I Yesu iamo dala lau si Pue Ala
14
1 Nauli ni Yesu i topeguruNa, “Inee bata-bata rarami! Mepotuumo komi si Pue Ala, ai mepotuu mbui komi si Aku. 2 Lawi i tombi nu TuamaKu, maisi pearia. Lau Aku i tombi nu TuamaKu mopatimamaka komi peariami. Baria Kuulika komi ewa etu, ane etu baria mamonso. 3 Awetu roomo Aku mopatimama peariami, ina mesola mbui Aku mai mangala komi, bona i pearia anu Kupearii, i se etu mbui komi simbela-mbela ai Aku. 4 I pearia anu Kukalaungi, niinsani dala lau i se etu.”5 Nauli ni Tomas, “Pue, baria kowo kiinsani imba pearia anu Nukalaungi. Mewali, adiwa ka kiinsanina dalana?”
6 Nauli ni Yesu, “Akumo dala bona manginsani i Pue Ala, Akumo anu manoto, ai Akumo anu mokiraka katuwu. Baria ria mogalo sadua anu pensani dongka i TuamaKu, ane baria mepotuu si Aku. 7 Ane keniinsani Aku, manoto niinsani mbui TuamaKu. Ei-ei, niinsanimo ai niitamo Ia.”
8 Nauli ni Pilipu, “Pue, tudoka kami TuamaMu, bona maosa raraki.”
9 Nauli ni Yesu, “Baria manipae Aku nuinsani, Pilipu? Masaemo kita simbela-mbela! Ima anu mangita Aku, mangitamo TuamaKu. Mewali, mangkiada mpane nuperade bona Kutudoka komi TuamaKu? 10 Baria manipae nupotuu, Aku mosintuwu ai TuamaKu, awetu mbui TuamaKu mosintuwu ai Aku. Apa anu Kuulika iko, baria Kuuli mangula peundeaKu saduduaKu, agaiana nakeningka Akuna ai TuamaKu sadua ngkida Kami, etumo mpane Kamimo anu mobago liliu. 11 Nipotuumode Aku mosintuwu ai TuamaKu, awetu mbui TuamaKu mosintuwu ai Aku. Naudapae baria nipotuu pololitaKu etu, agaiana sangangaa nipotuu i ope-ope anu niitamo Kubabei.
12 Bona niinsani: tau anu mepotuu si Aku, pensani sira mobabei ewa anu Kubabei, ba melumbuda lako i apa anu Kubabei, lawi ina lau Aku i TuamaKu. 13 Ai apa anu niperade i rara nu sangaKu, ina Kukiraka komi, bona apa anu Kubabei etu, TuamaKu ratoia. 14 Apa ngkida anu niperade i rara nu sangaKu, ina Kukiraka komi.”
I Yesu modandi kaina Nakirakana sira Inosa Magali
15 “Ane nipokaasi Aku, ina nipeulai ope-ope parentaKu. 16 Ina Kuperade i TuamaKu, ai ina Nakiraka komi sadua Topetulungi anu ntanina, bona Naporangai komi duduuna kasae-saeana. 17 Topetulungi etu, iamo Inosa ni Pue Ala anu monini komi i patudu anu mamonso. Tau anu baria mepotuu, baria sira pensani modoko Inosa ni Pue Ala, lawi baria raitara ai baria mbui rainsanira Ia. Agaiana komi, niinsanimo, lawi Naporangai komi ei-ei, ai Ia ina meari i rarami.
18 Baria komi ina Kupalengi ewa anakoi anu ilu pusa. Ina mesola mpesola Aku si komi. 19 Bariamo masae, bariamo Aku ina raita nu tau i dunia. Agaiana komi ina niita Aku, lawi tuwu Aku. Ai komi mbui ina tuwu. 20 Ni tempoKu tuwu etumo, ina niinsani posintuwuKu ai TuamaKu. Komi mosintuwu ai Aku, ai Aku mosintuwu ai komi.
21 Ima ngkida anu modoko ai mangula parentaKu, siramo anu mampokaasi Aku. TuamaKu mampokaasi tau anu mampokaasi Aku, ai Aku mbui mampokaasi ia, ai Kupatongawaaka ia wotoKu.”
22 I Yudasi (baria i Yudasi Iskariot) mekune si Yesu, “Pue, mangkiada mpane Nupatongawa wotomu si kami ngkida, baria i ope-ope tau anu i dunia?”
23 Nauli ni Yesu, “Tau anu mampokaasi Aku ai anu mangula patuduKu. Iamo anu napokaasi nu TuamaKu. TuamaKu ai Aku ina mai i tau etu, mpane meari Kami simbela-mbela ai ia. 24 Tau anu baria mampokaasi Aku, baria sira mangula patuduKu. Patudu anu niepe lako si Aku, kamonsona baria lako si Aku, agaiana lako i TuamaKuda anu motudu Aku.
25 Ope-ope ei Kuulika komi, i tempoKu mani simbela-mbela ai komi. 26 Agaiana ane dongka Topetulungi iamo Inosa Magali, anu natudu nu TuamaKu i rara nu sangaKu, Iamo anu ina mopatuduka komi sinangkana, ai Napopaingaaka komi ope-ope anu roomo Kuulika komi.
27 Kalompe nu katuwu Kupalengika komi. Kalompe nu katuwu anu lako si Aku, Kukiraka komi. Anu Kukiraka komi ei, baria ewa anu nisumba i dunia. Inee karao rarami, ai inee komi maeka. 28 Niepemo pololitaKu ni mpongone anu manguli: lau Aku, agaiana ina mesola mpesola Aku si komi. Ane nipokaasi mpuu Aku, sangangaa nipokatono mbui kalauKu i TuamaKu, lawi melumbu kuasa nu TuamaKu mpane lako Aku. 29 Ei Kuulika amimo komi lako baria mani mewali, bona ane mewali luwu, batena nipotuu.
30 Bariamo maisi tempoKu mololita ai komi, lawi ina dongkamo Datu nu Seta. Agaiana baria ria kuasana, mokuasai Aku. 31 Agaiana sinangkana ei sangangaa mewali, bona ope-ope tau ina manginsani ka Kupokaasina TuamaKu ai ka Kupeulaina liliu ope-ope anu Naparentaika Aku.
Mewali maingkomode komi, lambumo kita lako i se ei.”