I Yesu rapandiri ewa puu anggoro anu mamonso ai topeguruNa iamo daa anggoro
15
1 Nauli ni Yesu, “Aku ei rapandiri ewa puu anggoro anu mamonso, ai TuamaKumo anu mokadipuraka. 2 Ope-ope daa anu tuwu lako si Aku anu baria mowua, Natende. Ai ope-ope daa anu tuwu lako si Aku anu mowua, Napakabaa mpane Nakadipuraka, bona tetambai powuana. 3 Komi, magalimo nakenimpangepemi patudu anu Kupadongkakamo komi.4 Mosintuwu liliumo komi ai Aku, ai Aku mbui ina mosintuwu ai komi. Daa anu baria mentaka i puu anggoro baria mowua. Agaiana daa anggoro anu mentaka i puu nu anggoro batena mowua. Ewa etu mbui komi: baria komi pensani mowua ane baria komi mosintuwu liliu ai Aku.
5 Aku eimo puu anggoro, mpane komimo daana. Tau anu mosintuwu liliu ai Aku, ai Aku mosintuwu ai ia, maruminsi powuana.a Lawi ane mepogaaki komi lako si Aku, baria komi pensani mobabei ba apa ngkida. 6 Ima anu baria mosintuwu liliu ai Aku, batena ratende ewa daa, duduuna mewali bangi. Daa aretu, ragulu mpane ratende i rara nu apu. 7 Ane mosintuwu liliu komi ai Aku ai nipairara liliu pololitaKu, niperademode si Pue Ala ba apa peundeami, ai batena nakiraka komi. 8 Ane maruminsi powuami, topeguruKu mpuu komi. Etumo mpane TuamaKu ratoia. 9 Ewa TuamaKu mampokaasi Aku, Aku mbui mampokaasi komi. Etumo mpane sangangaa tuwu komi i rara nu asiKu. 10 Ane nipeulai parentaKu, ina tuwu liliu komi i rara nu asiKu, ewa Aku mampeulai parenta nu TuamaKu, mpane meari i rara nu asiNa.
11 Ope-ope ei Kuulika komi, bona katonoKu ria si komi, ai bona buke kamatonomi.
12 Eimo parentaKu: mombepokaasi komi, ewa ka Kupokaasimi. 13 Baria ria asi anu melumbu kabosena lako i asi nu sadua tau anu mosusu katuwuna mosorema simadana. 14 Komimo simadaKu ane nibabei apa anu Kusawaaka komi. 15 Bariamo komi Kuuli batua, lawi sadua batua baria manginsani apa anu nababei nu tuana. Agaiana Ei-ei, simadaku mpuu komi, lawi Kupadongkakamo komi ope-ope anu Kuepemo lako i TuamaKu. 16 Baria komi anu mampelisi Aku. Akuda anu mampelisi komi. Kutudu komi lau bona maisi powuami, iamo wua-wua anu baria pensani matonto. Etumo mpane, TuamaKu ina mokiraka komi, apa ngkida anu niperade i rara nu sangaKu. 17 Eimo parentaKu si komi: mombepokaasi komi!”
Tau anu baria mepotuu mokasisi kita
18 “Ane rakasisi komi nu tau anu baria mepotuu si Aku, nikaendomode: Akumo anu ilodo rakasisi. 19 Ane rapana, meula mani komi i tau anu baria mepotuu, batena rapokaasira komi, lawi rangara komi. Agaiana Kupelisimo komi ai Kupatanimo komi lako i olora, duduuna bariamo komi raporangara. Etumo mpane rakasisi komi. 20 Nikaendo apa anu Kuulika komi ni mpongone: sadua batua baria melumbu karabilana mpane lako i tuana. Mewali ane rapopesiasira Aku, komi mbui ina rapopesiasira. Ane ria sira tau anu mangula patuduKu, batena mampeulai mbui sira patudumi. 21 Ope-ope etu ina rababeika komi nakenimpeulami si Aku lawi baria sira manginsani i Pue Ala anu motudu Aku. 22 Ane kebaria Aku mai mopatudu sira, kebaria mbui sira madosa. Agaiana, lawi mai mpuu Aku mopatudu sira, etumo mpane bariamo ria dalara mosapuaka kamadosara 23 Tau anu mokasisi Aku, mokasisi mbui sira TuamaKu.
24 Ane kebaria Kubabei tanda kuasa anu baria mani rababei nu tau ntanina, kebaria sira madosa. Agaiana ei-ei nauda raitaramo apa anu Kubabei, batena rakasisira liliu Aku, ai TuamaKu. 25 Agaiana batena ewa etu, bona tepabukei apa anu teuki i rara Sura Aturara ai sura nu nabi-nabira, anu manguli: ‘Naudapae baria ria salaKu, rakasisi Aku.’