Basangkia mpangkana pepatudu ni Yesu
17
1 Roo ni se etu, nauli ni Yesu i topeguruNa, “Batena ria pekelo anu mopakanawu tau duduuna madosa. Agaiana masurewu mpuu sira tau anu moparia pekelo aretu! 2 Aginamo sambua watu popegili anu mabose rataka i tambolona, mpane rapopopakatiri ia i tasi. Mpanena mopakanawu ia sadua tau anu malede duduuna bariamo mepotuu si Aku. 3 Etumo mpane sangangaa mainga-inga komi!Ane pokamu mobabei sala, sangangaa nukambaroka. Ane tebalikimo rarana, nuampuni kowo ia. 4 Ane masala pokamu si iko nauda pitu mbela i rarana saeoa, ai bela-belana masala mai ia merade ampu si iko, sangangaa nuampuni.”
5 Rauli nu suroNa aretu, “Pue, pakaroso kowo pepotuuki!”
6 Nasonoi ni Yesu, “Ane riamo pepotuumi nauda kokoi ngkida ewa ati nu tasinawu, pensani niulika kau anu mabose ei: ‘Tewuka iko ai tetindaka i rara nu tasi!’ Ai batena ina mewali mangula sawaami.”
Ngkora pandiri kono i tua ai batua
7 Napaliliu ni Yesu pololitana ai ngkora pandiri ei, Nauli, “Pandirina, ria sadua lako si komi anu ria batuana. Batuana etu lau mowia ba mokampai porewu. Ane mesola ia lako i pobagoana, apa anu niulika? Ba niuli: ‘Maimo iko mangkoni?’ 8 Manoto baria! Ina niulikada ia ewa ei: ‘Nupasilolongaka sala aku pangkoniku! Mempasuru nsalaa iko. Nupegia sala aku tongoku manginu ai mangkoni. Ane roomo aku mangkoni, lako pensanida iko mangkoni.’ 9 Baria mbui ina niuli maisi kalompena i batuamu etu, lawi ikomo tuana ai ia batena mangula sawaamu. 10 Awetu mbui komi. Ane roomo nipeulai ope-ope anu naparentaika komi ni Pue Ala, sangangaa niuli: ‘Kami ei, batua biasa ngkida kami. Kibabei apa anu Naparentaika kami nu Tuaki ngkida.’”
I Yesu mopakaosa sampulu tau anu ketangga
11 I rara mpolumakoNa lau i Yerusale, i Yesu mangula tompo nu tana nu toSamaria ai toGalilea. 12 KadongkaNa i sambua boea, sampulu tau anu ketangga mai mampomberumpaka Ia. Meongko sira karao lako si Yesu, 13 mpane monganga sira, raulira, “Pue Yesu! Guru! Nupokaasi kowo kami!”
14 Awetu naita sira ni Yesu, Naulika sira, “Laumode komi nipopeitaka wotomi i tadulako menomba, bona tongawa kamaosamimo.” Awetu sira lau, tongora molumako, maosamo sira.
15 Sadua lako i tau aretu, manginsani kamaosanamo, mewali mesola ia lau si Yesu, motoia ia i Pue Ala masisimbuku. 16 Molingkudu ia motumpa i lio ni Yesu, mpane manguli maisi kalompena si Yesu. Tau etu iamo sadua toSamaria.
17 Roo awetu, nauli ni Yesu i ope-ope tau anu meula si Ia, “Bariapae sampulu sira anu Kupakaosa? Imbamora sira rangana anu sasio? 18 Mangkiada mpane sadua tau anu baria toYahudi ei ngkida anu mesola manguli maisi kalompena si Pue Ala?” 19 Lako ni se etu, nauli mbuimo ni Yesu i tau etu, “Nakenimpepotuumu si Aku, etumo mpane maosamo iko, mewali peongkomode, mpane laumode.”
Poparenta ni Pue Ala
20 Basangkia toParisi mekune si Yesu, impia kadongkana peparenta ni Pue Ala i dunia. Nasonoi ni Yesu, “Mpolinguruna kadongka nu peparenta ni Pue Ala i dunia, baria ria tanda-tanda anu pensani raita. 21 Awetu mbui, baria ria tau anu ina manguli: ‘Mai nipeita ia ria i se ei!’ ba ‘ia ria si dou!’ Lawi peparenta ni Pue Ala ria i olomi.”a
22 Roo awetu, nauli ni Yesu i topeguruNa, “Sambela tempo, ina nipenoka mpuu mangita Ana Manusia, agaiana baria Ia ina niita. 23 I tempo etu, ina ria tau anu ina mangulika komi: ‘Peita, ia ria si dou, ia ria i se ei!’ Agaiana inee komi lau meula si sira! 24 Lawi ane dongka mpesola Ana Manusia, ina tongawa mpuu. KadongkaNa, ina raita ewa pewangka nu banibi anu mensuwu lako i wuntuna sambali dongka i wuntuna sambali. 25 Agaiana mpolinguruna, sangangaa rapopesiasi nsalaa Ia ai baria Ia radoko nu tau anu tuwu ei-ei.
26 Apa anu mewali i tempo ni nabi Noho ni banimpia, etu mbui anu mewali i eo kadongka nu Ana Manusia. 27 Tau anu tuwu i tempo etu, baria rainsanira apa anu ina morumpa sira. Mangkoni ai manginu liliu ngkida sira, motombi sira ai rapopotombi sira. Etu anu rababeira liliu duduuna i nabi Noho mesua i rara nu duanga mabose. Ungangkidamo sira nalaboa nu ue, ai ope sira mamate. 28 Awetu mbui kabariara mainga-inga tau i kota Sodomo i tempona i Looti meari ni se etu. Mangkoni liliu ngkida sira, manginu-nginu ngkida sira, mobalu-balu sira, mowia sira ai mowangu sira tombi. 29 Agaiana tempo ni Looti lambu lako i kota Sodomo, i eo etu apu ai watu anu mawaa manawu lako i langi, mpane mopakatuna sira ope-ope. 30 Awetu mbui kabariana mainga-inga tau i tempona dongka mpesola Ana Manusia i dunia.
31 I eo etu, tau anu tongora momeso i tarampa,b inee sira mesua i rara nu tombi mangala anu-anura. Awetu mbui tau anu i bonde, inee sira mesola i boea mangala ba apa-apa. 32 Nikaendo apa anu mewali i towawine ni Looti!* 33 Ima anu napari-pari mampeparai katuwuna, katuwu malompe anu ria si ia ina matonto. Agaiana ima anu matonto katuwuna nakenimpeulana si Aku, iamo anu mansumba katuwu malompe.
34 Monso mpuu anu Kuulika komi: I eo kamaiKu mpesola, ria rodua anu maturu i sambua koi, sadua rakeni mpane sadua rapalengi. 35 Rodua towawine tongora mogili, sadua rakeni mpane sadua rapalengi. 36 [Rodua tau tongora mobago simbela i bonde, sadua rakeni mpane sadua rapalengi.]”
37 Awetu roomo i Yesu mololita, mekune sira topeguruNa si Ia, raulira, “Pue, imba pewaliana ope-ope etu?”
Nasonoi sira ni Yesu, Nauli, “Ane mangita komi tosi kaloa mogulu, niinsani kariana anu mamate i se etu. Awetu mbui, ina tongawa mpuu kadongkaNa mpesola i dunia.”