Markus 3

I Yesu mopakaosa tau i eo penombaa

1 Sambela tempo, mesua mbuimo i Yesu i rara nu tombi penombaa nu toYahudi. Ni se etu, ria sadua tau anu mawara palena sambali. 2 Ria mbui sira toParisi i se etu anu mangkadelo kamasala ni Yesu, ba mopakaosa Ia tau i eo penombaara. Etumo mpane mampeita mpuu sira apa anu ina nababei ni Yesu, lawi rapenokara mosalai Ia. 3 Nauli ni Yesu i tau anu mawara palena sambali, “Mai iko meongko i se ei i lio.” 4 Roo awetu, nauli ni Yesu i toParisi, “Mangula atura agamata, apa anu pensani tababei i eo penombaa: Mobabei anu malompe ba anu madaa? Motulungi kita tau ba mampopate tau?” Agaiana toParisi aretu, baria sira madota mosonoi, mandii-ndii ngkida sira. 5 Membalilimo i Yesu mototoki sira. Marumpu ai mapari raraNa lawi makoo mpuu rarara. Etumo mpane Naulika tau anu mawara palena sambali etu, “Ona palemu!” Naona mpuumo palena ai kasaliu maosa ia. 6 Lambumo sira toParisi lako i tombi penombaa, lau sira mogulu ai tau ni Datu Herode. Mangkadelo sira dala bona mampopate i Yesu.

Tau wori i wiwi rano

7 I Yesu ai topeguruNa mangoka lako i se etu, lau i wiwi rano Galilea. Mawori toGalilea meula si Ia. Mawori mbui anu mai lako i tana Yudea, 8 lako i Yerusale, lako i tana Idumea, lako i sambuteka ue Yarade, ai ria mbui lako i kota Tirus ai Sidon. Mawori mpii tau anu mai si Yesu lawi mangepe sira ope-ope anu Nababei. 9 Nakeningkaworina tau, etumo mpane i Pue Yesu motudu topeguruNa mopasilolongaka Ia duanga, lawi Napekiri bona ntena Ia rapii-pii nu tau wori aretu. 10 Mawori tau Napakaosa, etumo mpane ope-ope tau madua momberiri mopari-pari mogompilisi Ia, bona pensani sira mampetui Ia. 11 Mai mbui sira tau anu nakuasai nu seta. Awetu raitara i Yesu, kasaliu molingkudu sira i lioNa, mpane seta aretu monganga-nganga sira, raulira, “Ikomo Ana ni Pue Ala!” 12 Agaiana naombo mpii sira ni Yesu, bona inee raulira kaimana Ia.

I Yesu mampelisi topeguruNa anu sampulu rodua

(Mat. 10:1-4; Luk. 6:12-16)

13 Roo awetu, mempanaimo i Yesu lau i pearia anu momungku-mungku. Naronde sira tau anu Napenoka bona meula sira si Ia. Mewali dongka mpuumo sira si Ia. 14 Mpane Napakanoto sampulu rodua lako i olora mewali suroNa, Naulika sira, “Kupelisi komi bona niporangai Aku. Ina Kutudu komi lau mopadongka Bambari Malompe lako si Pue Ala, 15 ai ina Kukiraka komi kuasa mampopeloso seta.” 16-19 Eimo sangara anu sampulu rodua aretu:

I Simo (anu rauli mbui i Peturu),

i Yakobu ai i Yohane ana ni Sebedeus (sira aretu nasanga ni Yesu Boanerges -- lempona: ana gumpata^a),

i Andaria,

i Pilipu,

i Bartolomeus,

i Matiu,

i Tomas,

i Yakobu ana ni Alfeus,

i Tadeus,

i Simo toSelot,

ai i Yudasi Iskariot anu ina mampobalu i Yesu.

I Yesu ai i Beelsebul

(Mat. 12:22-32; Luk. 11:14-23)

20 Roo awetu, i Yesu mesola lau i tombi peariana. Agaiana batena mawori tau mai motoleliki Ia, duduuna Ia ai topeguruNa mogaloda mangkoni baria sira mampaka. 21 Ni tempo etu, ria tau anu mangulika i Yesu, “Magilamo Ia.” Mewali awetu naepe nu pokaNa, laumo sira pokaNa mangala Ia.

22 I se etu, ria mbui sira guru agama toYahudi anu dongka lako i Yerusale. Rauli nu guru agama aretu, “Nakuasai Ia ni Beelsebul datu nu ope-ope seta. Datu nu Seta etumo anu mokiraka Ia kuasa mampopeloso seta.”

23 Etumo mpane naronde sira ni Yesu mai si Ia, bona Napadongka si sira basangkia mpangkana ngkora pandiri, Nauli, “Pensanipae Datu nu Seta mampopeloso wotona saduduana? 24 Ane ria sambua kadatua, ai tau wori i rara nu kadatua etu mosisala liliu sira, kadatua etu ina magero. 25 Ane tau santina mobungka-bungka liliu sira baria ina sintuwu, tau santina etu batena masawu sira. 26 Ewa etu mbui i kadatua nu seta: ane Datu nu Seta mampopeloso singka setana, lempona seta moewa singka setana, duduuna magero kadatua nu seta etu.

27 Ane mesua kita i rara tombi nu tau anu maroso ai mampenoka kita morampaki isi nu tombina, sangangaa tasilu nsalaa tumpu tombi etu, lako pensanida kita mandoa mpane mangkeni anu-anuna.

28 Mewali, bona niinsani: Ane tau mobabei dosa ai mesalai, pensani mani ia raampuni. 29 Agaiana ima anu mosalai Inosa Magali, baria ria karaampunina. Babeia etu ina rasalai duduuna i kasae-saeana.” 30 I Yesu manguli ewa etu, lawi ria tau anu manguli nakuasai nu seta Ia.

Tina ni Yesu ai poka-pokaNa

(Mat. 12:46-50; Luk. 8:19-21)

31 Lako ni se etu, dongkamo sira tina ai poka ni Yesu meongko i raoa nu tombi. Motudu sira tau lau moronde i Yesu, lawi rapenokara mampololitaka Ia. 32 Ni tempo etu, mawori tau motoleliki i Yesu, raulikara, “Guru, tinaMu ai pokaMu, ria sira i raoa, rapenokara mampomberumpaka i Guru.”

33 Napekune ni Yesu, “Ima tinaKu? Ima pokaKu?” 34 Roo awetu, i Yesu mototoki tau sira anu motoleliki Ia, Nauli, “Sira eimo tinaKu ai pokaKu! 35 Lawi ima-ima anu mobabei peundea ni Pue Ala, siramo pokaKu ai tinaKu.”