Ragi nu toParisi
12
1 I nsobuna tau anu raundera mangita i Yesu, mewali mombegiu-giu sira duduuna mombelongko-longko sira. Ni tempo etu, nauli ni Yesu i topeguruNa, “Mainga-inga komi i ragi nu toParisi. Lawi mengkalompe sira i babeiara, agaiana madaa i rarara. 2 Agaiana ope-ope patuduKu anu tewuni mani ina tewungkesi. Ai ope-ope anu rawunikai mani batena ina tongawa. 3 Mewali, apa anu nipololita i tempo kawengi batena ngkida ina rainsani ane mabaamo, ai apa anu ni kukuwika rangami i rara nu tombimi anu tetuko, batena rabambari i sumalele boea.”Nipokaeka i Pue Ala
4 “Poka-pokaKu, nipetingai lompe pololitaKu: Inee komi mampokaeka tau anu mampenoka sira mampopate wotomi, lawi wule etuda anu rabukura rababeira. 5 Agaiana anu sangangaa nipokaeka iamo i Pue Ala. Lawi i Pue Ala makuasa mampopate wotomi, ai makuasa mbui motende komi i rara naraka. Monso mpuu anu Kuulika komi, Iamo anu sangangaa nipokaeka.
6 Lima mbaa dena pensani rapobalu ai rompeka doi anu saudi mpii imbana. Agaiana nauda awetu, baria ria mogalo sambaa anu baria nakadipuraka ni Pue Ala. 7 Apa mani komi. Mogaloda wuluami, nainsani ni Pue Ala kaisina. Mewali inee komi maeka. Lawi mobundu mpii mani komi, mpane dena.”
Nipangaku i Pue Yesu i lio nu tau wori
8 “Petingai lompe pololitaKu: Ima anu mopangaku peulana si Aku i lio nu tau wori, ia mbui ina napangaku nu Ana Manusia, i lio nu malaeka-malaeka ni Pue Ala. 9 Agaiana ima anu mosapuaka peulana si Aku i lio nu tau wori, ia mbui ina nasapuaka nu Ana Manusia i lio nu malaeka-malaeka ni Pue Ala.
10 Ima anu mampololita ba apa ngkida moewa Ana Manusia, pensani mani raampuni salana. Agaiana ima anu mopakoi Inosa Magali, tau etu bariamo ina raampuni.
11 Ane rakeni komi i tadulako agama ba i topoparenta bona raparesara nakenimpeulami si Aku, inee nipopari rara kaapana anu ina nipoposonoi sira. 12 Lawi i tempo etu, Inosa Magali ina mopaguru komi apa anu sangangaa niuli.”
Ngkora pandiri kono i topebuku anu madoio
13 Ria sadua tau lako i olo nu tau wori mai si Yesu, nauli, “Guru, Nuulika pokaku bona nakiraka kowo aku tiboku lako i sosora nu tomanaki.”
14 Nasonoi ni Yesu, “Poka, ima anu moongko Aku mewali topetongo-tongoimi anu mampokiraka komi sosora nu tomanami?” 15 Roo awetu, nauli ni Yesu i tau wori, “Mainga-inga komi ai malompe-lompe komi, inee komi masirokoa morompu anu-anu i dunia. Lawi nauda maisi anu-anumi, baria etu anu moparia katuwu malompe.”
16 Etumo mpane napadongka ni Yesu ngkora pandiri ei, Nauli, “Ria sadua topebuku. Ria tanana, lako i tanana etu, maisi mpii powua nu tuda-tudana. 17 Nauli nu rarana topebuku etu: ‘Apa anu sangangaa kubabei? Baria ria pambolia wua nu tuda-tudaku.’ 18 Kasopoana nasumba akala, nauli: ‘Aginamo tambaru anu kokoi ei kubaliki, mpane kuwangu anu mabose, bona i se etu kuboli ope-ope ganduku ai anu-anuku. 19 Roo awetu, bariamo paraluu aku mobago, lawi maisimo pamboliku, sondomo kupake basangkia mpae. I tempo etu, ina mangkoni ai manginu aku, i rara katono-tono!’
20 Agaiana naulikada ia ni Pue Ala: ‘Ee todoio! Kawengi ei mbui, ina mamate iko. Mewali, ope-ope anu nugulu etu, imamo luwu tumpuna?’”
21 Awetu roomo i Yesu mopadongka ngkora pandiri etu, Nauli, “Ewa etumo karugi nu tau anu mampenoka morompu kapebukuna saduduana i dunia, agaiana baria ia pebuku i petotoki ni Pue Ala.”
Inee karao raramu
22 Nauli ni Yesu i topeguruNa, “Etumo mpane Kuulika komi: Inee karao rarami kono i katuwumi ai niuli, ‘Apamo anu ina takoni ai apamo anu ina taposampi?’ 23 Lawi katuwumi melumbu mani lako i pangkoni ai pesampi. 24 Nipeita sira tosi kaloa. Baria sira mowia, baria sira mepae, baria ria tambarura. Nauda awetu, i Pue Ala batena mopakoni sira. Apa mani komi. I petotoki ni Pue Ala, katuwumi melumbu mani, mpane lako i tosi sira. 25 Apamo pobunduana karao rarami? Naudapae karao rarami mampekiri mampopengaa, baria komi pensani motambai tinuwumi nauda wule saudi ngkida. 26 Mewali, ane baria nibuku mobabei anu kokoi etu, mangkiada mpane karao rarami mampekiri mampopengaa? 27 Peita bunga anu tuwu i tongo nu pada. Baria sira mobago, ai baria sira mandau. Agaiana Kuulika komi, mogaloda i Datu Salomo anu pebuku mpii, sampina baria simbela peraena ai bunga aretu. 28 Mewali, ane i Pue Ala mampoperae owo i pada anu tuwu i eo ei mpane rasuwe ineilena, apa mani komi! Melumbu mani pekadipuraka ni Pue Ala si komi. Mewali, mangkiada mpane baria nipotuu pekadipurakaNa etu? 29 Mewali, inee karao rarami ba niuli: ‘Apamo anu ina takoni ai tainu?’ 30 Ope-ope etu rapepekiri liliu nu tau anu baria manginsani i Pue Ala. Molentano Tuamami anu i suruga manginsani asa apa anu niparaluu. 31 Mewali, sangangaa nipailodo peparenta ni Pue Ala i rara katuwumi, ai sinangka anu niparaluu batena Nakiraka komi.”
Anu-anu i suruga
32 “Nauda baria komi mawori, inee komi maeka, komi anu meula si Aku. Lawi lako i kabula nu rara ni Pue Ala Tuamami, mampelisi komi mansumba katuwu anu malompe i rara peparentaaNa. 33 Etumo mpane Kuuli, nipobalumo anu-anumi, mpane balukina nikiraka sira tau anu mesiasi katuwura. Lawi ane nibabei awetu, niboli anu-anumi i rara nu pundi anu baria pensani masepa, lempona, niboli i rara nu suruga. Anu-anumi etu baria ina matonto, lawi baria pensani rapanangka ai baria pensani nakoni nu kabubu. 34 Nibolimo anu-anumi i rara nu suruga, lawi imba-imba kariaana anu-anumi, i se etu liliu pampekirimi.”
Sadua batua anu mainga-inga
35-36 Roo awetu, napadongka ni Yesu ngkora pandiri ei, Nauli, “Sangangaa mainga-inga liliu komi ai sangangaa masilolonga mpuu komi, ewa batua anu mampegia tuara mesola lako i posusa pebua. Batua aretu, masilolonga liliu sira mobago, ai sulora tuwu liliu. Ane dongkamo tuara motangkudodoo boboka, kasaliu rabungkasira. 37 Morasi sira batua anu mainga-inga ai mampegia duduuna dongka tuara. Nipotuumode tuara etu ina timama mobago morora batuana. Mewali, napopomeso sira nu tuara, ai narora sira. 38 Morasi mpuu sira batua anu mampegia ai masilolonga i kadongka nu tuara, nauda i tongo mbengi ba liumo lako ni se etu.
39 Agaiana bona niinsani: ane rapana nainsani ami nu tumpu tombi, katinti sangkiana dongka topanangka, batena nakampai tombina, bona topanangka etu baria pensani mesua i tombina. 40 Etumo mpane sangangaa mainga-inga komi, lawi baria niinsani impia kadongka nu Ana Manusia.”
Ngkora pandiri kono i batua anu matundu ai anu baria matundu
41 Napekune ni Peturu si Yesu, “Pue, ima anu Nutunggai i rara ngkora pandiri etu, ba kami ngkida ba i ope-ope tau wori ei?”
42 Nasonoi ni Yesu, “Nipairara ngkora pandiri ei: ria sadua batua anu matundu ai matopa. Naongko ia nu tuana motadulakoi batua ntanina sira bona mourusi pangkonira. 43 Morasi mpuu katuwu nu batua etu, ane i pesola nu tuana, nasumba tongona mampopolumako bagona. 44 Batua etu batena ina naongko nu tuana mokadipuraka ope-ope anu-anuna. 45 Agaiana adiwa ane batua etu manguli i rarana: ‘Baria ina polo dongka tuaku’, mpane napepuumo morurugii sira singka batuana, malompe towawine malompe tomoane. Mangkoni ai manginu liliu ia duduuna malangu-langu. 46 Agaiana, ina dongka tuana i eo ai i jaa anu baria nainsani. Batua etu ina narurugii duduuna mamate ai napasimbela ai tau anu baria matundu.
47 Sadua batua anu manginsani peundea nu tuana, agaiana baria mainga-inga ai baria nababei peundea nu tuana, batua etu maruminsi kararurugiina. 48 Agaiana ane ria sadua batua anu baria kowo manginsani peundea nu tuana ai mobabei ia anu masala, baria maruminsi kararurugiina. Lawi ima anu rakiraka maisi, maisi mbui anu ina raperade lako si ia, ai ane maisi anu napotuuka nu sadua tau, maisi mbui anu ina rapeula lako si ia.”
Nakeningka i Yesuna tetambaimo posisala nu tau
49 “KamaiKu ei ewa apu anu ina mopakamampu dunia ei. Malompe mpuu ane apu etu tuwumo. 50 Agaiana ria mani kapari anu sangangaa morumpa Aku. Masusa raraKu lako baria mani kapari etu mewali. 51 Inee nisarumaka kamaiKu i dunia ei ina mopasintuwu tau. Baria! Agaiana kamaiKu ei ina mampopobungka tau. 52 Mepuu ei-ei, tau santombi ina mosisala sira. Pandirina, ane ria lima i rarana santombi, ina mosisala sira lawi anu tolu dua meula si Aku, agaiana anu rodua baria. 53 Tuamana ai anana tomoane mombeewa sira, tinana ai anana towawine mombeewa sira. Pomaniana towawine ai maniana towawine mombeewa sira.”
Nipekatandai apa anu ina mewali
54 Nauli mbuimo ni Yesu i tau wori, “Ane niitamo gawu mbai i kalimpaa eo, niuli ina keuda, mewali keuda mpuu. 55 Ane mewui pambui lako mbai monsau mai, niuli eo ina makere i eo etu, ai batena mewali awetu. 56 Komi tau anu mengkalompe! Niinsani mampekatandai tanda i langi ai i dunia, agaiana baria niinsani mampekatandai apa anu nababei ni Pue Ala i tempo ei.”
Mosintuwu ai iwali
57 “Mangkiada komi ei, mpane baria nipakanoto apa anu mamonso? 58 Lawi ane rapana, ria sadua tau anu mampenoka mosalai iko i lio nu topoparenta, sangangaa nupari-pari mombesingkalompe i tempomi mani i tongo nu dala. Lawi ane baria iko mombesingkalompe ai ia, ina nakeni mpuu iko lau i topobotusi kara-kara, mpane topobotusi etu ina mosusu iko i pulisi, ai pulisi ina mopasua iko i rara nu tarunggu. 59 Potuumode anu Kuulika komi: Baria iko ina tepawia lako i rara nu tarunggu, ane baria mani nupapiri dendamu.”