Ngkora pandiri kono i sadua topobotusi kara-kara ai sadua tobemba
18
1 Roo awetu, i Yesu mopadongka sampangka ngkora pandiri i topeguruNa bona mekakae liliu sira ai inee malede rarara. 2 Nauli, “I rara nu sambua kota, ria sadua topobotusi kara-kara anu baria mengkoru si Pue Ala ai baria mbui mobila ba ima ngkida. 3 I kota etu, ria mbui sadua towawine anu bemba. Mawori mbelamo ia lau mampombelioka topobotusi etu, mangkeni kara-karana, nauli: ‘Tulungi kowo aku mampombelioka iwaliku.’4 I rarana basangkia kasaena, topobotusi etu baria madota modurei ia. Agaiana kasopoana, nauli nu rarana: ‘Nauda aku baria mengkoru si Pue Ala ai baria mobila ba ima ngkida, 5 agaiana nakeningkadongkana liliu tobemba etu mai mosalempori aku, aginamo kutulungi ngkimo ia i kara-karana. Lawi ane baria ia kutulungi, ina mai liliu ia si aku.’”
6 Roo awetu, nauli ni Yesu, “Nipetingai apa anu nauli nu topobotusi anu madaa etu. 7 Mewali, apa mani i Pue Ala anu manoto potulungiNa tauNa, anu merade asi si Ia malompe kawengi ba mabaa. Ba nipenokami masae-sae tapegia, lako natulungida kita ni Pue Ala? Baria! 8 Nipotuumode, batena maliga ka Natulungita. Agaiana ane dongka mpesola Ana Manusia, ba Nasumba mani tau anu mepotuu si Ia i rara dunia ei?”
Ngkora pandiri kono i toParisi ai toperuru asele
9 Napadongka mbuimo ni Yesu ngkora pandiri ei, i tau anu moimba wotona saduduana anu mamonso, agaiana tau ntanina baria. 10 Nauli ni Yesu, “Ria rodua tau anu lau i Tombi ni Pue Ala bona mekakae, sadua toParisi mpane sadua toperuru asele. 11 ToParisi etu meongkomo mopatani saduduana ai mekakae, nauli: ‘Pue Ala, kuuli maisi kalompena si Iko, lawi baria aku ewa tau ntanina anu manangka, anu mebagiu, ai anu mebualosi. Kuuli maisi kalompena si Iko lawi baria aku ewa toperuru asele dou. 12 Mopuasa aku rombela i rarana saminggu, ai lako i ope-ope wua nu pobagoku, kukiraka Iko sampulu parasee.’
13 Agaiana toperuru asele etu, meongko ngkarao ngkida ia, ai baria ia pebai metirangai i langi. Nakeningka nainsanina kamadosana, narera-rera pondana, nauli: ‘Pue Ala! Nupokaasi kowo aku, lawi aku ei tau anu madosa!’” 14 Lako ni se etu, napasopo ni Yesu pololitaNa, Nauli, “Monso mpuu anu Kuulika komi: I pesolara i tombira sadua-sadua, wule toperuru asele etu ngkida anu nadoko ni Pue Ala ai Naimba manoto i petotokiNa, agaiana toParisi etu, baria nadoko ni Pue Ala. Lawi Ima anu mampemabose ina rapakoi, ai ima anu mengkakoi ina rapomabose.”
I Yesu mowati anakoi
15 Sambela tempo, ria sira tau anu mangkeni anara si Yesu bona Napaga woora mpane Nawati sira. Awetu raita nu topeguruNa apa anu rababei nu tau aretu, rakarumpuira tau aretu. 16 Agaiana i Yesu morondemo sira anakoi aretu, mpane Naulika sira topeguruNa, “Pogeaka sira anakoi mai si Aku. Inee sira niombo, lawi tau anu ewa anakoi areimo, anu ina mewali tau ni Pue Ala i rara nu peparentaNa. 17 Nipetingai pololitaKu ei: Ane baria komi mengkoru si Pue Ala ewa sadua anakoi, baria komi ina mewali tauNa i rara nu peparentaNa.”
Topebuku mapari mesua i suruga
18 Sambela tempo, ria sadua tadulako nu toYahudi anu mekune si Yesu, nauli, “Guru anu malompe, apa anu sangangaa kubabei, bona mansumba aku katuwu malompe anu baria mokasopoa?”
19 Nauli ni Yesu i tau etu, “Mangkiada mpane nuuli Aku ei tau anu malompe? Baria ria sadua tau anu malompe, batena ngkida i Pue Ala. 20 Nuinsanimo parenta anu teuki i rara Atura ni Musa: Inee mebualosi, inee mepopate, inee manangka, inee mewali sabi dongko, ai nubila tinamu ai tuamamu.”
21 Nauli nu tau etu, “Ope-ope parenta etu, aminamo kupeulai lako mangura mani aku.”
22 Awetu naepe ni Yesu pololitana, Nauli, “Ria mani sampangka anu sangangaa nubabei. Lau sala nupobalu ope-ope anu-anumu, mpane balukina nukiraka sira tau anu mesiasi katuwura. Ane ewa etu nubabei, ina mabose surungina anu nusumba i rara nu suruga. Roo awetu, maimo iko meula si Aku.” 23 Awetu naepe lolita ni Yesu, mapari rarana, lawi maisi anu-anuna.
24 Nainsanimo ni Yesu kaparina rarana, etumo mpane, Nauli, “Mapari mpuu tau anu pebuku mewali tau ni Pue Ala i rara nu peparentaaNa. 25 Mapari mani topebuku mesua i rara peparentaa ni Pue Ala, mpane sambaa onta mesua i rara nu kalolu gigiu.”
26 Tingkaramo sira tau anu mangepe lolita ni Yesu etu, raulira, “Oo, ane awetuda, imapae anu pensani rakiraka katesorema?”
27 Nasonoi ni Yesu, “Ane manusia, baria nabuku. Agaiana ane i Pue Ala, ope-ope pensani mewali, lawi baria ria anu baria Nabuku.”
28 Lako ni se etu, nauli ni Peturu, “Adiwamo kami? Kipalengimo sinangka-nangkana bona kiula Iko.”
29 Nasonoi ni Yesu Nauli i topeguruNa, “Bona niinsani: Ima anu mopalengi tombina, ba towawinena ba pokana sira, ba tomanana, ba anana nakenimpeulana si Pue Ala, 30 batena ina mansumba mpesola basangkia mbela surungina i dunia ei lako i ope-ope anu napalengi, ai mansumba mbui ia katuwu malompe anu baria mokasopoa i eo anu ina mai.”
Katolu mbelana i Yesu mampololita kono i kamateNa
31 Sambela tempo, i Yesu morondemo topeguruNa anu sampulu rodua, mopatani sira mogulu, mpane Naulika sira, “Nipetingai lompe! Ei-ei laumo kita monontosi Yerusale. I kota etu, ina tepabukei ope-ope anu rauki nu nabi-nabi kono i Ana Manusia. 32 Ina rasusu Ia i tau anu baria sira toYahudi. Ina rapopowadi-wadira, rapakoira, rawangelusira, 33 rapopesiasira, mpane rapopatera. Agaiana i katolu eona, ina tuwu mpesola Ia.”
34 Agaiana topeguruNa baria manginsani tunggaia ni Yesu, lawi lempo nu pololitaNa tewunikai mani si sira.
I Yesu mopakaosa sadua toperade-rade anu mabilo i Yeriko
35 Gompimo i Yesu i kota Yeriko, ria sadua tau anu mabilo anu momeso i wiwi dala merade-rade. 36 Pangepena tau wori moliu, napekune, nauli, “Apada anu mewali etulaura?”
37 Rasonoi nu tau wori, “I Yesu toNasare moliu!”
38 Awetu naepe nu tau anu mabilo etu pololitara, monganga masimbuku, nauli, “Yesu, pemulea ni Datu Daudi! Nupokaasi kowo aku!” 39 Tau anu ilodo sira mokarumpui ia, raulikara “Mandii iko!” Agaiana tau anu mabilo etu, napasimbuku mpii peronde-rondena, nauli, “Pemulea ni Datu Daudi! Nupokaasi kowo aku!”
40 Mengkaroomo i Yesu mpane Natudu tau, Nauli, “Keni mai tau anu mabilo etu!” Mewali rakeni mpuumo ia si Yesu, mpane mekune i Yesu si ia, Nauli: 41 “Apa anu nuunde Kubabeika iko?”
Nasonoi nu tau anu mabilo etu, “Pue, kuunde kowo bona meita aku!”