Sawaa ni Pue Ala ai ada nu toYahudi
7
1 Sambela tempo, ria sira toParisi ai guru-guru agama nu toYahudi anu lako i Yerusale, lau mampomberumpaka i Yesu. 2 Tau aretu mangita sira basangkia topeguru ni Yesu anu mangkoni agaiana baria sira memando nsalaa mangula ada agama Yahudi. 3 Nakeningka toYahudira, etumo mpane maruminsi pangulara ada nu ulububura, apa mani ane toParisi. Baria mani sira mangkoni, ane baria mani sira memando ewa anu saweweina rababeira, mangula ada nu agamara. 4 Ane mesola sira lako i pobalu-balua, sangangaa mendoi nsalaa sira lako baria mani sira mangkoni mangula ada agamara. Ai maisi mani ada anu radokora lako i ulububura anu rapeulaira mpii, ewa: ada mobakosi mangku, kura ai anu-anu, anu rababei lako i tambaga. 5 Etumo mpane toParisi ai guru-guru agama aretu mekune si Yesu, raulira, “Mangkiada mpane topeguruMu moliungi sira ada nu ulububuta? Mangkoni sira, agaiana baria sira memando nsalaa.”6 Nauli ni Yesu, “Komi tau anu mengkalompe! Mamonso mpuu apa anu nauli ni Pue Ala si nabi Yesaya ni banimpia kono si komi ewa ei:
‘Tau aretu, i ngudura ngkida mobila Aku,
agaiana rarara karao lako si Aku.
7 Baria ria bunduna penombara si Aku,
lawi patudu anu rapatudukara tau sira, lako i manusia.’ (Yesaya 29:13)
8 Mewali, sawaa ni Pue Ala baria nipeulai, agaiana maruminsi mpuu popatoromi ada nu manusia.”
9 Lako ni se etu, naulika mbuimo sira ni Yesu, “Mapande mpuu komi mopakakarao sawaa ni Pue Ala lako i katuwumi, bona adami saduduami ngkida anu nipeulai. 10 Pandirina, i rara Atura ni Musa teuki ewa ei: ‘Bila tuamamu ai tinamu.’ Ai ria mbui teuki ewa ei: ‘Ima anu motunda-tunda tuamana ba tinana, sangangaa rapopate.’ 11 Agaiana komi toParisi ai guru-guru agama mepatudu ewa ei: Baria masala, ane baria komi motulungi tinami ai tuamami, ane anu-anumi anu sangangaa nipopotulungi tinami ai tuamami etu, nipopenombamo si Pue Ala. 12 Mewali nipatumbeikamode tau etu baria motulungi tuamana ai tinana. 13 Mewali, Ngkora ni Pue Ala baria nipeulai; ada anu nidokomo lako i ulububumida, etu ngkida anu nipatuduka sira tau wori. Ai maisi mani babeiami anu ewa etu.”
Anu mepakakeraki ai anu baria mepakakeraki
14 Roo awetu, i Yesu moronde mpesola tau wori, mpane Naulika sira, “Nipetingai lompe ai nipairara bona niinsani! 15 Pangkoni anu mesua i ngangata, baria etu anu mopakakeraki kita. Agaiana lolita anu mensuwu lako i ngudutada, etu anu mopakakeraki kita. 16 Mewali, ima komi anu ketalinga, nipetingai lompe!”
17 Roo ni se etu, i Yesu mopalengi tau wori, mpane mesua i rara nu tombi. TopeguruNa mekune si Ia, ba apa tunggaiana ngkora pandiri etu ni mpongone. 18 Naulika sira, “Baria mbuipae niinsani lempona? Pangkoni anu mesua i rara nu ngangata, baria etu anu mopakakeraki kita i petotoki ni Pue Ala. 19 Lawi pangkoni etu, baria teboli i rarata. Agaiana tebolida i taita, mpane lako i se etu kasaliu tatende.” Ai lolita etu, napakanoto ni Yesu kabariana ria pangkoni anu rapalia. 20 Naulika mbuimo sira ni Yesu, “Agaiana babeiata etuda, anu mopakakeraki kita i petotoki ni Pue Ala, lawi babeiata mensuwu lako i rarata. 21 Lawi lako i rara nu manusia, mensuwu sinangka pekiri anu madaa, duduuna ria sira anu mobabei babeia anu merikati, ria sira anu manangka, anu mepopate, 22 mebualosi, mebagiu, mesasalai, mobabei mampopengaa anu madaa, mewali masirokoa, baria mebila, masina, mampemabose, ai baria madota rapatudu. 23 Ope-ope babeia anu madaa etu mensuwu lako i rara nu manusia. Etumo anu mopakakeraki tau i petotoki ni Pue Ala.”
Pepotuu nu sadua towawine
24 Lako ni se etu, laumo i Yesu i tana anu gompi i kota Tirus, ai kasaliu mesua i rara nu tombi. TunggaiaNa bona ntena rainsani nu tau kadongkaNa, agaiana kadongkaNa baria pensani tewunikai. 25 I kota etu, ria sadua tina anana towawine napesuangi nu seta. Awetu naepe nu towawine etu kariana i Yesu i kotana, laumo ia molingkudu i lioNa. 26 Towawine etu merade tulungi, nauli, “Popelosoka kowo aku seta anu mampesuangi anaku!” Towawine etu baria toYahudi, toFenisia ia anu lako i tana Siria.
27 Mpane nauli ni Yesu si ia, “Anakoi sangangaa rapakoni sala. Baria malompe mangala pangkoni nu anakoi, mpane rakiraka dike.”
28 Mesono towawine etu, nauli, “Mamonso mpuu Pue, agaiana dike anu ria i woi meja pangkonia, mangkoni mbui wuta pangkoni nu anakoi anu manawu mai lako i meja.”
29 Lako ni se etu, nauli mbui ni Yesu, “Kono pesonomu! Mewali, pesolamode lawi melosomo seta anu mampesuangi anamu.” 30 Mesolamo towawine etu. Dongka i tombi, naita malompe-lompemo anana i paturuana, lawi meloso mpuumo seta etu.
I Yesu mopakaosa tau anu bongo ai anu baria pensani mololita
31 Roo ni se etu, napalengi ni Yesu tana Tirus, mesola mpesola lau i rano Galilea, moliu kota Sidon ai tana Dekapolis. 32 Ni se etu, ria sira tau anu mangkeni sadua tau anu bongo ai anu baria nainsani mololita. Merade sira bona Napetui. 33 Mewali napatani ni Yesu tau etu lako i olo nu tau wori. Roo awetu, Napopesuamo karaweNa i talinga nu tau etu, mpane mowangelu Ia, ai mampetui dila nu tau etu. 34 Roo ni se etu, mengoamo Ia i langi, mpane naore inosaNa, roo awetu Naulika tau etu, “Efata!” Lempona: Tebungkasimo! 35 Meepe mpuumo tau etu, ai maluntumo dilana. Ai malompemo pololitana. 36 Naombo ni Yesu tau wori bona inee rapololita ba si ima ngkida apa anu mewali etu. Nauda Naombo mpii sira, batena rapadongkara imba-imba ngkida. 37 Mawuli mpuu rara nu tau wori, raulira, “Ope-ope anu Nababei, malompe. Tobongo, mewali meepe! Tau anu baria pensani mololita, mewali mololita!”