ToParisi mekune sira si Yesu ba lako imba mai kuasaNa
20
1 Sambela tempo, i Yesu mepatudu ai mopadongka Bambari Malompe i tau wori anu mogulu i karawaa nu Tombi ni Pue Ala. TongoNa mepatudu, dongka sira kapala-kapala tadulako menomba ai guru-guru agama ai totomana nu toYahudi. 2 Mekunemo sira si Yesu, raulira, “Nuulika kami lako imba mai kuasaMu mobabei ope-ope etu? Ima anu mokiraka Iko kuasa etu?”3 Nasonoi ni Yesu, “Ria mbui sampangka pampekuneKu si komi. Niulika Aku: 4 Lako imba mai kuasa ni Yohane Toperiu, moriu tau? Lako si Pue Ala, ba lako i manusia?”
5 Mololitamo sira tadulako nu toYahudi etu, raulira sadua ai sadua, “Adiwamo ka tasonoina? Ane tauli lako si Pue Ala kuasa ni Yohane, ina Naulika kita: ‘Ane awetu, mangkiada mpane baria komi mepotuu si ia?’ 6 Agaiana, ane tauli lako i manusia ngkida kuasa ni Yohane, ina rawatui kita nu tau wori, lawi ope-ope tau mampotuu i Yohane etu sadua nabi.” 7 Mewali rasonoira, “Baria kiinsani.”
8 Etumo mpane naulika sira ni Yesu, “Ane awetu, baria mbui komi ina Kuulika kalako imbana kuasaKu mobabei ope-ope etu!”
Ngkora pandiri kono i topobago i bonde anggoro
9 Roo awetu, i Yesu mopadongka sampangka ngkora pandiri i tau wori, Nauli, “Ria tau anu motudai bondena ai anggoro. Roo awetu, napopesaro i basangkia dua tau mampobago, mpane laumo ia modaga i tana anu karao, ai ina masae saudi ia meari i boea ntanina. 10 Dongkamo tempona mopupu wua anggoro, natudumo sadua batuana lau merade kirana i topobago bondena. Agaiana topobago bondena aretu mosokoda batuana etu, rarurugiira mpane rapopesola ntoo. 11 Roo awetu, tumpu bonde etu moparentai mbuimo sadua batuana anu ntanina. Awetu ia dongka i se etu, rarurugiira, rapakaeara mpane ratudura mesola ai baria mogalo apa nakeni. 12 Lako ni se etu, natudu mbuimo sadua batuana anu katoluna. Awetu ia dongka i se etu, rarurugiira mbui ia duduuna mensuwu raana, mpane ratendera i raoa nu bonde.
13 Roo awetu, naulimo nu tumpu bonde etu: ‘Apa anu sangangaa kubabei? Aginamo anaku anu kupokaasi kutudu lau. Manoto ane ia rapokaekara.’
14 Agaiana, awetu topobago bondena aretu mangita anana etu, mombeulika sira sadua ai sadua, raulira: ‘Doumo mai anana, ia anu ina mewali tumpu bonde ei. Aginamo tapopate, mpane taala bondena ai ope-ope isina.’ 15 Mewali, rasokora mpuumo anana etu, radii lau i raoa bonde mpane rapopatera.”
Roo awetu, napekune ni Yesu, “Ane mesola tumpu bonde etu, apa anu ina nababei? 16 Batena mai ia mampopate sira topobago bondena, mpane bondena ina napopesaro i tau ntanina.”
Awetu raepe nu tau wori ngkora pandiri etu, raulikara i Yesu, “Inee dongka mewali awetu!”a
17 Natotoki sira ni Yesu, mpane Nauli, “Mewali, apa lempona lolita ei, anu teuki i rara Sura Ngkora Magali:
‘Watu anu ratende nu topowangu tombi,
watu etuda anu mewali arii ntongo nu tombi?’” (Dulua Petoia 118:22)
18 Mpane nauli mbuimo ni Yesu, “Ope-ope tau anu manawu i watu etu ina marene sira, ai ima anu narumpa watu etu ina marige.”b
Pobaiari asele
19 Guru-guru agama ai kapala-kapala tadulako menomba manginsani ka sirana anu natunggai ni Yesu i rara ngkora pandiriNa ni mpongone. Etumo mpane, ria tunggaiara mosoko i Yesu ni tempo etu. Agaiana baria sira pebai, lawi mampokaeka sira tau wori. 20 Mewali, mangkadelo sira tempo anu malompe, mosaro sira tau bona tau aretu mengkalompe, mpane ratudura tau aretu mampetandaka Ia bona mansumba kamasalaNa ai basangkia pampekune, bona pensani Ia rasusura i tadulako nu toRoma bona raparesa mpane rasuku. 21 Awetu sira dongka si Yesu, raulira, “Guru, kiinsani kamonsona pololitaMu ai ope-ope patuduMu. Mepatudu Iko i kamonso-monsona mangula peundea ni Pue Ala, ai baria Iko mampopontani tau. 22 Etumo mpane kipekune Iko: mangula atura agamata, ba sangangaa mobaiari asele kita si Kaisar, ba baria?”
23 Agaiana nainsani ni Yesu tunggaia nu rarara anu madaa. Etumo mpane Naulika sira: 24 “Nipopeitaka Aku mai sampeka doi pera! Awetu rapopeitakara Ia, Napekune si sira: Lense ni ima, ai sanga ni ima anu ria i doi ei?”
Rasonoira, “Lense ai sanga ni Kaisar.”
25 Nauli ni Yesu, “Ane awetu, kiraka i Kaisar apa anu sintoto rakiraka i Kaisar, mpane nikiraka i Pue Ala apa anu sintoto rakiraka i Pue Ala.” 26 Kasopoana, baria ria kasala nu pololitaNa anu rasumbara i lio nu tau wori. Mandii-ndii ngkida sira, lawi rapowulira mangepe pesonoNa.
Karapopengkaorena tomate
27 Roo awetu, ria sira basangkia toSaduki anu dongka si Yesu. ToSaduki iamo tau anu baria mampotuu karapatuwuna mpesola tomate. Kadongka nu toSaduki aretu, rapenokara mampetandaka i Yesu bona rasumbara kamasalaNa, rapekunera, 28 “Guru, i rara Atura ni Musa teuki ewa ei: ane sadua tomoane mamate, agaiana baria ria anana, pokana sangangaa mampotombika bembana, bona ria pemulea nu pokana anu mamatemo etu. 29 Mewali, ria sira pitu topopoka, ope-ope sira tomoane. Anu torapowutu motombi, baria mani ria anana, mamatemo ia. 30 Mewali toina mampotombika bembana nu powutuna, baria mani mbui sira moana, matemo mbui tomoanena. 31 Awetu mbui anu mewali i katoluna duduuna dongka i kapituna. 32 Kasopoana mamatemo mbui towawine etu. 33 Mewali, ane monso-monso tuwu mpesola ope-ope tomate, imamo tomoane nu towawine etu? Lawi pitumo sira anu mampotombika ia.”
34 Nasonoi ni Yesu, “Tau anu tuwu ei-ei, mosamboko sira ai rapoposamboko. 35 Agaiana tau anu sintoto mansumba kirara i dunia anu mabou, ai anu napatuwu mpesola sira ni Pue Ala, bariamo sira mosamboko. 36 Lawi katuwura ewa katuwu nu malaeka, ai bariamo sira mamate. Sira aretu, napoana sira ni Pue Ala, lawi i Pue Ala anu mopatuwu mpesola sira.
37 Ina Kupakanotoka komi lolita anu ria i rara nu Ngkora Magali, anu mopakanoto katuwura mpesola tomate. I rara Sura Atura ni Musa, tabasa lolitakana adiwa i Pue Ala mongkora si nabi Musa lako i rara walaa dui anu mambugi. Anu manguli ewa ei: ‘Akumo i Pue Ala anu rapenombai liliu ni Burahima, i Isaki ai i Yako.’ 38 I Pue Ala etu baria Pue Ala anu napenombai nu tomate, agaiana i Pue Ala anu napenombai nu tau anu tuwu! Lawi si Pue Ala tau tuwu ope-ope.”
39 Ni tempo etu, basangkia guru agama mangulika i Yesu, “Guru, mamonso mpuu pesonoMu.” 40 Roo awetu, bariamo ria sadua anu pebai mampekune ba apa-apa si Yesu.
Datu Topesorema iamo pemulea ni Daudi
41 Lako ni se etu, mekune i Yesu i tau wori aretu, Naulika sira, “Mangkiada mpane niuli Datu Topesorema iamo pemulea ni Datu Daudi? 42 Lawi i Daudi saduduana mopakanoto Datu Topesorema iamo Tuana. I rara Sura Dulua Petoia, nauli ni Daudi ewa ei:
I Pue Ala mongkora i Tuaku, Nauli:
‘Pomesomode mbai kuanaKu,
43 duduuna Kupopengkoru sira ope-ope iwaliMu si Iko.’ (Dulua Petoia 110:1)
44 Mewali, ane i Daudi manguli Datu Topesorema etu iamo Tuana, mesua akalapae ane Datu Topesorema etu pemuleana?”
45 Tongora mani tau wori mampetingai pololitaNa, nauli ni Yesu i topeguruNa, 46 “Mainga-inga komi, inee komi mampeulai babeia nu guru-guru agama. Raundera molumako mopake badu anu mandoe, ai raundera rabila nu tau wori i pobalu-balua. Rapenokara rapopomeso i pomesoa anu teadai i tombi penombaa nu toYahudi ai i posusaa. 47 Moakalangi sira towawine anu bemba, bona morampaki sira tombira ai mekakae sira masae-sae bona rauli nu tau malompe babeiara. Ina mantimi mpuu pesuku si sira!”