ToParisi mokambaroka i Yesu lawi topeguruNa mobago i eo penombaa
12
1 Sambela tempo, i eo penombaa nu toYahudi, i Yesu ai topeguruNa moliu sira i sambua bonde. Tongora moliu i bonde etu, topeguruNa sira mopupu wua nu gandu, ranukura ai rakonira lawi maoro sira. 2 Ria sira toParisi anu mangita apa anu rababeira. ToParisi aretu mangulika i Yesu, “Peita topeguruMu! Moliungi sira atura agamata, mobago sira i eo penombaa!”3 Mesono i Yesu, “Bariapae nibasa apa anu nababei ni Datu Daudi, i tempona ia ai rangana maoro? 4 Mesua ia i rara Bambaru Penombaa, mpane mangkoni roti anu rapopenomba si Pue Ala etu. Mangula Atura ni Musa, tadulako menomba ngkida anu pensani mangkoni roti etu. 5 Niinsani mbui apa anu teuki i rara Atura ni Musa: Tadulako menomba i rara Tombi ni Pue Ala, moliungi sira atura agama i eo penombaa, agaiana baria sira rasalai. 6 Mewali Kuulika komi, ria i se ei anu melumbu kuasaNa, mpane lako i Tombi ni Pue Ala. 7-8 Lawi Ana Manusia, ria kuasaNa mopakanoto apa anu pensani rababei i eo penombaa.
I rara nu Sura Ngkora Magali, i Pue Ala manguli ewa ei:
‘Baria binata anu Kuunde nipopenomba si Aku.
Anu Kuunde, bona maasi komi i singka manusiami.’ (Hosea 6:6)
Mewali, ane rapana niinsani lempona lolita ei, kebaria sira nisuku tau anu baria sira masala.”
I Yesu mopakaosa tau i eo penombaa
9 Lambumo i Yesu lako i se etu, lau i tombi penombaa nu toYahudi. 10 I se etu, ria sadua tau anu mawara palena sambali. Basangkia tau mampetandaka i Yesu bona rasumba kamasalaNa, etumo mpane mekune sira si Yesu, raulira, “Guru, ba pensani kita mopakaosa tau madua i eo penombaa?”
11 Nasonoi ni Yesu, “Ane rapana ria dimbami sambaa, mpane dimba etu manawu i rara kalolu nu tana i eo penombaa. Ba nipogeaka ngkida i rara kalolu nu tana? Ba nisore, nauda i eo penombaa? 12 Apa mani manusia anu melumbu katuwuna mpane dimba. Mewali ane ewa etu, pensani kita mobabei anu malompe i tau ntanina i eo penombaa.” 13 Roo awetu, i Yesu mangulika tau anu mawara palena etu, “Ona palemu!” Naona mpuumo palena, kasaliu maosa, ai maroso mpesola ewa palena anu sambali. 14 Mewali lambumo toParisi aretu lako i tombi penombaa, mpane mangkadelo sira dala mampopate i Yesu.
I Yesu tudua ni Pue Ala
15 Nainsani ni Yesu kariana tunggaia nu toParisi aretu anu madaa si Ia. Etumo mpane malambu i Yesu lako i kota etu, ai mawori tau meula si Ia. Mpane, mopakaosa Ia ope-ope tau anu madua, 16 agaiana naombo mpii sira ni Yesu, bona inee raulira i tau ntanina kaimana Ia. 17 Ai tepabukeimo Ngkora ni Pue Ala anu napadongka ni nabi Yesaya ni banimpia, anu manguli ewa ei:
18 “Eimo tuduaKu anu Kupelisi,
anu Kupokakaia, ai anu mopakatono raraKu.
Ina Kukiraka Ia InosaKu.
Ina mopadongka Ia kanotona pobotusiKu kara-kara nu ope-ope tau anu baria toYahudi.
19 Baria Ia ina mombesese, baria Ia ina monganga-nganga,
ai baria Ia ina mololita masisimbuku i penga-penga dala anu mabose.
20 Pimpi anu malutemo baria ina Napapulo Natepoki,
ai sulo anu mewao-waodamo pewangkana baria ina Napopate.a
Ina mobago liliu Ia duduuna kanoto ni Pue Ala tongawa.
21 Ope-ope tau i sumalele dunia ina mesarumaka si Ia.” (Yesaya 42:1-4)
ToParisi mosalai i Yesu raulikara kuasaNa lako i Datu nu Seta
22 Lako i se etu, ria sadua tau anu mabilo ai baria pensani mololita rakeni si Yesu, lawi napesuangi nu seta. I Yesu mopakaosa ia, mpane meita ai pensanimo ia mololita. 23 Mawuli rara nu tau sira anu mangita etu, duduuna mombepekune sira, raulira, “Ba Ia eimo Datu Topesorema pemulea ni Datu Daudi anu radandi ni banimpia?” 24 Awetu raepe nu toParisi lolita nu tau aretu, raulira, “KuasaNa etu lako si Beelsebul, datu nu ope-ope seta. Etumo mpane pensani Ia mampopeloso seta.”
25 Agaiana nainsani ni Yesu apa anu ria i rarara. Etumo mpane Naulika sira, “Ane ria sambua kadatua, ai tau wori i rara nu kadatua etu mogaa-gaa liliu sira ai mombeewa, kadatua etu ina magero. Ai ane tau samboea ba tau santina mogaa-gaa liliu sira, baria ina sintuwu boea ba potina etu. 26 Ewa etu mbui i kadatua nu seta. Ane Datu nu Seta mampopeloso singka setana, lempona seta moewa singka setana, kadatua nu seta etu ina magero. 27 Niuli mampopeloso Aku seta ai kuasa lako si Beelsebul datu nu ope-ope seta. Mewali ane awetu, kuasa apa anu rapake nu topeulami aretu mampopeloso seta? Lako i babeia nu topeulami aretu, tongawamo kabariana mamonso peraimi etu. 28 PampopelosoKu seta ai kuasa Inosa ni Pue Ala, etumo anu mopakanoto kadongkanamo peparenta ni Pue Ala i olomi.
29 Ane mesua kita i rara tombi nu tau anu maroso ai mampenoka kita morampaki isi nu tombina, sangangaa tasilu nsalaa tumpu tombi etu, lako pensanida kita mandoa anu-anuna mpane takeni.
30 Ima anu baria simbela-mbela ai Aku, iamo iwaliKu. Ima anu baria motulungi Aku mangkeni tau mewali tau ni Pue Ala, iamo anu mangkeni tau karao lako si Pue Ala. 31-32 Mewali, bona niinsani: Ope-ope dosa pensani raampuni, mogaloda mopakoi ai meewa i Ana Manusia, pensani mani raampuni. Ngkalina ngkida dosa anu baria pensani raampuni iamo mopakoi Inosa Magali, malompe tempo ei-ei, malompe i dunia bou luwu.”
33 Nauli mbui ni Yesu i toParisi, “Ane kau anu malompe, malompe mbui wuana. Ane kau anu baria malompe, baria mbui malompe wuana. Mewali, kalompe ai kabariana malompe kau, tainsani lako i wuana. 34 Komi tau anu madaa! Baria mpuu komi pensani mampololita lolita anu malompe nakeningkadaa nu rarami. Lawi apa anu ria i rarata, etu mbui anu mensuwu i nguduta. 35 Tau anu malompe, batera mampololita apa anu malompe, lawi rarara buke kalompe. Tau anu madaa, batera mampololita apa anu madaa, lawi rarara buke kadaa. 36 Mewali, bona niinsani: I eo pobotusi kasopoa dunia, ope-ope tau ina rabotusi kara-karara mangula pololitara anu baria mobundu. 37 Lawi lako i pololitamu saduduamu, ina rabotusi kamasalamu ba kamanotomu.”
ToParisi merade bona i Yesu mobabei tanda kuasa
38 Roo awetu, basangkia guru agama ai toParisi mangulika i Yesu, “Guru, kipenoka mangita Iko mobabei tanda kuasa.”
39 Nauli ni Yesu, “Komi anu tuwu ei-ei, madaa mpii komi! Baria komi matundu si Pue Ala. Mamperade komi tanda kuasa, agaiana baria ria tanda kuasa ntanina anu ina rapopeitaka komi. Ngkalina ngkida tanda kuasa ewa anu mewali si nabi Yunu ni banimpia. 40 Ewa i nabi Yunu tolu eo tolu mbengi i rara nu tai bau anu mabose, ewa etu mbui Ana Manusia ina tolu eo tolu mbengi i rara nu talumba. 41 I eo pobotusi kasopoa dunia, tumpu kota Niniwe ina meongko simbela-mbela ai komi anu tuwu ei-ei, ai sira ina motudoka komi salami, lawi menonsomo sira lako i dosara i pampetingaira lolita ni nabi Yunu. Agaiana ei-ei riamo i olomi anu melumbu kabose nu katuwuNa mpane lako i nabi Yunu, ai baria nipotuu pololitaNa. 42 Ewa etu mbui i eo pobotusi kasopoa dunia, datu towawine lako mbai monsau ina rapatuwu mpesola simbela-mbela ai komi anu tuwu ei-ei, ai ia ina motudoka komi salami. Lawi datu towawine etu dongka lako i tanana anu karao mampenoka mampetingai pepatudu ni Datu Salomo anu matopa. Agaiana riamo i olomi anu melumbu kabose nu katuwuNa lako i Salomo, ai baria nipotuu pololitaNa.”
Ngkora pandiri kono i sadua seta anu mesola mpesola
43 “Ane seta mopalengi sadua tau, seta etu molulumako wilau wimai, mangkadelo ia pearia napengkaroongi sampalai, agaiana baria ria nasumba. 44 Etumo mpane nauli: ‘Ina mesola aku i tombi anu kupearii ni banimpia iamo tau anu kupalengimo.’ Mesolamo ia lau i tau anu napalengi etu, naita tau etu ewa tombi anu tekadipuraka agaiana baria ria anu mampearii. 45 Mewali, lau ia moronde pitu singka setana anu melumbu kadaara mpane lako ia. Laumo sira mesua i tau anu napalengimo, mpane mearimo sira i se etu. Kasopoana, tetambaimo kapari nu katuwuna tau etu lako i mpolinguruna. Ewa etumo pewalina i tau anu madaa i tempo ei.”b
Tau anu mobabei peundea ni Pue Ala iamo tina ai poka ni Yesu
46 Tongona mani i Yesu mololita ai tau wori, dongkamo tinaNa ai pokaNa. Meongko sira i raoa nu tombi mampenoka mololita ai Ia. 47 Sadua tau anu lako i olo nu tau wori etu mangulika i Yesu, “Guru, tinaMu ai pokaMu ria sira i raoa mampenoka mampomberumpaka i Guru.”