I Yesu mopakoni iba nsobu tau
8
1 Baria masae lako ni se etu, ria tau wori materusu simbela-mbela ai i Yesu. Awetu basangkia eomo sira mogulu, maoromo sira lawi bariamo ria pangkonira. Etumo mpane Naronde topeguruNa, naulika sira: 2 “Maasi raraKu mangita tau wori arei, lawi tolu eomo sira i se ei, ai bariamo ria pangkonira. 3 Baria turu raraKu motudu sira mesola tongora maoro, malimpu sira luwu i dala. Lawi ria sira anu karao mai kamaiaara.”4 Rauli nu topeguruNa, “Lako imba mai ina tasumba pangkoni anu tapopopakoni sira? Lawi pearia ei tepatani karao lako i tau.”
5 Napekune sira, “Sangkia ogu roti anu ria si komi?”
Rasonoira, “Pitu ogu.” 6 Lako i se etu, Natudu sira tau wori momeso i tana. Naalamo roti anu pitu ogu mpane manguli maisi kalompena si Pue Ala. Roo awetu, Nabinse-binsemo mpane Nakiraka sira topeguruNa bona ratibo-tiboka sira tau wori. 7 Ria mbui basangkia mbaa bau anu kokoi. Manguli mbui Ia maisi kalompena si Pue Ala, mpane Natudu topeguruNa motibo-tibo i tau wori. 8 Mangkonimo sira ope-ope duduura mabosu. Awetu roomo sira mangkoni, topeguruNa mogulu labina, pitu bingka mani. 9 Kaworira anu mangkoni ni tempo etu, kira-kira iba nsobu. Roo awetu, i Yesu motudumo sira mesola lau i tombira. 10 Mpane Ia ai topeguruNa mensawi sira i duangara lau i tana Dalmanuta.
ToParisi merade bona i Yesu mobabei tanda kuasa
11 Basangkia toParisi dongka si Yesu mampombeseseka Ia mangkadelo kanawuaNa, raulikara, “Babeika kami tanda kuasa bona tongawa si kami kalako si Pue Alana Iko.”
12 Awetu naepe ni Yesu pololitara, moinosa ngkende Ia, mpane Nauli, “Mangkiada mpane tau anu tuwu i tempo ei, mamperade tanda kuasa? Kuulika komi, baria komi ina Kupopeitaka tanda kuasa ewa anu niperade.” 13 Roo awetu, Napalengimo sira mpane mensawi i duanga lau i sambuteka rano.
Patudu nu toParisi ai Datu Herode rapandiri ewa ragi
14 I polumakora etu, topeguru ni Yesu baria mokaendo mangkeni bokura, batena ngkida saogu roti anu ria i rara nu duangara. 15 Napopaingaka sira, Nauli, “Mainga-inga komi i ragi nu toParisi ai ragi ni Datu Herode!”a
16 Agaiana topeguruNa baria rainsanira lempo nu pololitaNa etu, mewali mombekukuwi sira, raulira sadua ai sadua, “Nauli ni Guru ewa etu, lawi baria takaendo mangkeni roti.”
17 Agaiana nainsanida ni Yesu apa anu rauli nu topeguruNa, etumo mpane Naulika sira, “Mangkiada mpane nipololita liliu kabariami mangkeni roti? Baria manipae niinsani lempona? Ba makooda rarami? 18 Mawori mbelamowo niepe patuduKu, ai mawori mbelamo mbui niita kuasaKu. Kemata ai ketalinga komi, agaiana baria niinsani apa anu niita ai anu niepe. Bariapae nikaendo 19 roti anu lima ogu anu Kubinse-binse mopakoni sira tau anu lima nsobu? Ai sangkia bingka labina anu nigulu?”
Rasonoi nu topeguruNa, “Sampulu rombingka.”
20 Napekune mbui ni Yesu, “Mpane roti anu pitu ogu Kupopopakoni tau anu iba nsobu, sangkia bingka mbui labina anu nigulu?”
Raulira, “Pitu bingka.”
21 Naulika mbuimo sira, “Baria manipae niinsani apa anu Kutudoka komi ai Kupatuduka komi ei?”
I Yesu mopakaosa tau mabilo i Betsaida
22 Mpane, dongkamo sira i Betsaida. Ni se etu, ria tau anu mangkeni sadua tau anu mabilo si Yesu. Merade sira bona Napetui ai Napakaosa. 23 Napatoro ni Yesu pale nu tau anu bilo etu, mpane Nanini lau i raoa nu kota. Nawangelusi matana mpane Napetui. Roo awetu, Napekune, “Ba pensanimo iko mangita ba apa-apa ei-ei?”
24 Tau mabilo etu metotoki, mpane nauli, “Kuita tau molumako mogawu-gawu, kuita sira ewa kau.”
25 Lako ni se etu, Napetui mbuimo matana, mpane Natudu metotoki. Maosa mpuumo matana. Mewali ope-ope anu naita, tongawamo. 26 Roo awetu, natudu ia ni Yesu mesola lau i tombina, Naulika, “Pesolamode lau i tombimu, agaiana inee iko melempo i kota Betsaida.”
I Peturu mopangaku ka i Yesuna Datu Topesorema
27 I Yesu ai topeguruNa lau i boea-boea anu gompi i kota Kaisarea Pilipi. Tongora molumako, mekune i Yesu si sira, Nauli, “Mangula panguli nu tau wori, Aku ei ima?”
28 Rasonoi nu topeguruNa, “Ria sira anu manguli i Yohane Toperiu anu tuwu mpesola. Ria mbui sira anu manguli i nabi Elia. Ria mbui sira anu manguli Iko sadua nabi anu tuwu ni banimpia.”
29 Napekune mbuimo sira, Nauli, “Ane pesumbaa nu pekirimi, ima Aku?”
Nasonoi ni Peturu, “Guru, Ikomo Datu Topesorema!”
30 Lako ni se etu, naulika sira ni Yesu, “Inee sala niuli-uli kaimana Aku.”
I Yesu mampololita kono i pantodisaNa ai kamateNa
31 Roo awetu, napepuumo ni Yesu mopakanotoka nu topeguruNa, Naulika sira, “Ana Manusia sangangaa mansumba maisi kapari. Ina rasapuaka Ia nu totomana toYahudi, kapala-kapala tadulako menomba ai guru-guru agama. Ina rapopate Ia, agaiana i eo katolu ina tuwu mpesola Ia.” 32 Ope-ope etu, Napakanotoka sira. Agaiana nadii ni Peturu i Yesu lau i tumbirina, naulika, “Inee awetu pololitaMu Pue”. 33 Mewali membalili i Yesu mototoki topeguruNa anu ntanina, mpane mokarumpui i Peturu, Naulika, “Peloso, iko Datu nu Seta! Pekirimu etu pekiri nu manusia, baria pekiri ni Pue Ala.”
I Yesu mampololita adiwa mewali topeguruNa
34 Roo awetu, i Yesu moronde tau wori ai topeguruNa bona materusu sira simbela-mbela, Naulika sira, “Ima anu mampenoka meula si Aku, sangangaa baria mampeulai peundeana saduduana mpane mosimbu kau popakua ia, ai meula liliu si Aku. 35 Lawi Ima anu napari-pari mampeparai katuwuna, katuwu malompe anu ria si ia ina matonto. Agaiana ima anu matonto katuwuna nakenimpeulana si Aku ai nakeningka Bambari Malompena, iamo anu mansumba katuwu malompe. 36 Apa bunduna morompu ope-ope peawa i dunia, ane baria kita mansumba katuwu malompe anu baria mokasopoa. 37 Lawi baria ria anu pensani tapake montolosi katuwu malompe etu.
38 Meari komi i olo nu tau anu baria matundu si Aku. Agaiana ima anu maea mopangaku peulana si Aku ai mampokaea patuduKu. Ana Manusia ina maea mbui mopangaku ka iana topeulaNa, i kadongkaNa luwu ai kuasa nu TuamaNa simbela-mbela ai malaekaNa lako i suruga.”