Ngkora pandiri kono i topobago bonde
20
1 Nauli ni Yesu, “Peparenta ni i Pue Ala pensani rapandiri ewa ei: Sadua tumpu bonde anggoro lau mangkadelo tau anu raundera mobago i bondena. Madondo-dondo nasumba basangkia tau, 2 mpane naulika sira: ‘Laumode komi mobago i bondeku, ai ina kukiraka komi sadua-sadua saromi sampeka doi pera saeoa, sintoto ai saro nu tau saeoa.’ Rapokonora pololitana etu, lau mpuumo sira. 3 Awetu tinti sasiomo madondo etu, lau mbuimo ia, naita basangkia dua tau momeso-meso i pobalu-balua. 4 Naposawaaka sira: ‘Laumode komi mobago i bondeku, ina kukiraka komi saromi anu sintoto ai pobagomi.’ Lau mpuumo sira. 5 Ewa etu mbui nababei i togo eomo ai tinti tolu sindulau eo.6 Sindulau eomo, ina tinti limamo ni tempo etu, nasumba mbui tau anu momeso-meso. Napekune sira: ‘Mangkiada mpane momeso-meso ngkida komi saeoa, baria komi mobago?’
7 Rasonoira: ‘Lawi baria ria anu mampopobago kami.’
Nauli nu tumpu bonde etu: ‘Ane ewa etu, laumode komi mobago i bondeku.’ Lau mpuumo sira.
8 Malimpa eomo, naulimo nu tumpu bonde i mandorona: ‘Rondemode sira topobago aretu, mpane nukirakamo sira sarora. Nukiraka nsalaa sarora i tau anu lako mepuu mobago tinti lima ni mpongone, duduuna i tau anu mobago sira mepuu madondo-dondo.’
9 Mai mpuumo sira anu mobago mepuu tinti lima sindulau eo, radokora sarora sadua-sadua sampeka doi pera. 10 Ewa etu mpuumo duduuna dongka i topobago anu mepuu madondo-dondo. Topobago anu mepuu madondo etu manguli i rarara: ‘Manoto sangangaa melabi anu nakiraka kita, lawi saeoamo kita mobago!’ Agaiana batena sampeka doi pera ngkida mbui anu radokora. 11 I podokora sarora etu, modeade sira i tumpu bonde, raulira: 12 ‘Anu dongka mobago i taliku, mobago sira sajaa ngkida. Agaiana kami, mobago mantimi kami saeoa, nasimbaki eo anu makere kami. Mangkiada mpane nubaiari sira simbela ai kami?’
13 Nasonoi nu tumpu bonde etu: ‘Poka-poka, baria aku masala si komi. Bariapae nibotusitamo, saromi sampeka doi pera i rarana saeoa? 14 Dokomode saromi mpane laumode komi! Kalawiana peundeaku mokiraka saro i tau anu dongka i taliku simbela ai anu kukiraka komi. 15 Bariapae pensani aku mampopobundu doiku mangula peundeaku? Ba masina komi nakeningkalompena raraku si sira?’”
16 Napasopo ni Yesu ngkora pandiri etu, Nauli, “Ewa etu mbui, tau anu tepaitaliku i tempo ei, ina mewali tepailodo i tempo anu ina mai. Awetu mbui tau anu tepailodo i tempo ei, ina mewali tepaitaliku i tempo anu ina mai.”
Katolu mbelana i Yesu mampopainsanika kono i kamateNa
17 I tempo etu, i Yesu molumako monontosi kota Yerusale. Tongora molumako Naronde sira topeguruNa anu sampulu rodua mogulu sira mopatani, mpane Naulika sira, 18 “Nipetingai lompe! Ei-ei laumo kita monontosi Yerusale. I se etumo, Ana Manusia ina rasusu i kapala-kapala tadulako menomba ai guru-guru agama, ai ina rabotusi bona rasuku mamate Ia. 19 Roo i se etu, ina rasusu Ia i tau anu baria sira toYahudi bona rapopowadi-wadira, rasepe-sepe, mpane rapopate i kau anu rapopombesape. Agaiana i eo katolu, ina tuwu mpesola Ia.”
Tau anu mengkaiwoi, siramo anu mabose sangara i petotoki ni Pue Ala
20 Tempo etu, towawine ni Sebedeus ai anana rodua mai sira si Yesu. Tina ni Yakobu ai i Yohane etu molingkudu motumpa i lioNa lawi ria anu ina naperade. 21 Napekune ni Yesu si ia, “Apa anu nuperade?”
Nasonoi nu tinara etu, “Pamperadeku, tempoMu luwu mewali Datu, anaku anu rodua arei, momeso meparenta simbela-mbela ai Iko, sadua mbai i kuanaMu, sadua mbai i kabeoMu.”
22 Naulika sira ni Yesu, “Baria niinsani apa anu niperade? Nibukupae mokolo kapari anu sangangaa Kukolo?”
Rasonoi nu topeguruNa anu rodua aretu, “Kibuku!”
23 Nauli ni Yesu, “Mamonso, sangangaa nikolo kapari ewa anu Kukolo. Agaiana baria Aku anu mopakanoto ima anu momeso mbai i kuanaKu ai mbai i kabeoKu. Batena ngkida TuamaKu anu mopakanoto.”
24 Awetu raepe nu topeguruNa anu sampulu aretu pamperade nu rodua rangara anu ntalitoi etu, marumpu sira. 25 Etumo mpane i Yesu moronde ope-ope topeguruNa, mpane Naulika sira, “Niinsani mboto karuminsina peparenta nu topoparenta anu baria manginsani i Pue Ala, peunde-undeara moparenta tau wori. Tau anu mawane lantira mopari-pari tau wori mampeulai sawaara. 26 Agaiana komi, inee ewa etu babeiami. Ima anu mampenoka mawane lantina, sangangaa mewali sala sadua toperora. 27 Ai ima anu mampenoka mabose sangana sangangaa mewali nsalaa sadua toperora, 28 ewa pangkeniaka nu Ana Manusia: KamaiNa i dunia ei baria bona mewali toposawaa, agaiana kamaiNa bona mewali Ia toperora, ai mosusu wotoNa rapopate mosuru dosa nu manusia.”
I Yesu mopakaosa rodua tau mabilo
29 Kalambu ni Yesu ai topeguruNa lako i kota Yeriko, mokoloromo sira tau meula si Ia. 30 I wiwi dala, ria sira rodua tobilo anu momeso. Awetu raepe nu tobilo aretu i Yesu anu moliu, monganga-nganga sira, raulira, “Pue! Pemulea ni Datu Daudi! Pokaasi kowo kami!”
31 Mawori tau mokarumpui sira, raulira, “Mandii komi!” Agaiana tau mabilo aretu monganga-nganga ngkida sira masisimbuku, “Pue! Pemulea ni Datu Daudi, pokaasi kowo kami!”
32 Awetu naepe sira ni Pue Yesu, mengkaroo Ia mpane Naronde sira, Napekune, “Apa anu niunde Kubabeika komi?”
33 Rasonoira, “Pue, kiunde kowo bona meita.”
34 Maasi rara ni Yesu mangita sira, mpane Napetui matara. Ungangkidamo meita sira, mpane meulamo sira si Ia.