I Yesu tuwu mpesola
28
1 Awetu liumo eo penombaa nu toYahudi, lako baria mani mensibe eo i eo Minggu, i Maria Magdalena ai i Maria anu ntanina lau mampeita talumba etu. 2 Ungangkidamo ria linu marimbuku mpii, lawi sadua malaeka ni Pue Ala mendolu lako i suruga, dongka moduli watu popetuko nu talumba, mpane momeso i wongkona. 3 Lensena mewangka ewa banibi, ai sampina mabula mpii. 4 Surudado-surudado anu mokampai i se etu, morada mpuu sira nakeningkaekara, duduuna madungka sira ai mewali sira ewa tau anu mamate.5 Nauli nu malaeka i towawine aretu, “Inee komi maeka. Kuinsani ka nikadelona i Yesu anu rapaku i kau anu rapopombesape etu. 6 Bariamo ria Ia i se ei, tuwu mpesolamo Ia ewa anu Naulikamo komi ni banimpia. Mai nipeita podampaa Ia. 7 Mewali, laumode komi maliga, niulika sira topeguruNa katuwuna mpesolamo i Yesu. Ai moilodomo Ia lau i tana Galilea. Ina niita Ia si dou. Nikaendo apa anu kuulika komi ei!”
8 Kasaliu mensuwu sira towawine aretu mopalengi talumba etu. Maeka mpuu sira, ai ria mbui katonora. Melangkamo sira lau i topeguru ni Yesu lawi rapenokara mopadongka apa anu mewali. 9 Ungangkidamo dongka i Yesu i olo nu towawine aretu, ai Natabe sira. Maimo sira gompi-gompi, mpane mokalupui paaNa mpane menomba si Ia. 10 Naulika sira ni Yesu, “Inee komi maeka! Laumode komi niulika sira poka-pokaKu bona lau sira i Galilea, ai ina raitara Aku si dou.”
Popadongka nu surudado anu mokampai talumba ni Yesu
11 Kalambu nu towawine aretu, basangkia surudado anu mokampai talumba lau sira i rara nu kota mopadongka i kapala-kapala tadulako menomba ope-ope anu mewali i talumba ni mpongone. 12 Mogombo sira kapala-kapala tadulako menomba ai totomana nu toYahudi anu ntanina. Mpane maisi doi rakirakara surudado aretu. 13 Rauli nu kapala-kapala tadulako menomba i surudado aretu, “Niulika sira tau ewa ei: ‘I tongo mbengi, topeguru ni Yesu dongka mopanangka wotowataNa tongoki leta.’ 14 Ane pololitami etu naepe ni gubernur, kamidamo anu mololita si ia bona inee komi rapopangkia.” 15 Surudado aretu modoko doi anu rakiraka sira, mpane mopadongka sira apa anu roomo rapatuduka sira. Duduuna dongka ei-ei, tebambari liliu lolita etu i toYahudi.
I Yesu motudu topeguruNa sira mobambari Bambari Malompe
16 Topeguru ni Yesu anu sampulu sadua lau sira i tana Galilea. Lau sira i bulu anu natudoka amimo sira ni Yesu. 17 I se etu, mangita mpuumo sira i Yesu, mpane menomba sira si Ia. Agaiana ria mbui anu bata-bata mani rarara. 18 Nagompilisi sira ni Yesu topeguruNa, Naulika, “Ope-ope kuasa anu i suruga ai i dunia rakirakamo Aku. 19 Mewali, laumode komi i ope-ope tau i sumalele dunia, nipopewali sira topeguruKu, niriu sira i rara sanga nu TuamaKu ai AnaNa ai Inosa Magali. 20 Mpane nipatudu sira bona mampeulai sira sinangka anu Kuposawaaka komi. Ai bona niinsani: ina Kuporangai komi dongka kasopoa dunia ei.”