I Yudasi motunggai mampobalu i Yesu i iwaliNa
22
1 Bariamo masae ina dongkamo Eo Posusa Roti Anu Baria Raragii anu rapomabose nu toYahudi, anu rasanga mbui Posusa Pasa. 2 Ni tempo etu, kapala-kapala tadulako menomba ai guru-guru agama mangkadelo sira dala mampopate ngkandii i Yesu, lawi mampokaeka sira tau wori.3 Roo awetu, Datu nu Seta mampesuangimo i Yudasi, anu rasanga mbui Iskariot. Ia sadua lako i topeguru ni Yesu anu sampulu rodua. 4 Etumo mpane laumo i Yudasi i kapala-kapala tadulako menomba ai kapala topokampai tombi ni Pue Ala, mangulika sira tunggaiana ina mampobalu i Yesu si sira. 5 Matono sira mangepe tunggaiana etu, ai radandira ina rakiraka ia doi. 6 Napomakonomo ni Yudasi pololitara, mpane nakadelo tempo anu malompe mosusu i Yesu si sira bona rasokora i tempona baria rainsani nu tau wori.
I Yesu mangkoni i Posusa Pasa simbela-mbela ai topeguruNa
7 Dongkamo eo pepuaana Posusa Roti Anu Baria Raragii, ai mangula ada agama nu toYahudi, sambaa dimba sangangaa rasambale i eo etu, bona rakoni i Posusa Pasa. 8 Etumo mpane i Yesu motudu i Peturu ai i Yohane, Naulika sira, “Laumode komi mopasilolongaka kita pangkoni Pasa anu ina takoni.”
9 Rapekunera, “Tua, imba peundeaMu kipasilolonga pangkoni etu?”
10 Nasonoi ni Yesu, “Ane mesua komi i rara nu kota, ina nipomberumpaka sadua tomoane anu mangkeni panombua anu moisi ue. Meulamo komi si ia dongka i tombina. 11 Ane mesua komi i rara nu tombina, niulika nu tumpu tombi etu, ‘I Guru mekune: imbakari pearia anu pensani Kupearii simbela-mbela ai topeguruKu ina mangkoni pangkoni Pasa?’ 12 Tumpu tombi etu ina motudoka komi sambua lonta mabose anu i wongko. Lonta etu tepasilolonga amimo, ai sondo parewana. I se etumo ina nipasilolongaka kita pangkoni Pasa.”
13 Mesua mpuumo i Peturu ai i Yohane i rara nu kota. Kadongkara i se etu, ope-ope mewali ewa anu naulika sira ni Yesu, mpane rapasilolongaramo pangkoni Pasa.
14 Dongkamo tempora mangkoni pangkoni Pasa, momesomo i Yesu ai suroNa sira i tombi etu. 15 Tongora momeso, naulika sira ni Yesu, “Kuunde mpuu mangkoni simbela ai komi i Eo Posusa Pasa, lako baria mani Aku mansumba kapari. 16 Kuulika komi, bariamo ina Kukoni mpesola pangkoni Pasa, duduuna dongka peparenta ni Pue Ala i dunia.”
17 Roo awetu, naalamo ni Yesu sambua panginua anu buke anggoro, manguli maisi kalompena si Pue Ala, mpane Naulika sira topeguruNa, “Nialamode mpane nitibo-tibo. 18 Bona niinsani: Mepuu ei-ei, bariamo Kuinu anggoro duduuna dongka peparenta ni Pue Ala i dunia.”
19 Roo awetu, Naala mbuimo ni Yesu roti mpane manguli maisi kalompena si Pue Ala. Nabinse-binsemo roti etu, mpane Nakiraka sira, Nauli, “Eimo wotoKu anu rasusuka komi. Nibabeimo ada ei bona nikaendo Aku.” 20 Awetu mbui, awetu roomo sira mangkoni, Nasusukamo sira panginua anu keisi anggoro, Naulika sira, “Isi panginua anggoro ei, lempona dandi ni Pue Ala anu bou, anu mopasintuwu i Pue Ala ai manusia. Dandi ei napakaroso ai raaKu anu rabubuka komi. 21 Agaiana nipetingai sala! Sadua lako si komi anu ina mampobalu Aku i iwaliKu, ria simbela-mbela ai Aku i se ei! 22 Ana Manusia batena ina mamate, ewa anu napakanotomo ni Pue Ala. Agaiana maruminsi kasurewu nu tau anu mampobalu Aku!”
23 Awetu raepe nu topeguruNa pololitaNa, mombepekunemo sira ba ima anu ina mobabei etu.
Ima anu melumbu kabose nu katuwuna
24 Lako ni se etu, mombesonoimo sira topeguru ni Yesu, ba ima i olora anu melumbu kabose nu katuwuna. 25 Etumo mpane naulika sira ni Yesu, “Datu-datu i dunia peunde-undeara moparentai tau, ai ope-ope tadulako manguli ka sirana toposalingkungkungi tau wori. 26 Agaiana komi, inee komi ewa etu! Aginada tau anu teadai i olomi sangangaa mengkaiwoi, mpane topetadulakoi sangangaa mewali toperora. 27 Mewali, imamo anu teadai? Sadua tau anu momeso-meso mangkoni mampegia rarora, ba sadua tau anu morora ia? Tainsanimo: I dunia ei, anu teadai iamo anu momeso-meso mangkoni mampegia rarora. Agaiana nipeita Aku ria i olomi mewali sadua toperora.
28 I rara nu sinangka kapariKu, baria Aku sambela nipalengi. 29 Etumo mpane Kuulika komi: Simbela ewa TuamaKu mokiraka Aku kuasa meparenta, awetu mbui Aku ina mokiraka komi kuasa meparenta, 30 bona mangkoni ai manginu simbela-mbela kita i sambua meja i rara nu peparentaaKu, ai ina mampomesoi komi sampulu roogu pomesoa nu datu, meparenta i sampulu rontina toSaraeli.”
I Yesu mampololita pesapuaka ni Peturu
31 Roo awetu, i Yesu mangulika i Simo Peturu, Nauli, “Simo! Nupetingai: Datu nu Seta rakirakamo tempo bona mokelo komi. Bona komi, ewa gandu anu ratapisi tepatani anu moisi ai anu mawara. 32 Agaiana Kupekakaekamo iko Simo, bona ntena maguli pepotuumu. Mewali, ane menonso iko ai mesola iko si Aku, sangangaa nupakaroso rara nu pokamu-pokamu.”
33 Nasonoi ni Peturu, nauli, “Pue! Nauda aku ratarunggu ba mamate simbela-mbela ai Iko, batena meula liliu aku si Iko!”
34 Nauli ni Yesu, “Peturu, Kuulika iko: i eo ei, lako baria mani motuturua manu, tolu mbelamo nusapuaka ka nuinsaniKu.”
Batutu ai guma
35 Roo awetu, naulika sira ni Yesu topeguruNa, “Ka Kutudumi lambu lau mopadongka Ngkora Magali ni banimpia, baria komi Kupaliu mangkeni batutumi, boku ba kandupami. Ni tempo etu, ba ria kamakurami?” Rasonoira, “Baria ria.”
36 Nauli ni Yesu, “Agaiana mepuu ei-ei, ane ria doi ba boku i olomi, sangangaa nikeni, ai ane baria ria gumami, nipobalu jubami nipopobaluki gumami. 37 Lawi teukimo ewa ei i rara nu Sura Ngkora Magali: ‘Datu Topesorema ina rapasimbela ai tau anu madaa.’ Apa anu teuki etu sangangaa mewali si Aku. Lawi ope-ope anu teuki i rara nu Sura Ngkora Magali kono si Aku, tongona rapabukei.”*
38 Nakenimpangepe nu topeguruNa pololitaNa etu, mololita topeguruNa, “Pue, eimo guma romata.”
Nasonoi ni Yesu, “Sondomo.”
I Yesu mekakae i Bulu Saitun
39 Ewa saweweina, lambumo i Yesu lako i kota lau i Bulu Saitun. TopeguruNa meula mbui sira si Ia. 40 Kadongkara i se etu, Naulika sira, “Pekakaemode komi bona ntena komi manawu i rara pekelo.” 41 Roo awetu, mopatani Ia saduduaNa karao saudi lako si sira, mpane molingkudu Ia mekakae, 42 Nauli, “TuamaKu, ane pensani, Nupakakaraoka kowo Aku kapari anu ina morumpa Aku ei. Agaiana baria peundeaKu anu Kuula, agaiana batena peundeaMu ngkida anu mewali.” 43 [Roo awetu, dongkamo sadua malaeka lako i suruga mai mopakaroso raraNa. 44 Mapari mpuu Naepe, etumo mpane lako i raraNa mpuu mekakae. Nakeningkamapari raraNa, tumbumo siwuniaNa moogu-ogu ewa raa anu tudo i tana.] 45 Roo Ia mekakae, meongkomo Ia mpane lau i topeguruNa. Nasumba sira tongora maleta, nakeningkawiora nu rarara. 46 Naulika sira, “Mangkiada mpane maleta komi? Pematamode komi, ai pekakaemode komi bona ntena komi manawu i rara pekelo.”
I Yesu rasoko
47 Tongona mani i Yesu mololita, maimo sira tau wori. Tau aretu nakeni ni Yudasi, sadua lako i topeguru ni Yesu. Kadongkara i se etu, laumo i Yudasi si Yesu, natabe ai peiki mangula adara toYahudi. 48 Agaiana nauli ni Yesu, “Yudasi, ai peikimu, nususumo Ana Manusia i iwaliNa.”
49 Awetu raita nu topeguruNa apa anu ina mewali, mololita sira, raulira, “Pue, kiewa sira ai guma.”
50 Roo awetu, sadua lako i topeguruNa mowuka gumana motimbe talinga kuana batua nu Tadulako Menomba Mabose etu, pudu talingana. 51 Naulika sira ni Yesu, “Sondomo!” Mpane i Yesu mopatoro talinga nu tau etu ai Napakaosa.
52 Roo awetu, i Yesu mangulika sira kapala-kapala tadulako menomba ai tadulako-tadulako topokampai Tombi ni Pue Ala ai totomana nu toYahudi anu mai mosoko Ia, “Ba tau anu madaa Aku ei, mpane mai Aku nisoko mangkeni komi mai guma ai pewombe? 53 Eo-eona ria Aku simbela-mbela ai komi i karawaa nu Tombi ni Pue Ala mepatudu. Mangkiada mpane baria Aku nisoko ni tempo etu? Agaiana eimo tempomi mosoko Aku, lawi Datu nu Seta mokuasaimo komi!”
I Peturu mosapuaka peulana si Yesu
54 Lako ni se etu, i Yesu rasoko mpuumo mpane rakeni lau i tombi nu Tadulako Menomba Mabose. Naula ngkarao ni Peturu. 55 I karawaa nu tombi etu, ria sira basangkia tau anu mopatuwu apu rapanderuira. I Peturu lau mbui momeso simbela-mbela ai sira. 56 Sadua towawine anu mobago i tombi nu Tadulako Menomba Mabose, mangita i Peturu tongona manderu. Natotoki mpane nauli, “Tau ei mbui ria simbela-mbela ai i Yesu ni mpongone!”
57 Agaiana nasapuaka ni Peturu, nauli, “Baria kuinsani tau etu!”
58 Baria masae lako ni se etu, sadua mbui mangita i Peturu, mpane naulika, “Iko mbui sadua topeulaNa.”
Agaiana nasapuaka mbui ni Peturu, nauli, “Baria, baria aku!”
59 Kira-kira sajaa lako ni se etu, tosaduana mbuimo mopakanoto, nauli, “Kalawiana, ia mbui topeula ni Yesu, lawi ia mbui toGalilea!”
60 Agaiana nasonoi ni Peturu, “Baria kuinsani apa lempona anu nuuli!”
Tongona mani mololita, motuturuamo manu, 61 mewali membalilimo i Yesu mototoki i Peturu. Ni tempo etu, nakaendomo ni Peturu lolita ni Yesu anu manguli, “I eo ei, lako baria mani motuturua manu, tolu mbelamo Aku nusapuaka.” 62 Lambumo i Peturu lau i raoa, mpane maruminsi mpuu potumangina.
I Yesu rapapakoi ai rarurugii
63 Roo awetu, tau anu mokampai i Yesu aretu, mopapakoi ai morurugii i Yesu. 64 MataNa ratuko, raulikara, “Ee, nabi! Uli ba ima anu mowombe-wombe Iko!” 65 Rapapakoi mbui Ia ai mampopengaa lolita anu madaa.
I Yesu i lio nu tadulako-tadulako topobotusi kara-kara nu toYahudi
66 Ewa neilena madondo, topobotusi kara-kara nu toYahudi mogulumo sira. Topobotusi aretu iamo totomana nu toYahudi, kapala-kapala tadulako menomba ai guru-guru agama. Roo awetu, rakenimo i Yesu lau si sira. 67 Mekune sira si Yesu, “Nuulika kami ei-ei, ba Iko mpuu Datu Topesorema?”
Nasonoi ni Yesu, “Naudapae komi Kusonoi, batena baria ina nipotuu. 68 Ai ane mekune Aku ba apa si komi, batena baria Aku nisonoi. 69 Mewali mepuu ei-ei, Ana Manusia ina momeso mbai i kuana ni Pue Ala anu makuasa.”
70 Raulira mbui si Yesu, “Ba Iko mpuu Ana ni Pue Ala?”
Nasonoi ni Yesu, “Monso mpuu, ewa anu nuuli etu.”
71 Lako ni se etu, rauliramo, “Baria ria bunduna ria sabi! Taepemo pololitaNa saduduaNa!”