I Yesu mobakosi paa nu topeguruNa sira
13
1 Lako baria mani dongka Eo Posusa Pasa, nainsanimo ni Yesu ina dongkamo tempoNa mopalengi dunia ai mesola i TuamaNa. Napokaasi sira ope-ope tau anu meula si Ia i dunia ei, ai batena Napokaasi sira duduuna i kasopoana.2 Tempo ni Yesu ai topeguruNa sira mangkoni ni kawengi, ni tempo etu, Datu nu Seta roomo mokuasai rara ni Yudasi ana ni Simo Iskariot, bona mampobalu i Yesu i iwaliNa. 3 Nainsani ni Yesu ka Nakirakanamo nu TuamaNa ope-ope kuasa si Ia. Nainsani mbui ni Yesu kalako si Pue Alana Ia, ai kaina mesolaNa mbuimo si Pue Ala. 4 Etumo mpane mengkaroo Ia mangkoni mpane meongkomo, Nalonsu jubaNa, mpane Naala santau handu Naweweka i pekoNa. 5 Roo awetu, Naalamo ue Nabubu i loia, mepuumo Ia mobakosi paa nu topeguruNa sira, mpane Naparisi ai santau handu anu Naweweka i pekoNa etu.
6 Awetu Ia teduu si Simo Peturu, nauli ni Peturu, “Pue, mangkiada mpane Ikoda anu mobakosi paaku?”
7 Nauli ni Yesu, “Ei-ei, baria mani nuinsani apa anu Kubabei. I eo anu ina mai, lako nuinsanida.”
8 Nauli ni Peturu, “Inee, Pue! Baria sintoto ane Iko anu mobakosi paaku.”
Nauli ni Yesu, “Ane baria iko Kubakosi, baria ria kiramu anu nusumba lako si Aku.”
9 Nauli ni Simo Peturu, “Ane ewa etu Pue, inee wule paaku ngkida agaiana paleku ai wooku mbui.”
10 Nauli ni Yesu, “Tau anu roomo mendoi maningkumo sumalele wotona, bariamo paraluu rabakosi mpesola. Batena paana ngkidamo anu sangangaa rabakosi mpesola. Komi, tebakosimo komi, agaiana baria komi ope-ope anu maningkumo.” 11 I Yesu mololita ewa etu, lawi Nainsani amimo kaimana anu ina mampobalu wotoNa i iwaliNa. Etumo mpane Nauli, “Tebakosimo komi, agaiana baria komi ope-ope maningku.”
12 Awetu roomo i Yesu mobakosi paara, Napake mpesolamo jubaNa, mpane Ia momeso, Naulika sira, “Ba niinsani apa anu lako Kubabeika komi? 13 Nironde Aku Guru ai i Pue. Pololitami etu mamonso mpuu, kalawiana Guru ai i Pue Aku. 14 Mogalo Aku Puemi ai Gurumi, mobakosi Aku paami, apa mani komi sangangaa mombebakosi mpopaa mbui komi. 15 Kupopeitakamo komi pangkeniaka anu mengkaiwoi, bona nipeulai mbui babeiaKu etu.
16 Nikaendo pololitaKu ei: sadua batua baria melumbu karabilana mpane lako i tuana. Sadua suro baria melumbu karabilana mpane lako i tau anu metudu. 17 Ane niinsani ai nipeulai patudu ei, ina matono rarami.
18 Apa anu Kuuli ni mpongone, baria komi ope-ope kono. Kuinsani amimo ima anu Kupelisi. Agaiana sangangaa tepabukei apa anu teuki i rara Sura Ngkora Magali* anu manguli: ‘Sadua tau anu mangkoni simbela-mbela ai Aku, iamo anu mewali iwaliKu.’ 19 Ei Kupadongkaka ami komi lako baria mani mewali, bona ane mewali luwu, ina nipotuu Akumo Ia anu rauli RIA AKU. 20 Bona niinsani: ima anu modoko tuduaKu, simbelamo ai Aku anu nadoko. Ewa etu mbui, ima anu modoko Aku, simbelamo ai i Pue Ala anu nadoko lawi Iamo anu motudu Aku.”
I Yesu mampololita ami kaina rapobaluNa
21 Awetu roomo i Yesu mololita ewa etu, wioramo raraNa, mpane Nauli, “Bona niinsani: sadua lako i olomi ina mampobalu Aku i iwaliKu.”
22 Nakeningkawuli nu topeguruNa, mombetotokimo sira lawi baria rainsanira kaimana anu Natunggai. 23 Ria sadua topeguruNa anu napokakaia, momeso i tumbiriNa.a 24 I Simo Peturu mokindemo rangana, anu momeso i tumbiri ni Yesu etu, naulika, “Nupekune si Guru, ba ima anu Natunggai.”
25 Etumo mpane topeguruNa anu momeso i tumbiriNa etu, membalili si Yesu, mpane napekune, “Ima tauna, Pue?”
26 Nauli ni Yesu, “Ima anu Kukiraka roti anu Kueme i rara nu ue ei, iamo tauna.” Mewali Naalamo santepo roti, Naeme i rara nu panginua etu, mpane Nakiraka i Yudasi, ana ni Simo Iskariot. 27 Awetu nadoko ni Yudasi roti etu, Datu nu Seta mokuasaimo rarana. Roo awetu, naulika ia ni Yesu, “Apa anu ina nubabei, babeimode maliga.”
28 Agaiana baria mogalo sadua sira anu momeso mangkoni ni se etu, anu manginsani tunggaia ni Yesu mololita ewa etu si Yudasi. 29 TopeguruNa anu ntanina, nipenokara i Yesu motudu i Yudasi lau mobaluki apa anu raparaluu i posusara, ba mokiraka saudi doi i tau anu mesiasi, lawi i Yudasi anu mopatoro doira. 30 Awetu nadoko ni Yudasi roti etu, malambumo ia. Ni tempo etu, kawengimo.
I Yesu mokiraka topeguruNa parenta anu bou
31 Awetu malambu i Yudasi, naulimo ni Yesu, “Ei-ei Ana Manusia ina ratoia. Ai i Pue Ala ratoia mampoliungi Ia. 32 Ane i Pue Ala ratoia mampoliungi Ia, i Pue Ala mbui ina motoia Ia mampoliungi wotoNa saduduaNa, ai kasaliu natoia Ia ni Pue Ala. 33 Komi anaKu, bariamo Aku masae simbela-mbela ai komi. Ina nikadelo Aku, agaiana ewa anu roomo sira kuulika tadulako nu toYahudi, ewa etu mbui Kuulika komi: pearia anu Kukalaungi baria pensani nikalaungi.
34 Kukiraka komi parenta anu bou iamo: Mombepokaasi komi sadua ai sadua. Simbela ewa Aku mampokaasi komi, awetu mbui komi sangangaa mombepokaasi. 35 Ane mombepokaasi komi, ope-ope tau ina manginsani ka komina topeguruKu.”
I Yesu mampololita ami pesapuaka ni Peturu
36 Napekune ni Simo Peturu si Yesu, “Pue, imba Iko ina lau?”
Nauli ni Yesu, “Pearia anu Kukalaungi baria pensani nukalaungi. I eo anu ina mai, lako pensanida Aku nupeula.”
37 Nauli mbui ni Peturu, “Pue, mangkiada mpane baria aku pensani meula si Iko ei-ei? Baria aku maeka mamate nakenimpeulaku si Iko!”
38 Nauli ni Yesu, “Pebai mpuupae iko mamate nakeningka Akuna? Bona nuinsani: lako baria mani motuturua manu, tolu mbelamo Aku nusapuaka.”