Pepatudu ni Yesu kono i pogaa i rara posamboko
19
1 Awetu i Yesu roomo mopadongka ope-ope etu, malambumo Ia lako i tana Galilea lau i tana Yudea anu i sambuteka ue Yarade simbela-mbela ai topeguruNa, 2 ai mawori mbui tau meula si Ia, anu madua Napakaosa sira.3 Dongkamo sira basangkia toParisi anu mai mampetandaka i Yesu bona rasumbara kamasalaNa, rapekunera, “Mangula atura agamata, ba pensani mpuu tomoane mogaa ai towawinena nauda baria manoto apa puuna?”
4 Nasonoi ni Yesu, “Bariapae nibasa apa anu teuki i rara Sura Ngkora Magali: mpolinguruna i Pue Ala moteru sadua tomoane ai sadua towawine. 5 Ai roo awetu, Nauli:
‘Etumo mpane sadua tomoane sangangaa mopalengi tuamana ai tinana, ai tuwu simbela-mbela ai towawinena, bona anu rodua aretu mewali sira sadua.’ (Pewalina 2:24)
6 Mewali i petotoki ni Pue Ala, bariamo sira rodua, agaiana mewali sira sadua. Etumo mpane, apa anu napasintuwu ni Pue Ala, baria mpuu pensani nagaa nu manusia.”
7 Mesono sira toParisi, “Ane awetu, mangkiada mpane i rara Atura ni Musa mopaliu tomoane bona mokiraka sura mpogaa i towawinena, ane napenoka napogaaki?”
8 Nasonoi ni Yesu, “I Musa mopaliu tau mogaa, nakeningkakoo nu rarami. Agaiana kamonsona, baria ewa etu lako i mpolinguruna. 9 Bona niinsani: ima anu mampogaaki towawinena, molentano towawinena etu baria mboto mebualosi. Mpane tomoane etu mosamboko ai towawine ntanina, tomoane etu mebualosi.”
10 Lako i se etu, topeguruNa mangulika Ia, “Ane awetuda ada posamboko, aginamo ineemo kita mosamboko.”
11 Nauli ni Yesu, “Pepatudu etu baria ope-ope tau manginsani, wule i tau anu napakanotomo ni Pue Ala ngkida anu manginsani. 12 Ria tau anu baria pensani mosamboko lawi ewa etumo wotona lako i karapoanakana. Ria mbui anu baria mosamboko nakeni babeia nu tau ntanina i wotona. Ria mbui anu baria mosamboko nakenimpeundeana saduduana, bona ria tempona mampopolumako bago ni Pue Ala. Ima anu pensani mampeulai patudu ei, pogeaka napeulai.”
I Yesu mowati anakoi
13 Sambela tempo, ria sira tau anu mangkeni anara si Yesu bona Napaga woora Nawati sira. Agaiana topeguruNa mokarumpui tau aretu. 14 Nauli ni Yesu i topeguruNa, “Pogeaka sira anakoi mai si Aku. Inee sira niombo, lawi tau anu ewa anakoi aretumo anu ina mewali tau ni Pue Ala i rara peparentaNa.”* 15 I se etu Napagamo woo nu anakoi aretu, mpane Nawati. Roo awetu, malambumo Ia lako i se etu.
Tau anu pebuku baria madota mopawia anu-anuna bona meula si Pue Ala
16 Sambela tempo, ria sadua anantomoane anu dongka si Yesu mampekune, “Guru, babeia apa anu sangangaa kubabei bona mansumba aku katuwu malompe anu baria mokasopoa i eo anu ina mai?”
17 Nauli ni Yesu, “Mangkiada mpane nupekune kono i apa anu malompe? Baria ria ntanina anu malompe, batena ngkida i Pue Ala. Mewali, ane mampenoka iko mansumba katuwu malompe, peulaimode sawaa ni Pue Ala.”
18 Mekune mbui tau etu, “Sawaa anu adiwa?”
Nasonoi ni Yesu, “Inee mepopate, inee mebualosi, inee manangka, inee mewali sabi dongko, 19 nubila tinamu ai tuamamu, ai nupokaasi singka manusiamu ewa pampokaasimu wotomu saduduamu.”
20 Nauli anantomoane etu, “Ope-ope sawaa etu, kupeulai asamo. Apa mani anu sangangaa kubabei?”
21 Nasonoi ni Yesu, “Ane mampenoka iko meula si Pue Ala ai baria ria kamakurana pangulamu, laumode sala mampobalu anu-anumu, ai balukina nukiraka sira tau anu mesiasi katuwura. Ane ewa etu anu nubabei, ina mabose surungina anu nusumba i rara suruga. Roo awetu, maimo iko meula si Aku.” 22 Awetu naepe lolita ni Yesu, mapari rarana mpane malambumo ia, lawi maisi anu-anuna.
23 Etumo mpane nauli ni Yesu i topeguruNa, “Kuulika komi: mapari mpuu tau anu pebuku mewali tau ni Pue Ala i rara nu peparentaaNa. 24 Sambela mani Kuulika komi: mapari mani topebuku mesua i rara peparentaa ni Pue Ala, mpanena sambaa onta mesua i rara nu kalolu gigiu.”
25 Awetu raepe nu topeguruNa lolita ni Yesu, rapowulira mpuu, raulira, “Oo, ane awetuda, imapae anu pensani rakiraka katesorema?”
26 Natotoki sira ni Yesu mpane Naulika sira, “Ane manusia, baria mpuu nabuku napobago bona mansumba katuwu malompe anu baria mokasopoa. Agaiana ane i Pue Ala, baria ria anu baria pensani Nababei.”
27 Lako i se etu, nauli ni Peturu si Yesu, “Adiwamo kami? Kipalengimo sinangkana bona kiula Iko. Apa anu ina kisumba?”
28 Nasonoi ni Yesu, “Bona niinsani: i tempo ni Pue Ala mopakabou ope-opena, Ana Manusia ina momeso meparenta i pomesoa anu meawa. I tempo etu, komi topeguruKu ina momeso mbui komi i pomesoa anu sampulu roogu, meparenta ai mobotusi kara-kara nu toSaraeli anu sampulu rontina. 29 Ai ope-ope tau anu mopalengimo pokana, tinana ba tuamana, anana ba tombina ba bondena nakenimpeulana si Aku, batena ina mansumba ia surungina sangatu mbela kaisina lako i apa anu napalengimo etu, ai mansumba mbui ia katuwu malompe anu baria mokasopoa. 30 Agaiana mawori tau anu tepaitaliku i tempo ei, ina mewali tepailodo i tempo anu ina mai. Awetu mbui tau anu tepailodo i tempo ei, ina mewali tepaitaliku i tempo anu ina mai.”