I Yesu mopakaosa tau anu nakuasai nu seta
5
1 Lako ni se etu, dongkamo sira i sambuteka rano Galilea, i tana Gerasa. 2 Mendolumo sira lako i duangara, maimo sadua tomoane anu napesuangi nu seta mampomberumpaka i Yesu. 3 Tau etu meari ngkida i talumba. Baria rabuku nu tau mosilu ia, nauda sira mopake rante, lawi maruminsi karosona. 4 Mawori mbela paana ai palena rasilu, agaiana koloro ai rante anu rapoposilu palena batena ngkida nabotu-botu liliu, awetu mbui ai besi anu i paana natepo-tepo. Etumo mpane baria ria sadua anu nabuku mosoko ia. 5 Eo-eona ai wengi-wengina, molulumako ia i talumba ai i mungku-mungkuna, monganga-nganga ai mobelai wotona ai watu. 6 Karao mani, naita i Yesu ina dongka, melangka ia lau mampomberumpaka i Yesu, mpane molingkudu menomba si Yesu. 7-8 I Yesu mampopeloso seta anu mampesuangi tau etu, Nauli, “Peloso lako i tau ei!”Monganga tau etu, nauli, “Yesu Ana ni Pue Ala anu i suruga! Mangkiada mpane mai Iko? Kuperade bona modandi Iko i rara sanga ni Pue Ala, bona baria aku ina Nupopesiasi!”
9 Mekune i Yesu si ia, “Ima sangamu?”
Nasonoi, “Sangaku i Legion,a lawi mawori kami anu mampesuangi tau ei.” 10 Raperade nu seta aretu si Yesu bona inee sira napopeloso lako i tana etu.
11 Baria karao lako i se etu, ria boe sangguruma tongora mansui i papa bulu. 12 Seta aretu merade si Yesu, raulira, “Tudu kami mesua i boe aridou.” 13 Nauli ni Yesu, “Laumode komi!” Mewali, meloso mpuumo seta aretu kasaliu mesua i boe. Mewali boe aretu, melangka sira duduura manawu i rano, mamate sira malinso. Kaworira anu mamate kira-kira ronsobu mbaa.
14 Awetu raita nu tau anu mokampai boe apa anu mewali, melangkamo sira lau i kota ai i boea anu gompi mopadongka apa anu raitara. Etumo mpane maimo sira tau wori mampenoka mangita apa anu mewali. 15 Awetu sira dongka si Yesu, raitara tau anu nakuasai nu seta ni mpongone, momeso ewa tau biasamo, mebadumo, ai manotomo pekirina. Etumo mpane maekamo sira. 16 Tau anu mangita apa anu nababei ni Yesu ni mpongone, mopatuntuka tau ntanina sira apa anu mewali i tau anu nakuasai nu seta aretu, ai apa anu mewali i boera. 17 Roo awetu, tau wori aretu merade sira si Yesu bona malambu Ia lako i tanara. Mewali, mensawi mpesola i Yesu i rara nu duanga.
18 Tongo ni Yesu mensawi i duanga, tau anu nakuasai nu seta ni mpongone merade bona meula ia si Yesu. 19 Agaiana baria Napaliu, Naulika, “Pesolamode lau i tombimu, nuulika sira tosamboeamu apa anu nababeika iko ni Pue Ala ai adiwa asiNa si iko.” 20 Lau mpuumo ia i tana Dekapolis,b mopadongka apa anu nababei ni Yesu. Tingkara ope-ope tau anu mangepe bambari etu.
I Yesu mopakaosa sadua towawine anu mampetui jubaNa, ai mopatuwu mpesola ana ni Yairus
21 Mesola mbuimo i Yesu lau i sambuteka rano. Awetu dongka Ia, tau wori motoleliki Ia. Tongona mani i wiwi nu rano, 22 dongkamo sadua lako i tadulako nu tombi penombaa nu toYahudi, sangana i Yairus. Awetu ia mangita i Yesu, molingkudumo ia i lio ni Yesu 23 merade tulungi, nauli, “Ina mamatemo anaku towawine i tombi. Lau sala kita i tombiku, Nupetui kowo ia bona maosa ntena mamate.” 24 Laumo i Yesu simbela-mbela ai tau etu, ai tau wori mombepii-pii sira mangula Ia.
25 I olo nu tau wori aretu, ria mbui sadua towawine anu sampulu rompaemo mantodisa saki nu towawine, mensuwu liliu raana. 26 Mawori mbela merade bona rapakulii nu sando, duduuna ope isi nu tombina napobalu napopobaiari. Agaiana baria ria kaosana, tetambaida karuminsi nu sakina. 27-28 Lawi mawori mbelamo ia mangepe apa anu rapololita kono si Yesu, etumo mpane nagompilisi i Yesu lako i taliku ni Yesu i tongo nu tau wori, nauli nu rarana, “Nauda kupetui ngkida wuntu renda nu jubaNa, sangangaa maosa aku!” Mewali napetui mpuumo wuntu renda nu jubaNa, 29 awetu napetui, ungangkidamo tepompo raana, ai naepeka wotona maosamo.
30 Ni tempo etu mbui, naepeka ni Yesu ria kuasa anu mensuwu lako si Ia. Membalilimo Ia i tau wori, Nauli, “Ima anu mampetui jubaKu?”
31 Rauli nu topeguruNa, “Guru, mawori mpii tau anu mombepii-pii mogagu Iko. Mangkiada mpane Nupekune ima anu mampetui Iko?” 32 Agaiana Natotoki mantoleli mangkadelo kaimana anu mampetui Ia.
33 Nainsani nu towawine etu apa anu mewali i wotona. Moradamo ia nakeningkaekana, mpane mai molingkudu i lio ni Yesu mopangaku apa anu nababei. 34 Naulika ni Yesu towawine etu, “AnaKu! Maosamo iko lawi mepotuu iko si Aku. Pesolamode i rara nu kalompe-lompe. Maosamo iko, bariamo ria sakimu.”
35 Tongo ni Yesu mololita mani, dongkamo sira basangkia batua lako i tombi ni Yairus anu mangulika i Yairus, “Tua, anamu mamatemo. Ineemo iko mopakasusa i Guru.”
36 Awetu naepe ni Yesu apa anu rauli nu batua aretu, Naulika i Yairus, “Inee iko maeka, pepotuumode si Aku!” 37 Napapulomo ni Yesu polumakoNa, agaiana baria Napaliu tau wori meula si Ia, wule i Peturu, i Yakobu ai i Yohane toi ni Yakobu. 38 Kadongkara i tombi ni Yairus, naita ni Yesu mawori tau anu mogeo-geo ai maruminsi potumangira. 39 Awetu mesua Ia i rara nu tombi, Naulika sira, “Mangkiada mpane mogeo-geo komi ai maruminsi potumangimi? Baria mboto Ia mamate, maleta ngkida.” 40 Awetu raepera pololitaNa, rapapantawairada i Yesu. Lako ni se etu, ope-ope tau natudu ni Yesu meloso lako i rara nu tombi, mpane mesuamo i Yesu i paturua nu anakoi etu simbela-mbela ai tinana ai tuamana, ai topeguruNa anu tolu dua. 41 Napatoromo pale nu anakoi etu, mpane Naulika, “Talita kum!” Lempona: pengkawangumode anaKu. 42 Momesomo anakoi etu ai kasaliu molumako. (Lawi tinuwu nu anakoi etu, sampulu rompaemo.) Tingkara mpuumo sira ope-ope tau anu mangita. 43 Agaiana i Yesu moombo sira, Nauli, “Inee nipololita apa anu lako mewali ei ba si ima ngkida.” Ai Nauli mbui, “Nipakoni anakoi ei.”