli, “Ia sadua nabi, ewa nabi anu ni banimpia.”
16 Awetu naepe ni Datu Herode bambari etu, nauli, “Manotomo si aku ka ianamo i Yohane Toperiu! Ni banimpia kutudu tau motompoki tambolona, agaiana ei-ei tuwu mpesola.”
17-18 Awei tunturakana kamate ni Yohane Toperiu. Ni tempo etu, Datu Herode mandoa i Herodias napotombika. I Herodias etu, iamo samboko nu pokana anu rasanga i Pilipu. Mawori mbelamo i Yohane mokambaroka i Herode lako i babeiana etu, naulika, “Baria iko pensani mampotombika towawine nu pokamu! Babeiamu etu moliungi Atura ni Musa.” Etumo mpane i Herode motudu surudadona lau mosoko i Yohane, mpane rapopesua i rara nu tarunggu.
19 Etumo mpane, makoi rara ni Herodias si Yohane, ai napenoka napopate. Agaiana baria ia mampaka mopabukei tunggaiana etu lawi nasomboki ni Herode, 20 lawi i Herode motudumo sira surudadona bona mokampai lompe i Yohane i rara nu tarunggu bona baria ia marugi. I Herode baria pebai mampopate i Yohane lawi nainsani ka iana tau anu manoto babeiana. Bela-belana i Yohane mololita, mapari rarana mangepe pololita ni Yohane, agaiana naunde mbui mampetingai.
21 Kasopoana ria tempo ni Herodias. Ni tempo etu, Datu Herode mobabei posusa mokaendo eo karapoanakana. Mawori tuana naronde, tadulako ai topebuku anu lako i tana Galilea. 22 I posusa etu, ana ni Herodias anu towawine mesua mpane motaro i lio nu torare. Matono mpuu i Datu Herode mampeita potaro nu anantowawine etu, ai ewa etu mbui torarena. Nauli ni Datu Herode i anantowawine etu, “Apa anu nuunde? Apa ngkida anu nuperade, ina kukiraka iko!” 23 Mewali modandi ai mosumpamo i Datu Herode, nauli, “Apa ngkida anu nuperade, nauda santongo lako i peparentaaku, ina kukiraka iko!”
24 Laumo anantowawine etu mekune i tinana, nauli, “Tina, apa anu sangangaa kuperade?”
Nauli nu tinana, “Perademode woo ni Yohane Toperiu!”
25 Roo awetu, mesolamo ia lau si Datu Herode, ai kasaliu nauli, “Kuperade woo ni Yohane Toperiu raboli i wongko dula.”
26 Awetu naepe ni Herode pamperadena, mapari rarana. Agaiana dandina i anantowawine etu bariamo pensani nadii mpesola, lawi modandimo ia i lio nu torarena. 27 Etumo mpane kasaliu natudu sadua surudadona, lau mangala woo ni Yohane Toperiu. Mewali lau mpuumo surudado etu. 28 Nakeni mai woo ni Yohane Toperiu etu i wongko nu dula, mpane nasusuka anantowawine etu, mpane anantowawine etu mokiraka tinana. 29 Awetu raepe nu topeguru ni Yohane apa anu mewali etu, laumo sira mangala wotowata ni Yohane mpane rapaiwura.
I Yesu mopakoni lima nsobu tau
30 Ni tempo etu, mesolamo sira suro ni Yesu anu Natudu mopadongka Ngkora ni Pue Ala, ai rapadongkara si Yesu ope-ope anu rababeira ai anu rapatudukara i tau wori. 31 Ni tempo etu mbui, mawori mpuu tau mombesasambei mai si Yesu, Ia ai topeguruNa ina bariamo sira mampaka mangkoni. Etumo mpane nauli ni Yesu i topeguruNa, “Aginamo tapalengi tau wori, bona mengkaroo kita sangka, i pearia anu karao lako i boea ei.” 32 Mewali, memponemo sira i duanga lau i pearia anu maboa.
33 Agaiana tau wori anu mai lako i kota-kota anu i wiwi rano mangita kalambura, ai manginsani mbui sira imba kalauaara. Etumo mpane, melangkamo sira mangula dala i lore, duduuna sirada anu ilodo dongka mpane lako i Yesu ai topeguruNa. 34 Pendolu ni Yesu lako i duanga, Naita mbuimo tau wori mampegia Ia. Maasi raraNa mangita sira, lawi sira ewa dimba anu baria raporewu. Mewali napepuumo ni Yesu mopaguru sira mampopengaa patudu.
35 Awetu ina madedimo, laumo sira topeguruNa mogompilisi Ia, raulikara, “Guru, pearia ei karao lako i boea, ai ina madedimo. 36 Aginamo Nutudu sira tau wori lau i boea-boea anu gompi lako i se ei, bona mobaluki sira pangkonira.”
37 Nauli ni Yesu, “Komi anu mopakoni sira.”
Rasonoi nu topeguruNa, “Apamopae anu kikiraka sira! Ina laupae kami mobaluki roti, anu balukina rongatu doi pera, bona tapopopakoni sira tau anu ewa ei kaworira?”
38 Nauli ni Yesu, “Sangkia ogu roti anu ria si komi?”
Awetu roomo rapeitara, raulira, “Lima ogu roti ai rombaa bau ngkida.”
39 Roo ni se etu, natudumo sira ni Yesu tau wori momeso motobu-tobu i owo anu malewau. 40 Momesomo sira motobu-tobu, ria anu sangatu dua santobu, ria mbui anu lima mpulu dua santobu. 41 Roo awetu, naalamo ni Yesu roti lima ogu ai bau rombaa, mengoa Ia i langi manguli maisi kalompena si Pue Ala, mpane Nabinse-binse roti etu ai Nakiraka i topeguruNa bona ratibo-tiboka tau wori etu. Ai bau anu rombaa etu Nabinse-binseka mbui sira ope-ope. 42 Mangkonimo sira duduura mabosu. 43 Roomo sira mangkoni, topeguruNa mogulu labi nu roti sampulu rombingka buke, baria tepesua labi nu bau. 44 Kaworira anu mangkoni i tempo etu kira-kira lima nsobu tomoane.
I Yesu molumako i wongko ue
45 Roo ni se etu, i Yesu motudumo topeguruNa moduanga moilodo lau i sambuteka rano i Betsaida, ai Natudumo tau wori mesola. 46 I karooNa mampogaaki tau wori, mempanaimo Ia i bulu lau mekakae. 47 Awetu madedimo, topeguruNa i tongo ranomo sira. Agaiana, Ia ria mani i lore saduduaNa. 48 Ni tempo etu, naita ni Yesu topeguruNa moduanga i rano, mapari raepera mowose, lawi pambui mewui mai lako i lio nu duangara. Gompi mabaa, molumako Ia i wongko ue monontosi sira. Agaiana awetu Ia dongka si sira, ai ina Naliungimo sira, 49 raita nu topeguruNa ria tau anu molumako i wongko ue, monganga-nganga sira nakeningkaekara, raulira, “Dou tanuana!” 50 Maekamo sira mangita Ia.
Etumo mpane naulika sira ni Yesu, “Pakaroso rarami! Inee komi maeka! Aku mboto ei.” 51 Mensawimo Ia i duanga simbela-mbela ai sira, kasaliu mengkaroo pambui. Mawuli mpuu rarara. 52 Naudapae baria mani sira masae mangita tanda kuasa anu Nababei ai roti ni mpongone, baria mani kasaliu manoto i rarara kaimana mpuu i Yesu.
I Yesu mopakaosa mawori tau anu madua i Genesaret
53 Kadongkara i sondaka i sambuteka rano, mendolumo sira lako i duanga i tana anu rasanga Genesaret. 54 Awetu sira mendolu lako i duanga, tau anu meari i boea etu, mangita kadongkana i Yesu i tanara. 55 Mewali, melangkamo sira lau i boea-boea anu gompi, mpane mandoa ope-ope rangara anu madua rakenira lau si Yesu. Imba ngkida raepera kariaa ni Yesu, i se etumo tau mangkeni rangara anu madua. 56 Imba ngkida kalauaa ni Yesu, ba i kota ba i boea, rakenira rangara anu madua rabolira i pobalu-balua, mpane merade sira si Yesu, bona tau anu madua rapaliu sira mampetui wuntu nu jubaNa ngkida. Mewali tau anu madua aretu, Napaliumo sira mampetui wuntu nu jubaNa, ai ope-ope anu mampetui wuntu nu jubaNa, kasaliu maosa sira.