I Yesu ai i Sakeu
19
1 I polumako ni Yesu monontosi Yerusale, moliu Ia i kota Yeriko. 2 I kota etu, ria sadua tadulako nu toperuru asele anu pebuku, sangana i Sakeu. 3 I Sakeu etu napenoka mpuu mangita i Yesu. Agaiana nakeningkarembena, baria pensani naita, lawi mawori mpuu sira tau anu mogulu i se etu. 4 Etumo mpane melangkamo i Sakeu mampeilodongi tau wori, mpane memponemo ia i kau ara, bona pensani ia mangita i Yesu anu ina moliu i se etu. 5 Kadongka ni Yesu i se etu, Napengoa mpane Naulika, “Sakeu, pendolumode maliga! Lawi i eo ei, ina lau Aku nupotorare i tombimu.” 6 Mendolu i Sakeu maliga, lawi matono rarana modoko i Yesu i tombina.7 Awetu raita nu tau wori apa anu mewali etu, modeademo sira, raulira, “Ae, mangkiada mpane mewali torare Ia i tombi nu tomadosa?”
8 Tongo ni Yesu i rara nu tombi, meongkomo i Sakeu mololita nauli, “Pue, santongo lako i ope-ope anu-anuku, ina kukiraka sira tau anu mesiasi katuwura. Ai ima ngkida anu kubagiu, ina kupopesolaka sira iba mbela kaisina lako i apa anu kubagiuka sira.”
9 Nauli ni Yesu, “I eo ei, katesorema mewali i tombi ei. Lawi tau ei pemulea ni Burahima. 10 Lawi tunggaia nu Ana Manusia, mai i dunia ei, bona mangkadelo Ia tau anu karao lako si Pue Ala mpane mosore sira lako i suku dosara.”
Ngkora pandiri kono i doi bulawa
11 Awetu i Yesu gompimo i kota Yerusale, mawori sira tau meula si Ia. Tau wori aretu nipenokara: Ane dongka i Yesu i Yerusale, peparenta ni Pue Ala ungangkidamo ina dongka i dunia. Mewali, i Yesu mopapulomo pololitaNa ai ngkora pandiri ei, 12 Nauli, “Ria sadua tuana anu motunggai lau i tana anu karao, bona raongko mewali datu. Roo awetu mpane ia mesola. 13 Mewali, lako baria mani ia mangoka, morondemo ia sampulu dua batuana, mpane nakiraka sira sadua-sadua sampeka doi bulawa. Naulimo nu tuana etu i batuana: ‘Doi anu kukiraka komi ei, sangangaa nipopolumako duduuna mesola mpesola aku mai luwu, ria tambaina.’ 14 Agaiana i tana nu tuana etu, ria mbui sira tau anu mokasisi ia. Mewali awetu ia lambu, raparentakaramo bona basangkia tudua lau mangulika Datu Mabose: ‘Tua, inee nuongko ia mewali datuki, lawi baria ia kiunde!’
15 Nauda awetu, tuana etu raongko ngkida, mpane mesola lau i boeana. Awetu ia dongka, narondemo sira batuana, napekune ba sangkiamo tambai nu doina. 16 Anu mpolinguruna mai si ia, nauli: ‘Tua, anu nukiraka aku ni banimpia, sampeka doi bulawa. Eimo tambaina, mewali sampulu mpeka doi bulawa.’
17 Nauli nu Tua etu: ‘Malompe mpuu ka nupopolumakona bago anu kukiraka iko. Ikomo batua anu malompe. Mewali, nakeningkamatundumu mampobago bago anu kokoi, ina kupotuu iko motadulakoi sampulu kota.’
18 Batua anu karoduana mai mbui si ia, nauli: ‘Tua, anu nususuka aku ni banimpia, sampeka doi bulawa. Eimo tambaina, mewali lima mpeka doi bulawa.’
19 Nauli mbuimo nu Tua i batua anu karoduana etu: ‘Mewali, ina kupotuu iko motadulakoi lima kota.’
20 Roo awetu, mai mbuimo batua anu sadua, nauli: ‘Eimo doimu Tua. Kuboli lompe, kubungu i rara nu lensoku. 21 Maeka aku si iko Tua, lawi kuinsani kamasekemu. I Tua, mandoa nauda baria anu ni Tua, ai i Tua morompu wua nu tuda-tuda anu baria natuda ni Tua.’
22 Nauli nu Tua etu, ‘Ikomo batua anu madaa! Ina kusuku iko sintoto ai pololitamu saduduamu. Nuinsani aku ei tau anu maseke, anu mandoa apa anu baria sambela kuboli, ai mopupu wuana apa anu baria sambela kutuda! 23 Ane ewa etu, mangkiada mpane baria nupopesua ngkimo doiku i bank, bona ane mesola aku, sangangaa kusumba doiku ria mbui tambaina!’ 24 Roo awetu, nauli mbuimo nu Tua i tau anu meongko i se etu: ‘Niala doi anu ria si ia, mpane nikiraka i batuaku anu mansumba sampulu mpeka doi bulawa.’
25 Agaiana rauli nu tau aretu: ‘Tua riamo si ia sampulu mpeka doi bulawa!’
26 Nasonoi nu Tua etu, ‘Kuulika komi: tau anu nakariangi, i Pue Ala kalalaua motambai apa anu ria si ia. Agaiana tau anu baria ria apa-apana, nauda ba apa ngkida anu ria si ia batena Nadoa mpesola.’ 27 Roo awetu, nauli mbuimo nu Tua etu: ‘Kenimode mai iwaliku anu mosapuaka karaongkoku mewali datura. Nipopate sira ope-ope i se ei bona kuita!’”
I Yesu mesua i Yerusale ai ratoia nu tau wori
28 Awetu i Yesu roomo mololita ewa etu, molumakomo Ia ilodora, lau Ia monontosi kota Yerusale. 29 Awetu gompimo sira i boea Betpage ai Betania i bulu Saitun, i Yesu motudumo rodua topeguruNa moilodo, 30 Naulika sira, “Laumode komi i boea anu talio dou mai. Ane dongka komi si dou, ina niita sambaa ana kalide anu tetaka, anu baria mani sambela rapodara. Nikakasi lako i potakaana mpane nikenika Aku mai. 31 Ane ria anu mampekune komi mangkiada mpane nikakasi, nisonoi ewa ei: ‘I Pue anu moparaluu.’”
32 Lau mpuumo topeguruNa anu rodua aretu, rasumbara mpuumo ewa anu naulika sira ni Yesu. 33 Tongora mokakasi koloro nu kalide etu, tumpu nu kalide mampekune sira, nauli, “Mangkiada mpane nikakasi kalide etu?”
34 Rasonoira, raulira, “I Pue anu moparaluu.”
35 Roo awetu, kalide etu rakenira lau si Yesu, ralampiira ai badura, mpane ratulungira i Yesu mensawi i tumuna. 36 Awetu i Yesu ina moliu, mawori tau molonsu jubara, mpane rawokera i tongo dala nakeningka rapomabosera Ia. 37 Gompimo i kota Yerusale, i pempandolua lako i bulu Saitun, ope-ope topeulaNa mampomabose sanga ni Pue Ala. Nakeningkatonona rarara, mewali monganga-ngangamo sira motoia i Pue Ala, lawi raitaramo maisi tanda kuasa anu nababei ni Yesu. 38 Modudulua sira, raulira:
“I Pue Ala mowati Datu anu mai i rara nu sangaNa!
Malompe mpesolamo posintuwuta ai i Pue Ala.
Tetoiamo i Pue anu i suruga!” (Dulua Petoia 118:26)
39 Lako ni se etu, basangkia toParisi i olo nu tau wori mangulika i Yesu, “Guru, ombomode sira topeulaMu bona inee sira manguli ewa etu!”
40 Nasonoi ni Yesu, “Baria! Lawi ane mandii sira topeulaKu, watu-watu arei ina monganga-nganga motoia Aku.”
I Yesu motumangisi Yerusale
41 Gompimo i Yesu i Yerusale, Napetiro kota etu, mpane Natumangisi, 42 Nauli, “Mpiondo komi toYerusale! Morasi mpuu komi ane keniinsani apa anu pensani mopasintuwu komi ai i Pue Ala i eo ei. Agaiana, ope-ope etu telimbangimo lako i matami. 43 Lawi ina dongka tempona, iwalimi ina mobabei sira bente motoleliki kotami, mpane rabungkara komi, duduuna baria ria dalami mensuwu. 44 Ina masurewu komi, komi ai boeami ai ope-ope isina, duduuna bariamo ria saogu watu nu tombimi anu teboli i peariana. Ope-ope etu sangangaa mewali, lawi baria niinsani eo kamai ni Pue Ala si komi.”
I Yesu mesua i Tombi ni Pue Ala
45 Roo awetu, i Yesu mesua i Tombi ni Pue Ala. I se etu, Naliwu sira tau anu mobalu-balu, 46 Naulika sira, “I rara Sura Ngkora Magali i Pue Ala manguli ewa ei: ‘TombiKu iamo tombi pekakaeaa.’ Agaiana komi, nipopewalida tombi pogulua nu toperampaki!”