I Yesu motudu pitu mpulu topeguruNa lau mopadongka Ngkora Magali
10
1 Roo awetu, i Yesu mampelisi pitu mpulu topeguruNa anu ntanina, mpane Natudu sira rorodua samporangaa moilodo i ope-ope kota ai boea anu ina Nakalaungi. 2 Naulika sira, “Tau wori sira ewa gandu anu mamongko, maisi gandu anu mamongko, agaiana topepae baria sira mawori. Etumo mpane sangangaa niperade i Tumpu bonde bona Natudu sira tau lau mepae i bondeNa. 3 Laumode komi, agaiana sangangaa mainga-inga komi. Lawi Kutudu komi lau i olo nu tau anu madaa. Komi ewa ana dimba i olo nu serigala. 4 Inee komi mangkeni batutumi ba pambolia pangkonimi ba kandupami. Inee komi metabe masae-sae i tongo dala.5 Ane mesua komi i rara nu sambua tombi, sangangaa niulika tumpu tombi: ‘Tabea! Lompe nu katuwu lako si Pue Ala dongka si komi!’ 6 Ane malompe rara nu tumpu tombi modoko komi, batena ina nawati ni Pue Ala. Agaiana ane baria naunde modoko komi, pewati ni Pue si sira etu, mesola si komi. 7 Ane radoko komi, inee komi melimba-limba. Meari komi i tombi etu, duduumi mangoka lau i boea ntanina. Nikoni ai niinu apa anu rakiraka komi lawi sintoto mpuu ane topobago mansumba sarona.
8 Ane mesua komi i rara nu sambua boea mpane radoko komi, nikoni apa anu rakiraka komi. 9 Nipakaosa tau anu madua, anu ria i rara boea etu, mpane niulika sira tumpu boea: ‘Bariamo masae ina dongka peparenta ni Pue Ala si komi.’ 10 Agaiana ane mesua komi i rara nu sambua boea mpane baria komi radoko, laumode komi i dala mabose mpane niulika sira: 11 ‘Mogalo awu lako i boeami anu mentaka i talampa paaki, kitaronta i liomi mewali pepopainga si komi. Agaiana mainga-inga komi, lawi bariamo masae i Pue Ala ina meparenta i dunia!’ 12 Kuulika komi, i eo pobotusi kasopoa dunia, ina maruminsi mpuu pesuku ni Pue Ala i tau aretu mpane lako pesukuNa i tau anu meari i kota Sodomo ni banimpia.”
I Yesu mokambaroka tau sira anu lako i boea-boeana
13 Nakambaroka sira ni Yesu, Nauli, “Masurewu komi toKorasim ai toBetsaida! Maisi mpuu tanda kuasa anu Kubabei i kotami, agaiana baria mpuu komi menonso lako i dosami. Ane rapana tanda kuasa etu Kubabei i rara nu kota Tirus ai i Sidon, kemasaemo sira menonso lako i dosara, nauda baria sira toYahudi. Kemopakemo sira sampi ngkasusa rara, ai wotora raawuira, tanda penonsoramo lako i dosara. 14 I eo pobotusi kasopoa dunia, maruminsi pesuku ni Pue Ala si komi mpane lako pesukuNa i toTirus ai i toSidon.
15 Ai komi mbui toKapernaum! Ba nipenoka ina naore komi ni Pue Ala dongka i suruga? Baria! Ina Natendeda komi i rara nu naraka!”
16 Roo awetu, i Yesu mololita mbui i topeguruNa, Nauli, “Ima anu mampetingai ai modoko pololitami, simbelamo ai pololitaKu anu nadoko. Ima anu mosapuaka komi, simbelamo ai Aku anu nasapuaka. Ai ima anu mosapuaka Aku, simbelamo ai i Pue Ala anu nasapuaka, lawi Iamo anu motudu Aku.”
Pesola nu topeguruNa anu pitu mpulu
17 Basangkia kasaena lako ni se etu, mesolamo sira topeguruNa anu pitu mpulu. Matono mpuu rarara, raulikara i Yesu, “Pue, mogaloda seta, mengkoru sira si kami, ane kiliwu sira i rara nu sangaMu.”
18 Nauli ni Yesu, “Kuitamo Datu nu Seta manawu lako i langi ewa banibi! 19 Nipetingai pololitaKu: Kukirakamo komi kuasa molongko ule ba kalajengking, ai kuasa monangi ope-ope karosona nu iwalimi. Baria ria sadua anu pensani mopakarugi komi. 20 Agaiana nauda awetu, inee nipokatono nakenimpengkoru nu seta si komi. Agaiana anu nipokatono iamo kateukinamo sangami i rara nu suruga.”
I Yesu mekakae
21 Ni tempo etu, i Yesu nakuasai nu Inosa Magali, ai lako i katono nu raraNa, Nauli, “O Uma, anu makuasa i langi ai i dunia! Kuuli maisi kalompena si Uma, lawi ope-ope etu Nuwunikai lako ope-ope tau anu matopa ai anu mapande. Agaiana Nupatongawa i tau anu tepaiwoi katuwura. Lawi etumo peundeaMu. 22 Ope-ope nakirakamo Aku nu TuamaKu. Ai TuamaNa ngkida anu manginsani AnaNa, awetu mbui AnaNa ngkida anu manginsani TuamaNa, ai i tau anu Napopainsanika nu AnaNa.”
23 Lako ni se etu, bona ntena raepe nu tau, i Yesu membalili i topeguruNa, Naulika sira, “Morasi mpuu komi, lawi niitamo ope-ope ei. 24 Lawi ni banimpia ria sira mawori nabi ai datu mampenoka sira mangita apa anu niitamo, agaiana baria raitara. Raundera mpuu mampetingai apa anu niepe, agaiana baria raepera.”
Ngkora pandiri kono i toSamaria anu malompe rarana
25 Ria sadua guru agama nu toYahudi anu mampenoka mampetandaka i Yesu. Napekune, “Guru, apa anu sangangaa kubabei bona mansumba aku katuwu malompe anu baria mokasopoa?”
26 Nauli ni Yesu, “Apa anu teuki i rara Sura Atura ni Musa? Apa anu nubasa i se etu?”
27 Nasonoi nu guru agama etu, “Anu kubasa, ewa ei:
‘Nipokaasi i Pue Alamu,
i sukana kabula nu rarami,
i sukana pampekirimi,
i sukana karosomi,
i sukana kapandemi,’
ai ‘nipokaasi sira singka manusiami ewa pampokaasimi wotomi saduduami.’”
28 Nauli ni Yesu, “Konomo pesonomu. Babeimode ewa etu, bona mansumba iko katuwu malompe anu baria mokasopoa.”
29 Agaiana guru agama etu naunde mopakanoto babeiana. Etumo mpane nauli, “Ima sira singka manusiaku anu sangangaa kupokaasi?”
30 Nasonoi ni Yesu, “Ria sadua tomoane anu molumako lako i Yerusale mempandolu lau i kota Yeriko. I tongo dala, tau etu mampomberumpaka toperampaki. Rarampakiramo anu-anuna ai sampina, mpane rarurugii ia duduuna malimpu, mpane rapalengi ia tedampa i wiwi dala. 31 Ni tempo etu, ria sadua tadulako menomba anu moliu i dala etu. Awetu naita tau anu marugi i dala etu, naliu ngkida i sambuteka dala etu, mpane ia molumako liliu. 32 Awetu mbui ria sadua toLewi moliu i se etu. Lau napeita ngkida tau anu marugi etu, mpane mesola ia lau i sambuteka dala, mpane molumako liliu.
33 Baria masae lako ni se etu, moliu mbui sadua toSamaria i dala etu. Awetu naita tau anu marugi etu, maasi rarana i tau etu. 34 Nagompilisi tau etu, nabakosi belana ai anggoro, mpane napakulii ai lana, mpane nawewesi. Roo awetu, napopensawimo i darana, nakeni lau i tombi posanggaraa,a mpane natora i se etu. 35 Ewa ineilena, nadoamo rompeka doi pera, nakiraka nu tumpu tombi, naulika tumpu tombi posanggaraa etu: ‘Nutora sala tau ei. Ane doi ei baria mani sondo, kupapiridamo ane mesola aku mai.’”
36 Roo awetu, napekunemo ni Yesu i guru agama etu, Nauli, “Mangula pansumbaa mpekirimu, lako i tau anu tolu ni mpongone, ima anu mewali ranga nu tau anu rapakarugi etu?”
37 Nasonoi nu guru agama, “Tau anu mampetudoka asina.”
Nauli ni Yesu, “Konomo, laumode komi mpane nibabei mbui ewa etu.”
I Yesu mosondaki i Marta ai i Maria
38 Lako ni se etu, i Yesu mopapulomo polumakoana simbela-mbela ai topeguruNa, duduuna mensopi sira i sambua boea. I boea etu, ria sadua towawine anu rasanga i Marta anu modoko i Yesu i tombina. 39 Ria mbui sadua poka ni Marta anu towawine, sangana i Maria. I Maria etu momeso i lio ni Yesu ai mampetingai liliu ia pololitaNa. 40 Ni tempo etu, i Marta maisi bagona morora torare. Etumo mpane laumo ia si Yesu, naulika, “Tua, pokaku ei baria aku nadurei. Saduduaku ngkida mobago! Nuulika ia bona mai ia modurei aku.”