I Yesu mampekakaeka topeguruNa
17
1 Awetu roomo i Yesu mopadongka ope-ope etu, metirangai Ia i langi mpane mekakae, Nauli, “TuamaKu, dongkamo tempona! Popeawamode AnaMu, bona Ia mbui mampopeawa Iko Uma. 2 Nukirakamo Ia kuasa motadulakoi ope-ope tau, bona tau anu Nukiraka Ia, Kukiraka sira katuwu malompe anu baria mokasopoa. 3 Katuwu malompe anu baria mokasopoa iamo: Ane manginsani sira ka Ikona i Pue Ala anu mamonso anu baria ria karoduaMu, ai manginsani sira ka Akuna i Yesu Kerisitu anu Nutudu. 4 Uma, i rara dunia ei Kupopeitakamo sira peawa nu katuwuMu, i poparooKumo bago anu Nukiraka Aku bona Kupobago. 5 Etumo mpane Kuperade bona Nupopeawa mpesola Aku, si Iko Uma, ewa peawa anu ria si Aku simbela-mbela ai Uma lako baria mani ria dunia ei.6 Ane i tau anu Nukiraka Aku lako i dunia ei, Kupopainsanikamo sira kaimaMu Uma. KiraMu sira; Nususu sira si Aku, ai mampeulaimo sira pololitaMu. 7 Ei-ei, manginsanimo sira: sinangkana anu Nukiraka Aku, batena lako si Iko, Uma. 8 Kupadongkakamo sira ope-ope lolita anu Nupadongkaka Aku, lawi lolita etu radokoramo, rainsanira i kamonso-monsona kalako si Ikona Aku Uma. Mampotuumo sira ka Ikona anu motudu Aku.
9 Kupekakaeka sira topeulaKu aretu. Baria ope-ope tau i dunia anu Kupekakaeka. Anu Kupekakaeka, batena ngkida tau anu Nukirakamo Aku Uma, lawi siramo kiraMu. 10 Ope-ope tau anu mewali kiraKu, kiraMu mbui sira. Ai ope-ope tau anu mewali kiraMu, kiraKu mbui sira. Siramo anu mopatongawa peawa nu katuwuKu.
11 Ina laumo Aku si Iko Uma, bariamo Aku i dunia ei. Agaiana topeulaKu sira i dunia mani. O TuamaKu anu magali, Nukampaimo sira ai kuasa nu sangaMu anu Nukiraka Aku. Kadipurakamode sira bona mosintuwu sira, ewa Iko ai Aku mosintuwu. 12 Tongoku mani simbela-mbela ai sira, Akumo anu mokampai sira ai kuasa nu sangaMu anu Nukiraka Aku. Kukampai sira bona ntena ria anu matonto. Agaiana sadua anu matonto, tepakanotomo ia mansumba rugi bona tepabukei apa anu teuki i rara Sura Ngkora Magali.
13 Ei-ei, ina lau Aku si Iko Uma. Ope-ope ei Kuuli i tempoKu mani simbela-mbela ai sira i dunia ei, bona buke kamatonora anu rasumbara lako si Aku. 14 Kupadongkamo NgkoraMu si sira, ai dunia mokasisi sira, lawi baria sira lako i dunia, simbela ewa Aku baria lako i dunia. 15 Baria Kuperade bona Nuala sira topeulaKu lako i dunia ei simbela-mbela ai Aku. Agaiana pamperadeKu bona Nupawia sira lako i Datu nu Seta.a 16 Simbela ewa Aku baria Aku lako i dunia, sira mbui baria sira lako i dunia. 17 Nupelisi sira, mpane Nupopewali sira kiraMu ai NgkoraMu anu mamonso. 18 Uma, Nutudu Aku mai i dunia. Ewa etu mbui Aku motudu sira lau i tau ntanina i dunia. 19 Ai Kupakagalika sira wotoKu, bona sira mbui Nupelisi i pangulara NgkoraMu.
20 Baria wule topeguruKu aretu anu Kupekakaeka. Kupekakaeka mbui tau anu ina mepotuu si Aku lako i popadongka nu topeguruKu NgkoraMu. 21 PamperadeKu bona ope-ope sira mosintuwu. Ewa i Uma mosintuwu ai Aku, ai Aku mosintuwu ai i Uma. Kuperade bona sira mbui mosintuwu ai Kita, bona ope-ope tau ina mampotuu ka Ikona anu motudu Aku.
22 Kukirakamo sira peawa anu Nukiraka Aku, bona mosintuwu sira, ewa Kita mbui mosintuwu. 23 Aku mosintuwu ai sira, mpane Iko mosintuwu ai Aku, bona sira ina mewali mpuu sira mosintuwu. Ane ewa etu, ope-ope tau ina manginsani ka NutuduKu ai ka Nupokaasina sira tau aretu anu mepotuu si Aku. AsiMu si sira simbela ai asiMu si Aku.
24 Uma, peundeaKu bona sira anu Nukiraka Aku ina meari simbela-mbela ai Aku i peariaKu, bona mangita sira peawaKu. PeawaKu etu Nukirakamo Aku, lawi Nupokakaia Aku lako baria mani dunia ei Tateru. 25 O TuamaKu anu manoto, tau i dunia ei baria manginsani Iko. Agaiana Aku, Kuinsani Iko. Ai ope-ope tau anu mepotuu si Aku manginsani ka Ikona anu motudu Aku. 26 Kupopainsanikamo sira kaimaMu, ai batena Kupadongka liliu si sira kaimaMu, bona mampokaasi sira rangara ewa Iko mampokaasi Aku, ai bona mosintuwu sira ai Aku.”