I Yesu i lio ni Gubernur Pilatu
15
1 Madondo-dondo mpii, ope-ope topobotusi kara-kara nu toYahudi iamo kapala-kapala tadulako menomba ai totomana nu toYahudi ai guru-guru agama ai tadulako nu toYahudi anu ntanina, mogombo mpane mobotusi adiwa dalara mampopate i Yesu. Roo awetu, rasilura i Yesu mpane rakenira lau i lio ni Gubernur Pilatu. 2 Mekunemo i Pilatu si Ia, “Mamonsopae ka Ikona datu nu toYahudi?”Nasonoi ni Yesu, “Iko saduduamu anu manguli.”
3 Mampopengaa pesalai si Yesu anu rapadongka nu kapala-kapala tadulako menomba si Pilatu. 4 Etumo mpane mekune mbuimo i Pilatu si Ia, “Bariapae Nuunde mosonoi sira? Mampopengaa anu rasalaika Iko.” 5 Agaiana i Yesu baria madota mesono, etumo mpane napowuli ni Pilatu.
6 Bela-belana i Eo Posusa Pasa, i Pilatu ewa saweweina mopawia sadua tau anu ratarunggu, sintoto ai pamperade nu tau wori. 7 Ni tempo etu, ria sadua tau anu ratarunggu sangana i Baraba. Ia ai rangana ratarunggu nakenimpampopatera tau i rara nu peewara i topoparenta. 8 Mewali, moterusumo sira tau wori, raperadera si Pilatu bona mopawia sadua tau anu ratarunggu ewa anu paka nababei saweweina. 9 Napekune sira, “Adiwa, ba niunde ane kupawiaka komi datu nu toYahudi ei?” 10 I Pilatu manguli ewa etu, lawi nainsani kapala-kapala tadulako menomba mosusu i Yesu si ia, nakeningkasinara ngkida.
11 Agaiana kapala-kapala tadulako menomba mosuweki rara nu tau wori, etumo mpane nauli nu tau wori si Pilatu, “Nupawiaka kami i Baraba!”
12 Lako ni se etu, nauli mbuimo ni Pilatu i tau wori, “Ane rapana i Baraba anu kupawiaka komi, kupadiwakamo tau anu niuli datu nu toYahudi ei?”
13 Mongangamo sira tau wori, raulira, “Pakumode Ia i kau anu rapopombesape!”
14 Napekune ni Pilatu, “Kadaa apada anu Nababei?”
Agaiana monganga sira masisimbuku, “Pakumode Ia i kau anu rapopombesape!” 15 I Pilatu mampenoka mopakatono nu tau wori, etumo mpane napawiakamo sira i Baraba. Roo awetu, natudumo surudadona sira mosepe i Yesu, ai nasusuka sira bona rapaku i kau anu rapopombesape.
Surudado mampopowadi-wadi i Yesu
16 Roo awetu, surudadona sira mangkeni i Yesu lau i pobotusia kara-kara, i tombi ni gubernur. Mpane ope-ope surudado raronde moterusu. 17 Rabaduiramo i Yesu ai santau juba datu anu makamumu. Mpane, rababeiramo sambua songko lako i walaa anu modui anu ewa songko ni datu, rasongkoikara Ia. 18 Mpane, rapakoira i Yesu, raulikara, “Kibila Iko, Datu nu toYahudi!” 19 Rawombe-wombemo wooNa ai lai, mpane rawangelusi, molingkudumo sira motumpa i lioNa ewa tau anu menomba. 20 Awetu roomo Ia rapakoi, rawonsuimo juba anu makamumu anu rapakeka Ia ni mpongone, rabaduika mpesola Ia sampiNa saduduaNa. Ai lako rakenida i Yesu lau i raoa nu kota bona rapaku i kau anu rapopombesape.
I Yesu rapaku i kau anu rapopombesape
21 I tongo dala, mampomberumpaka sira sadua tau anu lako dongka, i raoa nu kota mai. Sangana i Simo toKirene, tuama ni Aleksander ai i Rupus. I Simo rapari-parira mosimbu kau popakua i Yesu. 22 Baria masae, dongkamo sira i pearia anu rasanga Golgota, lempona Bulu Bangawoo. 23 Ni se etu, i Yesu rapanginui anggoro anu ragalo ai mur,a agaiana baria Ia madota manginu. 24 Roo awetu, rapakumo i Yesu i kau anu rapopombesape, mpane sampiNa aretu, raundira bona mopakanoto sampiNa anu umbana, anu rasumbara sadua-sadua.
25 KarapakuNa i kau anu rapopombesape etu, tinti sasio madondo. 26 I kau popakua Ia etu, i wongko wooNa rapopatakai pata anu rapoukii apa anu rasalaika Ia, ewa ei: Datu nu toYahudi. 27 Ria mbui rodua toperampaki anu rapaku i kau anu rapopombesape simbela-mbela ai Ia, sadua mbai i kuanaNa ai sadua mbai i kabeoNa. [ 28 Mewali, apa anu rababei etu mopabukei apa anu teuki i rara nu Sura Ngkora Magali, anu manguli, “Rapasimbela Ia ai tau anu madaa.”]b
29 Tau anu melempo i se etu, mopakoi sira i Yesu molilika woora, raulira, “Ee! NiuliMuwo ina mogero Iko Tombi ni Pue Ala, mpane Nuwangu mpesola i rarana tolu eo? 30 Ane awetu, tulungi mpuuto wotoMu! Pendoluto lako i kau anu rapopombesape etu!”
31 Ewa etu mbui, kapala-kapala tadulako menomba ai guru-guru agama mopakoi liliu i Yesu. Mololita sira, raulira sadua ai sadua, “Tau ntanina Natulungi sira, agaiana wotoNa saduduaNa baria Nabuku Natulungi! 32 Nauli ka Iana Datu Topesorema, Datu nu toSaraeli! Ane ewa etu, ane taita mpuu Ia mendolu lako i kau popakua Ia etu, lako tapotuuda Ia!”
Tau anu rapaku i kau anu rapopombesape simbela-mbela ai Ia, mopakoi mbui Ia.
I Yesu mamate
33 Tinti sampulu dua mabaa, ungangkidamo madedi i sumalele tana etu i rarana tolu jaa. 34 Tinti tolu sindulau eo, mongangamo i Yesu masisimbuku, Nauli, “Eloi, Eloi, lama sabakhtani?” Lempona: Pue AlaKu! Pue AlaKu! Mangkiada mpane Nupalengi Aku?
35 Ria sira basangkia dua tau anu meongko gompi i popakua ni Yesu, raulira, “Petingai! Moronde Ia i nabi Elia.” 36 Mewali sadua lako si sira, melangkamo ia lau mangala lomo, naememo i rara nu ue anggoro anu mangilu, naboli i wuntu daa nu kau, mpane napakakonoka ngudu ni Yesu bona Namimisi. Mpane nauli, “Tapegia sala, tapeita ba mai mpuu i Elia mampopendolu Ia lako i kau anu rapopombesape ei!”
37 Lako ni se etu, mongangamo i Yesu masisimbuku, mpane opemo inosaNa.
38 Ni tempo etu mbui, rindi bana anu tetoe i rara nu Tombi ni Pue Ala masepa ntongo lako i wongko dongka i woi. 39 Tadulako surudado anu meongko mampombelioka kau anu rapopombesape etu, mangita adiwa kamate ni Yesu. Nauli, “Monso mpuu Ia ei Ana ni Pue Ala!”
40 Ria i se etu, basangkia dua towawine anu metotoki ngkarao. Lako i olo nu towawine aretu, ria i Maria Magdalena, i Salome ai i Maria tina ni Yakobuc ai Yoses. 41 Towawine aretu, iamo anu mangula ai motulungi i Yesu mepuu lako i tana Galilea. Ai mawori mani mbui towawine anu ntanina anu meula si Yesu, mai lako i Galilea dongka sira i Yerusale.
I Yesu rapaiwu
42 Ni tempo etu, mepuumo madedi. Ai i eo etu iamo eo pampasilolongaa, lawi ineilena iamo eo penombaa nu toYahudi.d 43 Etumo mpane, sadua tau anu rasanga i Yusupu toArimatea lau si Pilatu, ai napengkabaiki mamperade wotowata ni Yesu. I Yusupu etu, sadua lako i topobotusi kara-kara nu toYahudi anu rabila ai anu masaemo mampegia kadongkana peparenta ni Pue Ala i dunia. 44 Tingkara i Pilatu, lawi naepe i Yesu mamatemo. Etumo mpane narondemo tadulako nu surudado napampekunei ba mamonso mpuu kamateNamo. 45 Awetu naepe ni Pilatu lolita nu tadulako etu, napaliumo i Yusupu mangala wotowata ni Yesu.
46 Laumo i Yusupu mobaluki bana anu bula, mpane napopendolumo wotowata ni Yesu lako i kau anu rapopombesape, rabungkusi ia ai bana etu. Roo awetu, radampamo wotowataNa i rara nu talumba anu rakae i tabingke bulu watu, mpane naduli sambua watu rapopotuko boboka nu talumba etu. 47 I Maria Magdalena ai i Maria tina ni Yoses, mangita kaimbana wotowata ni Yesu rapaiwu.