I Yesu rakeni lau si Pilatu
27
1 Madondo-dondo, ope-ope kapala tadulako menomba ai totomana nu toYahudi, sampepekirimo sira bona mampopate i Yesu. 2 Roo awetu, rasiluramo pale ni Yesu mpane rakenira lau i lio ni Gubernur Pilatu.I Yudasi tebaliki rarana
3 Awetu i Yudasi anu mosusu i Yesu i iwaliNa, manginsani karasukuna mamate i Yesu, napenonsoi mpuu babeiana etu. Mewali, laumo ia i kapala-kapala tadulako menomba ai totomana nu toYahudi, napopesolaka sira doi pera anu tolu mpulu mpeka etu, 4 nauli, “Madosamo aku! Mampobalu Tau anu baria masala, duduuna rasuku mamate Ia!”
Rasonoira, “Apapae anu kiuli! Babeiamu mbotopae!” 5 Lako i se etu, i Yudasi motende doi etu i rara nu Tombi ni Pue Ala, mpane lau ia menoo motoe wotona. 6 Kapala-kapala tadulako menomba morompu doi etu, raulira, “Doi ei, doi ntolosi nu raa. Mangula atura agama, doi ei baria pensani rapake i Tombi ni Pue Ala.” 7 Mpane sampepekiri sira, bona doi etu rapopobalukira tana nu Topobabei Kura, ai tana etu rapotalumba nu tau anu baria sira toYahudi. 8 Etumo mpane duduuna ei-ei, tana etu rasanga Tana Raa.
9 Nakeni nu babeiara etu, tepabukeimo apa anu nauli ni nabi Yeremia, ewa ei:
“Radoara tolu mpulu mpeka doi pera etu, iamo baluki nu sadua batua anu rapakanotomo i Saraeli ni tempo etu.
10 Ai doi etu rapopobaluki tana nu topobabei kura.
Etu mewali mangula sawaa ni Pue si aku.” (Sakaria 11:12-13)
I Yesu i lio ni Pilatu
11 Roo awetu, i Yesu rakeni si Gubernur Pilatu. Mekune i Pilatu si Ia, nauli, “Ba Iko mpuumo datu nu toYahudi?”
Nasonoi ni Yesu, “Iko saduduamu anu manguli.”
12 Agaiana i karasalaiNa nu kapala-kapala tadulako menomba ai totomana nu toYahudi, baria Ia mesono. 13 Etumo mpane napekune mpesola Ia ni Pilatu, nauli, “Bariapae Nuepe ope-ope anu rasalaika Iko?” 14 Agaiana baria Ia madota mesono, etumo mpane mawuli mpuu rara ni gubernur.
Rabotusi bona i Yesu rasuku mamate mpane i Baraba rapawia
15 Pae-paena i Eo Posusa Pasa, ewa saweweina i gubernur mopawia sadua tau anu ratarunggu, sintoto ai pamperade nu tau wori. 16 Ni tempo etu, ria sadua tau anu ratarunggu anu rainsani mpuu nu tau wori kadaana, sangana i Yesu Baraba. 17 Mewali i katerusu nu tau mawori, i pearia ni Pilatu mobotusi kara-kara. Napekune sira ni Pilatu, “Ima anu niunde kupawiaka komi? I Yesu Baraba, ba i Yesu anu rauli i Kerisitu?” 18 Ewa etu pololita ni Pilatu, lawi nainsani tunggaia nu tadulako nu toYahudi anu mosusu i Yesu si ia nakeningkamasinara.
19 I tempo ni Pilatu momeso i pomesoa pobotusia kara-kara, dongkamo sadua tudua mangkeni tewai lako i towawine ni Pilatu anu manguli, “Inee nupesuaki kara-kara nu Tau anu baria masala etu! Nakeningka Iana, mpane mangipi aku anu mewulungati ni ngkunuwia.”
20 Agaiana kapala-kapala tadulako menomba ai totomana nu toYahudi mosuweki rara nu tau wori, merade si Pilatu bona i Yesu Baraba anu napawia, mpane i Yesu Kerisitu nasuku mamate!
21 Roo awetu, napekune ni Pilatu i tau wori, nauli, “Lako i rodua tau arei, ima anu niunde kupawiaka komi?”
Rasonoira, “I Yesu Baraba!”
22 Napekune mpesola ni Pilatu, “Ane awetu, kupadiwakamo i Yesu anu rauli i Kerisitu?”
Rasonoira, “Pakumode i kau anu rapopombesape!”
23 Napekune mpesola ni Pilatu, “Kadaa apada anu Nababei?”
Agaiana monganga sira masisimbuku, “Paku ngkimode i kau anu rapopombesape!”
24 Kasopoana naita ni Pilatu bariamo ria bunduna mampololitaka sira, lawi mepuumo sira maguneo. Naalamo ue memando ia i lio nu tau wori aretu, mpane nauli, “Baria kupesuaki pampopatemi Tau ei! Komi ngkida anu mamposurunga.”
25 Mesono tau wori, raulira, “Io, pogeakamode kami dongka-dongka i pemuleaki, anu mamposurunga pesuku kono i kamateNa.”
26 Lako ni se etu, napawiaka sira ni Pilatu i Yesu Baraba, mpane natudumo surudadona sira mampopesiasi i Yesu ai pesepe, mpane nasusuka sira bona rapakura i kau anu rapopombesape.
Surudado mopakoi i Yesu
27 Roo awetu, surudado ni gubernur mangkeni i Yesu lau i tombi ni gubernur, mpane moronde sira ope-ope rangara mai motoleliki Ia. 28 Rawonsuiramo sampi ni Yesu, mpane rabaduika Ia juba anu makamumu ewa juba datu. 29 Rababeiramo sambua songko lako i walaa anu modui, mpane rasongkoikara i Yesu. Rakirakara mbui Ia sambua lai anu rabolira i pale kuanaNa, mpane molingkudumo sira i lioNa mopakoi Ia, raulira, “Kibila Iko, datu nu toYahudi!” 30 Rawangelusira i Yesu, mpane raalara lai anu i paleNa rapopowombera wooNa. 31 Awetu roomo Ia rapakoira, rawonsuiramo juba anu rabaduika Ia ni mpongone, mpane rabaduikara mpesola sampiNa saduduaNa. Roo awetu, rakenimo i Yesu lau i raoa nu kota bona rapaku i kau anu rapopombesape.
I Yesu rapaku i kau anu rapopombesape
32 I tongo dala, mampomberumpaka sira sadua toKirene, sangana i Simo. Surudado nu toRoma aretu, mopari-pari i Simo mokolo kau popakua i Yesu. 33 Baria mani masae, dongkamo sira i pearia anu rasanga Golgota, lempona Bulu Bangawoo. 34 I se etu, i Yesu rapanginuira anggoro anu ragalo ai pou, agaiana Napemina ngkida baria Ia madota manginu.
35 Roo awetu, rapakumo i Yesu i kau anu rapopombesape, mpane sampiNa raundira bona mopakanoto kaimana anu mansumba. 36 Mpane, momeso sira mokampai Ia. 37 I wongko wooNa i kau popakua Ia, rapopatakai pata anu rapoukii apa anu rasalaika i Yesu ewa ei: Eimo i Yesu, Datu nu toYahudi. 38 Ria mbui rodua toperampaki anu rapaku i kau anu rapopombesape simbela-mbela ai Ia, sadua mbai i kuanaNa, sadua mbai i kabeoNa.
39 Tau anu melempo i se etu, molilika woora mopakoi i Yesu, 40 raulira, “Ee, NiuliMuwo ina mogero Iko Tombi ni Pue Ala, mpane Nuwangu mpesola i rarana tolu eo! Ane monso-monso Ana ni Pue Ala mpuu Iko, tulungimode wotoMu! Pendolumode lako i popakua Iko etu!” 41 Ewa etu mbui kapala-kapala tadulako menomba, guru-guru agama ai totomana nu toYahudi, mopakoi mbui sira i Yesu, raulira, 42 “Tau ntanina Nasorema, wotoNa saduduaNa baria Nabuku Nasorema! Mamonso mpuupae ka Iana Datu nu toSaraeli? Ane mendolu Ia lako i kau anu rapopombesape etu, lako tapotuuda Ia. 43 Nauli mepotuu Ia si Pue Ala, ai ka Iana Ana ni Pue Ala. Tapeita, ba mai mpuu i Pue Ala mopawia Ia.” 44 Ewa etu mbui toperampaki anu rapaku i kau anu rapopombesape simbela-mbela ai Ia, mopakoi mbui i Yesu.
I Yesu mamate
45 Mepuu lako tinti sampulu dua mabaa, ungangkidamo madedi i sumalele tana etu i rarana tolu jaa. 46 Tinti tolu sindulau eo, mongangamo i Yesu masisimbuku, Nauli, “Eli, Eli, lama sabakhtani”. Lempona “Pue AlaKu! Pue AlaKu! Mangkiada mpane Nupalengi Aku?”
47 Ria sira basangkia tau anu meongko gompi i popakua Ia anu mangepe etu, raulira, “Petingai! Moronde i nabi Elia Ia!” 48 Mewali ria sadua anu melangkamo lau mangala lomo, mpane naeme i rara anggoro anu mangilu, naboli i wuntu daa nu kau mpane napakakonoka ngudu ni Yesu bona Nainu. 49 Agaiana tau anu ntanina manguli, “Pegia sala, tapeita ba mai mpuu i Elia motulungi Ia.”
50 Roo awetu, monganga mbuimo i Yesu masisimbuku, mpane opemo inosaNa. 51 Ni tempo etu, rindi bana anu tetoe i rara Tombi ni Pue Ala masepa ntongo lako i wongko dongka i woi.a Kelinu anu marimbuku, ai watu-watu anu mabose maboka, 52 ai maisi talumba tebungkasi, ai mawori tau ni Pue Ala anu mamatemo rapatuwu mpesola. 53 Awetu rapatuwu mpesolamo i Yesu, mensuwumo sira lako i talumbara, mpane mesua sira i kota Yerusale, mawori tau anu mangita sira.
54 Tadulako nu surudado ai surudadona anu mokampai i Yesu, maeka mpuu sira mangepeka linu ai mangita ope-ope anu mewali etu, raulira, “Monso mpuu, Ia ei Ana ni Pue Ala!”
55 I se etu, mawori mbui towawine anu metotoki ngkarao. Sira aretu anu morora i Yesu, ai anu meula si Ia mepuu lako i tana Galilea. 56 Lako i olo nu towawine aretu iamo: i Maria Magdalena, i Maria tina ni Yakobu ai i Yusupu. Ai tina nu ana ni Sebedeus.
I Yesu rapaiwu
57 Awetu Ina malimpamo eo, maimo sadua topebuku anu lako i kota Arimatea, sangana i Yusupu. I Yusupu etu, sadua topeguru ni Yesu mbui. 58 Lau ia si Pilatu mamperade wotowata ni Yesu, mewali naposawaakamo ni Pilatu surudadona mokiraka wotowata ni Yesu si Yusupu. 59 Mpane naala wotowata ni Yesu, nabungkusi ai bana anu bula, 60 mpane napaiwu nadampa i rara nu talumba, anu kamonsona napatimama amimo ni Yusupu rapotalumbara sampoka. Talumba anu bou mani etu rakae i tabingke bulu watu. Roo awetu, nalolimo sambua watu anu mabose napopotuko boboka nu talumba etu, mpane mesolamo ia. 61 Agaiana i Maria Magdalena ai i Maria anu ntanina, momeso ngkarao sira lako i talumba etu.
Talumba ni Yesu rakampai nu surudado
62 Ewa ineilena madondo i eo penombaa nu toYahudi, kapala-kapala tadulako menomba ai toParisi lau sira si Pilatu, 63 raulira, “Tua gubernur, kikaendo lolita nu Topeakalangi etu, i tempoNa mani tuwu, Nauli: ‘Awetu liumo tolu eo, ina tuwu mpesola Aku.’ 64 Etumo mpane kiperade tua, bona nutudu sira surudadomu lau mokampai lompe talumbaNa etu, duduuna dongka i katolu eona, bona ntena sira lau topeguruNa mopanangka wotowataNa, ai ina raulira i tau wori i Yesu tuwu mpesola. Ane ewa etu, mawori tau ina rapakanawura, ai ina melumbu kaworira anu meula si Ia i tempo ei, mpane lako i tempoNa mani natuwu.”