I Yesu mampololita ada posamboko ai ada mpogaa
10
1 I Yesu mangoka lako i Kapernaum, lau i tana Yudea ai i tana anu ria i sambuteka ue Yarade. Mai mbuimo tau wori motoleliki Ia, mewali ewa saweweina Napatudu mbuimo sira. 2 Ria basangkia toParisi anu mai mampetandaka i Yesu bona rasumbara kamasalaNa, rapekunera, “Mangula atura agamata, ba pensani mpuu tomoane mogaa ai towawinena?”3 Nauli ni Yesu, “Parenta apa anu nakiraka komi ni nabi Musa?”
4 Rasonoi nu toParisi, “I Musa mopaliu tomoane mampogaaki towawinena, asala nababei sala sura mpogaa.”
5 Nauli ni Yesu, “Nakeningkakoo nu rarami, etumo mpane i Musa mouki ai mopadongkaka komi atura etu. 6 Agaiana lako i poteruNa dunia, ni tempona i Pue Ala moteru manusia, Nateru sadua tomoane ai sadua towawine. 7 ‘Etumo puuna sadua tomoane sangangaa mopalengi tuamana ai tinana, ai tuwu simbela-mbela ai towawinena, 8 bona anu rodua etu mewali sira sadua.’ Mewali, tosamboko etu bariamo sira rodua, agaiana mewalimo sira sadua. 9 Etumo mpane Kuulika komi, apa anu napasambua ni Pue Ala, baria mpuu pensani nagaa nu manusia.”
10 Roo awetu, i Yesu ai topeguruNa mesua i rara nu tombi. Tongora i rara nu tombi, topeguruNa sira mekune mbuimo si Ia kono i ada mpogaa.
11 Naulika sira ni Yesu, “Ima anu mampogaaki towawinena mpane mosamboko ai towawine ntanina, i lio ni Pue, tomoane etu mobualosi towawinena anu mpolinguruna. 12 Ewa etu mbui towawine anu mampogaaki tomoanena mpane mosamboko mbui ai tomoane anu ntanina, i lio ni Pue, towawine etu mobualosi mbui.”
I Yesu mowati anakoi
13 Sambela tempo, ria sira tau anu mangkeni anara si Yesu bona Napaga woora ai Nawati sira. Agaiana topeguruNa mokarumpui sira tau aretu. 14 Awetu naita ni Yesu apa anu rababeira, Nakarumpui sira topeguruNa, Nauli, “Pogeaka sira anakoi aretu mai si Aku. Inee sira niombo, lawi tau anu ewa anakoi aretu anu mewali tau ni Pue Ala i rara nu peparentaNa. 15 Bona niinsani: ane baria komi mengkoru si Pue Ala ewa sadua anakoi, baria komi ina mewali tauNa i rara nu peparentaNa.” 16 Awetu roomo Ia mololita ewa etu, Nakalupui sira anakoi aretu, Napaga woora ai Nawati sira.
Mapari mpuu topebuku mesua i peparenta ni Pue Ala
17 Tempo ni Yesu mopaliliu mbuimo polumakoNa, ungangkidamo ria sadua tau anu melangka mai si Ia, kasaliu molingkudu i lioNa, mpane mekune, nauli, “Guru anu malompe, apa anu sangangaa kubabei bona mansumba aku katuwu malompe anu baria mokasopoa?”
18 Nauli ni Yesu, “Mangkiada mpane nuuli Aku tau anu malompe? Baria ria sadua tau anu malompe, batena ngkida i Pue Ala. 19 Nuinsani mpuu sawaa anu teuki i rara Atura ni Musa: ‘Inee mepopate, inee mebualosi, inee manangka, inee mewali sabi dongko, inee mebagiu, ai nubila tinamu ai tuamamu.’”
20 Nauli nu tau etu, “Guru, ope-ope sawaa etu, lako kokoi mani aku, kupeulai asamo.”
21 Maasi rara ni Yesu mototoki tau etu, mewali Naulika, “Ria mani sampangka anu sangangaa nubabei. Laumode sala mampobalu anu-anumu, mpane balukina nukiraka sira tau anu mesiasi katuwura. Ane ewa etu nubabei, ina nusumba surungina i rara nu suruga. Roo awetu, maimo iko si Aku, ulamode Aku.” 22 Awetu naepe lolita ni Yesu, mapari rarana, mewali malambu ia, lawi maisi anu-anuna.
23 Natotoki ni Yesu topeguruNa sira, mpane Naulika sira, “Mapari mpuu tau anu pebuku mewali tau ni Pue Ala i rara nu peparentaaNa.” 24 Tingkara sira topeguruNa mangepe pololitaNa etu, etumo mpane Naulika mbuimo sira, “AnaKu, mapari mpuu mewali tau ni Pue Ala i rara nu peparentaNa. 25 Mangura mani sambaa onta mesua i kalolu gigiu, mpanena topebuku mesua i peparentaa ni Pue Ala.”
26 Awetu raepe nu topeguruNa lolita ni Yesu, rapotingkarara mpuu, raulira, “Oo, ane awetuda, imapae anu pensani rakiraka katesorema?”
27 Natotoki sira ni Yesu, Naulika, “Ane manusia, baria mpuu nabuku bona mansumba katuwu malompe anu baria mokasopoa. Agaiana ane i Pue Ala, baria ria anu baria pensani Nababei.”
28 Lako ni se etu, nauli ni Peturu, “Adiwamo ai kami? Kipalengimo sinangkana bona kiula Iko.”
29 Nauli ni Yesu, “Kamonsona, ima anu mopalengi pokana, tinana ba tuamana, anana ba tombina ba bondena nakenimpeulana si Aku ai nakenimpobambarina Bambari Malompe, 30 batena ina mansumba surungina anu mabose. I dunia ei ina mansumba sangatu mbela lako i kaisi nu tombina, pokana, tinana, anana, bondena, ai mansumba mbui pepopesiasi. Ai i eo pobotusi, batena ina mansumba ia katuwu malompe anu baria mokasopoa. 31 Agaiana mawori tau anu tepaitaliku i tempo ei, ina mewali tepailodo i tempo anu ina mai. Awetu mbui tau anu tepailodo i tempo ei, ina mewali tepaitaliku i tempo anu ina mai.”
Katolu mbelana i Yesu mampololita kono i kamateNa
32 I Yesu ai topeguruNa tongora i polumakoara lau i Yerusale, i Yesu molumako mbai ilodora. TopeguruNa sira mapari rara, ai tau wori anu meula lako i taliku, maeka sira. Etumo mpane, Naronde mbuimo topeguruNa anu sampulu rodua, rakaraosira tau wori mpane Naulika sira apa anu sangangaa mewali i wotoNa. 33 Nauli, “Nipetingai lompe! Ei-ei laumo kita monontosi Yerusale. I Yerusale, Ana Manusia ina rasusu i kapala-kapala tadulako menomba ai guru-guru agama, ai ina rabotusi bona rasuku mamate Ia. Roo awetu, ina rasusu Ia i tau anu baria sira toYahudi. 34 Ina rakaisii lolita Ia, rawangelusi, rawombe, mpane rapopate. Agaiana i katolu eona, ina tuwu mpesola Ia.”
Tau anu mengkaiwoi, siramo anu mabose katuwura i petotoki ni Pue Ala
35 Roo etu, i Yakobu ai i Yohane, ana ni Sebedeus, mogompilisi i Yesu, raulikara, “Guru, ria sampangka anu kipenoka kiperade lako si Iko.”
36 Nauli ni Yesu, “Apa anu niperade si Aku?”
37 Rasonoira, “Ane mewali Iko Datu anu meawa, nupaliu kami momeso i peparentaaMu simbela-mbela ai Iko, sadua mbai i kuanaMu, sadua mbai i kabeoMu.”
38 Naulika sira ni Yesu, “Baria niinsani apa anu niperade, nibukupae mokolo kapari anu sangangaa Kukolo? Ba nibuku mantodisa anu ina Kutodisa?”
39 Rasonoi ni Yakobu ai i Yohane, “Kibuku!”
Nauli ni Yesu, “Mamonso, ina nikolo mpuu kapari ewa anu Kukolo, ai ina nitodisa apa anu Kutodisa. 40 Agaiana baria Aku anu mopakanoto ima anu momeso mbai i kuanaKu ai mbai i kabeoku. Batena ngkida i Pue Ala anu mopakanoto.”
41 TopeguruNa anu sampulu aretu, marumpu sira mangepe pamperade ni Yakobu ai i Yohane. 42 Etumo mpane i Yesu moronde ope-ope topeguruNa, Naulika sira, “Niinsani mboto, topoparenta-topoparenta ai tau anu mawane lantira anu baria toYahudi, peunde-undeara moparenta tau wori, ai mopari-pari tau wori mampeulai sawaara. 43 Agaiana komi, inee ewa etu babeiami! Ima anu mampenoka mawane lantina, sangangaa mewali sala sadua toperora. 44 Ai ima anu mampenoka mabose sangana, sangangaa mewali sala ia sadua toperora i ope-ope rangana. 45 Mogaloda Ana Manusia, tunggaiaNa mai i dunia ei baria bona mewali Toposawaa. KamaiNa etu, bona mewali Ia toperora, ai mosusu wotoNa rapopate mosuru dosa nu manusia.”
I Yesu mopakaosa i Bartimeus
46 Mpane dongkamo i Yesu ai topeguruNa i kota Yeriko, awetu rapapuloramo polumakoara, mawori tau meula si sira. I tempora mopalengi kota Yeriko, i wiwi dala momesomo sadua tau anu mabilo merade-rade. Sangana i Bartimeus, ana ni Timeus. 47 Awetu naepe ni Bartimeus i Yesu toNasare anu moliu, monganga-nganga ia, nauli, “Yesu pemulea ni Datu Daudi! Pokaasi kowo aku!”
48 Mawori tau mokambaroka ia, raulikara, “Mandii iko!”
Agaiana tau anu mabilo etu, kalalaua masimbukuda ponganga-ngangana, nauli, “Pemulea ni Datu Daudi, pokaasi kowo aku!”
49 Mengkaroomo i Yesu molumako, mpane Nauli, “Ronde ia mai!”
Rarondera mpuumo tau anu mabilo etu, raulikara, “Pakaroso raramu! Peongkomode, lawi Narondemo iko!”
50 Meongkomo tobilo etu mopawia jubana i dala, ai kasaliu lau si Yesu. 51 Napekune ni Yesu si ia, “Apa anu nuunde Kubabeika iko?”
Nasonoi nu tau anu mabilo etu, “Guru, kuunde bona meita aku!”
52 Nauli ni Yesu, “Laumode, nakenimpepotuumu si Aku, maosamo iko!” Ungangkidamo meita ia, ai meula mbui ia si Yesu simbela-mbela ai tau wori.