Kabula rara nu sadua tobemba
21
1 I rara nu Tombi ni Pue Ala, naita ni Yesu basangkia tau anu pebuku mounsa doira i rara nu peti pambolia doi popenomba. 2 Naita mbuimo sadua towawine tobemba anu mesiasi katuwuna, mounsa doi popenombana. Anu napopesua etu, rompeka doi tambaga anu saudi ngkida imbana. 3 Nauli ni Yesu, “Kamonsona, popenomba nu tobemba anu mesiasi katuwuna ei, maisi imbana i petotoki ni Pue Ala, mpane lako i ope-ope popenomba nu tau ntanina, 4 lawi sira mokira lako i pelabia nu doira. Agaiana towawine ei, nauda mesiasi mpii katuwuna, mokira ia ope-ope anu ria si ia.”I Yesu mampololita kagero nu Tombi ni Pue Ala
5 Roo awetu, ria basangkia tau mampololita kono perae nu Tombi ni Pue Ala ei, lawi raparewai ai watu-watu anu merae ai parewa anu rapopenombaramo si Pue Ala. Etumo mpane Nauli ni Yesu: 6 “Apa anu niita i Tombi ni Pue Ala ei, sambela tempo i eo anu ina mai, baria ria mogalo saogu watuna anu teparampi mani i peariana. Batena ina magero asa.”
Kapari ai pepopesiasi
7 Lako ni se etu, mekunemo sira basangkia tau si Ia, raulira, “Guru, impia pewalina anu Nuuli ni mpongone? Ai tanda apa anu ina mewali ane dongkamo tempona mewali?”
8 Nauli ni Yesu, “Mainga-inga komi, bona ntena komi raakalangi, lawi mawori tau ina mai ai manguli, ka sirana Datu Topesorema. Ria mbui sira anu ina manguli kadongkanamo eo pobotusi kasopoa dunia. Agaiana inee sira nipotuu. 9 Ane mangepe komi bambari pombeala ai peewa, inee komi maeka, lawi ope-ope etu sangangaa mewali nsalaa. Agaiana etu baria mopakanoto kagompinamo kasopoa dunia.”
10 Lako ni se etu, napaliliumo ni Yesu pololitaNa, Nauli, “I tempo etu, tau sangamba ina mombeala ai tau sangambana, kadatua sambua ina moewa kadatua anu sambuana. 11 Imba ngkida ina ria linu mabose, saki anu mewulungati, ai maruminsi tempo oro. Ai batena ria basangkia tanda i langi anu mepakaeka ai mewulii. 12 Agaiana lako baria mani ope-ope etu mewali, komi ina rasoko ai rapopesiasi. Ina rasalai komi i rara nu tombi penombaa ai ratarunggu komi. Nakenimpeulami si Aku, komi ina rasusu i datu-datu ai i topoparenta. 13 Agaiana i se etumo tempomi, mopadongka pepotuumi si Aku si sira. 14 Sangangaa nipakaroso rarami, ai inee maeka rarami ba apa luwu anu ina nipoposonoi sira, mampeparai wotomi. 15 Lawi Aku anu ina mokiraka komi katopa mesono, duduuna baria rabuku nu iwalimi mobesoi ba mosapuaka apa anu niuli. 16 I tempo etu, ina rasusu komi nu tomanami, poka wotomi, poka-pokami sira, ai rangami i iwalimi. Mpane ria komi ina rapopate. 17 Nakenimpeulami si Aku, ina rakasisi komi nu ope-ope tau. 18 Agaiana kamonsona, baria komi ina mangkia-ngkia. Mogaloda sangkau wuluami, baria ria anu ina matonto. 19 Ane tetida liliu komi i rara nu ope-ope kapari ei, ina mansumba komi katuwu malompe anu baria mokasopoa.”
I Yesu mampololita kagero nu kota Yerusale
20 “Ane niita surudado mantolelimo i kota Yerusale, bona niinsani kabarianamo masae Yerusale ina ragero. 21 I tempo etu, tau anu meari i Yudea, sangangaa melangka sira lau i bulu. Tau anu i rara nu kota, sangangaa mensuwu sira lako i kota, ai tau anu i raoa nu kota, inee sira mesua i rara nu kota. 22 Lawi i eo-eo etu luwu, ina dongka eo pesuku ni Pue Ala, bona tepabukeimo ope-ope anu teuki i rara Sura Ngkora Magali. 23 Ina mapari mpuu katuwu nu towawine anu tongora mampaiwoto ai anu mopasusu anara. Lawi i tempo etu, tau i Yerusale ina narumpa sira kapari ai pesuku ni Pue Ala anu maruminsi mpii. 24 Ria sira tumpu kota Yerusale anu ina rapopate ai guma. Ria mbui sira anu ina ratawani ai rasawu-sawu sira imba ngkida i sumalele dunia. Ai kota Yerusale ina rakuasai nu tau anu baria sira toYahudi, duduuna sopomo tempona anu napakanoto ni Pue Ala si sira.”
Kadongka mpesola nu Ana Manusia
25 “I eo, i wula ai i betue, ina raita ria tanda-tanda anu metingkarai. Ope-ope tau i dunia, ina maeka ai mawuli sira mangita balumba nu tasi ai mangepe pogumuru nu tasi. 26 Nakeningkaekara mangita ope-ope anu mewali i sumalele dunia, ria sira anu ina malimpu, lawi pokale nu ope-ope kuasa ntanina anu ria i langi, mewulungati. 27 Ni tempo etumo Ana Manusia ina raita nu tau buke kuasa ai peawa, mendolu mai lako i suruga nabalungkusi nu gawu. 28 Ane ope-ope tanda-tanda etu mepuumo mewali niita, nipakaroso rarami ai niongkomode woomi, lawi bariamo masae ina rapawiamo komi lako i kaparimi.”
Ngkora pandiri kono i kau ara
29 Roo awetu, i Yesu mopadongka ngkora pandiri ei i topeguruNa, Nauli, “Nipairara apa anu Kupatuduka komi lako i kau ara ai i kau-kau anu ntanina. 30 Ane niita pengana motumbe, niinsani kaina dongkana tempo madii. 31 Awetu mbui, ane niita sinangka anu Kuulika komi ni mpongone mewali, niinsani kaina dongkanamo peparenta ni Pue Ala i dunia.
32 Bona niinsani: Ope-ope anu Kuuli ni mpongone, batena mewali lako baria mani mamate ope-ope tau anu tuwu i tempo ei-ei. 33 Langi ai dunia ina mapaia, agaiana NgkoraKu batena ria duduuna i kasae-saeana.”
Sangangaa mainga-inga komi
34-35 “Mainga-inga komi, ntena komi wule mampekiri liliu posusa-susa ai kalangu-langu. Mainga-inga komi ntena komi mampepekiri liliu katuwumi i dunia ei, duduuna mampomaleka komi. Lawi eo kadongkaKu mpesola, ungangkidamo ina raepeka nu ope-ope tau i dunia ewa tilobu anu mopakanawu tau anu mampomaleka. 36 Mewali, mainga-inga komi, ai mekakae komi si Pue Ala, bona tepawia komi lako i ope-ope kapari anu ina mewali, ai bona nibuku mampombelioka pobotusi nu Ana Manusia kara-karami.”