Ngkora pandiri kono i sampulu anantowawine
25
1 “Peparenta ni Pue Ala pensani rapandiri ewa ei: sampulu anantowawine motunggai lau modupa tomoane anu rabua, sadua-sadua sira mangkeni sulora. 2 Lima sira anu madoio, lima sira anu matopa. 3 Lima anantowawine anu madoio etu, mangkeni sira sulora, agaiana baria sira mangkeni popotambai mina nu sulora. 4 Lima anantowawine anu matopa mangkeni sulora ai mangkeni mbui sira mina i pamboliara anu ina rapopotambai mina nu sulora. 5 Masae mpuu lako dongkada tomoane anu rabua, duduuna matetunduamo sira anantowawine aretu, kasopoana letamo sira ope-ope.6 Tongo mbengi, lako riada tau anu monganga, nauli: ‘Doumo mai tomoane anu rabua! Maingkomode komi, nidupa ia.’ 7 Mematamo anantowawine anu sampulu aretu, sadua-sadua sira mopatimama sulora. 8 Anantowawine anu madoio mangulika sira rangara anu matopa: ‘Mada, nikiraka kowo kami minami saudi, ina mamatemo suloki.’
9 Mesono sira towawine anu matopa: ‘Minaki baria mbui sondo! Laumode sala komi mobaluki mina i topobalu-balu.’ 10 Lau mpuumo sira anantowawine anu madoio aretu mobaluki mina. Tempora lau mobaluki mina, dongkamo tomoane anu rabua etu. Anantowawine anu matopa aretu, matimama amimo sulora, etumo mpane kasaliu mesua sira simbela-mbela ai tomoane anu rabua i rara nu tombi posusaa, mpane ratukomo boboka.
11 Roo awetu, dongkamo mai anantowawine anu madoio. Meronde sira lako i raoa, raulira: ‘Ee tua! Bungkasika kowo kami boboka!’
12 Nauli nu tomoane anu rabua: ‘Kamonsona, baria komi kuinsani.’”
13 Napasopo ni Yesu ngkora pandiriNa ewa ei, “Etumo mpane sangangaa matimama komi, lawi baria niinsani eo ai tempo kadongka nu Ana Manusia.”
Ngkora pandiri kono i rodua batua anu madota mobago ai sadua anu malose
14 “Peparenta ni Pue Ala pensani rapandiri ewa ei: sadua tuana moliwo ina lau i kota anu karao. Lako baria mani ia lambu, naronde batuana mpane nakiraka sira doi rapopolumakora bona tetambai doi etu. 15 Nakiraka sira sadua-sadua mangula pebukuara. Sadua nakiraka lima nsobu doi bulawa, anu sadua ronsobu doi bulawa, mpane anu sadua sansobu doi bulawa. Roo awetu, malambumo ia. 16 Batua anu nakiraka lima nsobu doi bulawa, kasaliu mampopolumako doi etu lau mobalu-balu, nasumba mpuumo tambai nu doi etu lima nsobu mbui. 17 Ewa etu mbui batuana anu nakiraka ronsobu doi bulawa, mansumba mbui ia tambaina ronsobu. 18 Agaiana batuana anu nakiraka sansobu doi bulawa, lauda ia mokae tana napowunii doi nu tuana.
19 Masae tempona, lako mesolada tuara, narondemo sira batuana napekune adiwa karapopolumakora doina. 20 Batua anu nakiraka lima nsobu doi bulawa, dongka mangkeni doi sampulu nsobu i tuana, nauli: ‘Tua, anu nukiraka aku ni banimpia lima nsobu. Eimo doimu tetambaimo lima nsobu.’
21 Nauli nu tuara: ‘Malompe mpuu ka nupopolumakona bago anu kukiraka iko. Mewali, nakeningkamatundumu mampobago bago anu kokoi, kupotuuka iko mampobago bago anu mabose. Maingkomode simbela-mbela ai aku i rara nu katono-tono.’
22 Batua anu nakiraka ronsobu doi bulawa mai, mpane nauli: ‘Tua, ni banimpia ronsobu doi bulawa anu nukiraka aku. Eimo doimu tetambaimo ronsobu.’
23 Nauli nu tuara etu: ‘Malompe mpuu ka nupopolumakona bago anu kukiraka iko. Mewali, nakeningkamatundumu mampobago bago anu kokoi, kupotuuka mbui iko mampobago bago anu mabose. Maingkomode simbela-mbela ai aku i rara nu katono-tono.’
24 Roo ni se etu, maimo batuana anu nakiraka sansobu doi bulawa, nauli: ‘Tua, kuinsani kamasekemu. Ai kuinsani mbui wule mampegia ngkida iko modoko wua nu pobago, lako i bago anu baria nupobago. 25 Nakeningkaekaku, etumo mpane lau aku mowuni doimu kutau i rara nu tana. Mewali, eimo doimu.’
26 Nauli nu tuara etu: ‘Iko batua anu madaa ai anu malose mobago! Nuinsani mboto wule mampegia aku wua nu pobago lako i bago anu baria kupobago! 27 Ane ewa etu, mangkiada mpane baria nupopesua ngkimo doiku i bank, bona ane mesola aku, sangangaa kusumba doiku ai ria mbui tambaina!’ 28 Nauli nu tuara etu i batua anu ntanina: ‘Doa doi anu ria si ia, kiraka batuaku anu sampulu nsobumo doi bulawana. 29 Mewali, tau anu nakariangi i Pue Ala kalalaua motambai apa anu ria si ia. Agaiana tau anu baria ria apa-apana, nauda ba apa ngkida anu ria si ia batena Nadoa mpesola. 30 Batua anu baria mobundu etu, nitendemode i rara kadediana. I se etu ia ina motumangi ai mantodisa liliu.’”
I eo kasopoa dunia, Ana Manusia ina mobotusi kara-kara nu ope-ope tau
31 “Tempo nu Ana Manusia dongka, ina meawa katuwuNa ai buke kamakuasa, ai ina raporangai Ia nu ope-ope malaeka. Ina momeso Ia i kadera kadatuaNa anu meawa. 32 Ope-ope tau ina terusu i lioNa ai Nagaa sira mewali rontobu, ewa sadua toporewu mopatani dimbana ai towauna. 33 Tau anu mobabei peundea ni Pue Ala, rapasantobu sira mbai i kuanaNa, tau anu baria mobabei peundeaNa, mbai i kabeoNa.
34 Mpane Datu etu, mangulika ope-ope tau anu mbai kuanaNa: ‘Maimode komi anu nawati nu TuamaKu! Pesuamode komi i rara peparentaaKu. Peariami Kupasilolongaka amimo komi, mepuu i pewalina dunia ni banimpia. 35 Lawi i tempoKu maoro, nipakoni Aku. TempoKu mangkamara, nipanginui Aku. TempoKu moliu nauda baria Aku niinsani, nipopensopi Aku mewali toraremi. 36 Baria ria sampiKu, nisampii Aku. TempoKu madua, nipakulii Aku. TongoKu ratarunggu, nitulungi Aku.’
37 Mesono sira anu mbai kuanaNa, raulira: ‘Pue, impia Iko kiita maoro mpane kipakoni Iko, ba mangkamara mpane kipanginui Iko? 38 Niimpia Iko kipopensopi mewali torare i tombiki? Niimpia Iko kiita baria ria sampiMu, mpane kisampii Iko? 39 Niimpia Iko kiita madua mpane kipakulii Iko, ba i rara nu tarunggu mpane kitulungi Iko?’
40 Mesono Datu etu, ‘Bona niinsani: apa anu nibabei motulungi pokaKu, nauda sadua ngkida pokaKu anu mesiasi katuwuna, babeiami etu simbelamo ai Aku anu nibabeika.’
41 Roo awetu, Naulika sira anu mbai i kabeoNa: ‘Peloso komi lako i se ei, komi anu tegane! Pesuamode komi i rara apu anu mambugi liliu, anu tepatimamamo mewali posukua Datu nu Seta ai malaekana sira. 42 Lawi i tempoKu maoro, baria Aku nipakoni. TempoKu mangkamara, baria Aku nipanginui. 43 TempoKu moliu nauda baria Aku niinsani, baria Aku nipopensopi mewali toraremi. Baria ria sampiKu, baria Aku nisampii. TempoKu madua, baria Aku nipakulii. Tongoku ratarunggu, baria Aku nitulungi.’
44 Mesono sira, raulira: ‘Pue, impia Iko kiita maoro, mangkamara, moliu i tombiki ewa tau anu baria kiinsani, ba baria Iko mesampi, madua, ba ratarunggu, baria Iko kitulungi?’