Tadulako-tadulako nu toYahudi rapandiri ewa topobago bonde anggoro
12
1 Roo awetu, napadongkamo ni Yesu sampangka ngkora pandiri i tadulako-tadulako nu toYahudi aretu, Nauli, “Ria sadua tau anu motudai bondena ai anggoro, mpane nawala mantoleli. Roo awetu, nakaemo kalolu popiea anggoro, ai nawangu mbui pongko pokampaiaa. Roo awetu, napopesaro i basangkia dua tau mampobago, mpane laumo ia modaga i tana anu karao. 2 Awetu dongkamo tempona mopupu wua anggoro, natudumo sadua batuana lau i tau anu mampobago bondena, merade kirana. 3 Agaiana tau anu mampobago bondena aretu mosokomo batuana etu, rarurugiira mpane rapopesola ntoo. 4 Roo awetu, tumpu bonde etu motudu mbuimo sadua batuana anu ntanina. Dongka ni se etu, rarurugii mbui duduuna mabela woona, ratunda-tundara mpane rapopelosora. 5 Lako ni se etu, natudu mbuimo sadua batuana anu ntanina. Dongka ni se etu, rapopateda batuana etu. Batena ewa etu asa rababeira i ope-ope batua anu natudu: ria sira anu rawombe-wombe, ria sira anu rapopate.6 Bariamo ria anu ntanina anu pensani natudu nu tumpu bonde etu, batenadamo ana saduduana anu napokakaia. Kasopoana anana etu natudumo lau i tau anu mampobago bonde etu. Nauli nu tumpu bonde i rarana: ‘Manotomo poadaira anaku luwu.’
7 Agaiana, awetu raita nu topobago bonde anana etu, mombeulikamo sira sadua ai sadua, raulira: ‘Doumo mai anana, ia anu ina motumpui bonde ei. Aginamo tapopate, bona taala bonde ei ai ope-ope isina.’ 8 Mewali, rasokora mpuumo anana etu, rapopatera mpane wotowatana ratendera i raoa nu bonde.”
9 Roo awetu, napekune ni Yesu, “Mewali, apa anu ina nababei nu tumpu bonde etu? Batena mai ia mampopate topobago bondena aretu, mpane bondena etu, ina napopesaro i tau ntanina. 10 Nibasamimowoo lolita ei i rara nu Sura Ngkora Magali anu manguli ewa ei:
‘Watu anu ratende nu topowangu tombi,
watu etuda anu mewali arii ntongo nu tombi.a
11 Etu mewali mangula peundea ni Pue Ala,
ai malompe mpii apa anu nababei ni Pue Ala etu!’” (Dulua Petoia 118:22-23)
12 Awetu raepe nu tadulako nu toYahudi lolita ni Yesu etu, rapari-parira mangkadelo dala mosoko i Yesu lawi rainsanira ka sirana anu Natunggai ai ngkora pandiri etu. Agaiana baria sira pebai mosoko, lawi mampokaeka sira tau wori. Etumo mpane rapalengiramo i Yesu.
Tadulako nu toYahudi mampekune kono i pobaiari asele
13 Lako ni se etu, tadulako-tadulako nu toYahudi motudumo sira basangkia toParisi ai tau ni Datu Herode lau si Yesu. Tunggaiara, rapenokara mampetandaka Ia ai pampekunera bona rasumbara kamasalaNa. 14 Kadongkara si Yesu, raulikara Ia, “Guru, kiinsani ka Ikona tau anu manoto. Mepatudu Iko i kamonso-monsona mangula peundea ni Pue Ala kono i manusia. Ba ima ngkida baria Nupokaeka, lawi baria Iko mampopontani tau. Etumo mpane kipekune Iko: mangula atura agamata, ba sangangaa mobaiari kita asele si Kaisar, ba baria?”
15 Nainsani ni Yesu tunggaia nu rarara anu tewunikai. Etumo mpane Naulika sira, “Mangkiada mpane nipetandaka Aku? Nikeni mai doi anu paka nipopobaiari asele bona Kuita.” 16 Lako i se etu, rakirakara sampeka doi pera, Nauli, “Lense ni ima ai sanga ni ima anu ria i doi ei?”
Rasonoira, “I Kaisar.”
17 Nauli ni Yesu, “Ane awetu, kiraka i Kaisar apa anu sintoto rakiraka i Kaisar, ai kiraka i Pue Ala apa anu sintoto rakiraka i Pue Ala.” Tingkara sira mangepe pesonoNa etu.
ToSaduki mampekune i Yesu kono i karapatuwuna mpesola nu tomate
18 Roo awetu, ria sira basangkia toSaduki anu dongka si Yesu. ToSaduki iamo tau anu baria mampotuu karapatuwuna mpesola tomate. 19 Sira aretu, rapenokara mampetandaka Ia ai pampekunera bona rasumbara kamasalaNa, raulikara, “Guru, i rara Atura ni Musa teuki ewa ei: ane sadua tomoane mamate agaiana baria ria anana, pokana sangangaa mampotombika bembana, bona ria pemulea nu pokana anu mamatemo etu. 20 Mewali, ria sira pitu topopoka, ope-ope sira tomoane. Anu torapowutu motombi, baria mani ria anana, mamatemo ia. 21 Mpane toina anu meunsu lako si ia, mampotombika mbui bembana nu powutuna etu, baria mani mbui sira moana, mamatemo toina. Ewa etu mbui anu mewali i katoluna. 22 Ewa etumo pewalina duduuna i kapituna, duduuna mamatemo sira ope-ope baria ria anara. Kasopoana, mamatemo mbui towawine etu. 23 Mewali, ane monso-monso tuwu mpesola ope-ope tomate, imamo tomoane nu towawine etu? Lawi pitumo sira anu mampotombika ia!”
24 Nasonoi ni Yesu, “Masala mpuu pampekirimi etu, lawi baria niinsani isi nu Sura Ngkora Magali, baria mbui niinsani kuasa ni Pue Ala. 25 Lawi ane tuwu mpesola sira tau anu mamate, katuwura ewa katuwu nu malaeka i rara nu suruga, bariamo sira motombi ba rapotombika. 26 Ai katongawaana kono i tomate rapatuwu mpesola, baria manipae sambela nibasa i rara nu sura ni Musa kono i walaa dui anu mambugi etu? I rara nu sura etu teuki, i Pue Ala mongkora si Musa, Nauli: ‘Akumo i Pue Ala anu napenombai liliu ni Burahima, Isaki, ai i Yako.’ 27 I Pue Ala etu baria Pue Ala anu napenombai nu tomate, agaiana i Pue Ala anu napenombai nu tau anu tuwu. Masala mpuu pampekirimi etu!”
Guru agama mampekune kono i sawaa anu melumbu kabosena
28 Ni tempo etu, sadua guru agama nu toYahudi dongka si Yesu. Guru agama etu naepemo pombesonoi nu toSaduki ai i Yesu ni mpongone, mpane nauli nu rarana, “Malompe mpuu pesono ni Yesu!” Etumo mpane mekune ia si Yesu, nauli, “Sawaa umba anu i wongko mpii lako i ope-ope sawaa anu teuki i rara Sura Atura ni Musa?”
29 Nasonoi ni Yesu, “Eimo sawaa anu kaisa:
‘Nipetingai toSaraeli!
Sadua ngkida Pueta, iamo i Pue Ala.
30 Nipokaasi i Pue Ala, Puemi,
i sukana kabula nu rarami,
i sukana pampekirimi,
ai i sukana kapandemi,
ai i sukana karosomi.’ (Pepopainga 6: 4-5)
31 Ai sawaa anu karompangkana, ewa ei: ‘Nipokaasi singka manusiami ewa pampokaasimi wotomi saduduami.’ Bariamo ria sawaa ntanina anu i wongko mpii lako i sawaa anu rompangka etu.”
32 Nauli nu guru agama etu si Yesu, “Mamonso mpuuda Guru! Kono mpuu anu Nuuli etu. I Pue Ala batena sadua ngkida, baria ria anu ntanina. 33 Ai sangangaa tapokaasi i Pue Ala lako i sukana kabula nu rarata, lako i sukana kapandeta, ai lako i sukana karosota. Ai sangangaa tapokaasi singka manusiata ewa wotota saduduata. Etumo sawaa anu melumbu kalompena mpane lako i ope-ope popenomba anu ratunu ai popenomba anu ntanina anu tapopenomba si Pue Ala.”
34 Awetu naepe ni Yesu kamonsona pesono nu guru agama etu, Naulika ia, “Ina mewalimo iko tau ni Pue Ala!”
Lako ni se etu, bariamo ria sadua anu pebai mampekune ba apa-apa si Yesu.
Datu Topesorema ai Datu Daudi
35 Tempo ni Yesu mepatudu i karawaa nu Tombi ni Pue Ala, Napekune, “Mangkiada mpane guru-guru agama Yahudi manguli Datu Topesorema iamo pemulea ni Datu Daudi? 36 Molentano, i Daudi saduduana mopakanoto kono i Datu Topesorema. Ai nakenimpenini nu Inosa Magali, nauli ewa ei:
I Pue Ala mongkora i Tuaku, Nauli:
‘Pomesomode mbai i kuanaKu,b
duduuna Kupopengkoru sira ope-ope iwaliMu si Iko.’ (Dulua Petoia 110:1)
37 Mewali, ane i Daudi manguli Datu Topesorema etu iamo Tuana, mesua akalapae ane Datu Topesorema etu pemuleana?” Tau wori anu moterusu i Tombi ni Pue Ala ni tempo etu, matono sira mampetingai patuduNa.
I Yesu mopatuduka bona mainga-inga i guru-guru agama
38 Tempo ni Yesu mopaguru tau wori, Naulika sira, “Mainga-inga komi, inee komi mampeulai babeia nu guru-guru agama. Raundera molumako mopake juba anu mandoe, ai mampenoka sira rabila nu tau wori i pobalu-balua. 39 Rapenokara rapopomeso i pomesoa anu teadai i tombi penombaa, ai i pomesoa anu malompe i posusaa. 40 Moakalangi sira towawine anu bemba, bona morampaki tombira. Mpane mekakae sira masae-sae bona rauli nu tau malompe babeiara. Ina mantimi mpuu karasukura.”
Popenomba nu sadua tobemba
41 Tempo ni Yesu momeso mampombelioka peti pambolia doi popenomba, mpane mampeita adiwa sira tau anu modika doi popenombara i rarana. Mawori tau anu pebuku modika doira anu maisi imbana. 42 Ni tempo etu, dongka mbui sadua towawine tobemba anu mesiasi katuwuna anu modika doi popenombana. Anu napopesua etu, rompeka doi tambaga anu saudi ngkida imbana. 43 Naronde ni Yesu topeguruNa, Naulika sira, “Bona niinsani: tobemba anu mesiasi katuwuna etu, melumbu kaisina pokirana mpane lako i popenomba nu ope-ope tau ntanina anu mampopesua popenombara, 44 lawi ope-ope sira mokiraka lako i pelabia nu doira. Agaiana tobemba etu, nauda mesiasi mpuu katuwuna, ope-ope doi anu ria si ia, nakira asa. Nauda kamonsona, etudamo anu napopobundu i rara nu katuwuna i eo-eona.”