I Yesu mopatongawa kuasaNa moampuni dosa
9
1 Lako i se etu, mensawimo i Yesu simbela-mbela ai topeguruNa i duanga, moweta rano sira mesola lau i peariaNa i kota Kapernaum. 2 Kadongkara i Kapernaum, ria basangkia dua tau anu mokowa sadua tau anu mapalu rapopaturu i ali, lau sira si Yesu. Awetu naita ni Yesu kabosena pepotuura, Naulika tau anu mapalu etu, “AnaKu, nupakaroso raramu! Teampunimo dosamu.”3 Basangkia guru agama mangepe lolita ni Yesu etu, nauli nu rarara, “Tau ei mopakoi i Pue Ala!”
4 Agaiana nainsani ni Yesu apa anu ria i rarara. Etumo mpane Naulika sira, “Mangkiada mpane mampekiri komi anu madaa i rarami? 5 Umba anu mamura rauli: ‘Teampunimo dosamu,’ ba ‘peongko ai polumakomode.’ 6 Ei-ei ina Kupatongawaaka komi, i dunia ei Ana Manusia makuasa moampuni dosa.” Mewali, membalilimo i Yesu i tau anu mapalu etu, Naulika, “Pengkawangu, wilulumode alimu, mpane mesolamo iko i tombimu!” 7 Meongko mpuumo tau anu mapalu etu, mpane mesola lau i tombina.
8 Awetu raita nu tau wori apa anu mewali etu, maekamo sira, mpane motoia sira i Pue Ala, lawi i Pue Ala mokirakamo kuasa anu awetu kabosena i manusia.
I Yesu moronde i Matiu mewali topeguruNa
9 Roo awetu, malambumo i Yesu lako i se etu. Tongora molumako, Naita sadua toperuru asele anu momeso i pearia mogulu asele, sangana i Matiu. Nauli ni Yesu si ia, “Peulamode si Aku!” Meongkomo i Matiu ai kasaliu meula si Yesu.
10 Lako i se etu, i Yesu ai topeguruNa mangkoni sira i tombi ni Matiu. Tongora mangkoni, dongka mbui sira mawori toperuru asele ai tau ntanina mangkoni simbela ai sira. Tau aretu raimba tau madosa. 11 I se etu ria sira toParisi anu mangita pangkonira simbela. Etumo mpane rapekunera i topeguru ni Yesu, “Mangkiada mpane gurumi mangkoni simbela ai toperuru asele ai tau anu madosa?”
12 Naepe ni Yesu pololitara, etumo mpane Naulika sira, “Tau anu baria madua, baria paraluu mangkadelo sando. Tau anu madua ngkida anu paraluu mangkadelo sando. 13 Baria Aku mai moronde tau anu manguli manoto babeiara. KamaiKu ei, moronde tau madosa bona menonso sira lako i dosara. Mewali, nipekiri sala apa lempona Sura Ngkora Magali anu teuki ewa ei:
‘Baria binata anu Kuunde nipopenomba si Aku.
Anu Kuunde, bona maasi komi i singka manusiami.’” (Hosea 6:6)
Topeguru ni Yesu baria mopuasa i tempona mani i Yesu ria simbela-mbela ai sira
14 Lako ni se etu, dongka sira basangkia topeguru ni Yohane Toperiu si Yesu, rapekunera si Ia, “Kami ai toParisi mopuasa. Mangkiada mpane topeguruMu baria sira mopuasa?”
15 Nasonoi sira ni Yesu ai ngkora pandiri, Nauli, “Tau i posusaa pebua baria mapari rarara i tempona tomoane anu rabua ria mani i olora. Agaiana sambela tempo, tomoane anu rabua ina raala lako i olora. I tempo etuda, lako mopuasada sira.”
16 Roo awetu, i Yesu mopadongka ngkora pandiri anu rompangka, Nauli, “Baria ria sadua tau anu motampilengi badu anu masae ai sansepa bana anu bou. Lawi sansepa bana anu bou kasae-saea kalalaua mengkuru mpane masepa badu anu masae etu, ai kalalaua maemba kasepaana. 17 Ewa etu mbui baria malompe mokando anggoro anu bou i pambolia anggoro lako i kolimba anu masaemo. Lawi ina masepa pambolia anu masae etu, duduuna mabubu anggoro. Mewali anggoro anu bou sangangaa rakando i pambolia anu bou, bona ope-opena batena malompe.”a
I Yesu mopatuwu sadua anakoi ai mopakaosa sadua towawine anu mampetui jubaNa
18 Tongo ni Yesu mololita i topeguru ni Yohane Toperiu, dongkamo sadua tadulako nu tombi penombaa nu toYahudi molingkudu i lio ni Yesu merade tulungi, nauli, “Anaku towawine lako mamate. Lau kita i tombiku, Nupetui ia bona tuwu mpesola.” 19 Meongkomo i Yesu ai topeguruNa meula i tau etu lau i tombina.
20-21 Tongora molumako i dala, laumo sadua towawine mogompilisi i Yesu lako i talikuNa mai. Towawine etu, sampulu rompaemo mantodisa saki nu towawine, mensuwu liliu raana. Nauli i rarana, “Nauda wule kupetui wuntu renda nu jubaNa, sangangaa maosa aku.” Lako ni se etu, nagompilisi mpuumo i Yesu mpane napetui mpuumo wuntu renda nu jubaNa.
22 Napembalilingi ni Yesu towawine etu, Naulika, “AnaKu, nupakaroso raramu! Nakenimpepotuumu si Aku, maosamo iko!” Ni tempo etu ngkimo, maosa mpuumo towawine etu.
23 Roo ni se etu, pulomo i Yesu lau i tombi nu tadulako tombi penombaa etu. KadongkaNa i tombi etu, Naita mawori tau anu motulali ai motumangi. 24 Naulika sira, “Peloso komi ope-ope lako i se ei. Anakoi ei baria mamate. Maleta ngkida ia.” Awetu raepera pololitaNa, rapapantawairada. 25 Awetu malambumo sira ope-ope, mesuamo i Yesu i paturua nu anakoi etu, mpane Napatoro pale nu anakoi etu. Mewali kasaliu mengkawangu anakoi etu. 26 Apa anu mewali etu tebambari i sumalele tana etu.
I Yesu mopakaosa rodua tau mabilo
27 Roo awetu napaliliu ni Yesu polumakoaNa. Tongora molumako, ria rodua tau anu mabilo anu meula i talikuNa ai meronde-ronde, raulira, “Pemulea ni Datu Daudi, pokaasi kowo kami!”
28 Awetu i Yesu mesua i rara nu tombi, maimo sira rodua tau anu mabilo aretu mampomberumpaka Ia. Napekune sira ni Yesu, “Ba nipotuu kariana kuasaKu mopakaosa komi?”
Rasonoira, “Kipotuu, Pue!”
29 Lako i se etu, Napetui matara mpane Naulika sira, “Nakenimpepotuumi, mewalimo apa anu nisarumaka.” 30 Ungangkidamo meita sira. Roo awetu, naombo sira ni Yesu, Naulika, “Inee nipopololita si ima ngkida apa anu Kubabei si komi ei.” 31 Agaiana lau ngkida sira mobambari apa anu nababeika sira ni Yesu i sumalele tana etu.
I Yesu mopakaosa tau anu baria pensani mololita
32 Kalambu nu tau anu mabilo aretu, rakeni mbui si Yesu sadua tau anu baria pensani mololita lawi napesuangi nu seta. 33 Napopeloso ni Yesu seta lako i tau etu, mewali pensanimo ia mololita. Mawuli rara nu tau wori mangita anu mewali etu, raulira, “Mabose mpuu kuasaNa! Baria mani sambela taita anu ewa ei i tana nu toSaraeli!” 34 Agaiana rauli nu toParisi, “KuasaNa etu lako i Datu nu Seta, mewali pensani Ia mampopeloso seta.”
Maasi rara ni Yesu mangita tau wori
35 Roo awetu i Yesu mampolumakoi boea-boea ai kota-kota. Mepatudu Ia i tombi penombaa, mopadongka Bambari Malompe kono i kadongkana peparenta ni Pue Ala. Napakaosa ope-ope tau anu mantodisa sinangka saki ai tau anu baria masinokai wotora. 36 Maasi raraNa mangita tau wori, lawi maisi kaparira ai baria ria anu motulungi sira, sira ewa dimba anu baria raporewu. 37 Nauli ni Yesu i topeguruNa, “Tau wori aretu ewa gandu anu mamongkomo, agaiana baria mawori tau anu mampepae. 38 Etumo mpane sangangaa niperade i tumpu bonde bona Natudu sira tau lau mepae.”