Topopatoro doi anu mebagiu
16
1 Roo awetu, i Yesu mopadongka ngkora pandiri ei i topeguruNa, Nauli, “Ria sadua topebuku. Moongko ia sadua tau anu mokadipuraka anu-anuna. Agaiana ria sira tau anu mosalai topobagona etu, raulira i tuana: ‘Topobagomu etu mopaope mbero doimu ngkida!’ 2 Etumo mpane, topebuku etu moronde topobagona etu, naulika: ‘Ria bambari anu rapadongka si aku, anu mosalai iko i pobagomu. Mewali, sangangaa nupopeitaka aku ope-ope suramu kono i pobagomu mopatoro doiku. Bariamo iko pensani mokadipuraka doiku ai anu-anuku.’3 Nauli nu rarana: ‘O, apamo anu sangangaa kubabei? Napawiamo aku nu tuaku lako i bagoku. Ane motongko aku bonde, baria kubuku, ai maea aku merade-rade. 4 Aa, ei-ei kuinsanimo! Sangangaa kubabei babeia anu malompe i rangaku, bona radokora aku i rara nu tombira ane rapawiamo luwu aku, lako i bagoku.’
5 Mewali, narondemo sira ope-ope tau anu moinda i tuana. Tau anu mpolinguruna naronde napekune, nauli: ‘Sangkia indamu i tuaku?’
6 Nasonoi nu tau etu: ‘Sangatu gumba lana.’
Nauli nu topopatoro doi etu: ‘Eimo sura poukia indamu. Pomesomode, ukimode i se ei: Lima mpulu gumba lanadamo!’
7 Roo awetu, karoduana, naulika: ‘Iko, sangkia indamu?’
Nasonoi nu tau etu: ‘Sansobu karu gandu.’
Nauli nu topopatoro doi etu: ‘Eimo sura poukia indamu. Pomesomode, ukimode i se ei: Walu atu karu gandudamo.’
8 Awetu naepe nu topebuku etu, apa anu nababei nu topopatorona doi anu mebagiu etu, natoiada, lawi nauda motengko babeiana, agaiana mapande mpii ia. Lawi tau anu wule mampekiri ka dunia, mapande sira mangkadelo dala mourusi urusia nu singka rangara. Kapandera melumbu mpane lako i tau anu mengkoru si Pue Ala. 9 Etumo mpane Kuulika komi: Tau anu mengkoru si Pue Ala sangangaa mapande mpii. Anu-anumi i dunia ei sangangaa nipake motulungi singka rangami, bona ane dongkamo tempona, anu-anumi etu bariamo mobundu, ina radoko komi i pearia anu malompe duduuna kasae-saeana.
10 Ane sadua tau pensani rapotuu i anu-anu, anu saudi ngkida, pensani mbui ia rapotuu i anu-anu, anu maisi. Agaiana ane ria sadua tau baria manoto pokadipurakana anu-anu, anu saudi, apa mani mokadipuraka anu-anu, anu maisi! 11 Mewali, ane baria komi rapotuu mokadipuraka lompe anu-anumi i dunia ei, imapae ina mampotuu komi mokadipuraka anu-anu, anu monso-monso i suruga? 12 Ai ane baria niinsani mokadipuraka lompe anu-anu nu tau ntanina anu rapotuuka komi, imapae ina mokiraka komi anu-anu, anu mewali anumi saduduami?
13 Baria ria sadua batua anu nabuku mampobagoka rodua tuana, lawi sadua ina napokaasi, ai sadua nakasisi. Ina tetida ia i tuana anu sadua, ai baria ina tetida i tuana anu tosaduana. Ewa etu mbui komi, baria komi pensani mampeulai peundea ni Pue Ala, ane rapobatua komi nu anu-anu i dunia.”
14 Ope-ope lolita ni Yesu, naepe asa nu toParisi, mpane rapantawairada, lawi wule doi ngkida i pekirira. 15 Agaiana i Yesu mangulika sira, Nauli, “Mengkamanoto komi i petotoki nu manusia. Agaiana i Pue Ala manginsani isi nu rarami. Lawi apa anu nakadelo nu manusia, etumo anu nakasisi ni Pue Ala.
16 Mepuu ni banimpia duduuna i kadongka ni Yohane Toperiu, Atura ni Musa ai sura nu nabi-nabi rabambarimo ai rapatudukamo sira tau. Agaiana mepuu ei-ei, Bambari Malompe kono i peparenta ni Pue Ala rabambari liliu. Etumo mpane, mawori tau mopari-pari mesua i rara peparentaaNa. 17 Mamura mani langi ai dunia magero, mpanena sambua titi Ngkora anu teuki i rara Atura ni Musa, baria mewali.
18 Ima anu mampogaaki towawinena mpane mosamboko ai towawine anu ntanina, tomoane etu mebualosi. Awetu mbui sadua tomoane anu mosamboko ai sadua towawine anu napogaaki nu tomoanena, tomoane etu mebualosi mbui.”
Topebuku ai i Lasarus
19 Lako ni se etu, napadongka mbui ni Yesu ngkora pandiri, Nauli, “Ria sadua topebuku. Pesampina masuli asa balukina. Katuwuna eo-eona, mosusa-susa ngkida. 20 I boboka nu tombina, ria sadua tau anu mesiasi katuwuna, sangana i Lasarus. Wotona buke tangga. 21 Nakeningkaorona, napenoka kowo mangkoni wuta anu manawu lako i wongko meja nu topebuku etu. Natambai mani dike sira dongka modilai tanggana.
22 Roo awetu, matemo i Lasarus, mpane rakeni ia nu malaeka sira lau i pearia anu teadai i tumbiri ni Burahima. Baria masae lako ni se etu, mamatemo mbui topebuku etu, mpane rapaiwu. 23 Agaiana topebuku etu rakeni ia i pearia nu tomate ai maruminsi pantodisana. Ni se etu, mengoa ia, naita ngkarao i Lasarus momeso i tumbiri ni Burahima. 24 Topebuku etu moronde i Burahima, nauli: ‘Uma Burahima! Nupokaasi kowo aku! Nutudu i Lasarus moeme karawena i ue, bona mai motudoi dilaku. Mapari gaga kuepe i rara nu apu ei!’
25 Nasonoi ni Burahima: ‘Anaku, nukaendo katuwumu i dunia. Ni tempo etu, mansumba iko ope-ope anu malompe, agaiana i Lasarus kowo mansumba ngkida ia kapari. Ei-ei, tepalindomo i Lasarus i se ei, agaiana iko sangangaa mansumba kapari. 26 Natambai mbui, naparioloki kita nu sambua kabe anu mantinda mpii, anu baria pensani rapoliungi. Etumo mpane tau anu lako i se ei, baria pensani lau i se etu, ai tau anu lako i se etu, baria pensani mai i se ei.’
27 Roo ni se etu, nauli mbui nu topebuku etu: ‘Ane ewa etuda, kuperade mpii bona nutudu i Lasarus lau i tombi nu tuamaku, 28 lawi ria mani sira lima pokaku anu meari i se etu. Nutudu i Lasarus mampopaingaka sira kono i apa anu mewali si aku, bona ntena sira mansumba pantodisaa anu baria mokasopoa ei.’
29 Nasonoi ni Burahima: ‘Baria! Lawi riamo sura ni Musa ai sura nu nabi-nabi anu raukika sira. Pogeaka sira mampeulai apa anu teuki i rara nu sura etu.’
30 Nauli nu topebuku etu: ‘Uma Burahima, ane etu ngkida, baria sondo! Ane nutudu sadua tomate anu tuwu mpesola lau mololita si sira, lako mampenonsoida sira dosara!’
31 Agaiana nauli ni Burahima: ‘Ane lolita i sura ni nabi Musa ai sura nu nabi-nabi ntanina baria rapeulaira, batena baria sira ina mepotuu, nauda lako i tomate anu rapatuwu mpesola mangulika sira.’”