16
1 “Ope-ope ei Kuulika komi, bona ntena komi mosapuaka Aku. 2 Ina raliwu komi lako i tombi penombaa. Ai baria etu ngkida, agaiana sambela tempo tau sira anu mampopate komi, mangula pesumbaa pekirira, babeiara etu mampopolumako sira peundea ni Pue Ala. 3 Ope-ope etu ina rababeira si komi, lawi baria sira manginsani TuamaKu, ai Aku mbui baria Aku rainsanira. 4 Kuulika komi etu, bona ane mewali, ina nikaendo apa anu roomo komi kuulika.”Yesu mampololita pobago nu Inosa Magali
“Ope-ope patudu ei baria komi kuulika lako i mpolinguruna, lawi i se ei mani Aku simbela-mbela ai komi. 5 Agaiana ei-ei, ina lau Aku i TuamaKu anu motudu Aku mai, ai baria komi ria sadua anu mekune si Aku ba imba kalauaaKu. 6 Mapari rarami i ka niepena pololitaKu ni mpongone anu manguli kaina lauKu. 7 Agaiana kamonsona, mabose pobunduana si komi ane lau Aku! Lawi ane baria Aku lau, baria ina dongka Topetulungi. Agaiana ane lau Aku, ina Kutudu Ia mai si komi.
8 Ane dongka Topetulungi, Iamo anu ina mopakanoto i pekiri nu manusia kamadosara. Ia mbui anu ina mopakanoto i pekiri nu manusia kamanotoKu ai pesuku ni Pue Ala. 9 Ia ina mopakanoto i pekiri nu tau kamadosara, lawi baria sira mepotuu si Aku. 10 Ia ina mopakanoto i pekiri nu manusia kamanotoKu, lawi ina lau Aku i TuamaKu, ai bariamo Aku niita. 11 Mpane Ia mbui ina mopakanoto i pekiri nu tau anu manotomo kaina nasukuna ni Pue Ala tau anu madosa, lawi Datu nu Seta anu mokuasai dunia ei rapakanotomo kaina rasukuna.
12 Maisi mani anu Kupenoka Kuulika komi, agaiana ei-ei baria mani nibuku modoko ope-opena etu. 13 Ane dongka Inosa Magali, Iamo anu ina monini komi ai mampopainsanika komi ope-ope patudu anu mamonso, baria Ia mololita mangula peundeaNa saduduaNa. Apa anu Naepe lako i TuamaKu, etu anu Napololita. Mpane ina Nabambarika komi apa anu ina mewali i eo anu ina mai. 14 Ia anu ina mampopeawa Aku, lawi ina Nabambarika komi lolita anu Nadoko lako si Aku. 15 Ope-ope anu ria i TuamaKu, Aku mbui tumpuna. Etumo mpane Kuuli: apa anu nadoko nu Inosa Magali lako si Aku, etumo anu Napadongkaka komi.”
Kasusa ai katono rara
16 Nauli mbui ni Yesu, “Sampalai ngkidamo, bariamo Aku ina niita. Sampalai ngkidamo mbui, ina niita mbui Aku.”
17 Mawulimo sira topeguruNa, ai ria sira anu mombepekune, raulira, “Apa tunggaiaNa mpane Naulika kita: ‘Sampalaidamo, bariamo Aku ina niita. Sampalaidamo mbui, ina niita mbui Aku?’ Ai apa mbui tunggaiaNa mpane Nauli: ‘Lau Aku i TuamaKu?’” 18 Mombepekune liliu sira, raulira, “Mangkiada mpane Nauli liliu: ‘Sampalaidamo?’ Baria tainsani lempona.”
19 Nainsani ni Yesu karapenokara mekune si Ia. Etumo mpane Naulika sira, “Ba mampololita komi sadua ai sadua kono i apa anu Kuulika komi ni mpongone kono i: ‘Sampalaidamo, bariamo Aku ina niita. Sampalaidamo mbui, ina niita mbui Aku?’ 20 Bona niinsani: ina motumangi komi mangita apa anu ina mewali si Aku, agaiana tau anu baria mepotuu si Aku matono mpuu sira. Ina mapari rarami, agaiana kapari nu rarami etu ina tebaliki mewali katonomi. 21 Katonomi etu, ina ewa katono anu nasumba nu sadua towawine anu roo moana. Mpolinguruna mantodisa ia, agaiana ane mensuwumo anana, towawine etu bariamo mokaendo pantodisana, matonomo ia lawi mensuwumo anana i dunia. 22 Ewa etu mbui komi: ei-ei mapari rarami. Agaiana ina Kupomberumpaka mbui komi. I tempo etu, ina matono mpesola komi, ai baria ria anu pensani mandoa kamatonomi etu lako si komi.
23 Ni tempo etu, bariamo paraluu nipekune ba apa-apa si Aku. Nikaendo: apa ngkida anu niperade i TuamaKu i rara nu sangaKu, batena mpuu komi Nakiraka. 24 Duduuna ei-ei, baria mani niperade i rara sangaKu ane merade komi apa ngkida i TuamaKu. Mewali niperademode batena Nakiraka komi, bona buke mpii kamatonomi.”
I Yesu monangi kuasa anu madaa
25 “Ope-ope ei Kuulika komi ai ngkora pandiri mani. Agaiana sambela tempo, bariamo Kupake ngkora pandiri. Ina Kupololita si komi kono i TuamaKu i kanoto-notona. 26 I tempo etu, ina merade komi i TuamaKu i rara nu sangaKu. Bariamo paraluu Kuperadeka komi apa anu niparaluu i TuamaKu, 27 lawi TuamaKu saduduaNa anu mampokaasi komi. Napokaasi komi, lawi nipokaasi Aku, ai nipotuu ka Akuna anu lako si Pue Ala. 28 Aku lako i TuamaKu mai i dunia ei. Ei-ei, ina Kupalengimo dunia ei, mesola Aku lau i TuamaKu.”
29 Rauli nu topeguruNa, “Pue, ei-ei manotomo i pampekiriki, lawi bariamo Iko mopake ngkora pandiri. 30 Manoto i pampekiriki: Iko anu manginsani ope-ope. Bariamo paraluu napekune nu tau si Iko. Etumo mpane kipotuu mpuu ka Ikona lako si Pue Ala.”
31 Nauli ni Yesu, “Mewali mepotuu mpuupae komi ei-ei? 32 Nipetingai! Ina dongkamo tempona, ai kamonsona tempona dongkamo, ina melangka komi sadua-sadua lau i tombimi, ai ina nipalengi Aku. Agaiana baria Aku saduduaKu, lawi TuamaKu mamporangai Aku. 33 Ope-ope ei Kuulika komi, bona mansumba komi kalene rara lako i posintuwumi ai Aku. Tongomi mani i dunia ei, batena rapopesiasi komi. Agaiana nipakaroso rarami, lawi Kunangimo sinangka kuasa anu madaa i dunia ei.”